Pago Pago - AMERIKA SAMOA

TIMA’IA LE ATUNUU - MASINA O OKETOPA TAUALOA GASEGASE O LE MAFAUFAU

O le masina lenei o Oketopa, o le masina o le tausaga o lo’o ua fa’atulaga e le WHO ina ia taualoa ai gasegase o le Mafaufau lea e fa’amamalu ia Oketopa 10, i tausaga ta’itasi i le lalolagi atoa. 

Ua fautua ma tima’i mai le tatou Faipule i le Konekeresi, Uifa’atali Aumua Amata, ina ia lalamua ai le tatou teritori i lenei taumafaiga, ia manatua ma fa’alauiloa ai togafitiga ma taumafaiga uma ina ia fa’aititia a’afiaga o tagata lautele o le atunuu, i gasegase tau le mafaufau.

E le gata i lea aso iloga mo le lalolagi atoa, ae ua fa’amauina fo’i le aso Oketopa 08, i tausaga ta’itasi i le Iunaite Setete, e taualoa ai le gasegase o Omiga o le Mafaufau ona o le tele o mea e popole ma lutia ai le tagata, Depression Day. O lona uiga o le masina o Oketopa ua fa’atulaga lava e le Iunaite Setete o se masina e siakia ma faia ai talavai mo le mamalu lautele o le atunu’u i gasegase tau le mafaufau.

Ua tima’ia fo’i tagata uma ina ia amana’ia ma taualoa fa’asalalauga uma o afuaga o nei gasegase aua e le faigofie ona toe sa’oloto mai pe toe togafitia nei ituaiga o gasegase pe a oo ina aafia tumau ai nisi o le atunuu. Ia amana’ia fo’i le taga’i toto’a i auga o gasegase ina ia vave ona iloa ma taumafai e togafitia. O lo ua fa’ailoa mai lava le aoga tele o le vave iloa ma togafitia loa gasegase tau le ova le popole ma atuatuvale ina ia le mautu lea ituaiga o gasegase i mafaufau o tagata lautele ma avea ma ala e mou malie atu ai le malosi o le mafaufau.

Ua fa’ailoa mai e le vasega o foma’i o le Mafaufau, “O le a mafai ona matauina auga o lea gasegase o maua ai nisi i lea gasegase, a’e le’i fafaitetele, ma e eseese fo’i ala e iloga ai le a’afia o se tasi i lea gasegase.”

O le masina fo’i lenei e vaai toto’a ai le Iunaite Setete atoa i gasegase e afua ona mita’ia i tulaga o fanau e le manofo lelei, ae pisi na’ua lo latou olaga ma mafaufau, lea e fa’aigoaina o le Deficit/ Hyoeractivity Disorder ma ua matauina e a’afia ai le 17miliona o alo ua soifua a’e i le Iunatie Setete, ma ua aofia ai fo’i ma nisi ua matutua le soifua i le atunuu atoa.

O le tele o tima’iga ma gaoioiga fa’atino mo togafitiga ua matauina ai, ua fa’afetaia le mafai pea ona soifua o nisi ma lea lava gasegase o le mafaufau, ADHD, ma o le masina fo’i lenei ua taualoa ai nei taumafaiga uma ma fa’afetaia i latou o lo’o tausia fa’apitoa i latou o a’afia i nei gasegase o le Mafaufau i totonu o aiga, ae maise o faia’oga o lo’o nafa ma le a’oa’oina pea lava o nei fanau ma le tausiga fa’apitoa i nofoaga e tausia ai fanauiti.

OKETOPA 11 TAPUNIA LESITALAINA O TAGATA PALOTA

O le itula e 4:30 i le aoauli o le aso ananafi ua fa’amuta ai le lesitalaina o i latou mo le palotaga ia Novema 8, 2022. 

O le toe aso fo’i lea ua fa’atulaga e mafai ai e so’o se tasi e fia palota, ona suia le itumalo e mafai ona palota ai ona o lo’o nofomau ai o ia i lea itumalo. E fa’apena fo’i ma nisi o lo’o ua fa’aulu maia ni suiga i o latou suafa o le palota. 

O le aso Gafua, i le vaiaso lenei - le aso malolo, sa tatala ai le Ofisa o Palota ma e o’o mai i lea aso e tusa ma le 14,178 suafa o tagata palota i le lisi o le au palota mo Novema. 

Ua fa’amoemoe le Ofisa o Palota e fa’alauiloa i le po anapo pe o le taeao nei le aofaiga o tagata palota ua ma’ea ona lesitalaina mo le palotaga ia Novema.

Mo se fesili i le tulaga o le palota i lenei tausaga telefoni Ofisa o Palota i le 699-3571 / 699-3572.

