Ads by Google Ads by Google

TALA I VAIFANUA


[ata: foa'i]

Pago Pago - AMERIKA SAMOA

 

PISI EKALESIA KATOLIKO - TALIMALO FA’AU’UGA O LE EPIKOPO FOU

 

Ua iloga ona pisi le vasega o Matagaluega ta’itasi o le Ekalesia Katoliko i le Puleaga Samoa Pago Pago aua o le a talimalo i latou i le to’atele o le a masi’i atu e fia molimauina le sauniga mamalu o le Misasa Paia o le Fa’au’uga o le ulua’i Epikopo Samoa mo le Pule’aga Samoa Pago Pago, le afioga Patele Kolio Talamaivao Etuale.

 

O le sauniga e fa’atautaia i le malumalu o le Aiga Pa’ia i Fatuoaiga i le aso 4 Novema, 2022 i le itula e 9:00 i le taeao lava ma o iina fo’i o le a fa’atautaia ai le sauniga o le misasa o le fa’afetai ona o lea fa’aeaga ua mautu atu i se tasi o alo o le atunuu ma e fa’ato’a faia lea ia Novema 5 i le itula e 10:00a.m i Fatu-o-Aiga. 

 

Ua fa’ailoa o le a masi’i mai le afioga le Akiepikopo Alapati Lui Mataeliga o le Puleaga Samoa Pago Pago ina ia auai e fa’atautaia lea sauniga mamalu mo le fa’au’uina o lana afioga le ulua’i Epikopo Samoa i le Puleaga Samoa Pago Pago ma e fa’afoea fa’atasi a i la’ua ma Bisop H, Brown lea fo’i sauniga mamalu.

 

Ua fa’ailoa i pepa o fa’amatalaga, o Patele Kolio Tumanuvao Etuale Felise o Lotofaga Samoa, o se alo fo’i e fa’asino ia Maniva Palala o Moata’a Samoa.

 

Ua atoa nei le 49 tausaga o le afioga le Epikopo o le a fa’au’uina, ma o ia fo’i sa tausia lelei e ona matua Tumanuvao Kelekolio Tumanuvao ma Monika Etuale Tumanuvao o Iliili.

 

Na mua’i fa’amauina le umia o lona fa’ailoga BA i Philosophy  ma lona Mastere of Divinity i Mt Angel Seminary i Oregon, I le taimi nei o lo’o ua fa’aauau lana sailiga o lona PHD i le Pastorial Ministry ma ua matauina e mae’a i le tausaga a sau nei.

 

Ia Me 29, 2003 na fa’au’u lona tofi Patele a’o galue lava i Amerika Samoa nei ma sa faigaluega ai lava o se Patele mai lena umi o tausaga o lona lea tofi Patele ma ua atoa lelei le 19 tausaga o lana lea auaunaga.

 

O lo ua matauina le tele o lana tautua i le aotauina o fanau a le atunuu i a’oga a le Ekalesia ma o se sui faufautua fo’i i le fanau a’oga na fa’au’uina lona tofi o le Pule A’oga i le Pule’aga Samoa Pago pago i le tausaga e 2021, lea e fa’atautaia a’oga a Fesoasoani ma le Aufaigaluega uma a le Pule’aga.

 

I le taimi nei o lo’o ua fa’ailoa mai lona agaga fa’afetai ina ua toina mo ia lea pale o le manumalo i ona tiute fa’a-Patele o le Ekalesia Katoliko ma ua fiafia tele e fa’ataunuu ona tiute uma ua tofia ai ma le loto maulalo lava.

 

O le fa’afetai i lana Pule’aga I Samoa Pago Pago nei fa’atasi ai ma le mamalu lautele o ona aiga, o matua uma i le talalelei ae maise o nai ona matua o lo’o tautiga fa’atasi ma ia i tapenaga, ae tainane fo’i le tapua’iga mau ma talosaga si’itia mo ia e le mamalu o matua fa’aleagaga uma i Samoa na lua.

