Pago Pago - AMERIKA SAMOA

FIAFIA LE PULE’AGA SAMOA PAGO PAGO I LE FA’APA’IAGA O LE LATOU EPIKOPO #3

Na mae’a logo le nai Atea, ua logo fo’i le nai Ama, aua o le taeao ua ula ma ua le lau ni taeao fa’amau fa’ailogaina o le Pule’aga Samoa Pago Pago ina ia latou fiafia ma patipatia faiva o Ta’ita’i o le Galuega a le Atua i le latou tovine, lele ua fa’apa’iaina le latou Epikopo lona tolu i lenei vaitau.

O le fa’au’uga ma le fa’apa’iaga o le tofi Epikopo o Patele Kolio Tumanuvao Etuale sa matua vala’aulia ai le to’atele o le mamalu o e mautofi i malo o Samoa na Lua, ae tainane foi le mamalu o taita’i o le Ekalesia Katoliko mai pule’aga taitasi

Mo lea sauniga mamalu sa tolaulauina ai le tusi fa’amanuia mai a Pope Falanisisi mai le Vatikana ma sa malaga mamao mai ma lana afioga mamalu Novatus Rugambwa, o le Sui Aposetolo a le Ofisa o le Pope.

Ua fa’ailoa mai i lea lava tusi, ua talia e i latou le tusi talosaga atu a Epikopo Peter Hugh Brown ina ia tofia mai se isi sui Epikopo e fesoasoani ia te ia i le galuega i le Puleaga Samoa Pago Pago, ina ia mafai ona fa’atautaia lelei mea uma ia gatusa ai ma le aganuu ma mea uma e fa’ataua e tagatanuu o lo’o  tapua’i i lenei pule’aga.

Lea ua toina mai le latou tofiga, o le afioga Patele Kolio Tumanuvao Etuale, 49 tausaga o lona soifua, ma o ia lenei o le a ia tauavea nei le tofiga Epikopo ma le ta’ita’iga o le Pule’aga Samoa Pago Pago i le tausaga fou, 2023.

Na ta’ita’ia lava le sauniga mamalu o le Fa’apa’iaga o le Tofi Epikopo o Patele Kolio Tumanuvao e le afioga Epikopo Peter Hugh Brown, ae fa’amalumalu ai le afioga le Akiepikopo Alapati Lui Mataeliga ma le Sui Aposetolo na malaga fa’apitoa mai ma le tusi fa’ailo ma fa’amanuiaga a le afioga Mamalu a Pope Falanisisi.

Na masi’i mai fala masi’igata mai Samoa, le afioga le Tamaaiga TuiAtua Tupua Tamasese Tufuga Taisi Tupuola Efi ma le faletua Filifilia Imo Tufuga, Tainane fo’i le Ao Mamalu o le Malo o Samoa, lana afioga Tamaaiga Tuimaleali'ifano V. Sualauvi II ma le Masiofo.

Na tala’aao mai le fa’auluuluga o le Ekalesia Katoliko Roma Epikopo mai Fiti ma le Fa’auluuluga fo’i o le Katoliko mai Tonga fa’apea ma le Ofisa Ulu mai Niu Sila, lea fo’i sa malaga mai ai le afioga Patele Sefo Timu. E le gata i lea ae sa fa’aoo mai uma tusi fa’amanuia mai Aoga sa a’otauina ai le afioga le Epikopo ua fa’au’uina nei, Kolio Tumanuvao Etuale, mai Ausetalia, Niu Sila ma le Iunaite Setete o Amerika fo’i.

I le sauniga na tatala lava i le Ifoga na fa’atinoina lea e le Epikopo fa’au’u ae fesoasoani i ai ma le afioga le Ta’ita’ifono o le Komiti Fa’afoe a le Pule’aga Samoa Pago Pago ma le faletua le afioga Senatoa Fa’iivae Alexander Godinet ma le Faletua Ilaisa Steffany Godinet.

I lea ifoga e fa’ailoa ai le agaga salamo i so’o se agasala sa ia faia, ae se’i fa’amanuia ai le Atua i lona tofiga o le a fuafua e tautua ai i le Ekaesia. O le afioga le Maluolefale ma le faletua sa la’ua avatua le ietoga tele ma fa’apulou ai Epikopo Kolio Tumanuvao Etuale.

Ina ua mae’a le tatalo sa latou faae’e o latou lima, ta’ita’itofia uma o le sauniga mamalu ina ia latou fa’apa’ia ai ia te ia i lona tofiga fou ua taualoaina nei.

