Pago Pago - AMERIKA SAMOA

FA’ASEA FAIPISINISI LEAI NI LATOU SIAKI MAI LE $25,000 MO PISINISI MAI DOC

Ua sailia mai e faipisinisi laiti se fesosoasoani ona ua fiu i latou e fa’atali se alamanuina mai le ta’i $25,000 mo pisinisi sa aafia i puipuiga o poloaiga o le COVID-19. E le gata i lea, sa fa’atumu muamua fo’i talosaga mo se fesaosoani tupe e ta’i $10,000 peita’i o le tali lava e leai se mea e maua, ua fa’aleaogaina nei talosaga.

O le to’atele sa vala’au atu i le numera a le DOC ma fa’ailoa mai, peita’i ua fa’ailoa mai e le sui mai le itu sa fa’aulu tonu i ai nei talosaga, ua leai se toe vaega tupe o totoe. Ua mae’a lea fo’i fesoasoani ua tapunia. O le tagi a nei tina faipisinisi i le maketi i Fagatogo e afua mai, “Sa sili ona pagatia i matou, sa umi lava ona tapunia i matou e le fa’ataga ona tatala matou faleoloa, ae ua mae’a tatalaina lava isi faleoloa uma. Aisea ua le mua’i maua ai e i matou le fesoasoani, ae o matou o faipisinisi sili ona vaivai le tamaoaiga i le atunuu? E fa’amoemoe fo’i matou oloa gaosia i o matou lava lima, ae o lea e le maua se fesoasoani?”

Na oo mai lea i le itu o faipisinisi iloga i le atunuu, ua mae’a fa’auia mai ai fetusia’iga tau emeli i le va o le fapisinisi o le Faleoloa e lua i totonu o le atunuu, ma ua eseese fo’i i la’ua e pulea ma fa’atautaia laisene e lua o nei pisinisi. Na fa’aulu le talosaga a faleoloa nei e lua ia Aperila 26, 2022, ae ua te’i ua fa’ailoa mai i se emeli, e le lua ni meaalofa e avatu i se pisinisi e tasi, poo le faipisinisi e tasi, ae lua ana talosaga.

Ua toe tusi atu le emeli a le faipisinisi lea, o lo’o eseese pisinisi e lua, o le isi e fa’afoea e le tama matua ae o le isi pisinisi e fa’afoea lea e lona atali’i, e eseese fo’i igoa o faipisinisi e lua. Lua laisene eseese ma e le tutusa fo’i pisinisi nei e lua. E le’i i ai fo’i se fa’amatalaga na tuuia mai i le taimi o le fa’asalalauga na fa’alauiloa ai nei fesoasoani tau tupe $25.000 e le mafai ona avea fesoasoani nei i se faipisinisi e lua pe tolu pe fa ni ana pisinisi.

Ua mae’a ona fetusia’i ma fa’auia atu pepa o laisene ma e fa’afoea nei pisinisi i le DOC, ae ua fa’afo’i mai le isi tali mai lea Ofisa ua suia mai le tagata e fai mai, “Fa’afetai ua maua le ‘auga lea ua mae’a fa’asa’o, ae peita’i ua mae’a le taimi sa tatau ai ona fa’auia mai lau talosaga, ua le toe i ai se tupe mo lea alagamanuia mo le aufaipisinisi.”

O le tali atu a le faipisinisi lea, ua fa’ailoa ai, lona fa’agau le malie, ona ua le taga’i le sui na saunia maia le tali i lana emeli, o le talosaga a le faipisinisi lea sa fa’aoo atu lea ia Aperila 26, 2022, ae le’i taitai tapunia le taimi na atofa e fa’amae’a ai nei talosaga.

O le mea sili ona faigata ona talia gofie e tagata faipisinisi, o le fa’aumiumi ona fa’atali o latou tali, ae emo ane le ata, e lea e maua talileleia mo faipisinisi Saina na mulimuli fa’aulu atu latou talosaga mo nei fesoasoani tau tupe toina mai e le Malo, lea ua talileleia e ta’i $17,000 le tasi ae $15,000 leai ma se eseesega o latou pisinisi, sa tatala fo’i ma tapunia i taimi atofa o le fa’asa, ae misi atoa ia lea sa ia talanoa i na faipisinisi e talosaga ni a latou fo’i alamanuia nei, ina ua mae’a tapena lana fo’i talosaga.

