Pago Pago - AMERIKA SAMOA

TOAI TAUNUU LE 13 O TAUSIMA’I MAI FITI - AOTELEGA 22:

O tamaitai tausima’i mai Fiti e toa 22 i latou lea ua mua’i fa’ato’ai mai le to’a 13 o i latou na i le aso Lua na te’a nei. O lo ua fa’ailoa mai e le susuga le CEO Moefa’auo Bill Emmsley, “O nei tamaitai tausima’i uma sa fili fa’apitoa mai lava ma ua tofusia i latou ma fa’ailoga BSc i le Nursing toa atoatoa fo’i le 8 tausaga o latou fa’atinoa tiute uma fa’atausima’i pasi i Fiti lava.

Ona o lo ua mae’a ona a’otauina tausima’i uma nei i le faigamalo fa’aperetania lea sa a’oa’oina ai i latou i mataupu tau tausima’i, o lea e tatau ai ona mua’i faia ai latou suega NCLEX ina ia mautinoa o talafeagai o latou silafia ma le galuega i Amerika Samoa nei.

Afai o le pasia lelei e i latou le suega NCLEX, ona mafai loa lea ona faigaluega i latou mo le konekarate e 6 tausaga le umi i Amerika Samoa. E toe fo’i i latou i Fiti mo se malologa pe a mae’a le tolu tausaga muamua, ae toe taliu mai ona faaauau lea o latou galuega mo le isi tolu tausaga mulimuli o le Konekerate.

Ua toe fa’aauau foi le polokalama a le LBJ Medical Center lea e fa’afaigaluega mai ai tausima’i mai le Malo o Filipaina.

O le a faia se fonotaga a le susuga le CEO Moefa’auo Bill Emmsley e tusa o lea lava fo’i mana’oga ina ia toe faaauau.

Peita’i o le fa’amoemoe mausali lava o le LBJMedical Center ina ia a’o’oga lelei fanau uma o le atunuu o tauavea nei Kosi Fa’aTausimai i le Kolisi ma pasia lelei latou mataupu ona faato’a faigaluega lea ma le toto’a mo le tatou falema’i tele.

O lo ua fa’ailoa mai fo’i e moomia lava ona i ai se vaega tele o nei fanau talavou, o ni taulele’a aua e le na’o tamaitai e avea ma tausima’i, ua fa’atasia uma alii ma tamaitai i lea kosi.

ASO FA’AFETAI O LE BLUESKY FA’ATASI MA I LATOU UMA - HOPE HOUSE FATUOAIGA:

Na fa’ataunuu lava le foa’i na fa’atulaga e le Bluesky Communications mo le Hope House i Fatuoaiga i le aso 24 Novena, 2022. Ua le gata ina foa’ia e i latou le $3,000, ae ua latou taua’aoina fo’i manufasi tetele mo le ‘aiga fiafia a i latou uma o tausia fa’apitoa i lea nofoaga fa’atasi ai ma le aufaigaluega mamalu.

Ua le gata i lea ae ua faia le latou siva tele ma fa’amasani fa’apa’aga ma i latou uma o matua matutua ma e uma o gasegase o tausia fa’apitoa ai i le Hope House.

Ua latou toe fa’amanatu ai taimi fiafia fa’apenei ma le tamaitai lalelei sa avea ma fofoga o le Bluesky i soo se latou fa’atasiga, ia Sherry Sele. O se taimi lea ua latou toe tomanatu ai i ona uiga tausa’afia, ma fa’afetaia lona tula’i mai e faufautua i galuega foa’i mo le mamalu lautele e aofia ai fo’i ma tatou foa’i nei mo le Hope House mo le tele o tausaga.

I lenei tausaga ua fa’aauau ai pea nei foa’i taua fa’aletausaga a le Bluesky, o latou auaunaga masani ia i vaitau o Aso Fa’afetai ina ia fa’asoa atu le alofa tausimatua ma tausi e tigaina i gasegase a le Bluesky.

