Pago Pago - AMERIKA SAMOA

29 TAUSIMA’I TAU’AVEA A’OA’OGA MO FA’AILOGA - LPN & RN I LE ASCC

O le vaiaso o Lesitala a le Kolisi Tuufa’atasi i ana kosi eseese o tauavea ai, sa fa’atasia atu ai fo’i nisi o sui iloga na fili fa’apitoa e le Vaega o  Kosi Fa’atausima’i a le Kolisi e faatautaia ni fa’atalanoaga ma sui ua lesitala mo le fa’aauau ona sailia o fa’ailoga maualuluga i le tautua fa’a-Tausima’i.

O le aofai o sui na fa’atalanoa i aso e tolu e sui tofia nei e to’a 29 le fanau talavou ua loto ina ia fa’aauau latou a’oa’oga e tausailia ai latou fa’ailoga LPN ma le RN i nisi ua mae’a ona i ai o latou LPN.

O le to’atele fo’i o nei sui uma, ua fa’akonekarate e faigaluega e fa’ata’ita’ia ai latou tomai i le falema’i tele i Faga’alu, LBJ Medical Center. O nisi ua fa’aulu mai latou talosaga e fia fa’aauau latou kosi ae o lo’o galulue nei i le Matagaluega o le Soifua Maloloina a le tatou Malo.

I fa’afesili sa tuuina atu e sui taitasi na fa’atalanoaina le fanau lea e to’a 29, sa fia iloa ai se latou fuafuaga mo le lumana’i a le sui talosaga. Poo i ai se lagona e fia maua fa’ailoga nei ona se’e atu lea e faigaluega i se isi setete. poo tumau lona agaga ina ia fa’aauau ona tautua i’inei?

O i latou uma lava ua fa’ailoa le naunau ina ia fa’aleleia atili lo latou silafia o tiute fai. Ia malamalama lelei i ala e fa’atino ai le galuega aua o lo’o tautuaina le soifua ma’ale’ale o tagata lautele o le atunuu. O le fa’anaunauga ia fa’aleleia tomai e fa’atino ai tiute uma o le lavea’ia o le soifua.

O lo ua iloga mai e to’atolu lava Tausima’i Alii sa mafai ona auai. E to’atasi lava le tausima’i tama Samoa ma le to’alua o ali’i Filipino. O le isi uma vaega o tamaitai, ma e to’atele lava e fiafia tele i latou i le taimi o lo’o fa’atino ai o latou tiute i le falema’i i le tausiga o gasegase ma le faataunuuina o tui, o mea uma lava tau le galuega, e ao ina a’otauina le fa’atinoga o tiute ma e i ai sitepu e mulimulita’i ai.

O nisi o le fanau ua agaga nei ina ia  toe sailia o latou fa’ailoga maualuluga i nei faiva ua matauina e i ai nisi o latou mataupu na avea muamua i le kosi amata ole avea ai ma Tausima’i pasi CNA poo le LPN e le’i mae’a, o i latou na o loo fa’aauau pea ona a’o’oga i le taimi lenei e fa’aatoa latou maka poo togi e ausia ai ona fa’aauau latou sailiga o le LPN poo le RN. 

Peita’i ina ua talanoa ma le fa’auluuluga o le Kosi o le Tausima’i Pasi i le ASCC Lele Ah Mu sa ia fa’ailoa ai, “O le agaga fa’afetai ona ua maua lea faitauga to’atele e fia tau’avea pe faaauau latou a’oga ina ia ausia fa’ailoga maualuluga nei, o le sootaga o latou a’oa’oga i le matata o le Tausima’i pasi i le tatou Kolisi. O nisi lava tausaga ua te’a, e le atoa se to’asefulu o i latou e agaga ia fa’aauau a’oa’oga, masalo ona o le pisi i le galuega, ma ua le agaga ai e fa’aauau a’oa’oga, ae ua to’a ai lava le taumafai i le mea o i ai mo se taimi umi.”

O nisi o le fanau ua mae’a faia le fa’atalanoaga sa tumau mai lava o latou taumafaiga i le tausaga e 2017, 2018 ma le 2019. O nisi ua faailoa mai i le faatalanoaga, oa ua fai aiga, ua fa’atali ai lava se’ia mae’a ona tausia fanau, ae ua fa’aaoga lava le tomai ua maua e sailia ai le tupe mo le tausiga o le aiga fou ua amata. 