Na soso’o ma le sauniga mamalu o le Upu a le Atua lea sa laugaina ai fo’i e Epikopo Peter Hugh Brown, le Upu a le Atua. Sa ia toe fa’atepa lava le mamalu o le Ekalesia i le tofiga o Ieremia e le Atua, na tofia lava a’o i le manava o lona tina, o afuafua ai lona tagata aoga ia te ia i le galuega.

Sa faitio fo’i Ieremia e na te le iloa ona tautala atu i e matutua ma le nu’u faigata, ae ua fa’ailoa mai le finagalo o le Atua, “Pau lava lau mea e fai o lou alu atu e fa’atino ou tiute, ao au e mafuta ma lou gutu, ou te tuuina atu upu e te tautala ai. E mo’omia ona e augofie e fa’atino ou faiva, ae o le fesoasoani e toina mai e le Atua e ona le galuega.”

Mai le amataga sa tula’i ai lana afioga Epikopo Peter High Brown ma fa’ailoa le ‘auga o le aso fa’au’uina o lana afioga Epikopo Kolio, lea ua ia faailoa mai “O le Soifua Faitaulaga!”

I le au vala’aulia fo’i e auai fa’atasi i lenei sauniga mamalu, sa le mafai ona tu’uesea ai isi uso a tovine i Amerika Samoa nei. Sa vala’aulia fa’apitoa mai Taitaifono o le EFKAS ma le Ekalesia Metotisi mo lenei fo’i aso tele o le Pule’aga Samoa Pago Pago.

E le gata i lea sa aofia fa’atasi mai le tele o tamafanau a Amerika Samoa ma Samoa atoa o e ua mae’a avea ma Patele ma sa iloga ona to’atele le vasega o le Aufaiglauega  sa auai ma sa fa’atumulia ai laina nofoa e lua o le itu i sisifo o le Malumalu tele o le Aiga Pa’ia i Fatuoaiga lava, sa nofoia fa’atasi mai ai ma le aufaipese Samoa a le Aiga Pa’ia.

E le’i galo ona fa’aulu ma lomia fo’i le fa’amanuiaga mai le tatou Kovana Sili Lemanu P.S. Mauga  ma le la’ua faigamalo ma le tofa Talauega Eleasalo Ale i le polokalama fa’apitoa mo lenei fa’amoemoe. 

Sa ia fa’ao’o atu ai fa’amanuiaga fa’atasi ma ni lagona me’eme’e ona o le soifua saili o alo o Tutuila ma Manu’atele ina ia osi taulaga i le Silisili Ese o le puna o manuia uma mo le atunuu. “O le tatalo a le faigamalo, ia fa’afulu mai lagi lau tofa pa’ia, ma ia i ai pea filemu o le Atua i lau ta’ita’iga.”

Sa auai uma lana afioga le Kovana Sili Lemanu Mauga ma le faletua fa’apea fo’i ma le afioga le Sui Kovana Talauega Eleasalo Ale ma le faletua i le sauniga mamalu.

Ua fa’apea fo’i ona auai sui mamalu o le Fono Faitulafono a le Malo o Amerika Samoa, i lana afioga le Peresetene o le Senate Senatoa Tuaolo Manaia E. Fruean ma le faletua Fiapaipai Fruean fa’apea ma le afioga le Fofoga Fetalai o le Maota Savali Talavou Ale ma le faletua Beauty Ale. Na auai fo’i le afioga le Failautusi o le Mataupu Tau Samoa le Malo fa’alotoifale o le atunuu, lana afioga le Ma’oputasi Mauga Tasiaeafe Asuega ma Taiuagi Galea’i Mauga. Sa vala’aulia fa’apitoa fo’i lana afioga le Faipule o Amerika Samoa i le Konekeresi a le Malo tele o Amerika le afioga le Tei Uifa’atali Aumua Amata Radewagen  ma sa tapa fo’i lana ava i le ava fa’atupu na fa’atino e le afioaga o Fagasa mo le taeao fesilafilafa’i matagofie i Fatuoaiga.

O le sauniga mamalu o le Misasa sa faatino na tomuli lava i le Komenio Pa’ia ona fa’ato’a tolaulauina ai lea i le gagana Peretania ma le Gagana Samoa le Iugafono Malilie fa’atasi a le fono faitulfono ua fa’amau fa’ailoga ai le taumafai o lenei alo o Amerika Samoa ua tofia nei e avea ma Epikopo mo le Pule’aga Samoa Pago Pago e afua lana nofoa’iga pe a mae’a le tofiga o lana afioga Epikopo Peter Hugh Brown i le 2023.

