Pago Pago - AMERIKA SAMOA

FA’AALIGA A LE AUFAIFA’ATO’AGA “FARM FAIR” 3 ASO

O le aso Lulu na tatala aloa’ia ai le fa’aaliga a le Aufaifa’ato’aga, “Farm Fair”, ma Togala’au, fa’apea fo’i ma sui e fia fa’aalia ma fefa’ataua’i a latou mea tausami eseese.

Ua iloga le fiafia tele o le aufaifa’ato’aga aua ua latou aumaia i le fa’aaliga, fua sili ona lelei ma matagofie o latou fa’aeleeleaga ina ia fa’aalia ai. O lo ua fa’atulaga fo’i ma latou tau ina ia mafai ona filifili sui o gasolo atu e maimoaina lenei fa’aaliga, pe ua manatu ina ia fa’atauina mo aiga. 

I le itu o la’au toto fefa’ataua’i, ua va’aia le tele o la’au eseese e mafai ona fua lelei mai ma fa’amatagofie ai latou tafafale ma lumafale. Ua sili fo’i ona laufofoga fiafia tina lalelei o lo’o ua lava tapena atu latou la’au toto mo le fa’aaliga ma fefa’ataua’iga. 

O le malae i tafatafa o le Ofisa o le Veterans Affairs i Tafuna o lo’o faia ai le “Farm Fair” e o’o mai i le aso lenei, aso Faraile. 

Mai le vasega o faifa’ato’aga ua sauni le susuga Mikaele Saui’a mai Mapusaga, o ana Ta’amu Niu Kini ua matua uumi ua toeititi tutusa le uumi o ta’amu ma le ali’i fa’ato’a fanua.

Soso’o ane ma le faifaato’aga o Luteru Simi ma le faletua o Me Simi mai Futiga. Ua folasia la’ua taamu toga, Talo Niue, popo, Fa’i Samoa ma sasalapa lea e moomia tele mo togafitiga o gasegase o le atunuu.

Ua soso’o mai i le atugafale’ie ia Suitupu mai Malaeloa ma ua matua matagofie lana laulau i le tele o Esi lapopo’a ua pula lelei, tetele maukeni, talo ma Niu Suamalie.

Va’aia le fiafia mai o le susuga ia Togia’i Malele mai Malaeloa, ua folasia ana Ufi palai, talo, fa’i, Maukegi, Fa’i Samoa, Misiluki, Ta’amu Toga ma Manioka.  O Junior Sio mai Faleniu ua faaalia fo’i ana talo, manioka, Fa’i Popo, Fafie mo le tapenaga o fa’apusa, fa’i Samoa ma fa’i paka ae ua i ai fo’i ma esi.

E le’i misia tina faifa’ato’aga i lenei fa’aaliga tele a le aufaifa’ato’aga, ua tapena mai fo’i tina i le tele ua ia gafatia i lenei fa’aaliga mai lana fa’ato’aga i Ottoville. Tolo uumi, Fa’i Samoa, fa’i Papalagi, Manoka, ta’amu Niu Kini, talo, esi, Tipolo, fala ma fafie, ae ua tapena mai fo’i ma ona la’au toto matagofie ua mae’a totoina lelei i apa, e aofia ai ma Aloe o la’au e aoga i gasegase o le fanau.

O le isi faleie ua fa’alava mai i le itu i sasa’e o le malae, ua fa’ato’a nofoia mai e le aufaifa’ato’aga mai le falelima i sisifo, lea sa matua iloga ai ona la’u mai fua o fa’aeleeleaga a le susuga Fa’aumuumu Fenika mai lana fa’ato’aga mautu i Taputimu. Ua fa’aalia le talo ua fuataga lelei, fa’i ma ta’amu ma ua laufofoga fiafia mai alva le faletua o Gogosina Fenika aua fa’atauga o le ulua’i aso o le fa’aaliga. Fa’ailoa mai e le tina, “O le sapalai latou a fa’aititia loa ua toe soso’o mai, o loo tele lava le tapenaga e mafai ona aumaia ae fuafua mai fo’i i le taulia maumau fua o le eleele.”

Soso’o mai i ai o le poloka a le susuga Jason Isaia mai Aoloau ma o lo’o matagofie lana polokla ua folasia ai ana talo ma Fa’i. O le atugafale’ie lava lea ua soso’o mai ai ma Anetere’a Atonio mai Pavaia’i ma Ilai Eli mai Pavaia’i i la’ua folasaga fo’i o fua o fa’aeleeleaga.

O le vaega lea o lo’o soso’o mai lava ma le vaega o Fale’aiga ma ua matauina ua mae’a fa’atau atu le Supoesi ma le Vaiasalo mai le poloka o lo’o fa’atu ai le fale’aiga o le tamaitai o Ashley Otele, lea ua suia mai si ona tina o Ake Otele e masani ona fa’atautaia lea vaega o le tautua lautele i le tele o fa’aaliga fa’apenei. O latou fa’ato’aga o Futiga ma Vaitogi.