O nisi ona ua fa’auilavea fo’i le tausiga o nai matua matutua, ua fa’alagolago ia i latou lea tulaga i tua i aiga ona o le tomai ua mae’a maua, ona nofo ai lava lea e faigaluega ma tausi matua matutua, lea la ua fa’ato’a toe maua le masele e fa’aauau ai ai a’oa’oga mo fa’ailoga maualuluga o soso’o mai o le kosi fa’atausima’i.

Ina ua fesiligia le fanau o le a faaauau taumafai i se mea ua latou silafia e ao ina fa’aleleia mo le fa’aauauina o latou kosi fa’atausima’i, se mea e ao ina faia e le Kolisi Tuufa’atasi vaega a le Nurisng Department, e toatolu i latou na fa’ailoa maia, “Ua tatau ona fa’ato’atele nisi o sui faia’oga e a’otauina i matou i le potu a’oga i lenei Kosi. Pe afai matou te o atu i le itu o le a’otauina o le faia o le galuega i le falema’i, o i latou lava fo’i o a’oa’oina i matou i potu a’oga, o i latou lava fo’i ia o lo’o a’oa’oina i matou i le fa’atinoga o le galuega. E moomia lava ona fa’alautele atili le sosia e utuvai i ai i matou i le a’oga i le potu a’oga, ae oo atu i le fa’atinoga o le galuega i le falema’i, ua ese fo’i i latou o lo’o matou maua mai ai le fa’asoa.”

O se is lea vaivaiga o le auaunaga ua matauina ma fa’ailoa e lea vaega o le Kosi lea, ua tau leai lava nisi e mafaia ona a’oa’oina le kosi i potu a’oga, i tomai e fa’asoa mai i tusi ma le agava’a e tatau mautu i le mafaufau ma atamamai ai le fanau, e ese mai le itu e fa’atino ai le galuega e tusa o le aoaoga ua maua. O lo ua avea lava i latou ua agavaa i le galuega ma sui fo’i o lo’o a’oa’oina i latou i le potu a’oga.

FA’ATAOTO FUAFUAGA FA’ASAO LE SOIFUA I LE PAPASE’EA I LEALA, VAILOATAI

O lo ua talanoaina nei e le fa’atonu o le Puipuiga o le Saogalemu Fa’alotoifale Samana Ve’ave’a se ala e mafai ai ona feso’ota’i i latou ma le Fa’atonu matagaluega fou ua fa’atula’ia o Sailiga & Galuega Fa’asaoina o le Soifua Fa’amasino  Upuese Galoia, ina ia taumafai e fa’asa le nofoaga lea aua ua maumau le soifua talavou o nisi o alo o le atunuu, ona o le ta’e’ele ai.

O se isi o ala ua talanoaina e i la’ua, ina ia fa’aaogaina leoleo o le afio’aga ma le pulenuu e galulue fa’atasi ma latou matagaluega, ia mautinoa o lo ua taofia le fanau talavou mai lo latou fa’aaogaina o lea ogasami sou tele mai a latou ‘au’auga ma fa’ase’e e fia faia i Le’ala.

O le sailiga o le talavou lea na mulimuli nei lava ona leiloa ai i lea ogasami, ua afua ai ona faia loa lea fonotaga, aua e le o faigofie le va’aiga i matua ma aiga, a’o nonofo ma fa’atalitalia se fa’ai’uga o le sailiga. “Ua lagona le ootia o loto ma finagalo o aiga, e le mafai e se tasi ona fa’atumu le avanoa ua tu’ua e le fanau mai le li’o o le aiga. O taimi fa’apenei e le fia talanoa i ai se tasi, ae tatau lava ona i ai se fa’amalosiga e tu’umamaina ai le oo i ai o nisi aiga i lea tulaga.” O se tala lea a le susuga le fa’atonu Samana Semo Ve’ave’a.

O le fuafuaga o le a fa’atutuina ni fa’ailo, e lapata’ia ai le mamalu o tupulaga talavou ma tagata fegasoloa’i, ua fa’asaina le itu ona toe ta’e’ele ma fa’ase’e ai nisi o le fanau talavou, poo nisi lava fo’i ua iloga le tomai i le fa’ase’e, e sili ai ona fa’aaoga nisi o ogasami o lo’o ua iloga ona saogalemu ai le soifua. O le leoleoga o le a faamatuu atu lea i leoleo o le afioaga ua mae’a fa’atualga e le matagaluega o Mataupu Tau Samoa, ina ia fa’amalosia lea fo’i fa’asa.

