Pago Pago - AMERIKA SAMOA

FOA’I VASEGA COHORT #35 - AUFAIGALUEGA LBJ MEDICAL CENTER

I vaiaso totogi taitasi talu mai le masina o Aperila, ua fa’atautaia ai pea e le vasega faau’u o le Polokalama COHORT a le ASDOE ma le UH Manoa, e ala i tausami mama mo le aufaigaluega a le LBJ Medical Center ae maise i latou uma e faigaluega i le tuga o le po, ae mo’omia fo’i se fa’amalositino a’o fa’amalolosi e galulue e tautuaina le mamalu o le atunuu ua fa’agasegasea.

“O le faiga o nei foa’i, ua auaua’i mai lava sui o le matou vasega ina ia fa’ataunuu i le ta’i lua vaiaso ma faia le foa’i i le aso Faraile mulimuli o vaiaso totogi. O le fa’amoemoe ia fa’amama avega i le aufaigaluega galulue a le falema’i i taimi o lo’o fa’atino ai tiute, ina ia mautu le malosi o le tino, aua faiva o feagai ai. Ae maise lava o i latou e tiute po aua e le toe mafai on o i falea’iga ma ni faleoloa ua tapunia e aumai ai se mea’ai.” O se tala lea a se tasi o le vasega, Henipira o se tasi o le laulautofi o le vasega fa’aiuaso Cohort #35.

Ua iloga le agalelei o lea vasega, ma ua matauina fo’i e le Pulega o le Falema’i lea agalelei, ma ua latou saunia ai se tusi fa’ailoa e tamau ai lea galuega alofa ua faia pea lava e lenei vasega, a’o nofo saunia fo’i mo le latou fa’au’uga i lenei afa tausaga o le a mae’a.

O le faaupuga o lea tusi ua fa’ailoa atu ai i le Iunivesite o Hawaii, Matagaluega o A’oa’oga mo Faia’oga, le taua ma le talia leleia o le foa’i o lo’o fa’atino pea e le COHORt #35, ua le fa’atasi ae o lo’o fa’aauau pea lava talu mai le amataga o Aperila.

O sui e to’afa ua suia nei le vasega fa’au’u Cohort i lenei foa’i i le aso Faraile, Me13, na aofia ai Celeste Galea’i-Annandale, Athena Faumuina-Logoai,  Wilmamina Leafa ma Henipira Taumalatou Faumuina.

O le susuga fo’i le CEO o le Falema’i Moefa’auo William Emmsley sa ia taliaina ma le agaga fa’afetai tele lenei foa’i, ma ua ia faliu fo’i e taua’ao aloa’ia atu le tusi fa’alauiloa ma e fa’amau ai le agalelei ma le galuega alofa o lo’o fa’ataunuuina pea lava e le vasega o faia’oga o lo’o a’otauina mo fa’ailoga maualuluga i le polokalama fa’atautai lua a le UH ma le ASDOE.

O le tamaitai faia’oga o Henipira Faumuina sa ia taliaina lea tusi fa’ailo ma le fiafia tele. O le tusi lea e fa’auia sa’o alva i le Iunivesite o Hawaii Manoa College of Education ina ia taualoa le galuega alofa lea ua fa’ao’o pea e le vasega fa’au’u lenei.

Ua avea i latou nei e to’afa e fai ma sui o le fa’auluuluga o le Polokalama Cohort i le pulega a le UH Manoa fa’apea fo’i le Pulega a le ASDOE i le tatou malo nei. O le isi lea vaega o le a’oa’oga ina ia mafai ona talia aiai i latou e pasi a latou aoaoga ma mataupu uma ua a’otauina ai mo fa’ailoga maualuluga, ia gafatia ona latou fa’atinoa se galuega e agaga ma aoga i le atunuu lautele poo se vaega o le tautua lautele i Amerika Samoa.

“O le vaega lea o le polokalama mo faia’oga, ina ia gafatia ona latou aoao le fanau i mataupu uma fa’aonaponei, ae maise ia latou maua le agaga alofa ina ia fa’atino ai tautua e gafatia e i latou mo le atunuu lautele poo se vaega fo’i o le atunuu o nonofo ma alaala ai,” O se fa’amatalaga lea a Faumuina.

FA’APUPULA TUFATUFAGA O MEA’AI FANAU A’OGA - SUI O LE SLP

Ua savalia le tolu o vaiaso talu ona a’ae auaua’i a’oga ae ua fa’alogoina fo’i fa’asea a Matua i le tau sailiga o mea taumafa a le fanau. Afai fo’i ua maua le nofoaga, ae o nisi ua fa’ailoa mai ua uma meaai ae le’i taina le 11:00 lea e fa’amuta ai le tufatufaga mo le malutaeao ma le ‘aiga o le aoauli a le fanau o loo i tua i aiga i aso ta’itasi. 

