Pago Pago - AMERIKA SAMOA

MATAGALUEGA O A’OGA - FAAUUGA A’OGA MAUALULUGA

O lo ua fa’ailoa mai aso patino mo fa’au’uga o fanau fa’aiuaso i a’oga maualuluga ta’itasi a le Malo, peita’i o le vaiaso na te’a sa tumau lava i aso na fa’atulaga ai a’o le’i a’afia le atunuu i le Covid-19. 

Fa’au’uga o le A’oga Maualuga a le Manu’atele ua fa’atulaga mo le aso 10 Iuni ae le mautinoa poo le a se faiga e fa’atautaia ai. Ua fa’apea fo’i ona fa’atulaga uma isi faau’uga e amata mai ia Samoana mo le aso 13 Iuni, soso’o Nuuuli VocTech High i le aso 14 Iuni. O Leone High e soso’o ai i le aso 15 Iuni. Tafuna High School le aso 16 Iuni, ae fa’ato’a fa’aiu ai ia Fagaitua i le aso 17 Iuni.

M fa’auuga i Tutuila mo aoga a le malo e faia i le Veterans Memorial Stadium, ma ua taoto atu i le Komiti Faafoe o le COVID-19 fuafuaga a le matagaluega mo fa’auuga ae o lo’o fa’atalia sa latou faaiuga.

O aoga tumaoti ua maea ona faia latou fa’au’uga, sa faia lava le nonofo fa’avava, ma ave taua’aoina lava latou tusi pasi ma fa’ailoga e pei ona masani ai, ae usita’ia le faia o talifofoga ma nonofo fa’avava i latou na vala’aulia fa’apitoa mo le sauniga mamalu ma matua fo’i. 

O isi aoga tumaoti e tele e le’i faia ma e mulimuli mai i fa’au’uga a aoga maualuluga a le Malo. Ua na’o le Pacific Horizons e to’a 10 latou fanau fa’au’u, ua mae’a faia ma sa faia lava le polokalama ma tofia fo’i le latou fofoga tima’i fa’apitoa mo le fanau fa’au’u.

MALAGA A LE HAWAIIAN AIR - MOOMIA NISI MALAGA MAI LE VA’ALELE MEDICAID

I le taimi nei, ua leai ni avanoa o totoe mai malaga a le Masina o Iuni mo Hawaii a le va’alele o le Hawaiian Air, se’ia oo lava i le malaga o Iulai 14, 2022. Peita’i o lo’o i ai nai avanoa o loo totoe pea mo le malaga i Honolulu a le va’alele o lo’o totogi pau e le Medicaid Office a le tatou Malo. O le pasese ua ofoina mai e $750. i le malaga na’o le alu, e le mafai ona malaga ai se tasi e fa’aaoga lona pasese ua mae’a totogia i malaga masani a le Hawaiian Air.

O pasese fo’i o le Va’alele a le Medicaid e gasolo lava e totogia i le Ofisa Autu o le Medicaid i le Faletele o le ASTCA i Tafuna. Peita’i, ua toetoe tumu le pasese o le malaga atu i Honolulu, ae o le malaga mai i Pago Pago mai Honolulu a lea va’a a le Medicaid, e oo mai i le aso Gafua ua na’o le to’a tolu lava ua mae’a fa’amauina ai latou suafa. O lena malaga e fa’ato’a malaga mai ia Me 30, 2022, o le aso malolo fo’i mo tuugamau i le atunuu atoa.

I le taimi nei, ua mae’a fa’alauiloa fo’i e le Fa’atonu o le Medicaid Office i Amerika Samoa, Sandra King Young, “O lo ua fa’atautaia se fa’asalalauga mo pasese taugofie mo i latu e fia malaga mai ma malaga atu. Ua fa’ataugofie atu nai lo le pasese na mua’i fa’ailoa atu, ina ia mafai ona tau fa’atumu avanoa o le malaga mai a le va’alele i le teritori. O le taumafaiga ia toe mafai ona fa’aola le tinoitupe a le Medicaid na totogi pau ai le va’alele i le sau ma le toe fo’i.”

E afua ia Iuni 02, ona ta’i tasi le malaga a le va’alele Hawaiian air i le va o Pago Pago ma Honolulu i le vaiaso. O le a le toe ta’i lua vaiaso ma faia le malaga e tasi e pei ona i ai nei.

