Pago Pago - AMERIKA SAMOA

TO’A 4 I LATOU UA FA’AMAONIA SUEGA O LE COVID-19 - AUMALAGA A LE HAWAIIAN AIR & SAMOA AIR:

E to’a 4 i latou o lo ua taofia pe fa’anofoesea fo’i i le falema’i a le DOH i le Malaeva’alele ona ua fa’amaonia a latou suega Covid-19, o lo’o malaga mai ma le verusi o le Covid-19 i o latou tino.

E to’alua mai le Hawaiian Air i le aso Tofi ma le isi to’alua o e malaga mai Samoa i le Samoa Airways.

Pe afai ae toe kilia mai i latou i lea fa’anofoesea, ona tatala lea i tua i aiga, e toe fa’anofoesea mai ai mo le isi 5 aso.

Ua fa’ailoa mai fo’i e le’i aumaia ni pasese i le malaga i le aso Tofi a le “MV Lady Naomi” ona e na’o le to’a 4 lava o le pasese na mafai ona mae’a fa’atumu lelei le TalofaPass e mafai ai ona ulufale mai i Amerika Samoa.

O lenei fa’alauiloaga sa fa’ailoa mai lea e le tamaitai foma’i Dr. Elizabeth Lauvao.

Ua ia fa’ailoa mai fo’i, “E iloga mai o le matua faigata lava ona fa’aaoga mai o le TalofaPass e le mamalu o le atunuu o lo’o gasolo mai Samoa, ma e tatau lava la ona faia se aoaoga fa’apitoa mo lea fa’amoemoe mo tagata malaga mai Samoa.”

Ua mae’a pasia lelei e le Komiti Fa’afoe o le Covid-19 le feavea’i e le Lady Naomi o pasese e 60 I le va o Upolu ma Tutuila, i ana faigamalaga i vaiaso ta’itasi.

SISI FAAVAELOTO TAGAVAI A LE IUNAITE SETETE  - TAGATAVALEINA LE PALEMIA O IAPANI:

Ina ua fa’atonuina e Peresetene Joe Biden tagavai uma a le Iunaite Setete o Amerika ina ia sisi fa’avaeloto ona o le tagata valeina o le alii Palemia o Iapani, ua fa’apea fo’i ona fa’atonuina ai e Kovana Lemanu Peleti Mauga le fa’avaelotoina ai o tagavai uma i Amerika Samoa nei.

O le Palemia o Iapani, Shinzo Abe, e fasiotia o lo’o faia lana lauga i Nara, Iapani i le aso 8 Iulai, 2022. Ua atoa le 67 tausaga o lona soifua.

O le aso 8 Iulai, 2022 ua na’o le pau lea o le aso na sisi fa’avaeloto ai tagavai uma a le Iunaite Setete ma so’o se teritori ma Setete o Amerika e aofia ai ma latou Ofisa Tutotonu i so’o se atunuu o lo’o sisi a’e ai Fu’a a le Iunaite Setete o Amerika.

Ae na faatoa fa’amamaluina le sisi faavaeloto o fu’a i Amerika Samoa i le aso 10 Iulai, 2022 e taualoa ai le aofia o Amerika Samoa i le nofo fa’anoanoa o le lalolagi atoa ae maise le Iunaite Setete o Amerika atoa i le tagatavaleina ma maliu ai o lea ta’ita’i iloga i le lalolagi, ae fa’atauva’a lava le tagata na ia faia lea tulaga.

O le ali’i palemia ua fasiotia nei, ae toe lua aso fa’ataunuu le palota a lona malo lea e fa’asolo ai latou fa’atosina fa’avaega o upufai ae fanaina ai o ia ma maliu ai.

O le tala mai o le palemia sili lea ona umi lana tautua i le faigamalo fa’atemokalasi a Iapani o lo’o tula’i nei. O le tele o mea e auau mai lona agaga e sapaia mea e galulue feso’ota’i ai ma ta’ita’i o le Iunaite Seteete o Amerika mo le tele o tausaga.

Ua iloga fo’i ona matua tele mea e auaufaatasi ai peresetene ua tuana’i o faigamalo a le Iunaite Setete o Amerika ma lea ali’i Palemia o Iapani Shinzo Abe, ua fa’atagatavaleina nei.

O le aso 9 Iulai 2022 ua fa’atonuina ai fo’i tagavai a le Malo ina ia fa’avaeloto ona o soifua o nisi na fasiotia fo’i i le aso 04 Iulai  i High Park Illinois, ao faagasolo le faailogaina o le Fu’a a le iunaite Setete o Amerika, 2022.

TOE SIITAGA O FAITAUGA O E MAUA I LE COVID- 19  - UA LE USITA’I TAGATA LAUTELE:

I le saunoaga a le alii Foma’i Dr Iotamo Saleapaga e tusa o sona taofi fa’amauina i le afuaga o le toe oso i luga o le faitauga o le atunuu ua toe fa’amaonia nei suega o le verusi Covid-19, ua ia fa’ailoa ai, “Ua tele le le usita’i o tagata lautele i aiaiga ua mae’a fa’atulaga atu ina ia taofiofi mai ai le maua ma le pepesi o le verusi o le Covid-19 i le atunuu.”