Ona o lea fa’aletonu ma le le mautinoa pe mautonu o matua, o lea ua toe fesiligia ai le susuga Floyd Scanlon o le Polokalama o Meaai a le Fanau A’oga i le sa’o o tufatufa ai mea’ai a le fanau.

Ua fa’ailoa mai e eseese le faiga. “O nuu ua mamao ma valavala nofoaga o aiga lea e i ai fanau a’oga, ua fa’amoemoe tele lea tufatufaga i alii pulenuu ma latou leoleo fesoasoani i tua i afio’aga, latou te o ane i le nofoaga o fa’ao’o atu i ai e le SLP le mea’ai, ona o lea o i latou e kiliva i aiga, poo le nofoaga fo’i e mafai ona oo faigofie ane i ai matua e avatu ai mea’ai a le fanau o i tua i aiga i aso ta’itasi o le vaiaso.”

“O a’oga tulaga muamua ma a’oga maualuluga o lo’o vavalalata fale i falea’oga, e pei o Nuuuli ma e a’o’oga fanau i le Manulele Tausala, e tasi lava le afio’aga lea, ma ua fa’atulaga mai sa’o le nofoaga e o atu i ai matua ma ave’esea mai mea tausami a le fanau e tusa o le lisi o fanau o nonofo i aiga ma fa’atautaia mai ai a’oa’oga i upega tafa’ilagi.”

“Peita’i, afai lava e le’i mautinoa se matua poo fea e aga’i i ai mo le tufatufaga o mea’ai a le fanau, e mafai ona vili i le Ofisa o le School Lunch Program a le Matagaluega o A’oga, ma fesiligia le latou sui fa’apitoa ua atofa e talia lea fesili, mo le fa’asinomaga tonu o nofoaga o tufatufa ai mea tausami a le fanau,” o le fa’apupulaga lea a Scanlon.

Manatua e eseese le fa’atautaiga o faia ai tufatufaga o mea’ai, o lo’o talanoa mai fo’i Scanlon e tusa o le fa’asoa i le itu i sisifo, lea e fai si valavala o nofoaga o aiga ma le faleaoga o le fanau, ma ua faamau fa’ailoga ai se nofoaga tonu e fa’asoa mai ai, ma ua tufatufaina lea e Pulenuu ma latou Leoleo Fesoasoani i tua i afio’aga mea taumafa nei mo fanau.

O le afio’aga o Leone e tasi lava le nofoaga o lo’o ua mae’a tapena tausami a le fanau ma fa’ao’o i ai o le Hall tele a le Katoliko lea e tufatufaina ai mea’ai uma mo fanau i le afio’aga o Leone atoa, i a’oga uma o i ai.

O le fa’afetai ona ua mafai fo’i ona fa’apupula mai lea atugaluga o feagai ma matua, ma ua maua fo’i le vaifofo o le fa’aletonu lea, ia vala’au mo le ala o tufatufa ai tausami a le fanau i lou aafioaga ma le a’oga o a’o’oga i ai tou alo i aso ta’itasi o le vaiaso.

I AI FALEAIGA UA TATALA MO ‘AIGA I TOTONU

Ua fale’aiga ua mafai ona alaalata’i a latou tagata tautuina ma tausasami i totonu. Ua mae’a taua’aoina lea fa’atagaga e le Matagaluega o le Soifua Maloloina, ma ua mafai ai ona maua lea avanoa lelei mo le tautuina o latou ‘aiga i totonu o latou fale’aiga. O lona uiga ua mafai ona oka mea tausami ma ave i aiga, pe alaalata’i fo’i ma tausamia latou ‘aiga i totonu o le fale’aiga.

Ua fa’ailoa mai e pulega o nei fale’aiga, “Sa mua’i faia le latou fuafuaga fa’ataoto o ala o le a latou fa’atinoa ai le latou auaunaga masani lea, ma ua fa’auia atu i le Komiti Fa’afoe o le Covid-19 mo le latou iloiloga ma pasia lelei mai ai.”

“Na faia lea galuega a le matou pulega a’o le’i oo mai ina tu’umamaina nisi o aiaiga tamau o le fa’asa e pei ona i ai nei. O lea la ua tuumamaina mai ae ua fetaui lava fo’i ma le talosaga na fa’auia, o se fiafiaga ua mafai ona tatala lea avanoa ina ia tautuaina le atunuu e pei ona masani ai. Ae o le agaga lava ia usita’ia tulafono uma o le Covid-19 e ala i le nonofo fa’avava, le aofai o tagata i totonu o le fale’aiga ma le faia lava o pupuni fofoga ma ia fa’amama lava le nofoaga ma lima fo’i o tagata uma a’o le’i tausasami pe ulufale mai fo’i i totonu.”