Pago Pago - AMERIKA SAMOA

AUAI KOVANA LEMANA FONO A LE “ATOA SAMOA” I APIA

O lo’o ta’ita’ia atu e Kovana Lemanu P.S. Mauga le au usufono a le tatou Malo lea o lo’o malaga atu i Samoa mo le fonotaga a le Atoa Samoa i Apia. 

Ua fa’ailoa sa fa’ato’a tu’ua e Kovana Lemanu ma Ella Mauga le atunuu i le aso Gafua ae o le to’atele o le aumalaga sa mae’a tu’ua lava le atunuu i le aso Sa ina ia lava tapena mai le faataliga o le aumalaga mulimuli atu lea. O talanoaga o le a fa’atautaia lea i le Faletalimalo o le Taumesina i Vaiala ia Oketopa 13-14, 2022 i lea lava fo’i faletalimalo o lo’o alaala uma ai  le aumalaga lenei.

Ua fa’ailoa e le Ofisa o le Kovana o le a fa’aauauina i Samoa mataupu sa talanoaina i le fonotaga ia Iulai lea sa talimalo ai Amerika Samoa. 

O nisi o mataupu sa talanoaina e i ai lava le fa’aauau pea ona fa’afaigaluega mai o tagata mai Samoa i le tatou Kamupani I’a a le Star Kist ma ua sologa lelei lava lea fo’i mataupu i le faiga o lo’o fa’atautaia ai nei, mataupu tau femalaga’iga i le va o Samoa e Lua, tulaga e mafai ai ona galulue fa’atasi Matagaluega o le Soifua Maloloina e tineia ma puipuia mai Atoa Samoa mai fa’ama’i pepesi, le fa’atulagaga o le Komisi mo le Gagana Samoa, femalaga’iga i le Ea, faigafaiva ma Mataupu sa talanoaina tau Faato’aga ma Fua o fa’aeleeleaga e fa’afetaua’i.

Ua fa’ailoa mai o lo’o ua tapena fo’i sui o malaga a matagaluega eseese o aoga tele i ai lenei so’otaga i a latou folasaga faatino ae maise e muamua lava ona feiloa’i i latou i le Ava Usu o Feiloa’iga o Uso.

Ua fa’ailoa mai na fa’afaigata ona toe maua se nofoa avanoa mo nisi o le mamalu lautele e fia malaga i Samoa, ina ua amata ona faimalaga sui usufono nei i Samoa e afua mai lava i le aso Sa se’ia oo mai i le Aso Gafua.

Ua tauavea fo’i e le susuga le Sui Kovana le Malo i le taimi nei se’ia toe taliu mai i fanua le afioga le Kovana Sili.

KONELIO ALOFAITULI - MALO I LE FAIA’OGA TAUSAGA 2022-23

O le taeao o le aso Lua, sa fa’aalia ai loa le fa’ai’uga a le Komiti Filiili a le Matagaluega o A’oga (ASDOE) sa fa’alauiloa ai le “Faia’oga o le Tausaga 2022-2023.”

E to’atolu i latou sa tula’i mai mo le toe filifiliga a le Komiti, e tofu i latou ma le falelima na manumalo mai ai, 

O le falelima i Sasa’e sa tula’i mai ai Kaylla Pelogia Turituri o Fagaitua High; Falelima i Sisifo sa tula’i mai ai Me Iosefo mai Lupelele Elementary ma le Manu’atele lea sa tula’i mai ai le susuga Konelio Alofaituli o Manu’a High School.

O le toe va’aiga ia i latou uma nei a’o taumafai e fa’atalitali le fa’aiuga a le Komiti Filifili na tofia a le ASDOE mo lea faiva fita.

Sa masi’i mai fo’i le Segaula ina ia auai fa’atasi ma le latou faia’oga filifilia lea ua oo lana taumafaiga i le toe ta o le fa’amoemoe, ma tatalia ai le fa’aiuga a le Komiti i le Ofisa ulu o le Matagaluega i Utulei.

