Ads by Google Ads by Google

TALA I VAIFANUA


[ata: foa'i]

Pago Pago - AMERIKA SAMOA

 

FA’ATUMU TALOFAPASS ULUFALE I LE TERITORI - AIAIGA OO NOVEMA 15

 

E ui ina talosagaina e Samoa, ma ua toatele fo’i i latou e le o manana’o e fa’aaogaina pea le TalofaPass e fa’atumu ma ulufale mai ai i Amerika Samoa, ae ua fa’ailoa mai o lo ua mae’a aiaia fo’i le Fa’asa e afua atu ia Oketopa 24 se’ia faato’a mae’a ia Novema 15.

 

O le aiaiga muamua lava o le fa’aaogaina pea lea o le TalofaPass e ao ina fa’atumuina mo so’o se tasi lava e malaga e amata mai le 5 tausaga aga’i i luga e ao ina fa’aulu mai o latou pepa tui ua mae’a faia o latou tui puipuia o le Covid-19. 

 

Ua i ai fo’i le avanoa e mafai ai ona talosaga nisi o lo’o le faia o latou kilia o nei tui puipuia ona o le latou talitonuga fa’aleagaga e le mafai ai ona faia ni o latou tui puipuia.

 

O le a tele se avanoa e mafai ai ona fa’ataga e le GAR i latou na e malaga mai i totonu o le Teritori, ae le fa’aaogaina ai le TalofaPass mo i latou e ulufale mai ai. Peita’i, afai e talia e le GAR talosaga a nei sui e ulufale mai ai e tatau ia i latou ona usita’ia isi uma aiaiga o le saogalemu ua fa’atulaga mai e le GAR, aua e le o fa’aaogaina e i latou le TalofaPass.

 

O mea nei ua fa’atulaga mai mo i latou na e ao ina usita’ia:

 

• Afai o le a i si se tasi o i latou e fa’amaonia o i ai le Verusi o le Covid-19, e tatau ona ia fa’aaogaina le pupuni fofoga, mo aso uma lava se’ia vagana ua le toe fa’amaonia e ia se suega a le Covid-19 ma ua mama mai lea fa’ama’i.

• O i latou uma sa feso’ota’i ma le sui ua fa’amaonia le suega Covid-19, e tatau fo’i ona fa’aaoga e i latou pupuni fofoga mo le 5 aso, afai lava e le o fa’amaonia se suega o el Covid-19.

• O i latou uma e tale, mamafa le isu ma fiva, poo le i ai fo’i o auga o le Influenza, e tatau ona fa’aaoga le pupuni fofoga se’ia vagana ua le toe i ai nei auga.

• O soo se tasi lava o i ai nisi auga o gasegase o maua tumau ai, e ono pesia ai nisi e tatau ona fa’aaogaina pea pupuni fofoga pe afai o le a fa’atasi atu i nofoaga o i ai ni si e to’atele ae maise fo’i o le taimi e faimalaga mai ai.

• Peita’i e ui i nei mea uma, ua talosagaina lava le mamalu lautele o le atunuu ina ia fa’aauau pea lava ona faia tuiga puipuia

* o le Covid-19 i fanau ua atoa le 5 tausaga, ma nisi fo’i e le’i mafai ona faia o latou tui puipuia nei.

 

TIUTE FA’ATONU - PIKIA TAGATA FAIGALUEGA SAILI POO TAGOFIA FUALA’AU FA’ASAINA

 

Ua faia se suiga i le tulaga o le sailia o nisi e suesueina mo le latou tagofia o fuala’au fa’asaina ma o mai e faigaluega a’o fa’asua’ava, pe o lo’o lele fo’i i le tele o ituaiga o fuala’au ma vailaau o’ona o lo ua matauina o lo’o ua tagofia e le to’atele o le atunuu.

 

Ina ia taumafai ona maua a’ia’i le aufaigaluega o lo’o latou tagofia nei mea uma, e ao ai ona faia suega nei i tagata faigaluega a Matagaluega taitasi, ma ua iloga mai, e sili ona lelei le matau a le fa’atonu i lana aufaigaluega, pe afai o mata’alia o ia i ona tiute.

 

O le taimi e fa’ataunuu ai nei su’ega e le tau fa’ailoa maia, ae o le mea mautinoa lava mo le tagata fa’ato’a fia talosaga i le avanoa faigaluega e tatau ona faia a latou suega nei ona fa’ato’a talia lea e faigaluega, ma sa nafa fo’i le Matagaluega o Tagata Faigaluega ma lena faiva.

 

O lo ua lafo atu nei e le faigamalo lenei a Lemanu - Talauega lea matata i le vasega o fa’atonu sili o matagaluega uma a le Malo. E piki mai e i latou tagata faigaluega i lea aso ma lea aso o le a faia a latou suega o vaila’au oona ma fuala’au fa’asaina, ae o le sui e fa’atautaia nei suega, o le sui tofia e le Matagaluega o le Soifua Maloloina a le Malo, lea ua tofia ai nei le faletua o Julia Fo’ifua e le susuga le fa’atonu o Motusa Tuileama Nua.