Ua i ai fo’i le poloka ua tautua mai ai le aiga o Lai Ah Ching ma ua fa’atautaia mai lea e le tina o Teuali Ah Ching ma si ana tama o Delzalynn Ah Ching. O le lalelei lava o le au tautu o le taulia fo’i lea o le vaisalo, supoesi ma ‘aiga mataogfie ua lisia i le menu fa’apea ma le supo ua alumia i lea taeao.

O lo’o i ai pea lava lou taimi e te oo ane ai mo sau fa’atauga lelei, ma o le a fa’ato’a mae’a lenei fa’aaliga tele a le aufaifa’ato’aga, au fai lafumanu, aufai togala’au, ma le Au Kuka manogi mo tausami Samoa ma isi uma tausami e fa’afiafiaina ai le aiga, i le aso Faraile nei.

Ao fa’agasolo le maimoaga, sa fesiligia fo’i le atunuu i tulaga o fua o fa’aeleeleaga i tulaga o la’au ‘aina mata e aoga tele i le tausiga o le soifua lauelelei ma aiga paleni a tagata i aso ta’itasi. Ua iloga mai i le amataga o lenei faaaliga e le’i tele atu ni Kapisi o so’o se ituaiga, tamato, pi, kukama ma isi uma mea fa’apena, ae manatua o le vaega lea e masani ona o atu patino i taimi ua tulata ai i taimi tonu o fa’atauga a le mamalu lautele o le atunuu. 

Ua matele lava i fa’i pula, esi ma maukeni fua o fuala’au ‘aina ma fuala’au ‘aina mata ua va’aia i le amataga o le ulua’i aso o lenei fa’aaliga. 

Ua iloga fo’i, e le o toe popole le isi aiga i le tapenaga o le suavai mo le Lotu a Tamaiti, o lea o le a saunia mai le fa’aaliga lenei le suavai o le Aso Sa Pa’epa’e o le Fanau.

TATALA GALUEGA EKALESIA METOTISI - TAU AOFA’I “$3,504,740.57”

O galuega e tolu ua mae’a a le Ekalesia Metotisi, Sinoti i Amerika Samoa sa fausia e le Nana’s Construction na amata mai ia Ianuari 05, 2021 ae mae’a ia Aperila 22, 2022. 

“E ui ona o se vaitau uiga i le soifuaga galulue o le Kamupani ma le Ekalesia lea sa fa’atautaia ai le galuega lenei, ae o lea ua fa’amanuia le Atua, ae sa le asa fo’i le galuega ma fa’aletonutonu na feagai ai, peita’i e fa’afetaia, O le mea sili, ua ia te’i tatou le Atua, ua mae’a ma o se Ala lava o le Atua le galuega sa fitaituga ai le pa’ia lasi o le aufaigaluega ma ekalesia e fia i lenei Sinoti, fa’amalo le galulue,” o se upu tomua lea o le tala o le galuega na fofogaina e le susuga le Failautusi o le Sinoti Amerika Samoa.

Mai le sauniga amata, sa tula’i le afioga le Peresetene o le Metotisi mai Samoa, Pres. Faulalo Eti Pa’aga e taita’ia le sauniga i fafo o le Malu e tatala aloa’ia ai faitoto’a o le Maota tele ua tula’i ma ua mae’a lelei. Sa ia mua’i fa’alauiloa le tolu galuega o le a tatalaina fa’atasi ai i lea sauniga mamalu i fafo o le Malumalu, ina ia fa’aaogaina loa e le Sinoti Amerika Samoa pe a mae’a le sauniga mamalu i totonu o le Maota Tele ua ususaina nei. 

O le Fale Tele, O le Pakaga o Ta’avale ma le Pa e si’omia ai nei aseta a le Sinoti iinei mo le Ekalesia Metotisi Aoao. O nei poloketi uma ua fa’ailo, o se i’ugafono a ta’ita’i o le Ekalesia sa fa’atalosaga, ina ia fa’atumauina ma toe sailia nisi agaga fou e fa’aolaola tumau le Ekalesia i lenei Sinoti. O i latou sa moemiti ma amata mea i lenei fa’atofala’iga, ua momoe mai i latou, ae o lea ua ‘ae’ae manu ua ulu e lenei nofoa’iga

O le faletua o le Peresetene Aoao, Fialelei Eti Pa’aga lea sa ie ootia le lipine i lea sauniga, e tatala aloa’ia uma ai nei galuega tetele. Ona ua amata mai le timuga i lea taimi tonu sa fa’avave ai ona tapena i totonu le aofai na poto mo le fa’amoemoe, ina ua tatala aloa’ia le faitoto’a tele ma ulufale tagata uma mo le sauniga o le fa’apa’iaga o le Faletele. O iina sa mafai ai ona tomauina e le Peresetene Aoao o le Ekalesia Metotisi lona nuu ma ia fa’ailoa lona agaga fa’afetai i le Atua aua ua tula’i le Ala a’o se Nila e iloga ai “Ua ia te’i tatou le Atua!”

