Pago Pago - AMERIKA SAMOA

FA’AMATUU ISI ALAMANUIA PEPA MEA’AI LONA LUA - PE-EPT

Ua fa’alauiloa tufatufaga lona lua o Pepa Talafua ai mea’ai a le matagaluega o Alagamanuia mo Tagata Lautele a le tatou malo, ina ua talileleia mai le talosaga sa fa’aulu atu i le Matagaluega o Fa’ato’aga a le Malo tele USDA Food & Nutrition Services.

O le ala o lenei fesoasoani, ona o fanau ua misia nei ona fagaina i latou aoga o loo a’o’oga ai i le tausaga aoga 2021-2022 ona o le fa’asa o lo’o fa’amamaluina nei i le tatou Malo o Amerika Samoa lea ua pesia i le fa’ama’i Covid-19.

O le aofai o le tufatufaga lea o le a faia nei e $8.8miliona lona aotelega  mo le fagaina o le aofai e 14,000 le fanau a’oga i le teritori, mai ia Fepuari 22 se’ia oo ia Iuni 10, 2022.

O le tauaofai mo le tamaititi e to’atasi i le aso e $8.28 mo le umi ua fa’amauina mo le tolu o ana ‘aiga ua fa’amauina, malu o le taeao, aiga o le aoauli ma le aiga fa’avai’aiga.

O le tufaina mai nei alamanuia  pepa e talafua ai oloa tau mea’ai mo le fanau i aso ua atofaina mai, ma o i latou sa talosaga muamua ma maua lea fa’amanuiaga muamua e le toe tau talosaga mai. O talosaga uma lava e fa’atumu atu i luga o laina feso’oita’i tafailagi.

Ua faailoa mai o le tufatufaga lea mo le fanau a’oga, o le a fa’aaogaina mai e le matagaluega fa’amaumauga a le matagaluega o A’oga, i aoga o lo’o a’o’oga ai lau fanau. Ua na’o matua lava o lo’o fa’amauina suafa i fa’amaumauga a le fanau a’oga o le a mafai ona talosagaina lenei alamanuia.

E le o toe mamao ona fa’auia mai e lea e le Matagaluega o Alamanuia mo Tagata Lautele le latou faiga o le a fa’aulu atu ai talosaga mo lenei alamanuia mo fanau a’oga. O isi fa’amaumauga uma e pei o le vaitaimi tonu e fa’aulu atu ai talosaga, le umi e aoga ai nei pepa ‘ai ma faleoloa o le a mafai ona tala ai nei oloa tau mea’ai. E ao fo’i ina matua manino lelei lava le tuatusi i fa’amaumauga mo talosaga fa’aulu mo lea alamanuia.

O le auai o lau tamaititi i aoga, fa’atasi ai ma faia’oga o le a taua tele lea i fa’amaumauga a le DOE ina ia mautinoa ai lona maua o lea alamanuia. Ae maise o le auai i vasega o lea aso ma lea aso, e faamaumau uma mai lea e lona faia’oga ma ana galuega ua mae’a fa’aulu atu mo ona togi i le fa’ai’uga o lenei tausaga aoga.

Ua fa’afetaia lava fo’i e Kovana Lemanu Mauga le pasia lelei mai e le Pule o le USDA FNS o lenei talosaga mai le tatou Malo, Cindy Long ma Jesus Mendoza aua ana le talia maia e i nei pule o nei polokalama le alamanuia lenei, ua le mafai fo’i ona fa’ao’o atu se fesoasoani i aiga mo le tausiga lelei o fanau a’o feagai ai ma a’oa’oga mai tua i aiga.

SASAO COVID-19 I LE ATUNUU UA 1,932 MATI 21

O le fa’aiuga o faamaumauga i le aotelega o e ua fa’amaonia le i ai o le Verusi Covid-19 i o latou tino, ua tula’i mai i le 1,932 ia Mati 21, 2022 o le aso Gafua na te’a nei.

O le aofai o suega na fa’amaonia ona maua i le Covid-19 i lea lava aso e 367 i latou, ma ua maua ai loa lea aotelega 1,932.

Ua fa’amauina fo’i e lua sui na taofia i le aso Gafua lava, o e na o ane mo talavai i le ER ma ua iloga mai ua tatau ona taofia i latou mo togafitiga ma le puipuigamalu a le vasega o foma’i fa’apitoa i le falema’i Covid-19 i le LBJ Medical Center.

O se isi tala fiafia ua fa’ailoa mai ai, ua faamauina nei le to’a 242 o i latou sa mua’i fa’amaonia suega o le Covid-19, ua toe mama mai lea fa’ama’i pipisi.

