Pago Pago - AMERIKA SAMOA

SAINIA SAMOA LE MALILIEGA & UNITED ARAB EMIRATES [UAE] 

Ua fa’ailoa i lipoti fa’asalalau mai Samoa e fa’apea o le susuga Olo Fiti Va’ai, Minisita o Galuega Lautele, Feoaiga i le Ea & Le Talafatai o Samoa, ua va’ai mamao atu o ia i le tele na’ua o tagata maimoa mai fafo e aga’i mai Sasa’e Tutotonu, ina ua mae’a sainia se maliliega ma le UAE i le a’ai o Montreal, Kanata i le vaiaso mulimuli o Setema 2022.

O se tusi fa’alauiloa fa’alaua’itele mai le Failautusi o le Kapeneta a le Malo o Samoa ua fa’ailoa manino mai ai, “O lenei maliliega ua fa’ataga ai feoaiga i le ea fa’avaomalo i le va o Samoa ma le Atu Arapi.

Na sainia e Olo Fiti Va’ai  lenei feagaiga fa’atasi ma Saif Mohamed Al Suwaidi, le le fa’atonu sili o le Matagauega o Feoa’iga i le ea a le Malo o Arapi U.A.E.

Ua fa’ailoa fo’i e Olo Fiti Va’ai, o le leai ai o se va’alele tele ua mafai ai ona filifili lava le Kamupani Va’alele a le Polenisia lea ua fa’atautaia nei latou pisinisi o le Samoa Airways, ona latou feutaga’ia lava ma so’o se Kamupani Va’alele o le 6 Kamupani Va’alele lea e aofia i le UAE, ina ia fesoasoani i tulaga o feoa’iga fa’avaomalo ile va o Samoa ma isi a’ai tetele o le pasefika. 

MALIU VICTORIA  LILY VON DINKLAGE - ATOA LONA 100 TAUSAGA, “SENETENARI”

O le tina matua o Vctoria Lily o se tasi o tina sa soifua a’e i Samoa, ae o lona tama o le tagatanuu o Tutuila nei, ma ua mafua ai ona masi’i mai fo’i le tina ma le fanau atoa i Amerika Samoa nei.

Na soifua a’e o ia ia Mati 17, 1922 ma ua maliu o ia ia Oketopa 06, 2022. O ona matua o si ona tina o Lina Aleki Skelton o Pago Pago ma lona tama o Tui Saili Feagaimaali’i Masoe. O lona toe sauniga, sa fa’ataunuuina lea i lana Ekalesia sa tautua ai i lona Atua, Seventh Day Adventist i Leone.

Sa aufa’atasia le fanau ma latou fanau faapea ma fanau a fanau a lana fanau ina ia molimauina le soifuaga o le tina matua.

“O si o matou tina e le o se tasi e tele ni mea na amatalia ai e ia le matou aiga. E molimauina lona lototele e le fo’i i ni fa’afitauli, ae tumu i le loto fa’amagalo ma le agaga foa’i,” o le molimau lea a le atali’i ui’i o Victoria Lily, Paul VonDinklage.

“O aso o ao’oga i matou mai a’oga tulaga muamua, e le fo’i le tina i lana tausi ma fa’afailele fa’atasi i matou ma isi uma fanau a ona uso ma nisi fo’i o matou uo mamae i lo matou tuaoi. E fafa ta’ito’atasi i matou i le isi ituvai ina ia mafai ona oo i le faitoto’a o potu a’oga a le Felela, ae le fa’amauina ai se sala i le tuai atu i le a’oga. O lona alofa e sili mamao atu i lo tupe na te maua e fa’atino ai lona alofa. Ae peita’i, afai e fuaina le alofa i galuega fai e maua ai se tupe, ona silafia lea o le mamafatu o lena avega.” O se molimau lea ma loimata o le atali’i.  O lona fa’amoemoe sa taula i ai ana galuega tausi ma ta’ita’itama ia i matou, ia matou ola saogalemu ina ua maua a’oa’oga e maua ai galuega e mautu ai matou aiga.

Na ou fesili lava ia Mama, “Aisea ea ua tatou o mai ai i Tufuiopa ae tu’u le matou tama i Aleisa?” Tasi lava lana tala, “Malosi tele le faiteine o lou tama!”

“Pau a lea o se tala na matou fa’alogo i ai, e leai ma se isi tala e gagana ai le tina i tausaga e fia o le matou mafutaga. O lana tu’ualalo, ia outou ola fa’amagalo, aua le matau o leaga, ae fa’agalo ma fa’atafea ese mai lou mafaufau. Masalo o se vaila’au lea sa ia te ia, ua mafua ai ona ausia e ia nei tausaga e tele.”

I le molimau a le to’alua o Paul, Pamata Von Dinklage, sa fa’ailoa ai e lenei tina le faigata ona mafuta o ia ma le tama pepe a le Loomatua. E matele ina tele ai la’ua feupua’iga i le va o le la’ua aiga, ona e foliga mai e tauva i la’ua poo ai e sili i ai le alofa o Paul. 

“Peita’i, e uma ane lava le tauvaga, e sili lava Mama. Lea ua tu’ua le mafutaga, fa’afetai Mama o le a maua se taimi ou te alofa lelei ai ma tausi fa’alelei lau pele ma la’u pele fo’i.”

