Ads by Google Ads by Google

TALA I VAIFANUA


Le asiasiga ma le foa’i a Uifa’atali Aumua Amata mo le nofoaga o lo’o fa’aavanoa e le DHSS mo le vasega o tina ma fanauiti. [ata: Leua Aiono Frost]

Pago Pago - AMERIKA SAMOA

 

UIFA’ATALI AUMUA AMATA - FOA’I MO FANAUITI A LE ATUNUU

 

“Paupau ae oo i Lepea!” O se muagagana a le atunu’u e fai i so’o se fa’asoa, aua e ititi pe tele ae ia tofusia ai alo uma o le atunuu. Mai le tausaga 2014, o lo’o fa’aauau pea lava ona faia lenei foa’i mo le fanau e le tatou Faipule i le Konekeresi, Uifa’atali Amata ina ia maua fo’i se avanoa e fa’amalie ai loto o le fanauiti ma fanau talavou a le atunuu ua teteu mai i teuga o so’o se ituaiga, ma latou savavali ma le fiafia e saili se lole suamalie o le afiafi.

 

“Ua tatou va’aia le tumutumu i tausaga ta’itasi o lenei fa’amoemoe, peita’i o le fa’afetai ona ua mafai ona amana’ia e le fanau ma aiga le fa’atala’u’ula atu ina ia auai mai e tu’ulima atu se fa’asuamalie o lenei tausaga atoa. Poo fea lava e i ai le tino, ae matele lava ina fia auai mai i le atunuu mo le fa’amoemoe lenei, aua e taua fo’i le foa’i ma le loto mo fanauiti, e manatua fo’i e i latou nei ituaiga taimi a’o ta’ita’itama mai le soifua e i tatou matua ma le pa’ia o Aiga i le atunuu atoa.”

 

“Ua le gata la i alo uma o le atunuu i Tutuila nei lea foa’i, peita’i o le aso Lua ma le Aso Lulu na te’a, na tomua ai le foa’i mo le Manu’atele i alo uma ma fanau, ua fa’ao’o atu i ai le tufa’aga o lole suamalie. Ua fa’apea fo’i ona fa’ao’o le tufa’aga i le motu o Aunuu i le aso Faraile na te’a nei. O le agaga lava ia so’o se tufa’aga i fanau uma, fanau talavou se’ia oo i fanauiti,” o se tala lea a Uifa’atali. 

 

Ina ua va’aia le tulaga o lea afiafi i nofoaga e tolu i le taulaga i Fagatogo sa foa’ia mai ai lole suamalie ma vaiinu, o le Tedi o Samoa i lana pakaga sa taua’aoina atu ai foa’i nei. ae o lumafale o le Maota e alaala ai le Sui Kovana sa foa’ia mai ai fo’i lole mo fanauiti e le tofa Talauega ma le faletua Marion, ae ese fo’i le nofoaga i lalo ane o le Maota o le Kovana Sili ua tautuaina ai fo’i le fanau e lana afioga le Kovana Sili Lemanu Mauga ma le faletua Ella Mauga. Ua foliga mai ua toe fa’ai’ila atili moli o le taulaga i lea fo’i gaoioiga i le afiafi o le aso 31 Oketopa, 2022, le aso mo le Hallloween.

 

Ona o lea aso sa teuteuina atoa ai fo’i ma Ofisa fa’apea ma pisinisi ae maise o falea’oga ma potua’oga i teuga fa’a-Halloween, o lea la ua masani ai le fanau i le sipili fa’apitoa o lea aso. 

 

E oo atu i le taimi e tatala ai le tufatufaga ua leva ona fai le laina umi e gasolo mai ai, i lana afioga le Faipule, le pule sili o le Ofisa fa’alotoifale o le Faipule i le Konekresi, le afioga le Matua ia Pulu Ae Ae Jr, fa’apea ma le Pule Sili o le Aufaigaluega i le Laumua,  Ina Tavai Yahn. O i latou na sa tofia mo le taua’aoina atu o sukalati ma lole o so’o se ituaiga lava mo le fanau ua gasolo mai.

 

Ina ua mae’a le fa’amoemoe i Fagatogo sa toe fa’ae’e ta’avale uma a le Ofisa ma fa’agasolo loa le tufatufaga i nofoaga e pei o le Pediatric Ward i le LBJ Medical Center, i le fanau o lo’o taofia ai ona o fa’atafa gasegase, le potu talavai a le Pediatirc ae maise o nofoaga o lo’o fa’amautu i ai tina ma fanau o tausia fa’apitoa e le Matagaluega o Alamanuia mo Tagata Lautele poo le DHSS. 

 

E lua nofoaga nei, o le nofoaga ua na’o le fanau o tausia ai, ma le nofoaga o lo’o tausia fa’atasi ai fanau ma tina ona o pagatia i mafutaga i totonu o aiga. O i latou na e sili fo’i ona auau i ai le lagona ma le fia fa’asoa atu i ai o lana afioga le Faipule ma lana aufaigaluega i lea afiafi.

 

O le toe nofoaga sa asia ma fa’ao’o i ai le tufatufaga o le Nofoaga fa’apitoa mo fanau o lo’o ua ta’usala poo i latou fo’i o lo’o i le Juvenile i Tafuna. O le tamaitai Leoleo Jennings ma lana soa sa mafai ona fa’ao’o i ai nei fo’i foa’i taua, e fa’ailoa atu ia i latou uma o alo o le atunuu, “E taua outou uma!”