ISI AUMALAGA FESOASOANI E 50 FOMA’I, TAUSIMA’I & BIOTECHS

Ua fa’ailoa mai e le o toe mamao fo’i ae fa’ato’ai mai le isi aumalaga e fesoasoani mai i le tatou Falema’i LBJ Medical Center e ala i Foma’i, Tausima’i fa’apea ma nisi e faigaluega fa’apitoa i togafitiga e fa’aaogaina ai masini ma lo latou fa’aaogaina ia sa’o lelei ma aoga mo e fa’agasegasea. O i latou nei e to’a 50 i latou, ma ua fa’ailoa mai e le ta’ita’ifono o le Komiti Fa’afoe o le Covid-19, “O se fesoasoani tele lea ua mafai ona maua e le tatou falema’i, ma e fa’afetaia le to’ai taunuu mai o lenei aufaigaluega mo i tatou i le taimi lava fo’i ua sili ona mana’omia ai.”

Ua fa’ailoa mai i le lipoti a le alii foma’i Dr. Ledua, “O lo’o fa’aauau pea lava ona taumafai ona fetuuna’i solo taimi tiute o le aufaigaluega o lo’o totoe pea lava ona o nisi ua fa’amaonia i suega ua maua i le Covid-19. Peita’i o le aumalaga lea ua fotua’i mai o se fesoasoani ua sili ona taua mo le atunuu i lenei vaitau ua sofa’ia ai i tatou e le Covid-19.”

O lo ua tatalia nei o le aumalaga lenei e fa’ato’ai mai i se aso o lenei vaiaso. E ese mai lea aumalaga ua mae’a i ai i le atunuu ma galulue ai nisi o le isi aumalaga e to’a 11 o foma’i, tausima’i ma technicians fo’i mai le FEMA. Ua mae’a galulue nei i latou i le tatou falema’i tele i Faga’alu ona ua si’isi’i pea i luga le aofai o tagata o le atunuu ua maua i le fa’ama’i Coronavirus. Ua fa’ailoa mai o lo ua o mai i latou ma sapalai mai le isi vaega o le aufaigaluega a le Feterale o lo’o faigaluega fo’i i Palau.

Ua fa’amaonia mai fo’i i le lipoti a le ta’ita’i o le aumalaga a le FEMA, Allison Pfaedler, ua maaga mai i latou ma ituaiga suega fou lea e faia lava e le tagata mai lona aiga e 27,000 mo le Covid-19 i le aso Toona’i o le vaiaso ua te’a.

O se lipoti mai le aumalaga o le va’alele mai Hawaii ia Mati 31, 2022 o le a fa’anofoesea i latou i le taimi lava e to’ai taunuu mai ai i fanua le latou malaga. O i latou suega Covid-19 muamua lava e faia, afai e fa’amaonia se tasi ua kilia e le o i ai se verusi o le Covid-19, e tatala e alu i lona aiga, ae o nisi o le a fa’amaonia suega o lo’o ua i ai le verusi, e fa’anofoesea pea seia kilia mai le fa’ama’i.

O le tele o fa’amaumauga mo le fa’ama’i ma galuega tima’i fa’apea ma le faiga o tuiga ma fa’amaumauga uma lava e mafai ona maua mai le Uepesite poo le Itulau fa’asalalau Tafa’ilagi a le Matagaluega o le Soifua Maloloina i Amerika Samoa, peita’i ua matauina o lo’o tuai lava ona tuuina i luga fa’amaumauga o aso ta’itasi.

Ua ta’i tolu i le lua aso atoatoa o fa’amaumauga e le o maua ai i lenei sootaga, peita’i e fa’amoemoe i ai le tele o lipoti e ao ina fa’ailoa atu i le lautele, ma e tatau fo’i ona silasila i ai le atunuu ina ia fa’ailoa atu ia i latou fa’aiuga tonu o lo’o maua mai i togafitiga, aofai o e ua a’afia i le atunuu i lea aso ma lea aso.

Ua iloga ua fa’afaigaluega le to’atele o nisi sui mo lea faiva, ae le o fa’ataunuuina atoatoa galuega a nisi, ae maise pe afai ua tuai i le ta’ilua ma le tolu aso. 

“O se tasi lea o ala e mafai ai ona feseta’i fa’aiuga ma fa’amaumauga e mafai ona tuuina atu mai le ‘au fa’asalalau i le atunuu, ma e tatau fo’i ona silafia mai e le Komiti Fa’afoe o le Covid-19 lea ituaiga lape i fa’amaumauga fa’asalalau.” O se tala mai le sui o le Le Lali na ua taumafai e fa’afesoota’i laina a le DOH mo le sailiga o fa’amaumauga tonu.