Pago Pago - AMERIKA SAMOA

TO’A LUA FA’AMONIA COVID-19 I LE OFU, MANU’A

I le lipoti a le Matagaluega o le Soifua Maloloina ua fa’amaonia ai e to’a lua tagata ua maua i le COVID-19 i Ofu, Manu’a. Ma i lea lava lipoti ua ta’ua ai le a’afia i le atunuu le 6,000 ina ua toe fa’aopoopo atu nisi ua fa’amaonia suega a le Covid-19 i le aso Gafua na te’a nei.

O le aofai e 559 o tagata na faia su’ega ua maua ai le to’a 16 ua fa’amaonia suega ua i ai le verusi o le covid-19, ma ua oo ai le faitaga i le 6004 ua a’afia i le covid-19 talu mai le amataga ia Fepuari 21, 2022. Peita’i mai lea aofaiga ua toe lava o le 109 o i latou o i ai pea ke verusi, ae o le isi uma to’atele ua toe malolosi.

O lo ua tumau pea lava le aofai o i latou ua maliliu mai ona o a’afiaga o le Covid e fa’aopoopo atu i o latou ma’i tumau o a’afia ai. 

Ua tumau fo’i le aotelega o le atunuu ua mae’a faia tui puipuia o le Covid-19 i le 84.4%, ua 88,8% o lo ua mae’a faia le tui puipuia e tasi ma le 66.6% ua mae’a faia tui o le Booster.

Tumau pea nofoaga o lo’o fa’atautaia ai tuiga o le Covid-19 i falema’i itumalo o Amouli ma Leone ma le DYWA i Tafuna. O le nofoaga mo suega o lo ua faia lea i falema’i itumalo i Leone, Amouli ma Tafuna i le taimi lava e tasi.

FA’AU’UGA  KOLISI TUUFA’ATASI ASO FARAILE - MALAGA MAI AUFA’AU’U I TA’AVALE:

Faia le fa’au’uga o le vasega fa’auaso i le aso Faraile nei, ma ua fa’ailoa mai e le Ofisa o le Admissions a le tatou Kolisi, “O le ulua’i fa’au’uga lenei o le a fa’atautaia e malaga mai ai le tamaititi faauu i le ta’avale e tasi a le latou aiga, ma taua’aoina atu lona tusi pasi ma toe malaga ese atu i le ta’avale lava na sau ai.”

Ua saunoa fo’i le tamaitai peresetene o le Kolisi, Dr Rosevonne Pato, “O le faiga lenei ua faatautaia ai le fa’au’uga o lenei afa tausaga, ua talafeagai lea ma le tulaga ua i ai nei le fa’asa o le Covid-19 i le tatou atunuu, ma o le a le ‘alo fo’i le Kolisi mai le fa’amamaluina o aiaiga o le fa’asa, ona o le manatu i le saogalemu o le fanau a’oga, l aufaigaluega ma le atunuu fo’i o fia molimau i aso fa’apitoa o le fanau fa’au’u i lenei tausaga, lea aotelega i ai matua ma le pa’ia o aiga.”

O le taimi muamua lenei ua fa’atautaia ai se fa’au’uga o le fanau faau’u a le Kolisi Tuufa’atasi ua malaga mai ai le alo fa’au’uina i a latou ta’avale ina ia taua’aoina atu latou fa’ailoga, fa’atalofa i e to’aititi o le pulega a le Kolisi ma le taupulega a le Malo, ona toe malaga ese atu lea ma lona aiga i le latou ta’avale na sau ai. Ua fa’amauina fo’i lea faiga fou i lenei tausaga, o se ulua’i taimi ua fa’apea ai ona taua’aoina atu fa’ailoga o le fanau fa’au’u mai le tatou Kolisi Tuufa’atasi nei.

Ua leai fo’i se tasi e filifilia e le fanau e saunoa fa’apitoa mo le latou vasega fa’ai’uaso ma ua fa’ailoa mai e le Ofisa o le Admission a le ASCC, “Ua matauina e tusa ma le 73 o le fanau a’oga o le a fa’au’u i lenei afa tausaga.

Ua matauina fo’i e tusa e to’atolu o le fanau o lo’o i fafo e tauau e fofogaina o latou suafa mo le laina fa’au’u, ae le o auai i latou i le taimi nei mo le fa’au’uga. O le mea o le a mautinoa e fa’amamaluina, o le tasi lava lea o le ta’avale mo le sui fa’au’u e to’atasi, leai ma se isi ta’avale i le laina pe a leai le sui fa’au’u e to’atasi.

I le nofoaga fo’i o le a fa’atulaga mo le taua’aoina atu o fa’ailoga ma tusi pasi o le au fa’au’u, ua fa’ailoa mai o le a matua fa’aititia lava i latou o le a tutula’i ai. Ua le aofia fa’atasi le vasega o faia’oga uma o le ASCC fa’atasi ma le pulega i lea taimi, ae ua fa’atulaga lava na’o le Sui Mamalu o le Malo, Kovana Sili, le Sui o le Komiti Fa’afoe o Aoaoga Maualuluga a le Malo ma le Peresetene o le Kolisi e fa’atalofa i le ‘au fa’au’u i lenei tausaga.

