MA'I MUMU TUTUPA - AFAINA TELE ONA O LE FA'ATALALE O TAGATA

O le toe vaisao lenei o le taumafaiga malosi ina ia matua fa'atama'ia ma le lepetia le Ma'i Mumu Tutupa mai le tatou atunu'u atoa. O le ala lea o le fa'asalafa o le fa'asalalauga lenei, ina ia alofagia e matua uma, ia inumia fuala'au a le fanau iti se'ia o'o i talavou, lea e fa'amoemoe ia te oe le sainia o lona pepa e fa'ataga ai ona inu fuala'au o le Mumu Tutupa.

Ua fa'alauiloa atili mai, "O le mafuaga tonu lava e le mafai ai ona tineia a'ia'i lenei Ma'i Mumu Tutupa mai le tele o atunu'u o le teropika po'o malo uma nei e aofia i le li'o o atunu'u taumafanafana, e aofia ai Samoa atoa ma isi malo uma i le vasa pasefika, ona o le Fa'atamala lava!"

Aua le toe fa'atamala mai Matua, aua ua iloga nei le mataga o foliga o lenei gasegase, ma e i'u ina maua ai lou alo ma ola ai o ia i se olaga maasiasi ma le le fiafia e pei o isi fanau uma.

Ua fa'afetaia lava i le mamalu o le atunu'u ma le latou talisapaia o lenei fa'asalalauga faifaipea, aua e ala ina mautu i o tatou loto uma, le tatou sao i le soifua fiafia o lou alo i le lumana'i, pe a o'o ina mou atu i tatou mai le mafutaga i lenei lalolagi.

O lea fo'i gasegase ua mafai lava ona tineia a'ia'i pe a inumia sa'o fuala'au ua fa'atulaga mo le togafitiga mautu o le maua ai i siama o le Mumu Tutupa i lou tino. Utagia mai lenei lapata'iga aoga, ina ia folau saogalemu Amerika Samoa ma ana pa'aga tuaoi mai le a'afiaga mataga o le Mumu Tutupa.

I le taimi nei, e le o maua mai lava ni fa'amaumauga ua a'afia se soifua o se tasi ona o fuala'au fa'atulaga nei o le Mumu Tutupa, o lea ua atili ai ona tausailia uma i tatou ina ia inumia fuala'au o le mumu ma e mafai fo'i ona fa'afeso'ota'i mai telefoni nei: 770-1576 po'o le 633-5871, pe afai e le'i inumia fuala'au a lou alo, ae o lo'o naunau lou loto ina ia fa'ainumia fuala'au a si ou aiga, e faia lava so'otaga ma o'o atu sui iloga o le matagaluega o le soifua Maloloina e tautuaina lou aiga.

FA'AMALOSIA & FA'ALELEIA ALA FESO'OTA'I TAUTUA PISINISI & TAGATA

Ua mae'a fesuia'i foe o le taumafaiga ina ia fa'aleleia atili pisinisi e tautuaina le atunu’u ona o se sao lea o le Asosi a Aufaipisinisi i Amerika Samoa (American Samoa Chamber of Commerce).

I le latou fonotaga faapitoa ma nisi o sui o le malo e faufautua e tusa o Pisinisi ma lo latou sao i le atunu'u ma le Malo, sa mafai ona fa'ailoa ai lea sao i le fonotaga a lea Asosi a Aufaipisinisi e le susuga Paul Young, o se tasi e faufautua i le kovana. O ia fo’i sa avea ta’ita’ifono o le komiti fa’afoe a le Asosi.

"Ia fa'amalosia lava so'otaga o tautua ma le Malo, ae maise ma le mamalu lautele. O se taumafaiga lea ua toe fa'aleleia atili nei.” Na molimau le tama'ita'i o Luisa Kuaea e tusa ai o le taumafaiga lea i Guam, ma sa ia fa'apea ai, "E tatau lava ona matua galulue pisinisi ina ia faamalosi ma talitonu, e tele lona sao i le malo ma ona tagata e ala i lana tautua. Ia mautu so'otaga ma le Malo, ma ia galue malosi e fa'aleleia ala o lana tautua.”

I Kuaea o le sui taitai fono o le komiti fa’afoe a le Asosi.