“E pei lava ona va’aia i le tumutumu o fa’au’uga, o maliu, o aso fanau, o ‘aiga o fa’au’uga, o mea uma na mafuta i ai le faitau selau o tagata, ua le toe faia ni pupuni fofoga, ua le toe nonofo ma tutu fa’avava i latou. Ua soso’o fa’atasi ma ua le toe na’o na pa’i atu e fa’atalofa ae ua fusi mai le isi uso. O mea ia sa tau taofiofia mai ai le pipisi tele o le verusi o le Covid-19. Ua tatala atu lava na’o nai noataga o le fa’asa, ae ua fa’asoloatoa ai le fa’alogogata o le mamalu lautele. O le ‘afu lava o numera ia ua toe siitia i luga i le taimi nei le aofai o nisi ua toe fa’amaonia le suega Covid-19.” O se tala manino lea a le ali’i foma’i.

O le fa’amaumauga lea ua toe fa’ate’ia ai le Matagaluega o le Sofua Maloloina, ina ua mae’a ona toe tuufa’atasia mai le faitauga o i latou ua fa’amaonia suega Covid-19 i aso e fitu ua te’a, ua maua ai le 317 o i latou ua toe maua ai le verusi Covid-19.

O le aofaiga ua tamau nei mai le vaiaso ua te’a o i latou ua fa’amaonia le suega covid i le atunuu talu mai Fepuari 21, 2022 ua maua ai le 6811, ae ua mae’a toe mama uma lava i latou ua totoe mai na’o le 394 lea e i ai pea le verusi Covid-19. Ua fa’aopoopo fo’i le maliu e to’atasi ma ua atoa i ai le 32 o e ua maliliu ma a’afiaga o le Covid-19. O le sui mulimuli lava na maliu e 89 tausaga o le tama ma e le’i faia ni ona tui puipuia o le Covid-19. Ua matauina sa maua le toeaina i le Pneumonia ma isi fo’i ona gasegase tumau e ese mai le a’afia ai i le Covid-19 ma maliu ai.

Ua faailoa mai e le’i toe i ai nisi ua fa’amaonia mai le i ai o le verusi Covid-19, peita’i o lo’o fa’amauina lava le faleluasaga e 26 sui o lo’o maua ai le verusi i aso e 7 o tuana’i nei.

Ua fa’ailoa manino mai e le DOH, o le mafuaaga lava o le oo o le fa’ama’i i le Faleta’u ona o le maliu sa o atu ai nisi mai Tutuila nei e auai, ma e to’alua fo’i sui na malaga ane mai Ofu, o i la’ua fo’i na ua toe fo’i atu ma le fa’ama’i mai Ta’u i Ofu.

O lo ua toe fa’ailoa mai e Dr Saleapaga, “Mo tagata uma lava, ia fa’aaoga pea lava pupuni fofoga ma ia fa’avava mai isi tagata pe o le a matua le o lava i mea e tumutumu ai tagata.”

“Ua i ai fo’i le influenza fou lea ua maua ai le to’atele, e tatau lava ona faia suega a i latou ua fa’alogoina ai le tale ma le mamafa o le isu ma ua faigata ona fa’ate’a na mea e lua, e aofia ai ma le fiva. O auga tutusa lava na o le Flu ma le Covid-19. E tatau ona nofouta tagata uma e faia suega ia mautinoa e le o e maua i le Covid-19.” O se toe fa’aopoopo mai lea a le ali’i foma’i.

“Fautuaina tagata uma ia fa’amafanafana lelei le tino, aua le fa’amalulu o lenei vaitau ua suia mai i timuga ma au malulu le ea. Afai ua amata ona tale, ia fa’amamao mai isi sui o le aiga ma ia le alu i nofoaga faitele o tumutumu i ai le to’atele. Le mamalu o le atunuu, o tatou lava e afua ai ona toe lamatia o tatou soifua ona ua le faautagia poloa’iga tamau mo lenei vaitau e le te’a ese lava le Covid-19 mai o tatou lotoifale.”

Ua toe fautuaina nei le mamalu o le atunuu, ia toe fa’amalosia le fa’aaogaina pea o pupuni fofoga ma ia fa’avava mai isi uso a tagata i nofoaga faitele.

FA’AILOA MAI CEO - 20 FOMA’I & 25 TAUSIMA’I FA’AFAIGALUEGA MAI FAFO:

Ona o lenei vaitau ua matua faigata lava ona maua ni tausimai fa’apea ma foma’i e galulue i le tatou nei malo, o lea ua tonu ai i le Komiti Fa’afoe o le LBJ Medical Center e sailia i fafo nisi o tausima’i pasi ma Foma’i e galulue i le tatou falema’i.