“Mai le ma’ua mafutaga ma Mama, ua ou iloa ai fai le ituaiga Kalemoa e matua fiafia i ai lo’u to’alua, ma o se tasi lea o meaalofa ua ou maua mai lo’u tina. E ui fo’i e le tele ni taimi e ma te talatalanoa ma feasogi atu fa’atofa ia Mama, ae o le mea ua mautu i lo’u agaga ma lona fo’i loto, ou te alofa moni i si o’u tina. Fa’afetai Mama mo lou alofa ia ma’ua ma le fanau, fa’afetai le fa’asoa mai i mea e aoga mo le ma’ua a’iga ma le tausiga o le fanau.”

O le molimau a se tasi o atali’i e to’alua na mafuta na’o i latou ma Lily ina ua tau fai taito’alua alo tamaitai ma ua amata fai a’iga i latou ma malaga ese atu ai i Niu Sila ma Amerika, sa ia fa’amatala ai le lototele ma le toaga o le tina e saili le tupe e ola ai i latou ma tautua ai le matai o le aiga sa nonofo ai i Malaeimi.

“Mai le tolu ma le afa tausaga sa matou nonofo ai, e mate a’o’oga i aso uma, ma matua lelei ofu a’oga, e le misi se meaa’oga ona ma mea e fai a le a’oga ia Mama. O le matou tupe e maua mai i le toga pi ma kapisi e toto ma fai lava e Mama i le fasi fanua sa matou nonofo ai. A mamafa se avega, e tago Mama fatufatu le avega fa’amau lelei, ae tosotoso mai e matou ta’ifau e lua i le fale. O ma’ua o tagata e tuleia le fa’atauga e amata savavali atu i Malaeimi ae oo i Taputimu le fa’atauga.”

“E mate fo’i mai pe $40 e fa’soasoani lava e le mafai ona ma’ua o i le a’oga, ae leai se seleni e fa’atau ai se mea e mana’omia i le faleoloa. O se tina e talimana’o i mea e moomia e lana fanau. Ina ua fai taito’alua si ana fanau, sa ia fa’amatu’u i latou e o e taumafai o latou aiga, ae maise i a latou a’oa’oga, ina ia si’itia se ala e ola ai i matou nai lo le ala sa ia ui mai ai. O le tina onosa’i, ae le tu’ua lona alofa ma lana tautua i le Matai e ona le fale ma le eleele sa matou nonofo ai.”

“E tagi lava Mama i ona lima, o se olaga lea ua toto e ia i o ma’ua loto. Fa’atuatua i le Atua ma e iloa lelei, e le mafai ona le tu’u maia e le Atua ia te oe le ala e te maua ai lou mana’oga o i ai. A aumai ia manatua le sefulua’i o na mea uma, e le sau tupe, a’o le Ali’i.”

“Mama, fa’afetai i se ala sili ona lelei sa e fa’ata’ita’ia ia i ma’ua i lena taimi umi. Lea ua fai o ma’ua aiga, atonu e leai se mea e ma te popole ai pe a oo ina lutaluta le tai o le folauga a le aiga, ma ua totoe o se fasi fanua ma le fale e nofo ai, e toe fo’i lava e fai le togapi ma le toga kapisi e saili ai le tupe e ola ai. Misia oe Mama i le mafutaga, e le galo lava lou naunau ina ia tausia a’ia’i le Sapati o le Atua. O se mea lea e fa’amuamua.”

Sa tula’i fo’i le afioga Fanene Edda mo lana molimau i lenei tina, e le misia i se fa’alavelave o le aiga, aua o i latou uma lava o tausoga o tua’a o si ona tina ua mapu mai i Ti’asa.

I le aotelega o molimau uma a le fanau ma fanau a fanau, ua autasia ai i le latou fa’ailoa mai, le soifua tatalo o le tina. E tausi lona Sapati e le liliu ese lona vae i le tapula’a. O se tina tatalo mo tagata uma ma lana fanau. O se pese fo’i lea sa usuina e le to’alua o Margerette, “Sa ou Fa’alogoina o Ta’u lo’u igoa i lau tatalo” e fa’ai’u ai lana molimau.

O le tele o taimi o si ana tama teine o Margrette sa nafa ma le tausiga o Victoria Lily ina ua fa’atafa gasegase ma ua toe fo’i mai ai o ia i Samoa e toe fa’aauau lana galuega sa ia tu’ua mo sina taimi. O le fa’afetai sa ia si’itia, o se tina e lu’i i lou loto,lu’i i lau amio i le va ma lou to’alua ma lau fanau. Lu’i ia e ola fa’amagalo ma fa’agalo i mea leaga uma e oo mai ia te oe, aua o le Atua le fa’amasino tonu. Lu’i fo’i i lou ola fa’amaoni ma faitaulaga i le mea sili ua i ou lima. O lona soifua tatalo e le misia lea, e le taitai fo’i ona galo taimi patino o ana talosaga.

O le tina o le a auina atu i Samoa, e taoto ai. Aua e ui ina valavala ma le tama o le aiga, ae le’i tatalaina lava le la’ua mafutaga e pei o tete’aga masani. Ina ua mae’a lona toe sauniga iinei, o le a fa’ae’e atu ia Romona i Samoa, e amatalia lana polokalama ua fa’ataoto mai mo Mama i ona toe taimi ma lagomau ai.

O le sauniga lea sa ta’ita’ia lava e le susuga Pr. Iakopo Westerlund, ma o ia fo’i na saunia le upu fa’amafanafana i le fanau ma le pa’ia o aiga.