 

O le aso Tofi o le vaiaso na te’a, sa iloiloina lenei suiga e le fono a le Kovana ma lana kapeneta ma ua fa’atulaga mai le nofoaga mo nei suega e faia lea i le Alaternate #1 i Tafuna, lea fale sa fausia fa’apitoa mo le Covid-19 i tufale o le Falema’i I Tafuna.

 

“O le autu atoa o le taumafaiga, ina ia avatu le fa’atuatuaga o le Malo i le Fa’atonusili o lana lava matagaluega e nate pikia mai ai ana tagata faigaluega e fa’atautaia i ai suega, aua o ia o lo’o nafa ma le va’aiga toto’a o ana tagata faigaluega. E iloga lelei lava e ia i latou o lo’o tau atagia mai ai uiga ma aga a le tagata o lo’o tagofia vaila’au oona poo fuala’au fa’asaina,” se tala lea a Motusa.

 

Ua mae’a taoto le tulafono e ao ina fa’amamalu mo tagata faigaluega uma a le Malo, ma ua fa’amausali fo’i le tulafono tau le fa’atautaiaga o nei suega mo tagata faigaluega. Afai o le a maua o lo’o i ai fuala’au fa’asaina poo vaila’au oona i le toto o le sui faigaluega, e tuu avanoa i le ulua’i taimi, ae afai lava e uma le tele o suega ae maua ane lava o lo’o iai pea lava le pasene o le ava malosi ma fuala’au fa’asaina i le sui faigaluega lea, ua tatau la ma agava’a ona fa’ate’a ese mai le galuega.

 

O lo ua mae’a fa’alauiloa atu nei e le fa’atonu o le Soifua Maloloina, Dr Julia Fo’ifua mo lona tofiga fou ua i ai nei, na te fa’atautaia suega nei mo le aufaigaluega a le malo mai matagaluega eseese e faia latou suega o vaila’au oona ma fuala’au fa’asaina.

 

“O le filifili maia o tagata faigaluega e fa’atautaia suega nei, o le matata lea a le fa’atonu o matagaluega ta’itasi,” o se toe tima’i mai lea a Motusa.

 

TALANOAINA “ATOA O SAMOA” AOAOGA FESO’OTA’I FANAU I KOSI ESEESE

 

O se tasi o mataupu sili ona aoga mo le lumanai o Samoa na lua, sa talanoaina ai e ta’ita’i ma le usugafono a le Atoa o Samoa le tulaga tau a’oa’oga i kosi eseese mo fanau talavou i malo o Samoa na lua.

 

Na fa’amautinoa mai e Palemia Fiame Naomi Mata’afa le aoga ona fa’atula’ia e Malo na lua o Samoa, o se faiga lelei e mafai ai ona fa’afeso’ota’i a’oa’oga i kosi eseese ua mafai ona tausailia ai fa’ailoga o fanau o Amerika Samoa i Samoa, ma fa’apena fo’i i fanau talavou a Samoa i a’oa’oga i Amerika Samoa nei.

 

“O lenei faiga ua tulata lava le taimi e mafai ai ona fa’atino lea fa’amoemoe. O se mea e lelei ma e mafai ona aoga mo Malo e lua o Samoa Atoa.”

 

E ese mai lea ua mae’a fa’ailoa e le tamaitai Palemia, “Ua tele lava ala ua talanoaina ai le aoga o le so’otaga lenei i le va o tatou malo e lua, e mafai ai ona fa’aleleia atili galuega fa’atino tau le soifua maloloina ma ala e mafai ai ona tete’e atu i faamai pepesi ma faaleleia atili tautua a Matagaluega o le Soifua Maloloina i faigamalo e lua.”

 

“Ua i ai fo’i ma le lagona lea, e mafai fo’i ona feso’ota’i taumafaiga nei ina ia fa’aleleia atili tomai moomia i kosi eseese ua tau’avea e fanau talavou o lo’o nofo a’oa’oga ma sailia le atamai e tautua ai latou tagatanuu i le lumana’i. Ua mafai ona maua avanoa lelei e a’oa’oina ai fanau mai Amerika Samia i Iunivesite ua mae’a fa’amautu i Samoa nei, ma ua fa’apena fo’i ona faia mo fanau a Samoa i Amerika Samoa i a latou Kolisi ma Iunivesite o lo ua i ai.”

 

“Ua iloga mai e tele na’ua avanoa mo fanau a Amerika Samoa i Apia, Samoa nei, aua o lo ua mae’a fa’atula’ia le Iunivesite o Samoa, e le gata i lea o le Iunivesite o le Pasifika i Saute lea ua i ai le latou lala tumau i Samoa, ma o le USP o lo ua mae’a aiaia lona agava’a e Amerika ma ua pasia lelei mo lena tulaga, ua mafai ai ona agava’a i latou e pasi mai ma fa’ailoga e galulue ma fa’aaogaina o latou fa’ailoga na i le Iuniate Seteete o Amerika atoa.”

 

Ua fa’apena fo’i le saunoaga a le afioga le Kovana o Amerika Samoa, Lemanu PS Mauga, lea sa ia fa’ailoa ai o le a mafai fo’i ona fa’aulu fanau aoga mai Samoa i Kolisi ma Iunivesite o lo’o i ai nei i lenei vaitau.