Pago Pago - AMERIKA SAMOA

TOE TOTOGIA E LE FEMA - $1.9M I LE LBJ MEDICAL CENTER:

Ua fa’ailoa mai, ua toe totogia atu nei e le FEMA le aotelega e $1.9miliona i le LBJ Medical Center, ona o lo ua latou galulue pea ma fa’aauau le galuega na moomia ona latou fa’atinoa, “Ia ona fa’aleleia ma fa’alautele le Potu Taofia o le ICU, le potu taofia o le Pediatric Ward, le Potu mo Taotoga; Potu o Tina Ma’itaga; ma o galuega nei sa amatalia mai lava ia Aperila 2022.”

O le vaega lona lua lea o le tinoitupe atoa na toina mai mo le Falema’i Tele i Faga’alu ona o le latou tutumau e fa’atino uma aiaiga na fa’atulaga mo lea fa’atupega, ma o lona vaega mulmuli fo’i lea o lena alamanuia. 

Mai lea galuega tele ua mae’a fa’aopoopo ai moega e 26 ua mae’a fa’atulaga ai masini e tatau ona fa’aaogaina mo togafitiga fa’atasi ai ma le masini sapalai o le Okesene mama mo gasegase o togafitia, fa’atasi ai ma isi masini uma e fa’aaogaina e togafitia ai gasegase ua po’ia i le Covid-19.

Ua fa’aaliga le agaga faafetai o le sui Faipule I Uosigitone I lenei foa’I taua, aemaise i le vaega patino o le FEMA sa latou toe fa’amautu maia le vaega lua o le tinotupe lea, le susuga le pule ia Deanne  Criswell ma le latou vaega o le auaunaga na sapaia ai Amerika Samoa ina ua po’ia i le fa’ama’i ma latou fa’aleo ai se mana’oga tupito mo lea fesoasoani ia toina ma

SAO MAI TAGATA MAULU - ‘AINA E LE MALIE:

O se tama e 43 tausaga le matua, sa maulu e fa’atino ni galuega o Paipa i ogasami o lo’o i ai le Star Kist Samoa, ua fa’ailoa mai ua togafitia ona manu’anu’a tuga ina ua osofa’ia o ia e le Malie ao faia ana galuega.

O le tala mai o lenei ali’i e sau mai Portland, Oregon ma e faigaluega i se Kamupani i Amerika Samoa.

O ona manu’aga e pei ona fa’ailoa mai e Dr. Akapusi Ledua, e fai si loloto o ona manu’aga i lona vaega agavale ae ua tele fo’i lona toto ua masa’a i le taimi na oo atu ai i le falema’i.

Na vave lava ona fa’ao’o o ia i le potu mo taotoga ma latou galulue ai e su’ia ona manu’aga ma na fa’ato’a mae’a le galuega a foma’i e tusa ma le 4 ma le afa itula na faia ai.

Ina ua mae’a sa taofia o ia i le Potu Surgical a le tatou falema’i tele e ua fa’asolosolo lava ina manuia lona tulaga o ona manu’aga e pei ona fa’aalia i lipoti faamaumau a foma’i tiute.

Ua fa’ailoa mai o lo’o ua amata fo’i gaoioiga a Foma’i ina ia mafai ona siitia ese o ia mai le teritori e auina atu i Portland Oregon e fa’aauau ai ona togafitiga se’ia toe faaatoatoaina ai lona malosi.

E tusa ai ma se fa’amatalaga a se tasi o alii maulu, ua ia fa’ailoa ai, “Atonu e le’i la’eia e le sui lenei la’ei e tatau ai mo tagata maulu e fa’atino ai ona tiute, peita’i e mautinoa lava e ia sa taulimaina e ia le tama’i naifi lea sa mafai ona ia tatuia ai le malie ma ua fa’asaoina mai ai o ia i lea taimi.

