Pago Pago - AMERIKA SAMOA

AFIFIO MAI - PALEMIA O SAMOA & AUMALAGA USUFONO A LE USOGA A SAMOA NA LUA

Na umi se taimi o tatalia le aumalaga mulimuli mai le va’alele i le afiafi o le aso Lulu mai Samoa, lea sa masi’i mai ai le Palemia o Samoa, Fiame Naomi Mata’afa ma nisi o lana Kapeneta, o Minisita o lo’o tutula’i i le faigamalo a Samoa i lenei vaitau.

O e na fa’atali va’a e aofia ai le Kovana Sili o Amerika Samoa, Lemanu Peleti Mauga, le Failautusi o Mataupu Tau Samoa le afioga le Ma’oputasi Mauga T. Asuega, Komesina o Leoleo Lefiti Aitulagi Pese ma isi fo’i tama ta’ita’i o le atunuu, ina ia fa’afeiloa’ia le faigamalaga mamalu mai Samoa. O le ulua’i taimi fo’i lea ua malaga mai ai le afioga le Palemia o Samoa talu ona tula’i mai lona tofiga o tautua ai nei i le Malo Tuto’atasi o Samoa.

O le aumalaga lenei e to’alima Minisita o lo’o malaga fa’atasi mai ma le Palemia Fiame Naomi Mata’afa, e ese mai ai le CEO o le Matagaluega ma le Va i Fafo le tamaitai o Noumea Peseta Simi, fa’apea ma le Minisita o le Ofisa o le Palemia ma le Kapeneta Agafili Shem Leo.

O le Minisita o Fa’ato’aga ma Faigafaiva Laauli Leuatea Schmidt, Minisita o Fefa’ataua’iga ma Falegaosi Oloa Olo Levaopolo Fiti Va’ai, Misinisita O Galuega Fa’apisinisi & Aseta a le Malo Leatiniu Wayne Sooialo, Minisita o Tupe Mulipola Anarosa Molioo ma le Minisita o le Soifua Maloloina Valasi Tafito Selesele. O isi sui o le aumalaga lava lenei, sa mua’i to’ai taunuu mai i le teritori i isi malaga muamua a le va’alele mai Samoa.

O le fofoga na fa’afeiloa’ia le ‘au malaga o le tofa le Tootoo o le Faleula ae o le Fa’atonu o Tupe a le Malo o Amerika Samoa, ma sa lauga tali le susuga le Minisita o Fa’ato’aga ma Faigafaiva La’auli Leuatea Schmidt o le aumalaga.

Ua auai ma tumutumu fo’i nisi e to’atele o i latou sa sapaia le fa’amoemoe maualuga o le FAST mai lenei itu o Samoa, sa latou oo ane i le malaeva’alele ina ia maua se feso’ota’iga ma se feiloa’iga ma le afioga le Palemia sa latou fa’ananau ina ia tula’i mo le Malo o Samoa i lenei vaitausaga.

E le gata i le afioga le Palemia ae o lana vaega fo’i o le FAST ua avea nei ma Minisita e fa’auluulu i ai le lima matagaluega o le Malo o Samoa.

O le tatalaga aloa’ia o feutaga’iga i le va o le Usoga a Samoa na lua e tatala lea i le MPH Building a le Kolisi Tuufa’atasi e soso’o ai pe a mae’a le talisuaga a le aumalaga i le DDW i Utulei lava.

Na maua se taimi e talanoa ai ma le susuga le Minisita o Fa’ato’aga ma Faigafaiva La’auli Leuatea Schmidt e tusa o le fa’amoemoe o Samoa i lea fonotaga taua ma Amerika Samoa, ma sa ia fa’ailoa ai, “O a lava mataupu sa le matua mautu lelei talu mai le amataga o nei feutaga’iga o ta’ita’i o Malo o Samoa na Lua, o le a fa’amautu atili nei.”