“O le tasi o le soifua e toe maumau i lea ogasami, o le afe ai lea o avanoa o le soifua ua maumau. Fa’ao mai le Ola, ia manatu i le saogalemu a’ia’i.” O se toe fa’amatalaga lea a Samana. 

MOOMIA E ‘BABY JOHN MALUBAY” SUASUSU O TINA & TATALO MO LE AIGA

O le ali’i o Baby John Malubay, o le pepe meamea na fanau mai  i le 34 vaiaso o le ma’itaga o si ona tina o Cristina Malubay. O ni fa’aletonu i le tu’ueseeseina o Baby John ma si ona tina, i le taimi na fanau ai, ua maliu ai le Cristina, ae tu’ua pepe i le masini fa’afailele ai lona soifua i le “Nursery NICU” a le tatou falema’i i Faga’alu.

O le vala’au mo tina failele ina ia alofagia e moomia lava le suasusu o le tina i le tau fa’aolaola ai o Pepe ina ia atoa lona malosi, ona o lo’o ua le atoa masina o le ma’itaga a lona tina, lea ua sailia mai ai so’o se tina failele e fia foa’ia le suasusu fou mo Pepe John Malubay.

Ina ua fa’ate’ia lenei aiga i le maliu ai o Cristina, ua tu’ua ai na’o le tama ma le fanau e to’aono.  Na taoto Cristina i lana fanauga o Baby John, ae ua le mafai ai lava ona fa’asao mai lona soifua. O le atoaga o le ma’itaga e fanau tonu ai e 40 vaiaso, peita’i o lea ua fanau Baby John i le 34 o vaiaso o le ma’itaga o lona tina.

O lo ua vala’auina fo’i le mamalu lautele o le atunuu, ina ia molita’i le aiga o Cristina Malubay lea ua ia tu’ua fa’afuase’i, ao taumafai ina ia fanaua lana pepe fou o John Malubay. O Cristina ma lona to’alua ma le fanau e to’aono

E ese mai lea taumafaiga, ua fa’atautaia nei e nisi o uo mamae a Cristina se ala e mafai ai ona e ofoina atu se meaalofa tau seleni ua e finagalo malie e te fesoasoani ai i le tama ma le fanau ua tu’ua nei nao i latou. O se mea sa le fuafuaina, peita’i, o tagata o le Atua e iloga le tula’i ma fesoasoani i taimi faigata e feagai ai ma nisi o aiga ua pagatia.

O lo ua i ai le pusa ua mafai ona momono lava i ai se teutusi o sau meaalofa ua e loto e foa’i mo Baby John ma lona aiga ina ia fesoasoani i le maliu o si ona tina, ao se toomaga fo’i i le tama ua tuua nei na’o ia ma le fanau. O le pusa lea ua i le Krispy Chicken i Nuuuli, ina ia mafai ona afea ma tuu ai sau foa’i.

I le Facebook ua fa’aauala ai nisi foa’i i le “Go Fund Me..Cristina & Baby John Fundraising” o nisi o ala ua masani ai le to’atle mai so’o se mea o le lalolagi, ma e fa’aaogaina ai credit poo Debit Cards i na ala o foa’i. O sui o lo’o la’ua fa’atautaia nei ala o foa’i ua e uo mamae a Cristina Malubay o Lovely Dulay ma Andrea Amor De Guzman.

Ole aso fanau ua fa’amauina o Baby John Malubay o Iuni 23, 2022 ma o le aso fo’i lea ua fa’amauina ai le maliu ai o lona tina. Ua fa’ataga ma fautuaina e le falema’i ina ia faia lenei fa’asalalauga, aua e moomia lava e so’o se pepe o tu’uina i le masini fa’aolaola lelei ai pepe, ona fagaina pepe i le suasusu moni o le tina. O le suasusu e sili ona taua i lona tuputupu a’e o se tamaititi ua matua.

O le ala fa’atagisia lea o le atunuu, ae maise i tina o lo’o ua fa’asusu a latou pepe fou, ina ia alofagia Baby John pe afai o lava ma totoe lou suasusu e fa’aaoga tatau mo pepe ua tete’a vave ma lona tina ona o le oti.

Fa’amaise le Atua i le tama ma le fanau ona o le lutia ai o le folauga i lenei vaitau, ina ua amia fa’afuase’i le tina o le aiga.