Ua i ai fo’i nisi sa latou molimauina le va’aia e latou o malie i le ogasami tonu lea sa faailoa mai sa fa’atino ai tiute o lenei ali’i talavou,

TOINA MAI E LE CDC - $3.4MILIONA MO LE SOIFUA MALOLOINA:

Ua fa’ailoa mai le toina mai fo’i e le US Centers of Disease Cintrol & Prevention o le aotelega o le tinoitupe e $3,425,012. mo le Matagaluega o le Soifua Maloloina e fa’aleleia atili ai latou fa’amaumauga, le tapenaga o le aufaigaluega ma le galeuga tima’i uma o feagai ai ma le matagaluega o le soifua maloloina i le atunuu.

O lea aotelega o le taumafaiga lenei ua fa’atupe mai, ina ia mafai a’ia’i ona o’o auaunaga lelei uma tau le soifua maloloia i tagatanuu o le teritori i soo se mea o alaala ai, ma ia fa’aleleia atili le ala o tautua eseese nei e oo lava i le tomai ma agava’a o tagata faigaluega o lo’o latou fa’atinoa nei tautua.

O lenei fa’atupega ua fa’atulaga mo le lima tausaga, e ao ai ina mautinoa ua mae’a faia galuega a le Matagaluega o le Soifua Maloloina, e pei ona fa’atulaga mai ai i aiaiga tamau o lea faatupega.

I le fa’asalalauga fa’alaua’itele a le CDC ua latou folasia ai le latou mana’oga tupito ina ia faalogo i latou i fanoga uma e auina atu mai soo se vaipanoa o lo’o mautinoa e tetele ai le mana’omia e fa’aleleia le Soifua Maloloina, ma tuu sa’o mai fo’ i ai le fesoasoani o sili ona latou mana’omia.

O le taimi nei o le mea sili ona moomia e nu’u tumamao mai i saute o le atumotu o va’aia patino e le Iunaite Setete o le si’itia lea o le tulaga e tautuaina ai lo latou soifua maloloina lelei. E ui ina mamao ese mai i saute ae ua iloga e to’agaogao ma e moomia tele ona fa’ao’o uma i ai auaunaga tau le soifua maloloina i taimi uma, ae maise pe a oo fo’i ia lutia soo i fa’alavelave matuia fa’anatura ma toe toso atili ai i tua le latou soifua maloloina tausia lelei.

MAUAINA E LE TAUSALA MA LE MANAIA A LE AOGA MAUALUGA A TAFUNA MEAALOFA TUPE MAI LE FOEOLETINI FOUNDATION

O le uluai meaalofa tupe na ofoina mai e le Foeoletini Foundation na taua’aoina lea i le Tausala ma le Manaia ale aoga maualuga a Tafuna, ina ua manumalo i le tauvaga sa fa’atautaia lea ia Novema 19, 2022 i le Gov. Rex Lee Auditorium i Utulei.

O le auau o lea fa’amoemoe ua faliu i ai le Foeoletini Foundation ua fa’aautu lea “Amata ia te oe le Suiga Fou” o se taumafaiga ina ia taofia pe soloia le tagofia e fanau talavou o fualaau fa’asaina ma Vaila’au O’ona  ma o se taumafaiga ina ia aotelega i ai le vasega o talavou uma e mafai ona oo i ai lea fe’au taua tele.

O se poloketi ua alagatatau ma agatonu ma aiaiga o lo ua mae’a fa’ataoto mai e le Foeoletini Foundation, ua mafai fo’i ona talia e i latou ma taua’aoina i ai le meaalofa tupe e $1,000.

Ua faailoa mai e le sui fo’i o le Fa’alapotopotoga a le Foeoletini, “Ua matele ina talosagaina mai lava le fanau talavou mai fa’apotopotoga i totonu o a’oga, ae ua i ai fo’i fa’alapotopotoga i totonu o le atunuu lava ua talosaga mai. I le matau atu i lenei taumafaiga, ua to’atele lava fanau talavou ua ofo a latou tautua e fa’atautaia ai galuega tautua ma fa’atino mo le mamalu lautele, ua talia uma lava talosaga mai so’o se fa’alapotopotoga ua aofia i ai le tupulaga talavou.”

