Pago Pago - AMERIKA SAMOA

MATAGOFIE FA’AGASOLOGA POLOKETI - PAKA MAIMOAGA I VAITOGI

Ua vaaia le matagofie o le nofoaga e fa’atagi ai le Laumei ma le Malie i Vaitogi, ma fa’asolo atu i le itu i gauta lea sa va’aia ai le olaola o laufala ma paogo, lea ua mae’a suaina ese atoa ae ua galueaina ai se Paka mo ta’aloga o se nofoaga e matua lava ma totoe mo le tele o mea e fa’afiafiaina ai fanauiti fa’atasi ma o latou aiga.

O lo ua fa’ailoa mai  e le sui iloga mai le Ofisa o le Kovana, “Ioe o le nofoaga ua fausia ma fa’atulaga ina ia fa’afiafiaina ai aiga, ma o se paka tumau fo’i mo le mamalu lautele o le atunuu e asiasi i ai fa’atafafao ai fanau, ma ia maua fo’i se fa’asiliga malosi i le savavali solo ai ma fa’amatamata le fanau. O le agaga lava ina ia mautu nofoaga e tafafao mai nisi o e fia maimoa i le atunuu mai fafo, ae o i ai fo’i nei mea e mafai ona fa’atasi atu i ai fa’atasi ma aiga o le atunuu, e fa’afiafia fa’atasi ai.”

O le nofoaga lea e fa’atagi ai le Laumei ma le Malie, ua matua iloga ona fiafia turisi e aga’i i ai, peita’i e le saogalemu lava le tutu ai i luga o papa ae le fausia lelei se nofoaga fa’apea ina ia saogalemu le mamalu lautele e fia maimoaina lea fo’i mata’aga. O lo ua i ai le fa’ailo, o lo’o fa’aauau pea lava ona fausia ma faia galuega e le’i mae’a uma mo le nofoaga fa’apitoa lenei i Vaitogi.

E le gata i lea, ae o le ala lea sa sili ona tele omoomo ma e le’i fa’ataina fo’i, ae ua oo atu le asiasiga i lea nofoaga ma agai atu i tua i le Turtlle & Shark Motel, o lea ua matua matagofie alatele mo feoaiga i lea itu o Vaitogi.

O le vaega a le Paka ma Malaeta’alo ua latou fa’amaonia mai le i ai o mea ua fa’aleagaina, ma ua fuafua fo’i o le a i ai leoleo mo vaega nei e le o toe mamao ae va’aia ua leoina le Paka Liona ina ia le toe fa’aleagaina. Ua fa fale ua mae’a saunia e uia e le atunuu, peita’i ua lagona nisi o fautuaga ua fa’aoo atu i le Ofisa o lea matagaluega, ina ia toe soloia se tasi o na fale ae fa’atautaia mai ai se Ofisa o nei Leoleo mo le matagaluega e leoina le paka, “Ua tatau ona i ai se aufaigaluega tumau mo nofoaga nei, aua e pau lea o le mea e tupu mai, o le mae’a faia o galuega lelei, ae amata ai loa ona toe moomia galuega lipea e toe fa’aleleia ai, ae le’i atoa ni aso talu ona tatala.”

Tima’iga mo le atunuu, e i ai tulafono ua mae’a tamau, e mafai ai ona molia oe i le fa’amasinoga e te tali i ou moliga o le fa’aleagaina o mea totino a le malo na fausia mo le lautele o le atunuu. Afai e fa’amaonia le maua o oe na fa’aleagaina mea nei, o le a fa’amalosia lea tulafono e ali’i fa’amalosi tulafono a le malo, ae fa’amaonia e i latou na va’ai patino ma mautinoa o oe le sui ua tatau ona molia.

TAGA MUAMUA O LE PALOLO - VAIVAI IINEI, MALOSI TELE I SAVAII:

Tatalia le malaga mai a le “MV Lady Naomi” i lenei vaiaso, pe o le mea o tumau le alolofa mai o aiga i Savaii i nai uso i Amerika Samoa nei, a’o se ofu palolo fo’i! Ua iloga i le taga muamua o le palolo, ua tetele le alofa o le I’a i Salafai, ae ua vaivai ia i tatou i inei.

Ua fa’ailoa mai i ata ma tusitusiga, le matua’i lulu’u o le au ta palolo i Savaii i le taimi e masani ona ta ai le I’a ma ua fa’amauina fo’i e le tatou Matagaluega o le Vaomatua ma le Gataifale, o lo’o ua vaivai le i’a i lenei tataga muamua i le teritori.

Manatua o lo’o ua toe tatalia nei le i’a i le toe masina e ta ai, Novema ma o le toe ta lava e mau ai le fao! Aua le fa’avaivai, ae tapenapena mea uma e tatalia ai toe tataga lea ina ia sau le i’a ae o lava lau tapenaga, O le kula atoa lava le mea e ao ina fa’aopeopea i le sami mo le fa’amoemoe ia lava tapena.

