Ads by Google Ads by Google

TALA I VAIFANUA


[ata: SN]

Pago Pago - AMERIKA SAMOA

 

FA’ALAUILOA KAMUPANI STARKIST LE LATOU PULESILI & PERESETENE

 

O lo ua fa’alauiloa mai e le Starkist Company le kamupani ulu o le StarKist Samoa le latou Pulesili ma o le Peresetene susuga lea a Mr Chae-ung Um.

 

O le susuga Um na tu’ua le LG Electronics mo le Starkist ma avea loa ma Sui Peresete o le Starkist Company e afua lea ia Novema 01, 2022, peita’i o le a fa’ato’a taualoa lona lea tofiga Peresitene ma le Pulesli ia Ianuari 01, 2023.

 

O le a fa’aauau pea lava ona avea le susuga Andrew Choe ma CEO/Peresetene o le Starkist Company se’ia oo ia Tesema 31, 2022. O le taimi nei o le ua amata ona la’ua galulue fa’atasi ina ia mafai ona sologa lelei mea uma pe a oo ina soloa’i mai Um i le nofoaga o lo’o ia se’ei ai i le taimi nei.

 

FANAU A’OGA LAUTOGIA FA’AILOGA - “ASO O LE FA’AVAE MALO AMERIKA SAMOA

 

Ina ia fa’amau fa’ailogaina taumafaiga a le fanau sa fa’atino mo le fa’ailogaina o le Aso o le Fa’avae o le tatou Malo Fa’ateritori o Amerika, na saunia ai e le Matagaluega o A’oga ni fa’ailoga mo galuega sa fa’atauva ai le fanau i lenei tausaga.

 

O tauvaga sa fa’atautaia e le ASDOE e aofia ai le tauvaga tusiga pese, tusiga solo, tusiga tala ae fa’aautu lava mea uma i le Aso na fa’atuina ma pasia lelei ai le Fa’avae o le Malo o Amerika Samoa, fa’atasi ma ulua’i tulafono e 11 na aofia ai.

 

O le aso Faraile talu ai na fa’ato’a lauina ai loa fa’alaua’itele i latou o fanau a’oga ua manumalo i nei vaega ta’itasi na fa’aulu ai a latou tusitusiga.

 

O Levalea’i Maligi o le Aoga  Manu’a ua ia mauaina le fa’ailoga togisilia i le pese sa ia tusia. Mo le Solo tusia lelei ua maua le togisilia e le susuga David Apineru mai Tafuna High, tulaga lua i le solo lava o Kenneth Thompson ae tulaga tolu ai Lama Petelo ma Ane Tagaloa mai le A’oga Maualuga a Manu’a.

 

O le tusiga Tala ua manumalo ai Apelu Mann mai le A’oga Maualuga Tafuna, tulaga lua ai le tala tusia a Toasamoa Tuialu’ulu’u o le a’oga maualuga Manu’a ma le tamaitai o Arianna  Ta’atasi o Samoana sa tualga tolu ai lana tala tusia.

 

Fa’amalo i nei fanau ona o le taumafaiga ua fa’amaufa’alogaina ai le fa’amanatuga o le Aso o le Fa’avae o le malo o Amerika Samoa.

 

OKETOPA 29-30 - FA’AALIGA TA TATAU LONA 17 TISA’S I ALEGA

 

O le tausaga lenei e atoa i ai le 17 o tausaga talu lava ona fa’atautaia le Fa’aaliga Fa’apitoa a Tisa’s Tattoo Festival, poo le Fa’aaliga Ta Tatau a Tisa i Alega. o le fa’amoemoe lenei e te matua susu atu lava i le Tisa’s Barefoot Bar & Grill le nofoaga o le a fa’atautaia ai lenei fa’aaliga tele mo aso nei ua atofaina e lua, mo lea fa’amoemoe.

 

E ese mai lea o le a faia le fa’aaliga tele e soso’o atu i le fa’aaliga ua mae’a faalalauina nei e fa’alauiloa ai le fa’amoemoe, o le a fa’asolo fo’i ata i luga o ala tafa’ilagi mo le maimoa mai a le mamalu lautele i so’o s vaipanoa o le lalolagi.

 

O le a fa’aalia ai uma ata o i latou e gasolo atu, fa’aaoga lenei fa’aaliga e taina ai sau pe’a poo le Malofie. Samoa Moni, o le tatau a taulele’a poo le malu a tamaitai. Afai fo’i o isi lava ituaiga pea teuteuina ai le tino, ua maua foi le avanoa mo lena fa’amoemoe.