 

“E pei a ona ta’ua i luga, Paupau ia a oo i Lepea! Ia tau ina ia avatu lenei foa’i ititi ae ua avatu ai ma se agaga alofa, e fa’ailoa i fanau, e taua tele i latou ia i tatou uma o latou sui i faigaupufai o le malo tele, faigaupufai o le tatou malo, ma totonu o tatou aiga fo’i, ae maise o totonu o tatou mafutaga i Aiga o le Atua i Ekalesia.”

 

“Uso e a Faipule, Ia manuia lava lenei fo’i vaitau o le tatou taumafaiga o le fia fa’aauau fo’i o le tautua a nisi, ae o lo’o taumafai nisi mo se avanoa e amata tautua ai i faiva o Tamaalemalo poo Tamaitaialemalo o le tatou atunuu.E leai lava se faiva e asa ma se maumau, ia tatou tumau pea i le fealofani,” o se toe upu lea a Uifa’atali. 

 

TO’AIVA AUMALAGA FOLESI MALO TELE -  SOOTAU’AU & FUAFANUA ALE KOLISI

 

O le asiasiga mulimuli lava a le Folesi a le Malo Tele o le sefulu tausaga talu ai, peita’i, o a latou fa’amaumauga ua tele sona eseesega i le taimi nei, ona ua tele auvamauga ma nofoaga eseese ua va’aia i le atunuu ua mae’a suaina ma ua fuafua e fa’atino ai nisi o galuega poo le mafai fo’i ona fa’asagalemu ai feoa’iga ma le soifua o nisi e to’atele.

 

Lea ua toe malaga mai le to’a 9 o i latou ma ua atoa fo’i le vaiaso ua tuana’i, talu ona faia latou aoaoga fa’apitoa i potu aoga i le ASCC Land Grant, ma ua fa’asolo mai i le vaiaso nei, ua amata ona o atu i latou i laufanua ina ia mafai ona a’otauina le aufaigaluega a le ASCC Fuafanua i ala e mafai ai ona latou faia galuega fa’amaumau i eleele ma laufanua o le atunuu.

 

Ua fa’ailoa mai e se tasi o le aufaigaluega a le Fuafanua a le ASCC, “O lo ua aoga tele lava ia i matou uma i lenei vaega o le Laufanua Fa’asao a le Kolisi Tuufa’tasi  o Amerika Samoa, aua ua mafai ai ona a’otauina i matou i aoaoga tusitusia ae ua fa’alautele atili atu i le aoaoga i le faiga o galuega i le fuaina o eleele.”

 

O le galuega o lo’o fa’atautaia nei o le fuaina lea ma fa’avasega eseese o Amerika Samoa e le o faatoaina i ni fa’ato’aga a le mamalu lautele o le atunuu, poo avea lava ma vaomaoa. O lo ua galulue so’otau’au ei i latou na malaga mai ma le susuga Dennis Sene Jr. lea e avea ma ta’ita’i o lea vaega o le tatou Kolisi Tuufa’atasi. O lo ua mae’a i ai fo’i le aufaigaluega a lea vaega o le Kolisi ma ua aofia fa’atasi pea i latou i nei a’oa’oga faapitoa uma ua fa’atino e le ‘au malaga mai a le Malo tele.

 

Ua fa’ailoa mai fo’i e le sui mai le Ofisa o le Fuafanua a le Land Grant, “O lo’o malaga mai i latou nei ma masini e fa’aaogaina, ma afai fo’i e malaga i matou i Manu’atele, o le a filifili nisi e malaga fa’atasi ma nisi o le matou aufaigaluega i Manu’atele ae o le to’atele lava o le a fa’aauau pea tiute iinei.”

 

O lo ua aofia fa’atasi le auofisa o a le Fuafanua i le Land Grant ma le aufaigaluega fa’apitoa o galulue e tau fa’afo’ia Manu ma la’au Fa’alafua i le atunuu, i lenei aoaoga atoa o lo’o fa’atautaia e le Au Fuafanua a le malo tele. 

 

Ua faailoa fo’i e Sene o lo’o ua i ai eleele o lo’o ua mae’a fa’avasega mai e ao ina latou suesueina leleii Aunuu, Manu’a ma Tutuila fo’i.

 

Fa’ailoa e Sene o le a fa’amauina galuega uma ua faia i nei eleele ua fa’avasega mai mo i latou e suesueina ma o le a fa’alauiloa lava mea uma i se taimi o i luma pe a mae’a ona faia galuega e tatau ai ona fa’atino e pei o lenei aumalaga ma latou galuega o lo’o ua a’oa’oina ai i latou.

 

FA’ATUPEGA - TAUSIGA LELEI TINA & FANAUITI

 

Ua fa’ailoa mai le toe maua mai fo’i o le fa’atupega mo le polokalama fa’aauau a le Matagaluega a le Soifua Maloloina e tausia lelei ai le soifua laulelei o tina ma’itaga latou pepe poo fanauiti.

 

O le aotelega o lea seleni ua toina mai mo le tausaga 2022-2024 e $105,034, mai le vaega o Soifua Maloloina a le Malo tele o le Health & Human Services [HHS]. 

 

“O se mea e sili ona taua, o le fa’aaogaina tatau lea o lenei vaega tupe mo le umi ua ta’ua i luga, ma ia fa’aaoga fo’i ia tausia lelei le soifua o tina ma’itaga ma latou pepe pe a o’o fo’i ina fananau mai fanauiti. E ao lava ina fa’ataua atili le auaunaga lea i nei vaega tupe ua toe toina mai,” o se fa’amatalaga lea a le tamaitai Faipule i le Konekeresi, Uifa’atali Amata e pei ona faailoa ai lea fa’atupega.