Na va’aia le fa’afiafiaina o le Pule A’oga o Manu’a High School ma le vasega o fanau a’oga sa latou malaga mai, lea ua toe fa’ae’e le la o le latou Sa i le Manu’atele fa’atasi ma le pale o le manumalo mo Konelio Alofaituli. O ia fo’i lenei e avea lava ma Ta Pese o le aufaipese a le a’oga i so’o se latou faatasiga, e aofia ai ma le sauniga mamalu o le fa’au’uga o le fanau fa’ai’uaso talu ona faia’oga o ia i le Manu’atele.

I le fa’atulagaga a le Komiti filifili ua manumalo ai Konelio Alofaituli i lenei tausaga i le “Faia’oga o le Tausaga 2022-2023.” O le tulaga lua o le tamaitai o Kaylla Peolaina Turituri mai Fagaitua High ae tulaga tolu ai le tamaitai o Me Iosefo o Lupelele Elementary.

Fa’amalo le galulue punoua’i i o outou faiva, o outou fo’i sa fili fa’apitoa mai o outou Laumua taitasi e avea ma outou faia’oga o le tausaga lenei. O lona uiga o outou uma o faia’oga manumalo i agaga o le fanau o lo’o outou a’oa’oina. Ia manuia o outou faiva i potu a’oga fa’afetai le alofa ma le onosa’i i fanau a le atunuu.

SOSO’O KOVANA FA’ALAUILOAGA - MATAITUINA MANU’A MO FA’ALAVELAVE FA’ANATURA

Ua toe soso’o e Kovana Lemanu Mauga lana fa’alauiloaga o le Manu’atele o lo’o fa’aolioli mai le a’afia i fa’alavelave fa’afuase’i fa’anatura ma e taualoa mo le isi 30 aso lea fo’i fa’aaliga taua.

Ona o lea fa’aaliga taua a le kovana, o lona uiga e tatau ona matua mita’i ma sauniuni uma so’o se ituaiga o fesoasoani mo le Manu’atele pe afai o le a sofa’i fa’afuasei mai nei fa’alavelave fa’anatura ma a’afia ai nisi o tagata o soifua fa’apea ma mea totino ae maise o fale o alaala ai le mamalu o i latou uma i le Manu’atele.

O luluga o Mafui’e ma le fa’aolioli mai o se maugamu e ao ina pa i se taimi o le lumana’i, lea ua afua ai ona fa’amautu muamua lenei fa’alauiloaga a le Kovana.

Ua fa’atonuina ina ia tapena ma sauniuni ala uma e mafai ai ona fa’atula’ia esea mai tagata uma e ao ina fa’asaoagalemu mai le Manu’atele i so’o se taimi e mautinoa ai ua lata ina pa se maugamu, poo se taimi fo’i e u’umi ma malolosi ai luluga o lo’o faalogoina e tagata i motu o le Manu’atele. 

O le a fa’atulaga e le Malo nofoaga e tausia lelei ai tagata uma o le a aveesea mai o latou aiga i le Manu’atele ona o lenei fa’alavelave o fa’aolioli mai ma nofo tapena i ai le malo.

Ua toe taliu i Hawaii le ‘aumalaga a le USGS lea sa masi’i mai ma latou masini ina ia fuaina ai le malolosi o luluga, ma tau mita’i tonu ai se taimi e ono pa ai se Maugamu i le Manu’atele, faapea ma le nofoaga tonu o lo’o mafua mai ai nei luluga o lutia ai le Motusa.

Ua fa’ailoa e nei saeanisi suesue, ua le toe tele ni mafui’e lulu ma ua le toe malolosi fo’i luluga , ma ua fa’asolosolo ina toe mou malie atu luluga i le motu o Ta’u.

Ua fa’ailoa mai fo’i e tagata o le Manu’atele, e moni lava ua amata lava ona tau le toe fa’alogoina e i latou ni luluga o mafui’e, ma o se mea e fiafia ai, o le vave ona fafagu mai i latou uma, i mea o le a tauau ina tutupu i le lumana’i e le Atua foafoa, ma le Natura o mea uma na fai mo le siomaga mautu o le Manuatele.

Ua fautuaina e Kovana Lemanu tagata uma i Amerika Samoa ma le Manu’atele, “Afai e fa’alogoina loa ua umi ma malosi tele se luluga o se Mafui’e, manatua e soso’o mai ma le galulolo tele poo se Tsunami, ia saili nofoaga maualuluga e aga’i fa’avave loa i ai. Aua lava le toe fa’atali.”