O le fiafia fa’atasi ma papesse faapea ma tatou siva sa fa’afiafia loto lea i tina ma tama matutua fa’apea ma i lattor uma o tausia fa’apitoa i le Hope House.

Sa auai le afioga Epikopo Kolio Tumanuvao Etuale i lea sauniga mammalu ma sa avea fo’i ma sui mamalu na te taliaina maia le foa’i taua o le tinoitupe manufasi mo ke aiga fiafia a le Fale o Faamoemoega mo lenei tausaga.

O le susuga le pule Sili CEO Justin Tuiasosopo sa avea ma sui o le Bluesky na te fa’aleoina le latou foa’i I lenei tasuaga ma sa susu atu o ia ma se vaega tele o le latou pulega ma le aufaigaluega ina ia faaauau lea foa’i fa’aletausaga.

FA’ALAUTELE & SIITIA MALOSI’AGA TAUTUA  A LE ASTCA - LALA I LE CBT HO CHING NUUULI:

Na auai atu le afioga le Sui Kovana Talauega Ale i le toe tatalaga o le faalautelega ma le toe si’itia o le malosi’aga ole tautua a le ASTCA mai lona Lala i le CBT Ho Ching i Nuuuli. Na tapena le sauniga mamalu ina ia tuu atu fo’i i le Atua le fa’amoemoe maualuga o lea lala o le Malo, i lana tautua tau feso’ota’iga, lea ua siitia ona malosi’aga i le 5G i le taimi nei.

Na amatalia i le sauniga fa’afetai i le a’ao ta’ita’i o le Atua i le taumafaiga mai tausaga e tele i lea matagaluega, ma ua oo mai fo’i i lenei vaitau e le o misia lava le fesoasoani sili a le Atua i le poto ma le iloa e fa’aleleia atili ai le taumafaiga.

Ina ua mae’a siitia le fa’afetai ona tuu avanoa lea i le saunoaga mamalu a lana afioga le Lutena Kovana  Talauega Eleasalo Ale mo sa ia fa’ailoa mai ai i lana tautalaga, “Tatou te maofa i le mata’utia o le alofa o le Atua ia i tatou ma lo tatou malo. Lea fo’i ua mae’a fa’amautu lea tuaua mo le atunuu e fa’afetaia ai lava le aao ta’ita’i ma le faasino o le Atua ia i tatou. Ua mafai ona fa’aleleia atili le tautua leneima ua fa’alautele atili  e tautuaina ai tagata lautele, pisinisi ma le tatou Malo.”

“Ua le gata i oloa o fefa’ataua’i ua fa’aleleia atili ai sootaga ma pelega i atunuu mamao, ae ua fa’apea foi i feso’ota’iga ma fefa’ataua’iga i le va o le tatou Matagaluega nei ma le mamalu lautele o tatou o nonofo pea iinei. Fa’afetai i le auaiga e one lenei fale o pisinisi ua mafai ona tatou fa’aaogaina lona vaega tele ma ua avea ma lala o le tatou Matagaluega e feagai tonu lava fo’i ma le isi tatou Kamupani o lo’o faamautu i le la itu o le ala.”

“Ua iloga ala o pisinisi, ua iloga fo’i ala o taumafaiga ina ia fa’ataututu i fefa’ataua’iga ma tautua e lelei atili ai le auaunaga mo tagata lautele, aua a maualalalo totogi o minute mo fesoota’iga ma fa’apea ma tau o telefoni ma isi uma auupega e faaaoga mo feso’ota’iga, o le aoga lea mo le mmalu lautele”

“I lau susuga le CEO Chuck Filiaga , ia lelei fa’afoe le auaunaga mo le atunuu.” O se toe upu lea a le afioga le Sui Kovana i lona avanoa e saunoa ai sa atofaina mo le polokalama.

O le lipine na ootia lea e le susuga le sui sili ona matua o faigaluega lava i le ASTCA, James Taylor, ua atoa fo’i le 61 tausaga o le tautua a lenei tama i le ASTCA.