Pago Pago - AMERIKA SAMOA

FA’AILOA MAI E FOMA’I ILOGA LBJ MEDICAL CENTER - SILI ONA MO’OMIA TELE LAVA TAUSIMA’I:

Ua faailoa mai e le Pule o Foma’i i le Falema’i LBJ Medical Center, Dr Iotamo Saleapaga, na ia faailoa mai o lo’o sili ona moomia Tausima’i mo le falema’i i le taimi nei.

O se saunoaga lea sa ofoina atu e le ali’i foma’i, i le taimi a’o iloiloina le latou tupe faasoa e le fono faitulatono ma ua va’aia ai fo’i le maualuluga o totogi o lo’o totogia ai sui ta’ito’atasi o le pulega o le tatou falema’i.

“I le taimi nei ua 70% o tausima’i galulue i le tatou falema’i o tausimai mai fafo, ae ua matua mana’omia ai lava se fa’atupega mo lea polokalama ia lava le aotelega o tausima’i mo le tautuaina o le mamalu lautele o le atunuu. E tatau ona una’ia malosi le fa’amalosiga o tupulaga a’o’oga i le Kolisi Tuufa’atasi e tauavea lea kosi mo ni tausima’i aoaoina lelei ma fai tikeri.”

Ua faailoa fo’i e Saleapaga, “E leai ni polokalama e fesoasoani e fa’aosofia ai le fanau talavou e tauavea nei kosi tausima’i i le Kolisi. E tatau ona taumafai atili e fa’atumauina le fiafia o tausima’i galulue tumau i Amerika Samoa nei.”

Ua faailoa mai fo’i e Dr Saleapaga, “Sa fa’atupe mai e le Ofisa o le Kovana nai polokalama fesoasoani nei mo le tau sailiga ma fa’aosofia le fiafia o fanau talavou e tau’avea kosi mo tausima’i ile Kolisi, ma sa iloga lava ona to’atele nisi o fanau a’oga na maua mai ai e amata a’oa’oina fa’apitoa i kosi fa’atausimai.”

“O se mea lelei pe afai ae toe faaauau lea lava faatupega ina ia mafai ona fa’afo’ia lea faafitauli e tulai mai pea, e le lava tausima’i pasi i le atunuu.

O lo ua feololo mai le tulaga o foma’i mo togafitiga o tagata e gasolo atu i le falema’i mo talavai. I le taimi nei o lo’o to’afitu le fanau o lo’o a’oa’oina fa’apitoa i Fiti i le taimi nei, ae o le isi to’alua ua fa’ato’a amatalia a la’ua a’oa’og laa i le ma,o le totogi o a’oga a nei fanau e $25,000. i le foma’i e fia a’oa’oina.

Ua fa’aalia se manatu o Senatoa Togiola Tulafono, afai e to’afa le fanau a’oga fa’afoma’i e fa’asikilasipi  Fiti o le a maua mai le pili e fa’aalu ai le $100,000. i le tausaga atoa.

Ua faailoa mai fo’i e Saleapaga, “Ua sili atu ona vave aoga mai le fanau ua aoaoina i Fiti ile tatou falema’i, nai lo le auina atu o i latou i Iunivesite i le Iunaite Setete, e umi le taimi e fa’atalitalia ai, ae le’i fo’i mai fo’i nisi e to’atele.”

Fa’ailoa mai fo’i e ele Pule Sili o le falema’i Moefa’auo Bill Emmsley i lea lava fonotaga o lo’o ua i ai le fa’atulagaga e fa’afaigaluega mai le isi to’a 20 tausima’i ae le’i uma lenei tausaga.

MAE’A SUESUEGA I MANU’A - MALAGA ESE ATU AU SUESUE USGS:

O le au Su’esu’e a le USGS sa malaga mai mo le faatulaia o masini e fa’amaumauina mai le malolosi ma le tele o luluga o le mafui’e i le Manu’atele, ua mae’a nei a latou suesuega ma ua fa’ailoa mai, ua amata ona tau le toe fa’alogoina fo’i ni luluga o mafuie i Manu’a.

I se fonotaga sa fa’atautaia faapitoa i le taeao o le aso Lulu na te’a i le Ofisa o le Temco sa fa’ailoa ai e Dr Natalia Deligne ma se sui fo’i mai le Fa’atonu o le Tusami Warning Center  Dr. Charles McGreery, ua la’ua faailoa mai o lo ua mae’a nei ona fa’amautu uma nisi o masini e fa’amaumau maia faitauga o luluga ma isi uma fa’amaumauga e aia i masini fa’apitoa ua mae’a fa’atutuina i le alititai o le gataifale o Tutuila, Ofu, Olosega ma Ta’u.

O le a toe fo’i i latou i Honolulu, ae o le a fa’aauau pea lava ona faia ni fa’ai’uga mai fa’amaumauga o le a faitauina lava e masini nei e tau fa’atulaga i le gataifale o Amerika Samoa, ina ia tau fuafua tatau i ai le taimi tonu e ono tupu ai se fa’alavelave fa’afuase’i.

E tusa ai o le tulaga o luluga i le Manu’atele o mafui’e ma le fa’aolioli mai o se maugamu i le Manu’atele ua fa’ailoa mai e vasega o sui suesue a le USGS, “O le faali’ali’a mautu lava o mea e tutupu mai le Siomaga e pei ona i ai luluga nei, lea ua toe faasolosolo lava ina le toe tele ma le toe malolosi fo’i ni luluga i le taimi nei. Peita’i ua mae’a fa’atulaga e le Malo galuega lavea’i ma toe fa’aleleia ma ala o suesuega mo fa’amaumauga ina ia mautinoa a tapena le to’atele mo taimi fa’aletonu e ono tutupu mai i le lumana’i.”