Ua matua leai se fa’avaivai i le to’atele, e tolu lelei po o sofa’i le tai pe a mai le I’a, ae ua iloga na vaivai lava i le po muamua na asia ai, ae oo mai la i le po lona tolu o le aso Sa lea, ua leai ma se fa’ailo a le I’a. O lona uiga ua moni ai lava le mua’i vavalo a se tasi o tina e fiafia i lea faiva i tausaga ta’itasi, “O le taga mulimuli o le tausaga lenei e tetele, aua o le taga muamua i le tausaga ua te’a sa tetele i le tatou nei gataifale. Ua iloga fo’i e le o tetele naua timuga ma aupouli, o lona uiga e aga’i la i le i’a e fa’ato’a sau fo’i ia Novema.”

“E leai se isi fa’amoemoe o totoe, toe pau fo’i lea o le taga o totoe o lenei tausaga, ia saunia lelei mai fa’asolo e tatalia ai le toe taga o le 2022. Ua va’ai o le to’atele lava na’o le tapena o mea faigaluega, ae misia pea le fa’asolo pua ma fugala’au manogi, ua tatau ona faia se suiga i le tataliga mulimuli lea, ia aufa’atasi uma le vaomatua ma le gataifale e toina mai le i’a.” O le fasafasa lea a se tasi o tama matua, sa tatalia le mata’ai i le palolo, ae o lea e le’i maua se ofu ia Oketopa.

Manatua o le tau masani e ta ai le palolo, o le atoa o le masina i le afiafi po muamua e vaaia ai ua atoa, ona faitau loa lea o le 7 aso, o le aso tonu lena e ta ai le palolo ia Novema.

Aua le fa’atali i le fitu, aso mai lava i le Lima aso, 6 aso ma le fitu aso, aua o le mea lena sa faia i le taga muamua lenei. E leai se fiu pe fia maua se tofo i le i’a e faalua lava ona sau i le tausaga atoa. O le fa’asologa o afioaga i le itu i matua i sisifo o Salafai lea ua fa’ailoa mai sa matua tetele i ai le i’a i lenei taga muamua. O tala ma ata o le matua tetele o le Palolo i lena itu o le motu tele i Salafai, sa fa’ailoa ai le au faifaiva ua matua fa’atutumu kula ma so’o se apa ma ulo i le palolo.

O sui sa ta mai i luga o va’a lea fo’i sa fa’ailoa mai le lava ma totoe o latou fagotaga. E toatele lava nai aiga i nuu nei sa le o uma e ta palolo tagata o latou aiga, o lea ua ititi fo’i le fuataga ua maua mai mo i latou, ae na logotala loa aiga i Upolu ma Tutuila nei, sa tetele le i’a i latou afio’aga, e le’i toe fa’atali ae ua fai ‘aisiga. O le ulua’i va’a lenei o le a fa’ato’ai mai i fanua talu ona maea le taga muamua, tatalia la’ia pe a mai le aisiga ua leva na fa’auia, aua o lo’o uia muamua mai Upolu.

I Samoa lava ia, e matele ina latou iloa e tetele lava le palolo i Savaii i le tataga muamua, ae matele mai le tele i Upolu pe a oo i le tataga mulimuli.

TAUMAFAI ALAPU ROTARACT  A LE ROTARY - FAIA SE TAMOEGA SAILI TUPE

Ona ua i ai ni fa’ama’i ua amata ona fa’alogoina ua oo mai i Samoa ma e tauau e ono ulufale mai i Amerika Samoa e le o toe mamao, o lea ua vave galulue ai le Rotaract Club a le Rotary Club i Pago Pago, e saili tupe e ala i se latou Tmmo’ega  i Lanu, ia Novema 05, 2022.

O le aso Toona’i lea o le a fa’atautaia ai lenei fa’amoemoe lelei, ma ua i ai se taimi e mafai ai ona fa’ailoa mai o le a fa’aulu mai lava lou suafa ma lesitala mo lea fa’amoemoe lelei, ae o le fa’atupega lea o le latou galuega fa’atino mo fanauiti ia puipuia mai lea fa’ama’i ua pepesi i Samoa.

Ua fa’atauina atu latou pepa e lesitala ai oe e te tamo’e ma auai i lea fa’amoemoe, ma o le a fa’atautaia nei tamoega i aso Toona’i ta’itasi e pei ona fa’ailoa mai e le susuga Lui Lefiti o le tau o nei pepa e fa’atau mai e te auai ai i tamoega nei mo Novema 05, 2022 o le a fa’aaogaina tatau lea mo le taumafaiga lea ua mae’a fa’ailoa atu. 

O togafitiga  o lea gasegase pe a maua ai fanau i Samoa o loo fuafua e fa’atupe i lau saoga mo lea tamoega e aoga fo’i mo oe o tamo’e e fa’aleleia atili ai lou soifua maloloina ma fa’alusi au ou pauna ma le so’ona mamafa o lou tino.