Ole galuega sa fia fa’atautaia a le faipisinisi lea na matua ai ona talosaga, ona o le fia fa’aleleia o lana Pakaga o ta’avale i lumafale o lona faleoloa. O lea ua toe fa’asoa lava lenei ali’i faipisinisi e na te taumafai e fa’atupe lava e ia lea galuega, ae o se fesoasoani sa ia manatu i ai, aua e hire e ia le pisinisi suapalapala ma le vasega o tagata Samoa uma lava e latou te fa’asimaina lana pakaga fou ua fa’agaoioia nei.

“Ua fa’amatu’u atu a’u pepa ma fa’amaumauga o talanoaga ina ia mafai ona e taina ai se tala, e fa’ailoa atu ai i ta’ita’i o le Malo, e le o nofomalie i o matou loto lenei fa’asalalauga sa oo mai, ina ia talosagaina ni fesoasoani e taua’ao sa’o atu i le aufaipisinisi sa oi ona o le tau fa’afaigaluegaina o latou tagata, toe fa’aititia taimi e tatala ai latou pisinisi ona o le fa’asa o le Covid-19. Pe afai lava e le tutusa ai lava fa’apea ona va’ai le Ofisa o le DOC i tagata faipisinisi, se ua matou iloa e le taualoa i matou uma i la outou silasila. Ua fai fo’i ma nisi e tou te masani ai ua taua’ao i ai fesaosaoni, ae o lea e fa’asea mai fo’i nei sui matutua o tina o le atunuu, e le o maua fo’i se latou alagamanuia. O ai ea e ave i ai le fa’amua ao ai e tuulafoa’ia a latou talosaga na fa’aulu atu?,” le fa’afesili ia ma folasaga fa’amau ua tuuina mai e fa’auia atu i ta’ita’i o le Malo.

Pe ana fai e mautinoa mai se tali e faigofie ona malie le loto, ae o le so’ona fai mai lea, “A ou fai atu ua uma le tupe lena, o le tali lava lena e avatu.” O lafoga fa’apena e le fa’anofo filemu ai se agaga o se tasi, ua avea ma se mea e pupuna atili a’e ai le to’atama’i ma saili loa i luga atu o oe lena e saofa’i i lena nofoa, ua tatau ona suia oe, aua e te toe tautuaina le atunuu.

“Lea ua matou va’ai i fua o na tupe uma, ua siitia totogi o e ta’ita’i ma i latou uma ua popoto ma atamamai i faiva ua outou se’ei ai, ae va’ai o le silafaga a le Atua e ao ina tou fefe i ai, aua o le tautua e leai se alofa, e le umi ae va’ai patino i mea e tutupu mai ai.  Fa’afetai fa’asilasila mai ma aumai le lisi o e ua maua na fa’amanuiaga, pei lava ua fai ma se tau ane ai. ae o le a tuu ai faapea, sei filifili i matou uma i le Maketi, e sili lava pe a avea au ma sui, e fia maua se taimi ma le Kovana pe a taliu mai i fanua le faigamalaga.”

O se toe upu lea a le tina matua faipisinisi Vetereni i le Maketi, lea ua manatu e tulituliaupu sona avanoa e feiloa’i ai ma le Kovana, ia manino mea uma i ona lagona ma lana va’ai.

FA’ASEA FAIFA’ATO’AGA - LE’I MAUA SE TALA I LE $1,000. MO MEAFAIGAUEGA

O le polokalama lea sa fa’atautaia e le Matagaluega o Faifa’ato’aga, sa fa’ataga ai le sui faifa’ato’aga e alu i le faleoloa o le Neil’s ACE. Home Center poo le Tool Shop, e tuufa’atasia mai ai sana lisi o tau o meafaigaluega e faaalu ai le $1,000 ona fa’ato’a fo’i ane lea i le Ofisa o Fa’ato’aga i Tafuna e fa’aulu ai sana talosaga ua fa’amuta i le aso Faraile na te’a nei.