O lo ua sapaia e le Foeoletini Foundationa soo se fa’alapotopotoga lava e tautuaina se fa’amoemoe e mafai ona auai i ai le to’atele o le autalavou i le atunuu ma ua naunau ma auga i le tulaga mama mai le tagofia o le tele o fuala’au fa’asaina ma vaila’au oona.

“Ua iloga lava o le ala e mafai ai ona maua a’ia’i agaga o le tupulaga talavou o le faatasi atu lea i a latou polokalama fa’atautaia ua mafuta i ai, ua mafai fo’i ona tuu avanoa lelei ia i latou e fa’aalia ai o latou lagona ma manatu i soo se mataupu ua fia folasia mai ai o latou lagona fa’aalia.” O se tala lea a le tamaitai Fa’atnu sili o le Foeoletini Foundation, Trudie Ledoux-Sunia.

“Ua matou manana’o ina ia avea lenei Fa’alapotopotoga e fai ma ta’iala i nisi fo’i fa’alapotopotoga ina ia fa’ata’ita’i mai i ai ma latou sootau’au mai i lea fa’amoemoe lelei, e tau taofiofi ma soloia ai le tagofia e le fanau talavou o fuala’au fa’asaina ma vaila’au oona i le teritori.”

“O lea taumafaiga o le a maua ai se avanoa lelei mo le tupulaga talavou latou te fafauina ai ni ala e mafai ai ona fesootai le tupulaga ma ni avanoa lelei e mafai ai ona fa’atino ni a latou poloketi aoga e ‘auga i aoaoga aoga e taofia ai le tagofia o vaila’au oona ma fuala’au fa’asaina, atoa ai ma le iloa patino fo’i o a’afiaga tau le mafaufau ma le tino e pagatia ai i latou o le a fa’aaogaina nei mea, e le aoga i le mafaufau ma le tino soifua maloloina lelei o i latou uma.”

“E le gata i lea, ae o le a maua fo’i e i latou le sootaga ma fesoasoani uma e mafai ai ona latou feso’ota’i ma isi polokalama aoga e fesoasoani malosi e aoao ma saili ala o fesoasoani eseese e sailia lava e i latou o talavou. E aiaia fo’i e i latou nisi poloketi fou e fa’atutu lava i le ‘auga e tasi, ae matua fa’ataua le ofo mai o tautua a le tupulaga e faatautaia ai, ma sailia tele e i latou vaifofo o fa’fitauli o feagai ma le tupulaga i lenei vaitau. O le va’a e fautele e le tupulaga talavou mai ona tulaga uma, o le fa’atuina atoa ai ma le faaaogaina, e matuaina mai lava e tupulaga, ia aoga fo’i mo i latou ua tagofia fuala’au fa’asaina ma vaila’au oona ina ia taofia loa.” O se toe fa’apupula atili mai lea a le fa’atonu o le Foeoletini Foundation.

Ua fa’afetaia fo’i e le tamaitai fa’atonu o le Foeoletini Foundation a latou pa’aga galulue mai le teritori fa’apea fo’i ma fafo ona o le latou loto i le ‘auga o le fa’amoemoe, “O le fa’amoemoe maualuga lava o le Foeoletini Foudation, ia aga’i i luma le galuega tima’i, a’oa’o ina ia silafia ma faaatoatoa le latou taumafaiga ia fa’asaoina lava se tasi o tupulaga ua a’afia lona soifua maloloina, ma lona tagata a’oa’oina ona o a’afiaga o le tagofia o fuala’au fa’asaina ma vaila’au o’ona.”

Soo se taumafaiga lava ua agaga ina ia tau taofiofia ai le so’ona tagofia e le tupulaga talavou o sikaleti, ava malosi, fuala’au fa’asaina ma vaila’aua oona i le atunuu, ua fa’ailoa mai e mafai ona talosagaina se fesoasoani tupe mai le Foeoletini Foundation i le teritori. O le maualuga lea o le latou foa’i ua faia i le taimi nei, e $1,000. mo so’o se fa’amoemoe lava ua agatonu le latou ‘au’au ma le sini autu fo’i o taumafaiga a le Foeoletini Foundation.