Fa’aaauau foi sana fa’amatalaga ma ia fa’ailoa mai ai, “Ua matua fiafia lava e maua lenei mafutaga fa’atasi ma le usoga i Amerika Samoa nei, ae maise ia i latou uma na foa’i mo le fa’amoemoe ua a’e manumalo. Lea ua o mai e maua se so’otaga ma ia fa’afetaia aloa’ia le alolofa ma le lima foa’i mole fa’amoemoe o le faigamalo a le FAST i le tatou teritori.”

“O le agaga o le sootaga lenei, ina ia fa’amalosia le agaga fa’atasi o Samoa na lua i mea e tatau ona taga’i toto’a i ai fa’alotoifale, tulaga o le pa’ia maualuga i aiga, faiganuu, Ekalesia o tapua’i ai Samoa i le Atua ma tatou Faigamalo e lua. Ia mautu ona tatou feuta’iga o le usoga mai le vavau, e tasi lo ta’ua tupuaga, e le tatau ona tatou fa’atuatuana’i le tasi ae ia mautsali le so’otaga o le uso tu’ofe.”

Ava Fa’atupu o le Feiloa’iga a le Usoga a Samoa na Lua - Ua atoa tala o le Maota talimalo o Tufele Li’amatua  i le Malae o le Suigaula a le Atuvasa i Utulei, ina ua alaalata’i le pa’ia o le tala na atoa sa masi’i mai Samoa, le afioga le Palemia ma le aumalaga mamalu 

O le isi tala na atoa i ai le mamalu maualuga o le saofaiga o ta’ita’i o le faigamalo a Amerika Samoa i ona ta’ita’i le afioga le Kovana Sili ma lana taupulega fa’alotoifale.

Ua fa’afesaga’i Segaula, ua alalata’i tala na atoa i ai Samoa, ma sa latou patipatia fo’i le ava aua ua mai vai ae magalo ava o le usu fa’atali a le Malo o Amerika Samoa i le usoga masi’i mai Samoa. Ua ioe foi taofi o failauga totofi i lea taeao, “Ua feiloa’i uso, ma o le fiafiaga sili lea e vi’ia ai le Atua Soifua.”

Ua mae’a tapena mai uma fo’i le vasega o ta’ita’i o le Fono Faitulafono o le Malo o Amerika Samoa aua na faauia lava le avea’i mai lana afioga le Kovana sili ina ia auai fa’atasi i latou i le Maota i Utulei mo lea fa’amoemoe maualuga.

Na fa’atautaia lava le ‘ava usu e le aumaga a le Ofisa o Mataupu Tau Samoa, ae o le tausala lalelei o Amerika Samoa  sa ia paluina le ‘ava mo le feiloa’iga.

Ua fa’ailoa mai fo’i o le a muta le fonotaga i mataupu uma e ao ina talanoaina i le va o ta’ita’i ma le aumalaga mai Samoa i le afiafi o le aso Tofi, ae o le aso Faraile lea ua fa’amoemoe e faia ai se feso’ota’iga a le aumalaga ma le vasega o e na sapaia lo latou fa’amoemoe i le vaitau o le palotaga i Samoa. Ona o lea ua tula’i manumalo le FAST, o lea o le a latou tutu ai ma talotalo fa’afetai i le mamalu lautele o le atunuu fegasoloa’i i le Malae o le Suigaula a le Atuvasa i Utulei.

POLOKALAMA FESOASOANI A LE “BACK ON TRACK” - MO AIGA MAFATIA

O le polokalama na afuafua ina ia mafai ona fesoasoani isi mo se tasi poo se aiga o lo’o pagatia, ua matua iloga le i ai o se mana’omia tupito tau lo latou falenofo, poo se galuega e toe fa’aleleia ai tautua lautele mo se aiga pagatia.

O le Polokalama lenei ua matua’ina mai e le tamaitai o Mona Uli ma ua fa’aigoaina o le “Back on Track” pe o le toe fa’afo’i i se lelei.

Ua faailoa mai e Ui, “O le polokalama e tausailia ai se tasi o agalelei ma e lua ala e te agalelei ai. O le mafai ona e foa’i o lau taleni o e agava’a ai e fesoasoani e fa’atino le galuega toe fa’aleleia poo le foa’i fo’i o mea e fa’aaogaina mo le galuega toe fa’aleleia o moomia e lea aiga.”