 

Ua fa’ailoa mai o le a aufa’atasi atu le afioga le Kovana Sili o Amerika Samoa, Lemanu PS Mauga ma le faletua Ella Mauga fa’apea ma le afioga le palemia o Samoa, Fiame Naomi Mata’afa i le sauniga mamalu i lea aso atofaina mo le fa’au’uga o le ulua’i Epikopo Samoa o le Pule’aga Samoa Pago Pago.

 

FOA’I BLUESKY - TAUALOA GALUEGA TIMA’I & TOGAFITIGA KANESA

 

O le masina o Oketopa sa fa’atautaia e le Matagaluega o le Soifua Maloloina ma nisi o fa’alapotopotoga tuma’oti  i le atunuu, e tima’ia le mamalu lautele ia silafia togafitiga ma nisi o fesoasoani mo i latou o lo ua po’ia e le Kanesa. 

 

E le gata i lea, ae ua fa’alauiloa mai fo’i so’o se ituaiga ala e mafai ai ona vave silafia ua e maua i le Kanesa o so’o se ituaiga, ma vave ai ona faia togafitiga mo oe, ina ia fa’aauau ai pea le mafutaga ma aiga, o e pele ia i latou oe.

 

O le ala lea o le la’eia e le to’atele o le lanu piniki  e faailoa ai lou sapaia a’ia’i o lenei taumafaiga i le atunuu atoa, ma ia manatua fo’i e pele ua to’esea mai mafutaga fa’aleaiga, ona o le saua o lea gasegase.

 

E fa’afetaia ai le Pulega ma le Aufaigaluega a le Bluesky Communications, aua o lea ua latou foa’ia le $3,000 ina ia fa’asifo mo galuega e tima’ia ma togafitia ai le atunuu mai le Kanesa. 

 

I se pepa o fa’amatalaga ua fa’ailoa ai e le Pule Sili o le Bluesky, Justin Tuiasosopo, “O se avanoa lelei lenei ua matou maua e mafai ai ona foa’i mo lenei fa’amoemoe lelei. Ua matauina lava le to’atele na’ua o tatou pelega, o tina ma tama ae maise o nisi o uso ma tuafafine talavou, ua maumau i le faigata o le kanesa o so’o se ituaiga i le atunuu. Poo le a se tupe ua foa’i, tau ina silafia le agaga o lenei aufaigaluega ma le Kamupani atoa, ia tatou tausoa fa’atasi i galuega tima’i ma togafitiga ina ia fa’asaoina mai a tatou pelega mai le Kanesa.”

 

Ua fa’afetaia fo’i e le Bluesky le galuega o lo’o fa’atautaia e le American Samoa Community Cancer Coalition ona o le latou sao aoga tele mo e uma ua faailoa atu e fomai ua maua  ia i le Kanesa, “Peita’i o se fesoasoani ititi pe tele, ae avatu ai se toomaga mo lea sui i ona lagona ootia e toe fa’amalosia ai lona loto e tu ma tete’e malosi atu i le Kanesa.”

 

“Ua tatou iloa, e le faigofie pe a oo ina po’ia se tasi e pele i o tatou aiga i lenei ma’i fita, o le Kanesa o le Susu ua matele ina maumau ai tina ma tuafafine i le atunuu, ua na’o se fesoasoani ititi ae ia fa’amalosia ai o latou lagona, e tu ma tete’e atu i tiga ma le Kanesa, o le a fa’auia fo’i lenei fesoasoani e fa’ao’o atu e le ASC Cancer Coalition, aua ua matele ina silafia uma e le lautele o le atunuu, o aga’i i ai ma talosaga mo se fesoasoani tau seleni e aoga mo le pasese poo se tupe fa’aagaaga i lau malaga e saili togafitiga i fafo poo iinei fo’i lava,” o se isi lea toe fa’aopoopo a Tuiasosopo e tusa o le latou foa’i tupe mo lea fa’amoemoe aoga.

