Pago Pago - AMERIKA SAMOA

41 NOFOAGA UA FA’ATULAGA MO LE PALOTAGA 2022

Ua fa’alauiloa e le Ofisa o Palota le 41 nofoaga o le a fa’atautaia ai le Palotaga 2022 a le atunuu, ia Novema 08, 2022.

E silia ma le14,000 i latou ua mae’a lesitalaina i le atunuu atoa, o le a latou filifilia Faipule i le Maota o Sui o le Fono Faitulafono, Faipule i le Konekeresi ma  se fa’ai’uga i le 11 o suiga o le fa’avae ua mae’a folasia e fia fa’apasia.

E ui lava ina o lo’o leai se tasi e tauva ma le tatou Faipule i le Konekeresi i lenei palotaga, ae tatau lava ona faia pea le palota mo le tofi. 

O le faiga fo’i lea o lo’u ua faatulaga mo isi uma faipule e to’a lima e le o i ai nisi o lo’o latou tauva mo le nofoa o le latou itumalo i le Maota o Sui.

O le 41 o nofoaga o loo lautogia e faia ai palota a Itumalo ta’itasi i totonu o Amerika Samoa. 

O nsi o fale o le Malo o lo’o ua mae’a lautogia e avea ma nofoaga e faia mai ai le palota ua aofia ai le Gov. Rex Lee Auditorium i Utulei lea ua fa’atulaga mo palotaga a Itumalo #1 ma le Itumalo #2 a le Manu’atele i Tutuila nei. O le EOB i Ofu lea ua lautogia e fai ai palota mo le itumalo Ofu Manu’a #2, Olosega ma Sili, ae o le Potu Fono o le Ofisa o Mataupu Tau Samoa i Utulei ua fa’atulaga e faia ai palota a le mamalu o afio’aga o Gataivai ma Utulei, poo le Itumalo #7.

O nofoaga uma nei e 41 ua fa’atulaga ina ia latou faitauina a latou palota i le taimi lava e tapunia ai le avanoa e faia ai se palota a se tasi i le ta tonu o le itula e 6:00 i le afiafi. Ua fa’ailoa atu fo’i i le aufaigaluega o lo’o totofi mo nofoaga uma nei ina ia faitauina le palotaga mo le Sui Faipule o itumalo ta’itasi i le fono faitulafono ma le sui faipule o Amerika Samoa i le Konekeresi, ona faato’a faitauina ai lea o palota i vaega e 11 o suiga o le fa’avae. 

O le ma’ea ai ona faitauina o palota i fale palota ta’itasi, ona tuuina atu lea o le fa’aiuga i le Komesina o Palota e iloiloina ma fa’amonia, ae le’i fa’asalalauina i luga o le KVZK-TV.

O le lomiga a le Samoa News i le aso Faraile ua te’a ma le aso Gafua o le vaiaso lenei sa lomia ai le lisi atoa o fale palota. O le a maua le lisi o nofoaga pe a e kiliki i le laina tafailagi 2022-Midterm-Election-Polling-station

MATAUINA TAGATA TUALAUTA - OVA LE MAI O LE SUAVAI MAI PAIPA

Ua tofoina e le to’atele o aiga o lo’o fa’aaogaina le suavai paipa a le ASPA, ua maualuga tele le mai o le suavai lea e ta’ia mai le paipa o le suavai taumafa a le ASPA. Ua molimauina mai nei e nisi o aiga e to’atele le suia mai o le mai o le suavai mai paipa vai a le ASPA, ua taumafai fo’i e fesiligia le mafuaga o lea tulaga o le tautua lautele.

Ua tele aiga ua le fa’aaogaina ai le suavai mai paipa e gaosia ai mea’ai ma tunu ai le ti mo i latou uma, ona ua suia le tofo lelei o le suavai sa masani ai.

Na valaa’u mo se fa’amaoniga o le taumafaiga o fa’atino a le ASPA i lea tulaga, ma talanoa ai i le itu o le tautua tau le suavai taumafa a le ASPA ma fa’auia ai le vala’au i le susuga George ae toe tuu ai le vala’au i le susuga Fidel, o le inisinia o le Suavai Taumafa ma Ala o le Suavai tatafe i le atunuu.

Fa’ailoa e le susuga ia Fidel, “O le taimi nei o lo’o fa’auau le matou sailiga ma suesuega i le suavai taumafa manino o lo’o fa’auia atu i laina o paipa vai a le ASPA, peita’i e le’i mae’a. E le faigofie lava so’o se galuega fa’atino mo lenei tautua, aua e mamao le nofoaga e ta’ia mai ai le suavai o lo’o inumia ma fa’aaoga e le to’atele o le atunuu ma isi afio’aga. Peita’i e ao ina faia aua e moni ua ese le tofo o le suavai i le taimi nei, ma ua tele fo’i le pasene o le masima o lo’o ua i ai.”

“E lua mea e masalomia, o le tofo e ala ina suia ona ua sao mai se suasami i totonu ma le lona lua, ua tele le kololini ua fa’aopoopo i le suavai ina ia mama ai ma pe ai le tele o siama e le aoga i le tino o tagata ma manu. peita’i a’o le’i tu’uiina aloa’ia mai se tali i le mamalu o le atunuu, e ao ina mautinoa tonu lava le afaina. E le mafai ma e le tatau fo’i ona si’itia le pasene o le Kololini e fa’aopoopo i le suavai taumafa mai so’o se nofoaga o lo’o sasa’a atu i ai.”