“O lona uiga, afai ua silafia o le aiga o moomia ina fa’aleleia le taualuga o le fale o nonofo ai, e moomia apa ma fao ma laupapa pe afai ua pala laupapa e tutu’i i ai fao ma apa. Ae sili atu ona moomia nisi e a’e i luga, ma latou fa’atinoa le galuega atoa lea.”

Peita’i o le aiga ua mataituina nei e ave i ai le fesoasoani, ua iloga le moomia ona toe palama lelei le fale o nonofo ai. Ua i ai fo’i fanau o lo’o soifua ma a’afiaga tumau o le tino i gasegase na soifua a’e o maua ai lava, fa’atasi ai ma se tagata matua ua mae’a maua i le Dementia. O nei ituaiga o gasegase ua le mafai ona toe i ai se vaifofo, e fa’asolosolo atu lava ina matua afaina le sui ma maliu ai.

Ina ua va’aia lea talosaga mo se fesoasoani ua fa’auia mai i ala o se fa’asalalauga fa’alaua’itele i so’otaga mautu a le Facebook ma emeli, ua matua tali fo’i le atunuu i le agalelei ma le alofa tula’i.

Ua mafai ona fa’auia mai lau foa’i poo lou taimi e fa’atino ai le galuega i ala ua feso’ota’i ai ma le tamaitai o Mona Uli poo le Ofisa Fa’asalalau a le South Seas Broadcasting i Fagaima, mo so’o se sapalai o loo moomia ona fa’aleleia ai le falenofo mo lea aiga.

E mafai fo’i ona e foa’i i le tulaga o le seleni mo le fa’atauga o mea e fa’atino ai galuega nei. Manatua o le foa’i e le fa’atuaoia, e le tau fa’amasinoina lona fa’aaogaina, ae foa’i ma le loto e aoga lea mo le aiga pagatia.

O le tina lea ma le fanau, ua agaleagaina fo’i e le tama sa la’ua mafuta, ma ua tu’ua e ia le mafutaga, ae faia le isi ona aiga. E ala eseese mai le alofa o le Atua, fa’afetai fo’i le agaga e foa’i ai ma le alofa.

POLOKALAMA NOGATUPE MO MAOTA A LE FALETUPE O ATINA’E

Ua fa’alauiloa mai e le Faletupe o Atina’e a le Malo o Amerika Samoa, le latou polokalama o le MAOTA, lea e mafai ai ona faia nogatupe e fa’aleleia ai Maota o Aiga ae matua gafatia lava ona totogia ona peimeni ma ua faatulaga nei aoaoga ia Aukuso 9 -10, 2022.

E tai lua vasega i le aso e tasi, ma o le vasega muamua e amatalia lea i le itula e 9:00 seia oo i le 10:00am ma le vasega lua e amata lea i le 12:00 - 1:00 i le aoauli. O Aukuso 11, 2022 ua fa’atulaga ai se fa’asalalauga fa’alaua’itele e mafai ona talanoa feso’ota’i ai i uga o alaata o le Facebook ma o lo ua fa’ataunuu nei feso’ota’iga uma ina ia mafai ona feuta’iga le faletupe o Atina’e ma le mamalu lautele o le atunuu ua agaga ina ia latou fa’aaogaina lea alamanuia.

Ua faia fo’i ina ia silafia mai e le mamalu o le atunuu mai le falelima i sasa’e ma le falelima i sisifo o le atunuu, pe fa’apefea le fa’atumuga o le talosaga mo nei ituaiga o nogatupe e fa’aleleia ai Maota o le atunuu o alaala ai aiga. O nei nogatupe uma o lo’o fa’atupea lea mai le tinoitupe na maua mai le American Rescue Plan Act.

A i ai ni fa’afesili mo lea mataupu e mafai ona vala’au i le numera 633-4031 ma fesiligia mo Eterei Toilolo poo le  tuatusi fo’i o le emeli eterei.toilolo@dbas.as