Pago Pago - AMERIKA SAMOA

FA’ATAUTAIA PEA LE “VAIASO MO TAUSIMA’I UMA I LE TERITORI”: ME 6-12

Ua amata tapena le Asosi a Tamaita’i & Alii Tausima’i le latou polokalama o le a fa’amanatuina ai le latou vaiaso fa’apitoa lea e amatalia ia Me 06, se’ia oo i le aso 12, o lenei lava tausaga. Ua fa’ailoa mai i luga o le uepesite a le falema’i tele i Faga’alu, “E le misia ona fa’ailogaina lenei vaiaso i le tausaga nei, o le a fa’atautaia se polokalama ae o le a fa’aitiitia ona o a’afiaga o le Covid-19 o lutia ai le atunuu, ma ua atili ai ona mo’omia tele le auaunaga a le vasega o tausima’i uma i le tatou atunuu.”

O le polokalama o le a fa’atautaia ua manatu le taita’iga o le Asosi a tausima’i i le atunuu, o le a mafuli lea e fa’ailoa aloa’ia atu le galulue malosi o sui totino uma o le Asosi a Tausima’i i lenei vaitau o lo’o vevesi ma pisi tele i latou e fa’ataunuu o latou tiute ina ia le so’ona pipisi ma a’afia le mamalu o le atunuu i le covid-19.

“O le a taualoa le tautua a tausima’i uma ua iloga ona naunau ma fa’atino tiute uma e mo’omia ona faia e i latou aua le auaunaga mo le atunuu atoa, ae maise i latou o lo ua pesia ma toe taumafai e togafitia ona o le Covid-19.”

O se lomiga mulimuli mai o le a fa’asalalau aloa’ia ai lenei polokalama fa’ataoto mo le fa’ailogaina o le vaiaso o tausimai i le atunuu. Peita’i o le taimi nei, ua tatou va’aia ma fa’amaonia le moomia tele ona lava ma totoe o tatou Tausima’i Pasi i le atunuu ina ia mautinoa ua fa’ataunuu tiute uma e latou te fesoasoani ai i le tausiga o gasegase, fa’atautaia o talavai, ma le tali atu i se tauslga lelei atoatoa a’o fa’ataotolia gasegase uma o so’o se ituaiga i le tatou maota gasegase. 

Ua vala’au faalaua’itele mai le fa’auluuluga o le Sosaiete a Tausima’i i le atunuu ina ia auau fa’atasi uma RNs, Nurse Practitioners, LPNs ma isi e oo lava i Nurse Aides ina ia latou fa’amanatu ma fa’ataua fa’atasi le latou fo’i Auaunaga i le atunuu e afua mai ia Me 06, se’ia oo ia Me 12.

“Ia manatua o le tatou auaunaga e ofoina atu ma le agaga o le alofa ma le fa’amaoni i tagata uma, e le fa’ailogaina la tatou auaunaga, ae tatau ona fa’atino o tatou tiute ma le mata’u lava ina ne’i maumau le soifua ua tu’ulima ia i tatou e fa’afailele ma toe tau fa’aolaola. Ua mautinoa e le laulelei uma aso i le faiva, ae o aso sousou ma le pisi tele toe sili le mana’omia ai o la tatou auaunaga, o aso patino ia e iloga ai lo tatou agaga i o tatou faiva fa’atino,” o se tima’iga lea a le tamaitai fa’atonu o Tausima’i uma - Simamao Tuatoo.

2 AUMALAGA MAI HAWAII ASO 28 APERILA FAAMONIA COVID-19

Fa’ailoa e le Matagaluega a le Soifua Maoloina, e to’alua sui na malaga mai i le Aso Tofi talu ai, na fa’amaonia i o latou tui na faia i le malaeva’alele i Tafuna, o lo’o malaga mai ma le verusi o le Covid-19.

O i latou o le pasese na le maua ai le verusi o le Covid-19 ua tu’u i latou e malaga sa’o i o latou aiga, ina ua mae’a ona sainia le latou maliliega ma le DOH e nofo va’ava’aia mo le 7 aso. E faia fo’i latou suega o le Covid-19 e lua a’o le’i toe faaumaina le latou nofo va’ava’aia.