“Ua talitonuina atoatoa e le pulega o le tatou Kolisi Tuufa’atasi, o le fa’atautaiga lenei o le tatou fa’au’uga i lenei tausaga, ua talafeagai lelei ma aiaiga o lo’o ua fa’amamaluina nei o le covid-19. E taua tele le soifua o tatou fanau, ia mataituina lea i taimi uma e le tatou Kolisi Tu’ufa’atasi, ma o le manatu maualuga ia taumafai tagata uma ina ia usita’ia nei aiaiga uma o le fa’asa ona o le agaga alolofa i fanau, ia sao ma uli lo latou fa’amoemoe taua i lenei tausaga,” o se tala lea a Dr. Pato. 

TOTOGI DOC AOFAI  $146,000 - FAIPISINISI A’AFIA ONA OLE FA’ASA COVID-19:

Ua fa’ailoa mai e le sui o le vaega o fesoasoani fa’apitoa mo Pisinisi a le Matagaluega o Fefa’ataua’iga, “Ua mae’a nei ona fa’aaluina e le DOC le aofai e $146,000, o tupe fesoasoani mo pisinisi i le to’a 51 o pisinisi sa talosaga mai i le Cash Assistance Program a le Malo poo le “CAP”.

O le fesoasoani tupe lea a le malo ua fa’ailoa mai e tusa ma le 221 talosaga a le au faipisinisi ua fa’auluina atu i aI ma ua fa’atulaga fo’i fesoasoani tupe nei e amata mai le $1,000. se’ia oo i le $10,000. le tinoitupe e taua’aoina fa’ameaalofa mai ai e le Malo, e ala mai i le Matagaluega o Fefa’ataua’iga.

O le tamaitai faatonu lea ua mafai ona ia fa’amaonia lea aotelega o le seleni ua mae’a latou fa’aaluina ua tula’i mai i le $146,000 mo le 51 pisinisi ua mae’a talia a latou talosaga.

Ua fa’ailoa mai, “E 16 pisinisi ua te’ena latou talosaga ona ua fa’alua ona fa’aulu mai a latou talosaga. Ae to’a 17 isi talosaga ua fa’aulu mai o lo’o iloilo pea se fa’ai’uga e faia i ai, ona e le o atoatoa mea sa manatu e tatau ona fa’aulu mai mo le talosaga, ina ia mautinoa ai ua talileleia le talosaga na fa’aulu mai.”

“O talosaga nei e 16 ua fa’aleaogaina, ona e tasi lava le sui faipisinisi ae ua silia ma le tasi lana talosaga ua fa’aulu mai. O le 17 lea ua ta’ua, e ao ina taua’aoina mai fa’amaumauga o moomia mo se fa’aiuga lelei mo i latou, ae o isi uma tatou talosaga, e le’i oo i ai le fa’asologa o iloiloga toto’a a le tatou vaega ole aufaigaluega galulue ma e oo lava ina mae’a uma tatou talosaga ma fa’ailoa atu.”

O lo ua fa’ailoa mai o le taimi fa’atulagaina e tatau ona fa’ao’o mai ai lau talosaga mo se fesoasoani tau tupe lea a le CAP ole a fa’amutaina lea ia Me 31, 2022.i le itula e 4:00 i le afiafi.

FA’ATUPEGA MATAGALUEGA O LE INITERIA OIA MO AMERIKA SAMOA

O le vaega o le OIA a le Matagaluega o le Initeria lea e fa’aulu mai ai tupe fesoasoani mo le Malo o Amerika Samoa, ua latou fa’ailoa maia, le aotelega o tupe ua toina mai mo Amerika Samoa i lenei tausaga fa’aletupe ua atoa le $26.6 miliona.

O nei fesoasoani tupe sa fa’auia mai ina ia mafai ona faaleleia nisi o tautua lautele a le malo i le tausaga fa’aletupe 2022 e aofia ai le fa’aleleia atili o aoga a le Malo, fa’aleleia le falema’i ma ana tautua mo le mamalu lautele o e saili togafitiga pe fa’aauau fo’i togafitiga i gasegase ua maua tumau ai, ua faauia fo’i le fesoasoani mo le Kolisi Tuufa’atasi o Amerika Samoa ma le fesoasoani i le Vaega o Faamasinoga i le tatou teritori.

Ua faailoa e le susuga Keone Nakoa le Sui Failautusi o le Initeria OIA, “O tausaga fa’aletupe ta’itasi e tagai toto’a ai le tatou Konekeresi i ala e mafai ai ona fesoasoani atili e fa’aleeia le tautuaina o tatou tagatanuu lautele i Amerika Samoa. O le fa’afetai ona o le manatu o le Konekeresi ina ia fa’aleleia le tatou falema’i tele LBJ Medical Center ina ia fa’aleleia atili le latou tautua mo tatou tagata lautele.”

O alagatupe ma vaega o le tatou Malo ua fa’auia mai i ai fesaosoani toina mai e le Initeria OIA ua aofia ai: Matgaluega o Aoga, $13,090,000; Falema’i o le LBJ $11,564,400; Kolisi Tuufaatasi Amerika Samoa $1,558,400; Fa’amasinoga Maualuga a Amerika Samoa $457,200.

O le aotelega e le alagatupe e $26,670,000 mo Amerika Samoa.