l1,000+ PAUNA KUKAMA FOA'I MO LE LBJ MEDICAL CENTER

O le ali'i faipisinisi o Pyo Hakyeol lea e ona le Faleoloa o le Family Mart i Nuuuli ma le Aiga Mart i Pago Pago, ua ia foa'ia le 1,000+ pauna o Kukama i le falema'i o le LBJ i Fagaalu e fa'aaogaina mo mea taumafa a le mamalu lautele o le atunu'u o lo'o taofia ai, atoa fo'i ma le fale'aiga o lo'o gaosia mea'ai ma fa'atau i le lautele mo se seleni fa'aopoopo a le falema'i.

Fa’ailoa mai e Hakyeol, "Ona ua le mafai ona taliaina uma e le Polokalama o Mea'ai a le Fanau Aoga lea tele o le Kukama, o lea ua faia ai lea fa'aiuga, ina ia fa'aaogaina le ma'eleaga o le aufaigaluega ina ia toto ma fa'afailele le Kukama e fiafia i le polokalama lea, atoa ai ma le fa'atau atu i faleoloa e lua ua ou faia nei. Peita'i e tuai ma e le lava le alumia o le kukama e tumau ai lona lelei pe afai e na'o na ta'atia i le faleoloa se'ia piki e se tasi. E tatau lava ona fa'aaoga le Kukama ae o lo'o lelei atoatoa mo le tausami."

Ua ma’ea foi ona foa’i kukama i le Hope House ma le toese i Tafuna.

O le tama'ita'i o Ianeta Ah Ping, le o lo'o avea ma sui e fa'avasegaina 'aiga tatau mo tagata uma o gasegase i le falema'i, fa'atasi ai ma lana aufaigaluega sa latou fa'afetaia le to'ai taunu'u fa'afuase'i atu o lea foa'i taua.

"Fa'afetai tele Pyo i lou alofa, e ui ina o lea ua e foa'ia ona ua le toe mafai ona taofia le fua o le eleele e ao ina fa'aaoga, ae o nisi lava o Faioloa e sili ai lo latou fa'atau atu i le tau maulalo nai lo le foa'i fa'apea e aunoa ma se totogi. Fa'afetai tele ia fa'amanuia le Atua i lau pisinisi, ia toe fa'atumu mea ua fa'agaogaoina ona o lenei foai taua,” o se tala lea a le tama'ita'i o Felanua'i Felise o le Supavaisa i lea itu o le falema'i.

Ua fa'ailoa fo'i e le ali'i Kuka o Ku'a Mauaigoa, ina ua fesiligia i se taimi atoa e mafai ai ona fa'aaogaina lea tele o le kukama ae ua ia fa'ailoa ai, "O le sapalai lea e mafai lava ona fa'aaoga i le vaiaso atoa mo mea tausami a gasegase o lo'o ua fa'ataotolia i le falema'i fa'atasi ai ma le fale'aiga."

FA'ATUPEGA A LE BOYS & GIRLS CLUB MAI LE ASDHS

Ua fa'ailoa mai e le Boys & Girls Club o Amerika Samoa (BGCAS) ua agava'a i latou mo le fa'atupega a le Matagaluega o le Homeland Security (ASDHS) lea e taua'aoina mo fa'alapotopotoga ma Sosaiete e le fa'atula'ia mo ni polofiti (non-profit organization).

O lea fa'atupega ia agaga lava i le tulaga saogalemu o le fanau i totonu o le latou nofoaga autu, ma e ao fo'i ona fa'aaogaina lea vaega tupe ua taua'aoina $100,000. mo le fa'amoemoe, e fa'aleleia atili ai le puipuiga o le latou Lotoa atoa ma fale o fa'atautaia ai le Boys & Girls Club i Tafuna.

O le susuga le Fa'atonu o le ASDHS, Samana Ve'ave'a sa ia fa'alauiloa maia lea manuia fa'aletupe ua aga atu mo le Boys & Girls Club. E toina sa'o mai lea vaega tupe mai le ASDHS Non Profit Security Grant Program.

O lea vaega tupe atoa lava e ao ina fa'aalu i le fausia o se pa e siomia ai le lotoa a le BGCAS, toe fa'apipi'ia fo'i ma ni masini pu'eata e mafai ona fa'atutu i tulaga saogalemu.

