Pago Pago - AMERIKA SAMOA

PA’U TEISI TAU O OLOA MASANI ONA FA’AOGA E AIGA

Ua fa’amauina mai se pa’u teisi o le tau o oloa e masani ona fa’atauina e Aiga ta’itasi o le Malo mo le fa’aaogaina ma ua iloga fo’i le alumia i so’o se vaitau o le soifuaga i totonu o le atunuu, i le masina lava o Novema lea fa’ato’a mae’a atu.

Ua fa’amauina le 0.4% ua pa’u ai le tau o oloa masani ona fa’atauina e aiga ta’itasi mo le fa’aaogaina i le masina o Novema talu mai ia Oketopa.

E 8 oloa ua fa’amauina mai le 20 e masani ona sue’ina ai lea pasene poo pa’u pe si’itia i masina ta’itasi, ua fa’ailoa mai ua pa’u le tau sa fa’atau atu ai ia Novema mai le tau sa fa’atau atu ai ia Oketopa i le mamalu lautele, ma ua afua ai lea pa’u teisi i le tau o le soifuaga i oloa masani ona fa’atauina e aiga ta’itasi o le atunuu.

Ole suka ua fa’aititia i le 0.2%, o le pata ua fa’atauina i le 0,3%, o le i’a fagota mai ua fa’atauina i le 0.6% le tau pa’u, ma saimin pepa ua fa’atau atu  le 0.7%, ae o le fuamoa ua fa’atau atu i le 0.6% le tau pa’u, spare ribs pua’a ua fa’atau atu i le 0.9% le tau ua pa’u ai, ma le tau o le vae moa ua faatau atu i le 3.4% le tau pa’u, ae o le tuna fo’i ua fa’atau atu i le 0.8% le tau pa’u.

Ua faapea fo’i ona siitia le tau e fa’atau atu ai le isi 8 o mea e masani ona alumia i fa’atauga a aiga taitasi o le atunuu: Talo, Fa’i, Aisikulimi, mayonaise, turey tails, apainu ma le sosisi. O isi oloa e aofia ai le susu, falaoa ma le pisupo o lo ua le suia i le masina atoa o Novema.

O le siitaga maualuga lava o le tau o nei oloa ua fa’amauina e le Matagaluega o Fefaataua’iga, o le masina lea o Me 2022, ma ua fa’amauina fo’i, o le tele lava o tau tumau ua faamauina lea i masina e tolu o totoe o le tausaga, se’i vagana ai pe a oo ina sioti le sapalai o se oloa, ona toe fefa’ataua’i mai lea pe a fa’ato’a maua, ua maualuga le tau e siitia i ai.

Pe a fa’atusalia le tau o loa sa i ai ia Novema o le tausaga 2021, ua iloga mai ua siitia le tau o oloa nei pe a aotelega e tusa ma le 17.3% mai le tau ua fa’atauina ai e le atunuu i lenei tausaga, ae ua fa’aititia teisi mai le tau sa fa’atauina ai e le atunuu e tusa ma le 0.4% i le tau o oloa ia Oketopa 2022.

MALIGI TAMAITAI SAMOA ULUFALE ATU -  BOOT CAMP MARINE SAN DIEGO

O le tamaitai Maligi Koa ua fa’aulu sa’o mai Amerika Samoa ua ulufale i koleniga fa’apitoa a le Maligi Koa i  Marine Corps Recruit Depot i San Diego, CA, o ia o Mele Ah Ling.

O le nofoaga lea, e koleni ai lava na’i Maligi Koa tama mai le amatagamo le tolu masina pe pasi pe leai. Peita’i o lea fa’ato’a ulufale lea i ai se tamaitai Maligi Koa mai Amerika Samoa, aua o nisi sa mua’i ulufale sa ese le nofoaga sa a’otauina mai ai, e masani ona ulufale mo le Boot Camp i Marine Corps Recruit Depot i Parris Island, South Carolina.

O le mafuaga ua fa’ailoa mai, o lea fa’ato’a talia lea o tamaitai e koleni fa’apitoa mai i le San Diego Marine Corps Recruit Depot, ae ulufale loa le tamaitai o Mele Ah Ling i le Maligi Koa mai le tatou teritori.

O Mele Ah Ling mai le Laumua o le Toa Tafuna, na tu’ua le atunuu ia Novema 07, 2022 ma ua ulufale nei i le San Diego Marine Corps Recruit Depot i San Diego mo ana koleniga fa’aMaligi ma e fa’ato’a mae’a lea ia Fepuari 2023.

O le tamaitai na ia una’ia malosi lea tamaitai ina ia auai ma tautua i le US Marine Corps, Staff Sgt. Helenia Porter, ma ua ia fa’ailoa mai, “Ua lava sauni Mele mo lana folauga i l Maligi Koa, ua mae’a faia lana fa’ai’uga o le vaega au lea e fia auai, o lona naunauta’iga ua mae’a fa’amauina i lona loto, ua tapena fo’i lona tino e ala i ana fa’amalositino, ua agava’a aua o lo’o tu’uina atu fo’i e ia lona fa’amoemoe i le Atua e mafaia ai.”

Ua fa’ailoa e Staff Sgt Porter, “Na ou maua le feso’ota’iga ma Mele e ala i lana uo mamae o lo’o koleni fa’apitoa e ulufale ai i le Maligi, ma ua ia fa’ailoa mai o lo’o i ai le fa’anaunauta’iga o Mele e fia alu i le Maligi Koa. O iina loa sa ou fa’afetauia ai loa Mele ma fa’amautu ai lona fa’anaunauta’iga ia auai i lenei auaunaga. O le ala fo’i lea ua fa’aea ai o ia o se Ulua’i tamaitai Maligi Koa ua ulufale ma a’oa’o fa’apitoa fa’aMaligi Koa i le Boot Camp lea i San Diego, sa nao tama sa a’otauina mai ai i vaitau ua tuana’i.”

O se tala mai a Mele Ah Ling, “Ou te mana’o i le vaega ‘au e sili ona faigata e a’otauina ai a’u aua ou tiute fa’atino i le vaega au. O le faigata o le a’oa’oga, o le anagata fo’i lena o le atamai e maua ai.” O se tala lea a le tamaitai o Mele Ah Ling ina ua maua mai le tala, e a’otauina o ia i le Nofoaga o le Maligi Koa i San Diego lea e na’o taulelea lava sa a’otauina ai muamua.

O se tala mai le uso o Mele, Roselyn Ah Ling, “E mautinoa lava e faigata lau sailiga malo Mele, ae matou te tatalo ma tu’i le mulipapaga ina ia e fo’i mai ma le manumalo. Fa’afetai fa’aea aiga fa’afetai le saili malo.”