SAILIA PEA MEAFAIGALUEGA DMWR - FAD-C SA FA’AOPEOPEA I LE SAMI

Ua lipotia e le Matagaluega o Faigafaiva ma le Vaomatua, o lo’o tausailia pea poo ai se tasi ua ia ave’esea se tasi o latou mea faigaluega sa fa’aopeopea i le gataifale poo le ogasami e latalata i le afio’aga o Vaitogi. O lea mea faigaluega e aoga tele e iloga patino ai se ogasami o lo’o matele i ai le ‘ia o le gataifale. Ua tusia i lea meafaigaluega o upu nei “FAD-C”

Ua fa’ailoa e sui o le Matagaluega o le Gataifale ma le Vaomatua, o le mea faigaluega lenei sa fa’aopeopea lea e tusa ma le 5 maila le mamao mai Vaitogi, ma ua ave’esea ae ua tuu na’o manoa e mafai ai ona maka pui i lena gataifale.

Ua fa’ailoa fo’i, “E le na’o se tasi lea  ituaiga masini ua fa’aopeopea i le gataifale, ae ua fa’aaogaina ina ia mafai ona fa’apoapoa mai le tele o i’a i lea ogasami, o lona uiga e matua aoga lava nei FAD i le vasega o tautai fagota ma le aufaifaiva. O le a tele fo’i le kesi e sefe ma le taimi o se au fagogota e fa’asao pe afai o le a i ai se FAD mo i latou.

Pe afai lava o lo’o i ai se tasi ua silafia se tasi o i ai lea FAD, fa’amolemole o le a mana’omia lava ona fa’ailoa mai i le Ofisa o le DMWR i le numera telefoni 633-4456, ona o atu lea o nisi e aumaia i totonu lea masini aoga tele.

FA’AMANATU LE 150 TAUSAGA AUAUNAGA A LE SWIRE SHIPPING

O le aso Tofi o le vaiaso na te’a sa fa’amanatuina ai le atoaga o le 150 tausaga talu ona faavae le Kamupani mo fela’ua’iga o uta i va’a oloa a le Swire Shipping i le atuvasa i le va o malo eseese o le lalolagi, ma ua aofia ai ma Amerika Samoa i a latou tautua.

O le aso Lulu sa fa’atino ai lea fa’amanatuga i Samoa, ae fa’ato’a faia lea fiafia i le aso Tofi i le tatou malo, ona o le eseesega o taimi ua i ai nei i lo tatou va ma le Malo Tuto’atasi o Samoa. Sa fa’atino lea fiafia i le Sadies by the Sea i Utulei ma sa vala’aulia uma ai e le Pulega ma le Aufaigaluega a le Swire i Amerika Samoa a latou paaga fa’apisinisi ma nisi fo’i o sui mamalu o le Malo , e taualoa ai le latou tautua i Amerika Samoa nei.

O e sa auai mai mo lea faamoemoe maualuga a le SWIRE na fa’atasi mai ai le latou sui iloga mai le SWIRE i Fiti, Alex Patterson, ma faatasi ai ma le latou pule sili i’inei, Rob Hardman  ma le aufaigaluega masani a i le latou Ofisa Va’a mo fela’ua’iga. 

Ona o lea fo’i Kamupani Va’a mo fela’ua’iga o Oloa eseese e le’i umi le tautua i Amerika Samoa nei, ae ua iloga lana tautua i atunuu tetele o le lalolagi, o lea sa fa’ailoa ai e le susuga Alex Patterson, “O lea ua fa’amautu mai le sootaga  le matou tuautua i Amerika Samoa, ma ua iloga fo’i le aoga tele o lea sootaga, ma ua i ai le fa’amoemoe, o le a matua fa’aaogaina tatau lava e le SWIRE lea so’otaga i tautua eseese o lo’o fa’atino fa’avaomalo i le lumana’i.”

Ua to’atele i latou sa auai i lea fiafia ma ua fa’apea fo’i ona auai ai ma sui mamalu o le Ofisa o le tatou faipule i Amerika Samoa, ma ua iloga ona fiafia fa’atasi ai i latou ma e uma na auai i lea afiafi a tamali’i. Fa’afetaia fo’i le auaunaga maeaea a le SWIRE ma le latou aufaigaluega masani ae maise le ali’i pule Rob Hardman ma lana aufaigaluega i aso ta’itasi, lea e aofia ai Mike Gebauer, Jessie, Mao, Sherry, Sina ma Virgil, malo le galulue matagofie fo’i le fa’atasiga ma le fiafia i lea aso e fa’amanatuina ai le atoaga o le 150 tausaga o le SWIRE i le atuvasa.