 

SUI “SUESUE I MEA UA TANUMIA I LE ELEELE & TA FATAGATA”

 

Ua malaga atu nei le tamaitai lauiloa i lana matafaioi o le “Suesue o Measina Tanumia i le Eleele” Epifania Suafo’a Tauai, ma lona to’alua o se tasi o ta fa’atagata i le TAOA, Talisoa Taua’i Ioane, ina ia fa’asoa atu lo la’ua silafia i nei matata ua agava’a ai, ma ua avea o nisi e fa’alauiloaga o la’ua matata ma oloa gaosia i le Falemata’aga o Tala’aga Fa’anatura i Burke, [Burke Museum of Natural History & Culture].

 

E le gata i lena itu o le fa’aaliga, ae ua fa’ailoa mai fo’i o le a auai atu i le School of Aquatic & Fishery Sciences i le Iunivesite o Washington.

 

O lenei ulugali’i na fa’afeso’ota’ia e i la’ua lenei avanoa matagofie i le taimi na fa’atautaia ai se polokalama i le Iunivesite o Washington i le 2019 e mafai ai ona aoga ma fai sou sao i fa’aaliga nei, ma o avanoa e mafai ona talosagaina e nisi mai atumotu o le Pasefika ina ia auai i le polokalama ua fa’aigoaina Connection Between Island Societies & Local Ecosystems.

 

O le tusi sa taua’aoina mo i la’ua nei talu mai lena malaga i le 2019 na mafai ai ona galulue so’otau’au lava i la’ua ua agava’a ma fefa’asoa’i lo la’ua silafia i a la’ua matata o agava’a ai, ma fa’atalanoa le aoga o le toe maua mai o measina a Samoa sa tanumia i le eleele, toe maua ai tala’aga ua leva ona tanumia fa’atasi ma nei measina, o le aganuu ma agaifanua a Samoa ma le tele o sosia tau atisi o loo mau’oa tagatanuu o Samoa na lua.

 

Ua fa’ailoa le fiafia tele o nisi o ali’i polofesa sa galulue mai lea umi o le so’otaga ma Epifania ma Talisoa Taua’i, “O le oo mai o lenei faigamalaga o le a tele atu se aoga mo matou tamaiti a’oga o lo’o tauavea mataupu tau atisi ua fa’asoa mai e i la’ua nei. Ua to’atele le fanau a’oga ua mafai nei ona silafia mea uma tau le atumotu i le Pasefika ona ua mafai ona taga’i ma maimoaina fua o galuega alofilima ua maimoaina o ta e Talosia ma measina ua fa’aalia sa toe laga mai e Epifania mai le eleele, ma o latou tala’aga.”

 

Ona o le aoga tele o le ulua’i malaga a i la’ua nei i le tausaga 2019, lea fo’i ua toe vala’auina mai ai i la’ua e toe malaga atu fo’i ma e fa’aaoga tatau ai lo la’ua masina atoa e fa’aalia ma taina faatagata ae maimoaina e le fanau aoga i le falemata’aga o le Iunivesite i Washington.

 

Na malaga atu i la’ua nei i le vaiaso ua tuana’i ma o le a silia ma le masina le la’ua nonofo ai i Seattle Washington mo lea fa’amoemoe taua tele.

 

I le taimi nei o le faletua o Epifania o lo’o avea ma tagata suesue o meaina tanumia i le eleele poo le alititai a le Matagaluega o Uafu ma Malaeva’alele ma o lo’o avea o ia ma se tasi e faia’oga i lea vasega. O lo’o ua i ai lana pepa e saunoa fa’apitoa ai i lana vasega e tusa o le Aganuu mai Suesuega o Measina ua Loa ona Tanumia a le Pasefika i Saute. O lena fo’i lana mataupu sa ia saunoa fa’apitoa ai i le Iunivesite o Samoa.

 

O le susuga Talisoa o lo ua ia a’oaoina le vasega i le ta fa’atagata e fa’aaoga ai ogala’au i le Northwest Native Art Gallery.