Ua fa'ailoa mai fo'i e lea lava matagaluega o le malo, o lea fo'i se isi tautua e mafai ona talosaga mai i ai nisi o fa'alapotopotoga e le o fa'atuina e maua ai ni tupe fa'asili po'o ni polofiti.

E mafai fo'i ona talosagaina nisi o ituaiga o a'oa'oga e mafai ai ona iloa patino po'o afaina upega tafa'ilagi i osofa'iga a tagata i luga o le Initeneti ma faoa atu ai fa'amaumauga, tulaga lea e fa'aigoaina o le saipa sekeuriti, fa'atasi ai ma ituaiga o aoaoga e mafai ona iloa mamao atu ai o lo'o aga mai ni faiga fa'aterarisi ma ala e mafai ona puipuia mai ai tatou nofoaga autu o sosaiete nei e le o ni vaega o le Malo, po'o ni pisinisi.

O le tamaita'i o Lisa Tuato'o o le ASDHS, sa ia taua'aoina lenei meaalofa taua mo le BGCAS ma ua faaalia fo'i le agaga fa'afetai tele o le tina o Mary A.T. Tulafono, ta'ita'ifono o le BGCAS.

"I tausaga ua mavae o nei ituaiga fa'atupega sa faia lava na'o vaega o le Malo, peita'i o le tausaga muamua lenei ua mafai ona agava'a ai nisi o sosaiete fa'apenei e latou te maua lea fesoasoani tele. O lea e fa'afetai tele atu ai i le susuga le Fa'atonu ma le aufaigaluega a le ASDHS aua ua latou tali mai i se tali fiafia mo le matou nei fa'alapotopotoga,” o se taa lea a Mrs. Tulafono.

Sa ia fa'ailoa fo'i, "Fa'afetai lava, aua ua iloa nei, ua sili la outou fa'ataua i le soifua ma'ale'ale o le tupulaga talavou o lo'o ua fa'aaogaina le matou fo'i lotoa ma le Ofisa Autu, o lo latou saogalemu a'ia'i ua outou fa'amuamua nei."

FOTUTUPU SUSUGA I LA'AUNAFAUSIA AIONO SATUALA TUAIFAIVA

Ole aso Faraile na te'a nei sa fa'afotutupu ai susuga i La'aunafausia Aiono Tuaifaiva i Taupouga, Matailiili i Fasitoouta ma sa aofaga i ai le afio'aga, itumalo ma Samoa na potopoto e molimauina lea fo'i aso patino i Aiga ma ona tino.

O i latou na fa'anofonofo e aofia ai: Sulimoni Aiono Leofo Aipovi Aiono; Aiono Meapelo Leofo Frost; Aiono Leugaimafa Penehuro Matai'a. Ua pale fo'i suli o Aiga i ona faleao Aiono Sapa Saifaleupolu suli o Aiono Faigama'a, Aiono Muliaina Lameko o Suli o Aiono Sapeti; Aiono Sailimalo Laloata o Suli o Tuaifaiva Peau; Aiono Misiluki  o Suli o I'u Lalau Misiluki; Aiono Meresaini Laulua o suli o Sulu Fatialofa; Aiono Manusuamamao Utuone o suli o Sala Maluafou.

Na poto aiga na aga'i mai le Ta'alolo i le Maota o Taupouga mo le fa'amoemoe o tatali atu ai e le afio'aga ae maise o le Falefitu.

I le aso Sa na soso'o ai sa toe fa'atasia le aiga Sa Aiono i le Maota o Aiono Tifaga ma fa'aulu ai le aotelega e 42 matai tautua mo le pa'ia o aiga. O lea se fa'amoemoe, ia matua galulue fa'atasi le aiga i mea uma, ia fa'afaigofie le ola tautua ai i aiga e ala i suafa nei ua toe fa'atula'ia ma e lesitalaina i le tausaga fou.

Mai le tele o tausaga e le'i au lea Suafa e to'atele ai o ni nofo, peita'i, ua filifili le pa'ia o aiga, e ao ina ia faatula'ia suiga fou, e tali talafeagai ma suiga o lenei vaitau.

Fa'amanuia le Atua i nei nofo, ma ua fiafia fa'atasi fo'i aiga uma, ua o'o ina fa'amanuia le soifua tautua mai matua ma aiga i tausaga e tele, lea ua e'e ai papa i alo i lenei vaitau o le soifuaga.