Ua  mautinoa, “O le Manu’atele lava latou pe afai e tupu mai se galulolo tele, e tatau ona vave lava le o loa i eleele maualuluga pe’a umi se luluga o le mafui’e toe malosi tele. Aua le fa’atali.” 

Mo Tutuila e na’o le 7 minute e tatau ai ona fa’avave ese mai eleele maualalalo ma aga’i atu i eleele maualuluga. O le isi mea ia matua fa’alogo i se umi o lulu pea lava se mafui’e. Ia fa’alogo lelei fo’i i le malosi o le mafui’e pe toulu ese mai meafale i mea o fa’atutu ai, ma ia malosi e tali tutusa ma le mafui’e sa a’afia ai i tatou ia Setema 29, 2009.

O le a fa’atutu pea lava o le a masini e fuaina ai le malolosi o mafui’e ma le umi e lulu ai, i alititai o le Manu’atele ma Tutuila ina ia fuaina i ai le taimi tonu o se fa’aletonu fa’anatura e ono tupu mai fa’afuase’i.

Na i ai le taimi na tuu fa’apitoa lava ia Dr Greery e na te fa’amatalamatala atoatoa ai le fuaina o nei masini o luluga ma lo latou malosi fa’atasi ai ma fa’amaumauga ua mae’a fa’amauina mai e i latou mai le Manu’atele.

TAUALOA E LE INITERIA LE GALUEGA A LE AU SUETUSI A LE APIPA:

O lo ua fa’ailoa mai le fiafia tele ma ua taualoa nei e le DOI poo le Matagaluega o le Initeria le fa’aiuga o galuega na feagai ai ma le Au Suetusi a le Asosi a Su’etusi o Atumotu Pasefika poo le APIPA.

O le latou fonotaga fa’aletausaga lea sa fa’atautaia ma ua atoa i ai le 33 tausaga o fa’atautaia pea, na amata mai le aso 29 Aukuso se’ia oo ia Setema 02, 2022.

O lea fonotaga sa fa’auia lea i ala fa’avetuale i feso’ota’iga tau tafa’ilagi ma e tusa ma le 500 sui mai vaega eseese o le Malo tele sa auai ai ma feso’ota’i ina ia latou fa’afesiligia fa’amaumauga ma fa’afofogaina fo’i tali mai le ‘au suetusi ma tausitusi a le APIPA.

E ui ina eseese fo’i le faigamalo ua fa’atautaia nei le Malo tele, i le ta’ita’iga a Peresetene Joe Biden, ua fa’ailoa mai o loo mautu mai lava feso’ota’iga ma feutaga’iga i le va o sui o le malo tele ma au tausi tusi ma su’etusi a le APIPAmae maise ai lava le matagaluega o le Initeria lea e fa’auia mai ai le tele o fa’atupega mo Amerika Samoa mai le Malo tele.

Ua ofoina mai fo’i i lea lava fonotaga nisi o tima’iga ma a’oa’oga fa’apitoa mo sui uma sa usufono e tusa o fa’amaumauga ma tausiga o tusi i lipoti o fa’aletupe ma isi mea uma e fesoota’i CPE lea e moomia tele i fa’amaumauga o lipoti tau tupe ma tausiga o tusi a le Malo mo le silafia a Su’etusi mo a latou lipoti.

Ua fa’ailoa mai i le fa’aiuga o le fonotaga a le APIPA 2022, ua fa’aauau pea lava ona fa’atumulia avanoa mo sui usufono i tausaga ta’itasi ma ua fa’aopoopo fo’i nisi o mea e mafai ona fa’aofi i le polokalama atoa o lea fonotaga, e aoga tele mo aufaigaluega a le Malo tele, Iiteria ma le Malo o Amerika Samoa i vaega e aoga tele mo le fa’amauina o lipoti o tupe, tusia o lipoti, fa’asoasoaina o tupe toina mai, avea ai ma nisi o ta’ita’i o nei vaega ma ofisa tupe, mea e ono a’afia ai fa’amaumauga ma le fa’atualgaga lava o lipoti uma ia mautu a’ia’i.

O fa’amaumauga aotelega ua mautu ai le 2,785 le aofai o tusi pasi ua taua’aoina talu mai nei tasuaga e tele na fa’atautaia ai nei fonotaga ma ua fa’aaluina fo’i le 7,028 itula o a’oa’oga fa’apitoa ma fonotaga sa fa’atautaia ai.

O le fonotaga a le APIPA 2022 sa fa’atautaia e le vaega o le APIPA mai FSM e le altou Ofisa o le National Public Auditor ma sa amatalia lava fo’i le fonotaga lenei le ali’i Peresetene o le FSM David Panuelo lea sa ia tima’ia fo’i le fonotaga i ona sui usufono uma lava, “Ia fa’ataua lava le fa’amaoni o fa’amaumauga uma lava ina ia faigofie mea uma tau le tou faiva fa’atino mo tatou faigamalo uma.”

Sa suia fo’i le tatou Malo, e le susuga le Sui Territorial Auditor Sualauvi Su’a ma nisi o lana aufaigaluega i lea fonotaga fa’atautaia tau feso’ota’iga tafa’ilagi.