O nisi ua mautinoa lava e malaga i le va’alele lea e tu’ua i le aso ua aofia ai le 25 Tausimai na malaga mai a le polokalama a le NuWest Group, 105 o gasegase o lo’o fia malaga mo togafitiga ma talavai, ma le isi to’a 100 o pasese ua mafai ona maua avanoa i lea lava malaga.

SUIA E SAMOA LE KAMUPANI SAPALAIA OKESENE FALEMA’I MOTOOTUA

Talu mai le vaitau na lutia ai Samoa i le fa’ama’i Misela, ma fa’asolo mai ai se’ia pa’ia le vaitau o le Covid-19, sa fa’aauau pea ona fa’aaoga mai e le Matagaluega o le Soifua Maloloina i Samoa le Kamupani a le Industrial Gases e fa’atutumu atu ai latou tane o le Okesene mo togafitiga o gasegase i le falemai tele i Moto’otua, Le Tamasese Mea’ole Hospital, ma isi falema’i fa’aitumalo fo’i i le atunuu pe a mo’omia.

Peita’i i le aso Tofi na te’a nei, Me 19, 2022 na fa’ato’a tatala ai le tautua a le Nofoaga fou ua latou gaosia mai ai le Okesene i le atunuu ma o se fesoasoani mautu mai Niu Sila ua gafatia ai ona fa’atula’ia lea tautua i Samoa. 

Ua faailoa mai o le tau aofai o lea tautua na fa’atula’ia ai e $ST1.07miliona, ma ua fa’ailoa fo’i i saunoaga fa’apitoa o le aso fa’amau fa’ailogaina, “O se molimau lea i le tulaga galulue fa’atasi o i ai nei Niu SIla ma Samoa i le taumafaiga e fa’ao’o togafitiga lelei mo le mamalu o le atunuu ina ia mautu fo’i ala o togafitiga o feagai ai ma le MOH.”

O le nofoaga lenei mo le gaosiga o le Okesene e fa’aaoga e le falema’i ua fa’ailoa mai e 200 tane Okesene e mafai ona utuina ai i le aso e tasi.

O le susuga le Minisita o le Matagaluega o le Soifua Maloloina Valasi Tafito Selesele, sa ia fa’ailoa mai, “O le fa’afetai i le Kamupani gaosi Okesene a le Industrial Gases i Amerika Samoa lea sa tulai mai ma fesoasoani i le taimi o le mana’omia tele o lea auaunaga talu mai le vaitau o le lutia ai o le atunuu i le Misela, ma soso’o mai ai lava ma le a’afiaga i le Covid-19.”

“E pei fo’i ona lau silafia, talu mai le 2019, na matua leai lava se toomaga o Samoa ma le tatou matagaluega o le Soifua Maloloina ina ua leai se sapalai o le Okesene mo togafitiga o e gasegase i le falema’i. O le galuega na fa’atautaia o le la’u lea o tane i Amerika Samoa ina ia fa’atutumu mai mo togafitiga e mo’omia ai. Ua sailia lava soo se ala e fa’aaoga mo le sapalai lea, ma ua atoa nei le 3 tausaga o faia lea tulaga, ae maua loa le tatou fesoasoani lenei mai Niu Sila e fa’atuina ai lenei Nofoaga mo le Gaosiga o le Okesene mo i tatou. O le fa’afetai e matua silisili lona fa’aleoina.” O se saunoaga lea a le Minisita o le Soifua Maloloina.

O le susuga le Komesina o Niu Sila i Samoa, Dr Trevor Matheson, sa auai o ia i le sauniga mamalu, sa ia fa’ailoa mai le sao o Niu SIla i lenei poloketi taua tele. “Na toina mai le $NZ665,000. lea e fa’aliliuina i tupe Samoa ma maua ai le $1.07miliona, ina ia fuafua, fausia ma fa’atula’ia le nofoaga e gaosia ai le Okesene mo togafitiga o gasegase i le atunuu. O le galuega fo’i lenei ua mafai ona mae’a ma amata faaaogaina ona ua mafai ona galulue fa’atasi malo e lua ma matagaluega o lo’o aofia ai  i le amatalia ma le fa’amae’aina o le galuega atoa.”