E le’i tuu mamaina mai e Samoa lenei fa’amau fa’ailoga sili ua ausia e lenei alo o le atunuu i le Pulega Samoa Pago Pago, sa matua masi’i mai le afio’aga o Lotofaga, Samoa ma latou fa’aeaea le aso o lana afioga Epikop[o Kolio Tumanuvao Etuale.

I le aso To’onai na soso’o ma le aso Faraile na fa’apa’ia ai lana tofi Epikopo sa ta’ita’ia ai e Epikopo Kolio Tumanuvao le sauniga o le Misasa o le Fa’afetai i le itula e 10:00 i le taeao i Fatuoaiga lava, malumalu o le Aiga Paia,.

Peita’i o le Aso Sa sa ia ta’ita’ia ai loa le sauniga o le misasa pa’ia i le malumalu na amata mai ai lona soifua tapua’i i lana matagaluega i Iliili. 

Mata’ina fo’i le savali tele sa ia ta’ita’ia maia ma lana ekalesia e o e tapua’i i le latou malumalu tele i Iliili. Malo le fai o le faiva Epikopo Kolio Tumanuvao Etuale, o ou mama na!

LE MAUA SIAKI TOTOGI A NISI AUFAIGALUEGA A LE MATAGALUEGA O A’OGA:

Ua fa’ailoa mai ua gugulu nisi o le aufaigaluega a le Matagaluega o A’oga, ona ua oo i le itula e masani ona fiki ane ai siaki totogi mo e faaalu sa’o i latou teugatupe siaki, ua le oso le mea lena. O lona uiga ua fa’ailoa manino mai fo’i, o nisi fo’i o le Aufaigaluega e totogi i pepa siaki i le aso Gafua nei, o le a fa’apena fo’i le mea e tupu ai i le aso.

Ua maua se avanoa o se tasi o le aufaigaluega a le Matagaluega o A’oga ina ua fesiligia pe aisea ua fa’apea ai le mea ua tupu i nisi, aua e mautinoa e matua le fia oo le soifua tautua o se tasi i lea ituaiga omiga, ae ua fa’ailoa mai e ia, o lo’o i ai se isi galuega o moomia ona faia e i latou i faila o nisi o le aufaigaluega a le Matagaluega o A’oga.

O lo ua taumafai ona fa’aulu atu isi fa’amaumauga i le taimi e fa’auia atu ai fa’amaumauga mo le sauniga o siaki totogi, ona o lea ua moomia mai ona fa’aopoopo atu ma le aofai o tausaga o le tautua a sui uma e faigaluega i le matagaluega, ina ia matauina ai le aufaigaluega ua loa ona faigaluega ae le’o si’itia lava totogi.

“O le galuega la lea o le sailia o tausaga na amata faigaluega ai ma fa’aofi atu i le faila mo le saunia ai o le totogi, e mae’a mai mo nisi, ua maea tapena le lisi mo le sauniga o siaki totogi a le matagaluega, lea e afua ai ona misia a latou siaki i lenei vaiaso totogi.”

E tusa ai ma le fa’amatalaga a lea sui ua fa’ailoa mai e tusa ma le 50 tagata faigaluega lea e aafia i lea fa’afitauli le ma’alofia ma le fa’amalulu mai ai fo’i ia i latou o a’afia, ae o le a taumafai lava ina ia fa’aalu le lisi lea mo siaki e tatau ona maua i le aso Lua.

Ua mae’a fo’i ona fa’ao’o uma se emeli i pule a’oga uma lava, ina ia vave ona fa’aoo ane tausaga talu ona faigaluega sui nei i le Ofisa autu o tagata faigaluega a le malo, ma ia alofagia fa’ailoa vave i nai faia’oga o a’afia, e le o se mea e umi o tatalia siaki nei, pe a oo ina fa’auia mai uma lava fa’amaumauga moomia mo le fa’avave ona faamae’a mea uma aua le totogia loa e i latou siaki totogi.

Ona o lea ua moomia nei e Kovana Lemanu ona fa’amauina atu le umi o lau tautua i le Malo, aua o lo ua naunau le faigamalo e fuafua i ai le totogi o tagata fa’ato’a faigaluega ma le totogi o tagata ua loa ona pagatia e faiigaluega, ae o lo’o maulalo lava latou totogi.

Ua fa’ailoa mai, “Masalo o le aso Lua e oo atu ai ua mae’a totogia uma siaki totogi nei a sui faigaluega uma i le DOE.