O se isi mea fou ua fa’atulaga nei malaga ta’itasi i le vaiaso e afua atu i le vaiaso nei ma aga’i atu i le lumana’i ona o le fa’atulagaga fou ua fa’atautaia nei ona o le fa’atalosaga a le ta’ita’i o le tatou Malo ma le Komiti Fa’afoe o le Covid-19 a le taotu Malo, aua ua iloga le mo’omia mo femalaga’iga i fafo i le vaitau o le tu’aga umi o a’oga i lenei tausaga.

Ua suia nei le fa’atulagaga sa i ai e ta’ilua vaiaso ma faatautaia mai malaga nei mai Honolulu Hawaii.

AUDREY SEVA’AETASI - TULAGA MUAMUA TAUVAGA N.E.A

Ua fa’afetaia le taumafaiga a le tamaitai fa’aiuaso mai le a’oga maualuga a Samoana 2022, ina ua maua e ia le tulaga togisilia i le tauvaga solo a le National Endowment of the Arts [NEA].

Ua mautu nei le maua e le tamaitai o Audrey Seva’aetasi o le fa’ailoga togisilia i le tauvaga solo “Poetry Ourselves” o se tauvaga solo e tatau ona e fa’aleoina a latou lava solo na tusia  ina ia fa’afofogaina e le vasega o fa’amasino o lea tauvaga.

Na fa’aaogaina fo’i le ala o feso’ota’iga tafa’ilagi YouTube e fa’aleoina ai lana taumafaiga lenei ua tumati’e.

Ua lua ala e mafai ai ona e tauva i le tauvaga solo lea, e mafai ona fa’aulu lau solo ua tusia e oe lava ae le fa’aleoina, pe ua mafai fo’i ona e fa’aleoina lau solo na tusia. O le fa’amasino na lautogia e fa’afofogaina ma faitauina solo nei o Poet Chen Chen.

O solo uma na tusia ma fa’aulu toe fa’aleo, lea ua togisilia ai nei Audrewy Seva’aetasi. Ina ua fa’afofogaina fo’i le solo a le tamaitai, ina ua ia fa’aleoina i ala o fesota’iga tau tfa’ilagi ua atoa ai tino o le tama i lana fa’atinoga.

Ua aofia nei le tamaitai o Audrey Sevaaetasi i le tuufa’atasiga o sui e to’a 9 o i latou ua togisilia mai vaega e 9 o le tauvaga lava lenei, ina ia toe tauva mo se tasi e timati’e lana taumafaiga ma manumalo ai i le tinoitupe e $20,000. 

Le atunuu e, ia alofagia e sii a’e i talosaga le taumafaiga a lea alo o le atunuu, aua o faiva lava e tapua’ia e manuia lea, ae sili ai pe a fa’amanuia lava i ai le Atua.

O le fa’amalo e ao ina tuuina atu i lea alo o le atunuu ona o le taumafai ua a’e manumalo i lea fo’i la’asaga o le tauvaga. Afai e fia maimoaina le taumafaiga a Audrey e maua lea i le upega tafailagi https://www.youtube.com/watch?v=OwDxLStRCZM

MALO POLOKETI A LIUALEVAIOSINA LE’IATO I LE NATIONAL SPACE SYMPOSIUM

Ua fa’ailoa mai ua tumati’e nei fo’i le fa’aaliga na tapena e le tamaitai o Liualevaiosina Chloe Leiato mai Tafuna HIgh School i lana poloketi na fa’aulu  i le National Science Symposium.

“Pe afai ae aoga lenei taumafaiga e una’ia ai se tasi o tamaiti e fiafia e fa’atino ni a latou poloketi fa’apenei i le STEM, o se mea sili lava lena e afua mai lenei taumafaiga,” o se tala lea a Liualevaiosina.

O le poloketi fa’atino a le tamaitai o le toe fa’aolaolaina lelei lea o Amu o  A’au o le tatou teritori. O auala e mafai ai ona toe fa’aleleia le ola laulelei o amu ma e fa’aleleia atili ai fo’i male olaola lelei o A’au lea e mautu i ai ma ofaga i ai meaola uma i le gataifale.

O le galuega fa’atino lea a Liualeva’aosina sa tulaga lua i le tauvaga a le Pacific Symposium for Science i Hawaii peita’i o lea ua toe soloa’i atu lana galuega fa’atino ma fa’amauina le tulaga tolu i le tauvaga lona 60 a le Iunaite Setete atoa o Amerika, lea sa fa’atauva ai isi sui uma mai isi setete ma teritori o Amerika. 

O le vaega sa tauva ai le tamaitai o Le’iato o le “LIfe Science Category”.