Ua fa’ailoa mai la i se lipoti lata mai a le susuga le CEO o le falema’i Moefa’auo Bill Emmsley, “Ae le’i to’ai le folauga a le atunuu i le fa’aiuga o lenei tausaga, ua mae’a fa’ato’ai mai i fanua le to’a 20 o Foma’i agava’a ma le 25 o Tausima’i pasi e galulue mo le tatou falema’i tele i Faga’alu.”

O le saunoaga fa’apitoa lea a le CEO o le falema’i na faia i le fonotaga mulimuli nei a le Komiti Fa’afoe o le Covid-19 a le tatou Malo, ina ua fesiligia foi i se fuafuaga faataoto a le Komiti Fa’afoe o le LBJ Medical Center e fofo ai le fa’afitauli ua loa o a’afia ai le tausiga lelei o tagata fa’agasegasea i le falema’i fa’apea ma talavai mo e fia maua se togafitiga mo latou gasegase tumau.

Ua ia fa’ailoa mai, e tauau o le masina nei poo le vaitau o le masina fou, e to’ai taunuu mai ai nisi o tausima’i mai fafo, ua finagalo malilie e tautua iinei e ala i tiute fa’atausima’i pasi.

Ua le fa’ailoa maia e le CEO poo fea e aga’i mai ai nei tausima’i ma foma’i peita’i e i ai lava tausimai sa tiute iinei i le vaitau o le Covid-19, na latou fa’ailoa lo latou naunau e toe fia soso’o le latou tautua i Amerika Samoa nei, masalo o nisi nei o i latou sa talosaga ua faia latou fa’ai’uga e toe taliu mai.

Ua saunoa fo’i Emmsley, “E le faigofie lenei fa’afitauli o le tau leai o ni tausima’i pasi mo faiva e fesoasoani ai i le galuega a ali’i ma tamaitai Foma’i i le teritori. Ae ua matou taumafai atili ina ia maua mai nisi ua agava’a ma fiafia e talia le vala’au e avea ma tausimai ma foma’i i le tatou nei teritori.”

O le aofai lea o foma’i e fia maua mai e to’a 20 ma le aofai o tausima’i pasi e fia maua mai e to’a 25 i latou. O lo ua mae’a faia fa’atalanoaga mo nisi o le fanau a le atunuu o le a fa’aauau latou aoaoga LPN ma RN i le ASCC i lenei amataga o le tausaga a’oga 2023, ma e to’a 26 i latou ua mae’a ofoina e fia fa’aauau latou aoaoga ia mautinoa o agava’a i tiute fa’atausima’i pasi.

TOFIA SUI FOU - TUTULAI LAULAUATOFI A LE KALAPU A LE ROTARY I PAGO PAGO:

O lo ua mae’a fo’i ona suia sui e tutula’i i tofiga o le Laulauatofi a le Kalapu a le Rotary i Pago Pago Amerika Samoa nei, i le aso Toona’i 2 Iulai, 2022.

O lea suiga sa fa’atautaia lea i le Sadie Thompson Inn ma sa tula’i ai le ali’i peresetene ua mae’a nei lana nofoaiga David Buehler, ma tu’uina aloaia atu le tofi Peresetene i le tamaitai o Katrina Mariner ma lana laulauafono fou, e latou te fa’atautaia ai galuega fa’atino uma a le Kalapu a le Rotary mo le atunuu.

“Ia taua ou faiva fa’atino, nai lo Oe!” o le auau lava lea o le auaunaga fa’ale sui totino o le Rotary Club. “Tautua ia faia se suiga lelei e Iloga ai le Rotary!” O le auau lea sa fa’atino ai tiute uma o le Rotary i le tausaga ua tuana’i nei

O le sauniga mamalu ma le fiafia fa’atasi foi o Sui totino uma o le Rotary i lea afiafi, sa fa’atino ai se fa’afetai a le Laulauafono i sui ta’ito’atasi o le Kalapu ona o le latou vaega sa fa’atino mai le tausaga atoa e fa’atautaia ai galuega uma na faia a le Rotary Club i totonu o le atunuu.

Na i ai foi se fa’ailoga fa’apitoa na tapena ma fa’aleo ona o le auaunaga ua mae’a nei a le totino o le Rotary Club le susuga Joe Yandall, lea na tu’ua le mafutaga ma le Kalapu ma aiga ia Aperila 2022.

Na i ai fo’i se fa’ailoga taua na taua’aoina i le susuga le ali’i peresetene tuai o Frank Barron lea sa ia fa’aauau lava lona tiute tau’ave o le Kovana o le Rotary mo Samoa na lua ma le isi fa’afetai tele i le tautua a le sui totino o le Rotary Creighton Chong lea ua suia nei lona tofi e galue ai i le USCoast Guard e avea ma Lt Commander, ma o le a ia tu’ua nei le mafutaga iinei, ona ua suia lona tofiga i lana galuega.

O le Sui Totino o le Rotary sa ia mauaina le fa’ailoga o le Rotarian o le Tausaga na maua lea e Moe Hardman. O le poloalama fa’atautaia mo le afiafi atoa na avea ai le susuga Rotarian Joey Cummings ma fofoga taumolimoli o le afiafi atoa.