 

Manatua o le a susu mai lava i le nofoaga autu o le fa’amoemoe i Alega, Tisa’s Barefoot Bar & Grill. O mea uma lava o lo’o fa’aaogaina mo lenei fa’amoemoe e le fa’aleagaina ai le Siomaga, ona o lea fo’i nofoaga e fa’ataua tele ai le tulaga tausia lelei o le Siomaga o Amerika Samoa ma le lalolagi atoa.

 

O le to’atele o le au maimoa o lo’o fia tagataga’i mai i le fa’atautaiga o lenei Faaaliga tele o Taga Tatau, o lo’o afifio ma papa a’ao i fafo atu o le atunuu, ma ua mafai ona maua mai a latou so’otaga e fa’alauiloa atu ai le fa’aaliga lenei lona 17 a le Tisa’s Tatto Fest lona 17.

 

“I le tausaga ua te’a, e tusa ma le 250,000 i latou na fa’aaogaina upega tafailagi e maimoa mai ai ma sa latou fa’aalia fo’i lo latou fiafia e matamata mai a’o ea atu le tatou fa’asalalauga tu’usa’o mai Alega i ala tafa’ilagi.” O se tala fiafia lea a Tisa Fa’amuli. O ia lea o le tamaitai o lo’o fa’afoea lenei fa’aaliga tele ma o ia fo’i na amata mea i lenei fa’amoemoe 17 ai lenei o fa’aaliga talu ai.

 

“I le tausaga nei o lea ua maua mai le 500,000 tagata ua soofaatasi mai i ala lava nei tau tafa’ilagi, ae o lea e le’i amatalia le fa’amoemoe,” o sana toe fa’aopoopo mai lea.

 

O lana fiafia lea mo le fa’aaliga o lo’o fa’aolioli mai i le fa’aiuga o lenei vaiaso. Ua mafai lava ona e feso’ota’i ma lea fa’aaliga i le taina lea o le Tisa’s 17th Tattoo Festival ma maimoa ai i fa’asalalauga fa’alauiloa o lo’o ua mae’a saunia lelei mo le fa’amoemoe o lenei tausaga.

 

I le tausaga nei ua fesiligia mai ele vasega o e fia maumoa mamao mai, se tala’aga o le Malofia a Aloali’i Samoa moni,  ma le tala’aga fo’i o le Malu a tama’ita’i Samoa moni. O lo ua fa’ailoa mai ina ia maimoaina e le mamalu lautele o la tatou lea Measina taua tele, ma ia tofusia i tatou i le agaga o le fa’apolopolo ma fa’afailele lelei a tatou measina nei, ina nei mamulu ese atu lona taua.

 

O le a fa’alauiloa fo’i suafa o Tufuga, o e galulue i le taina o fa’atagata, o i latou o lo’o tautuaina le mamalu o le a gasolo mai, ae maise i latou o le a gaosia siapo ma isi measina uma a le atunuu ma le lalolagi o tagata o le a maimoaina mai le tatou fa’amoemoe atoa lenei.

 

O le a i ai ausiva e fili fa’apitoa o latou taimi e pesepese ai ma fa’aalia a latou siva, o aufaipese fo’i o le a i ai fa’apitoa i lea vaitaimi atoa ma o ausiva e latou te saunia fo’i nisi fa’afiafiaga e fa’amatagofie atili ai le tatou fa’asalalauga ma le maimoaga i lenei tausaga.

 

O se mea fou ua fa’ailoa mai e i ai tauvaga o le a fa’atautaia i luga o laina feso’ota’i tau tafa’ilagi e oo latou fa’ailoga pe a aotelega i le $2,000.

 

E tapena ma faia fo’i le suavai mo le taimi tonu e nofoia ai nofoaga uma mo i latou o le a tapua’ia faiva o el Matuaofaiva ma le au solo, ina ia latou maimoina lava le Tatau ua mae’a lelei. O lona uiga o le a i ai pesega, o siva ma fa’afiafiaga eseese, ae mais eo le ‘aiga matagofie o le a laulauina, ae pu’eina atoa nei mea uma i le tatou ata fa’asolo ma fa’asalalauina aloa’ia i laina feso’ota’i fa’atafai lagi.

Mo le aso 30 Oketopa lava ia, ua tapena ai le to’ona’i mo i latou uma na tapuaia faiva o le Matuaofaiva ma le na taliau.