O lea fonotaga a le Asosi i le vaiaso ua te’a sa auai Keniseli Lafaele Fa'atonu o le DOC, Rep Sam Meleisea, ma Young. I lea lava fonotaga sa aofia ai se vaega fa’apitoa o “fesili ma tali” ma o nisi o mataupu e aofia ai lafoga totogi, tupe maua, ma tulaga o fesoasoani.

"O le tele o le aufaipisinisi e fefefe i le tele o so'otaga ma Ofisa o Lafoga, peita'i, e ao ina tatou iloa lelei, e mafai ona fesoasoani atu le Ofisa o Lafoga ia te outou pe afai o le a maua so outou avanoa lelei e malamalama ai i le faiga o nei ituaiga o pepa e fa'atutumu ma ala e mafai ona totogia ai a'o itiiti na pili totogi e pisinisi."

O le fautuaga lea i le aufai pisinisi i le taimi o le fonotaga mai sui o le malo ae maise se saunoaga a le Kuaea.

FAIGATA LE GAGANA SAMOA I FANAU - ONA O FA'AILOGA I FA'ALEOGA O UPU

I se tala mai Samoa tuaoi i le Talamua Online, ua fa’ailoa ai e se tasi o faia'oga o le Gagana Samoa ma o le sui fo'i o le Komisi mo le Gagana Samoa, Rev. Ma'auga Motu, sa ia fa'ailoa ai, "O le to'atele o le fanau o lo'o a'oa'oina i le Gagana Samoa, ae maise i le faitau lelei i le gagana, ua latou fa'ailoa mai, ‘Ua faigata ia i matou le gagana Samoa ona o le tele o mau fa'ailoga e ao ina usita'ia pe afai o le a tautala ma fa'aleo upu fa'asamoa’.”

Ua i ai nei le talosaga mai le fanau i le Komisi ina ia tapena se "Fa'asino Upu Lomifefiloi mo le fa'amoemoe."

Ua fautuaina e i latou ina ia fa'avasega upu o lo'o ua mana'omia ona faitauina e tusa o fa'ailoga eseese nei, ma ia fa'alanu ia upu i le lomiga o lea Tusi Lomifefiloi.

O lona fo'i lea lagona e tusa o le le fiafia ai o fanau e faitau ma tautatala ai i le gagana, ona o le taumafaiga ia fa'aleo sa'o le upu fa'asamoa e tusa o fa'ailoga nei.

"O le fa'aiuga o na mea uma, pe afai e te va'ai atu i upu o le gagaa Samoa, ua auleaga lava, ma ua le fiafia oe e taumafai e fa'aleo ma tautala ai,” o sana tala lea e tusa o lena fa'aletonu.

Saunoa le sui pule o le Iunivesite o Samoa Fui Professor Asofou So’o, "O lea Tusi Lomifefiloi o le a taumafai e tu'ufaatasia nei o le a fa'aaogaina tatau e le vasega o failauga talavou o aiga i totonu o le atunu'u atoa, aua o i latou nei ua fai fuafua aga'i i ai lea galuega lelei."

O le tama'ita'i Ofisa Sinia o le Ministry of Education, Sports & Culture, Dr. Karoline Afamasaga Fuata'i ua ia naunau fo'i i lea Lomifefiloi, aua ua iloga le fa'afitauli lea i le vasega o tupulaga talavou, ua o'o lava fo'i i tagata matutua, ua le naunau ina ia fa'aleo upu e tusa o fa'ailoga, ae ua taumafai lava e fa'aleo i le fa'aleoga sa masani ona fa'alogo ai, o fa'aaoga e nisi.

"E moni lelei, e aofia loa ma fa'ailoga ise upu Samoa, ua tau le iloa tautala e fa'aleo na upu, ae sili ai ona fa'aaoga lava na'o le sipelaina ia sa'o lelei, ona fa'aleo lea e le tagata i le fa'aleoga mai le faia'oga. O le poloketi fo'i ua fa'atula'ia, e sapaia lelei ma o le mea mautinoa, o le a to'atele i latou e fa'aaogaina mo le aga'i atu i luma o a'oa'oga o le Gagana Samoa,” p se tala lea a Dr Fuata'i.