Ina ua tula’i le failautusi a le Sinoti Amerika Samoa mo lana lipoti aloa’ia, sa ia mua’i tapa fo’i le afioga a le Atua mo lana folasaga.  O le auga o le fa’afetai a le failauga mo le tala o le galuega sa si’itia mai lea i le Salamo 66: 8-11, lea na mua’i fa’afetaia ai e le Nuu o le Atua, ma tauanau ina ia fa’alogo mai ona fofoga i le alaga o le latou fa’afetai. Aua e ui ina tofotofoina i latou e pei o le Ario ua mae’a tofiotifina i fita ma mea e tutupu a’o fa’atino le galuega, ae o le Mea Sili, ua ia i latou lava le Atua!

Na toina mai fo’i le Upu mai ia Mareko 9, 21-24 ..”Ua lafo so’o fo’i i latou i le afi ma le vai, ina ia fano ai o ia, ae peita’i, ai se mea e te mafaia, ia e alofa mai ia te’i matou, ma ia e fesoasoani mai ia te’i matou. Ioe sa le ‘asa le galuega ma le fa’alogo mai ua vesivesi, ae le o matua fememea’i, ua outou gafatia ona toe so’o le fau ma le fau ma toe fa’aauau le galuega, o le vi’iga e le ia te’i tatou, ae ia fo’i i le Atua e ou le vi’iga ma le mamalu. O auauna le aoga lava i tatou uma.”

Tau na taua’aoina atu i le Matuofaiva e aofia ai ma le ata o le fale atoa e $3,050,000 lea ua fa’atulaga mai e le tau o le galuega - Tino ole fale e $1,125,000. Tau o Sima ma mea uma mo puipui o le Maota atoa e $845,000. Totogi o le Leipa ma masini e fa’afaigaluega mo le galuega atoa e le Kamupani, o mea ia mai nisi kamupani, e $780,000. Maua ane ai le aotelega lea e $3,050,000. e toina atu ai ma le ata e tusa o le 10% ole tauaofai o le galuega.

O nisi o mea na fa’aopoopo mo galuega uma e tolu i le tau atoa e aofia ai: Kamupani a le Titanic mo le latou tautua sa sapalai mai e $4,250 le siaki na taua’aoina atu; $250.00 mo isi sapalai; $2,450 kamupani a le Silva; o le tau aofai o le Pa e $94,000.; Tau o Moli e 9,470; Faitoto’a e $21,000.; Galuega atoa o le Pakaga $300,000. galuega o le Fa’aleoina o le Malu ma ona meafaigaluega uma $8,700.; Moli i fafo o le Malu e $14,000. Aotelega o isi galuega & pili fa’aopoopo nei e $454,740.57.

Tuufa’atasiga o le tau aofai uma o nei galuega e tolu; Faletele, pakaga o taavale ma le Pa e Si’omia ai ua tula’i mai i le $3,504,740.57. 

Na patipatia e le mamalu uma na aofia lea tala o le tupe fa’aalu mo le galuega, ma sa fa’ai’u loa le sauniga mamalu i le tula’i mai o le susuga le Fa’atonu Sili o galuega ma le pemita ua mae’a fa’ailoa ai le agava’a o lenei faletele, e fa’atino uma ai fa’amoemoe ua mae’a fa’atulaga e le Ekalesia Metotisi i lana Sinoti Amerika Samoa.

Sa mua’i fa’afetaia fo’i e le tamaitai fa’atonu o Galuega Lautele a le Malo, Faleosina Faiai Voigt, “O le fa’afetai ona e leai lava ma se fa’alavelave na a’afia ai le aufaigaluega ma tagata uma fo’i o le Ekalesia i lenei galuega tele, ae o le fa’amalo ma le fa’afetai tauata’i e fa’ao’o atu lea i le Matuaifaiva ma le falefa o le aiga Salemalama, Nana’s Construction Company, aua o lo’o tatou galulue fo’i mo le fausaga o le Maota o Fa’amasinoga i le taulaga, o se tasi fo’i o maota tele i le atunuu, fa’afetai le fa’ato’ato’a a’o olooloia i o outou faiva o le fau mea lelei i le atunuu. E moni lava, e leai se mea e o lua ma le “Woman’s Touch”[Limalelei o tina] i galuega tau fa’atula’i i le atunuu.”

O le aiga tele na talimalo ai le Metotisi Sinoti Amerika Samoa i le mamalu lautele na aofia mai a latou malo fa’aaloalogia se’ia o’o lava i e uma na molimauina lea aso tele i lo latou soifua auauna i le Atua.

I fafo ane o le Faletele i ona lumafale o lo’o ua mae’a fa’amautu i ai le Ma’a Fa’amanatu a le Sinoti Amerika Samoa, mai augatupulaga o le Ekalesia Metotisi ma o latou Fa’afeagaiga sa galulue ai e avea ma Sea o le Sinoti, o nisi o i latou nei sa auai i le taumafaiga mo lenei galuega tele ua mae’a fa’atuina.