O lo ua fa’ailoa mai e Fidel, o le a matua logo mai lava le mamalu o le atunuu e ala i fa’asalalauga fa’alaua’itele pe afai o le a mae’a maua le tali o suesuega ua fa’atautaia ma amatalia nei. O lo ua talosagaina e ia le vaiaso lenei se’i fa’amae’a lelei ai latou ia galuega, ona toe fa’ao’o mai lea o le tali i le mamalu o le atunuu.

I se tala fo’i mai ia Fidel lava, “O lo’o matou galulue so’otau’au lava ma le ASEPA ina ia suesueina lelei le agava’a o le suavai a le ASPA mo le inumia. O i latou na o lo’o ua fa’alagolago atu i ai i matou mo nei suesuega uma e faia i le suavai manino poo le suavai taumafa.”

O le talanoaga ma le susuga Ryan Tuatoo sa ia fa’ailoa ai, sa faauia atu se talosaga i le sui sa fa’atautaia le suesuega i le suavai ina ia fa’ailoa mai se mafuaga o lo’o ua atili ai ona mai le suavai taumafa, peita’i ua fa’ailoa mai e le’i talia mai lava nei fa’afesili, ona e le o faigaluega le sui sa tatau ona fa’ao’o mai ai se tali mautu o lea mataupu o fa’afesiligia.

“Pe afai o le fa’aititia pea le tele o le suavai e mafai ona i totonu o fa’atanoa vai, o le mafuaga fo’i lea e mafai ai ona tele le tofo mai o le suavai, ae tatau fo’i ona fuafua toto’a i ai le aofai o le Kololini e tatau ona fa’aopoopo atu i ai. o nei mea uma e ao ina faia ma le mataala galuega a le aufaigaluega pe afai ua va’aia le ititi o le suavai i le fa’atanoa vai.”

O le mafuaga fo’i lea o le tatalia o le lipoti a le Inisinia o le Suavai , ina ia mafai ona fa’ailoa patino poo fea le fa’atanoa lea ta’i mai ai le sapalai o le suavai i vaega nei o le Tualauta e tofo atu ua tele le masima i le latou suavai taumafa. Lea ua talosaga mai le susuga le Inisinia fa’apitoa o le suavai, tuu atu lenei vaiaso se’i faia a latou suesuega, ona toe fa’ailoa mai lea mo le silafia a le mamalu lautele o le atunuu.

Moni fa’afesili a le tatou nusipepa nei e tusa ai o lea tulaga o le suavai taumafa a le ASPA, e mafai ona emeli atu ni fa’afesili e fia maua se tali i le susuga le Inisinia o le suavai a le ASPA: fidel@aspower.com

3 SUI LEDPELIGHT TAPENA - LAISENE E TAULIA I SO’O SE SETETE O USA

O le aso Tofi na te’a nei ua toe to’ai mai ai i fanua le sui faipisinisi e feso’ota’i ma le taumafaiga ona fa’atula’ia Laisene Aveta’avale o Tagata aveta’avale uma i Amerika Samoa ina ia mafai ona maua laisene o so’o se tasi e pasia e fa’afoea ta’avale i le atunuu, ae ua agava’a fo’i e avea ma se tasi o ana fa’amaoniga o lona sui i so’o se setete e malaga i ai.

Ua fa’ailoa mai o le polokalama lea ua mafai nei ona fa’aulu ma fa’aaoga e le tatou nei malo, e mafai ai ona feso’ota’i atu ma polokalama fa’atulaga a isi setete uma i o latou Ofisa o le Laiseneina o Ta’avale ma fa’amaonia ai Laisene o tagata ave ta’avale.

“O le fa’amoemoe, ia mafai ona pu’ea loa lava nei Laisene o le mamalu lautele o le atunuu i le fa’aiuga o le masina o Novema, lea ua aulia nei,” o se saunoaga lea a le susuga le Sui Komesina o Leoleo, Terry Letuli.

O le sui ua malaga mai nei ma toe fa’aauau ana galuega e galue o ia fa’akonearate mo le Ledpelight, ma ua mae’a ona toe siakia e ia le masini ua mae’a fa’atula’ia i le tausaga e 2019, ua toe siaki atu lava o lo’o lelei mo le fa’aaogaina loa. 

 na’o le to’atolu lava sui faigaluega a le Ledpelight o lo’o ua i a nei i le vaiaso nei. E to’alua lava na amata fa’afaigaluega mai i le 2019 ma le sui na malaga mai i le po o le aso Gafua e toe siakia le masini fa’aola e faia ai le aoaoga a le aufaigaluega i nei aso e lua ma saunia ai loa lava mo le fa’atinoga o le tautua i le atunuu.

Ona o le to’alua o sui nei sa fa’afaigaluega e le Ledpelight sa faigaluega tumau ai lava iinei, o lea ua iloga ai ua mae’a masani sui nei i le fa’agaoioiga o isi galuega uma i totonu o le tatou Ofisa o le OMV.