Peita’i, na matua fa’asea mai ai nisi o le mamalu lautele o faifa’ato’aga, i latou nei e fai ma latou le la’u o latou fa’aeleeleaga e faatau atu i a latou makesi i autafa o alatele, fa’apea fo’i ma le maketi, aua o lea ua va’aia e nisi, e leai lava ni fa’ato’aga ale to’atele ua talosaga, ae fa’ato’a iloa e i latou lea alagamanuia, ona ua fa’ailoa mai e nisi sa latou fetaui, ae toe tasi le aso uma lea alamanuia.

“Ua toe fa’atotope atu nei, ae okaoka se tumu o laina o lo ua i ai, o se mea sa tatau ona leva ona fa’ailoa maiina ua mautu mai le vaega tupe lea e fesoasoani patino ia i matou e fa’atau ai meafaigaluega e aoga mo le fa’ato’aina o le laufanua mo fa’ato’aga,” o se tala mai lea a nisi o lo’o mautinoa lava o fai ma’umaga i latou.

Na i ai le nofoaga sa fa’asinotonu i le Ofisa o Fa’ato’aga i le Diaster Resilience Summit 2022 i le vaiaso ua te’a, peita’i e le’i talanoa pe fa’asoa mai fo’i ta’ita’i o lea Matagaluega i lea poloalama.

Ua fa’ailoa mai na fa’amauina e tapunia le Ofisa o le Matagaluega o fa’ato’aga i le itula e 8:00 i le afiafi o le aso Faraile ina ia mafai ona talia uma lava talosaga a nisi sa matua pisi ai e fa’atumu ma taua’aoina atu i le Matagaluega lea ona e fia maua lea alamanuia o mea faigaluega aoga i le fa’ato’aina o laufanua mo fa’ato’aga.

2 SUI AMERIKA SAMOA AUAI FONOTAGA O LE PASEFIKA TECHCAMP I NZ

O le tamaitai faia’oga Sabrina Sulua’i-Mahuka ma le tamaitai o Cassie Tuineta Mahuka, o i latou ia ua maua avanoa e auai ai mai Amerika Samoa i le fonotaga a le Pacific Leaders TechCamp lea e usuia i Niu Sila.

O i la’ua nei ua atoa i ai sui e to’a 50 o talavou mai atunuu o le Paseika i lea fonotaga o lo’o talimalo ai Niu Sila ae o lo’o ua avea ma latou pa’aga mautu mo lea taligamalo le US State Department lea ua soofa’tasi ma le Cultural Vistas e faatautaia le TechCamp lea mai ia Oketopa 29-31, 2022.

Ua fa’ailoa le agaga fa’afetai o le ali’i Emepasa o Amerika i Niu Sila, Samoa, Niue ma le Atu Kuki, le susuga Thomas Udall, ona ua maua e le Malo o Amerika se avanoa lelei e talimalo ma fa’atautaia lea fo’i fonotaga taua.

“O se avanoa lelei lea ua mafai ona soofa’atasi uma ai sui mai atumotu ma tima’ia i latou ina ia toe mae’a le fonotaga, taliu i o latou atunuu, ma avatu ai se fe’au taua ua maua mai, e fesoasoani atili lea i taumafaiga eseese a latou malo ma o latou tagatanuu, ina ia nofouta i mea e ao ina osotatau e fai i aso fa’aletonu o le tau o fa’aolioli mai, ma ia galulue fa’atasi e toe fa’aleleia vave le siomaga pe a tuana’i nei aso leaga,” o se tala lea a Udall.

O Sabrina ma Cassie o nisi e aiga ae ua la’ua maua lenei avanoa ona sa talosaga ta’ito’atasi lava i la’ua, ma e fiafia fa’atasi fo’i i la’ua e auai i taumafaiga uma i le atunuu e tete’e atu i le fitaituga o le Siomaga o Amerika Samoa ona o suiga matuia o le Tau i le lalolagi.