Pago Pago - AMERIKA SAMOA

FESOASOANI AU FA’ASALALAU FA’ALAUA’TELE - FA’AOLAOLA O LE GAGANA SAMOA

Ua toe fa’amanatu mai e le Komisi o le Gagana Samoa i le ‘au fa’asalalau, le latou sao tele e fa’aauau ai ona fa’asao ma fa’atumau pea le Gagana Samoa i le atunuu ma soo se mea o alaala ma papaaao ai tagata Samoa i so’o se vaipanoa o le laloalagi.

I le fonotaga na tu’ufa’atasia e le Komisi o le Gagana Samoa, ina ia latou feutaga’i ma le Au Fa’asalalau i le atunuu ina ia manino lo latou sao tele i le tau’avea o le Gagana Samoa mai lea augatupulaga i le tasi, ma ia gafataulima lava lea tofi o le atunuu, ina ne’i mou ese atu.

O le ta’ita’ifono  o le Komisi lea, le afioga Peseta Tialuga Seloti ma isi sui totino o le Komisi e aofia ai Rev. Eleasalo Faataataa ma Rae Lelili’o sa latou feutaga’i ma tusitala mai le KVZKTV, Samoa News, KHJ South Seas Broadcasting, ina ia latou tuumatamaga mai lava le sao patino o le au fa’asalalau i upu e ao ina tusia ai tala ia manino lelei le fe’au o ‘aumaia, ma fofogaina fo’i i ala fa’asalalau fa’alaua’itele i Siufofoga i le atunuu, ia manino ma malamalama lelei tagata i fa’asalalauga ma fe’au tu’usa’o o lo’o ua tatau ona fa’aleo mai e i latou.

O le isi mea sili ona taua, o nisi o saunoaga ma tusitusiga ua le tatau ona toe faaaogaina, ona ua le sa’o lo latou fa’aaogaina i saunoaga ma tusitusiga fa’asalalau fa’alaua’itele.

“E mautinoa e leai se tasi e taumafai ona toesea le mau, e pule le sui fa’asalalau i lana e taulogologo mai, ae tatau ona mataituina le tonu ma le sa’o o le ala o le taulogologo. Ia sa’o ona fa’aaogaina le tatou tofi poo le mau tau’ave i le gagana o fa’aaogaina, o le auupega sili ona taua, ua avea ma tatou tofi, o le Gagana Samoa lea,” o se saunoaga lea a Peseta.

“Ona o le faanaunauga ua i ai, ia sa’o le fa’aaogaina o le Gagana Samoa, o lea ua tu’umavaevae ai o tatou sao tau’ave e ala i lenei taumafaiga, ma ia fa’autagia, e tatau ona mataituina ma le atoatoa e i tatou uma, i taimi uma e fa’aaoga ai le Gagana Samoa,” o sana toe fa’aopoopo mai lea.

O lo ua folasia mai fo’i le agaga tonu o le Komisi galulue i le taimi nei, o le a faia fa’afaleula fatua’iupu i le atunuu, ina ia mafai ona malilie fa’atasi le atunuu ma le komisi o le gagana i upu e agatonu ma le fa’asamoa ai nisi o mea fou, e tatau ona fa’aaoga e le au fa’asalalau i ni mea ua tatau ona fa’asamoa sa’o, ae ua faigata tele ona fa’aliliu fa’asamoa. 

Mo se fa’ataita’iga, “E pei o upu nei ua fa’aaogaina so’o i lenei vaitau o le talutalu fou o masini ma mea e fa’aaogaina e inisinia: Technology ua fa’asamoa sa’o i lona fa’aleoga Tekonolosi.”

I le fa’asoa mai a nisi o lo’o tusitusi i le gagana, sa ia fa’ailoa ai, “E moni lelei, e tele atu le fa’anaunauga o le to’atele o le atunuu ina ia manino lelei le faaperetania poo le Igilisi e tautatala ai fanau, ma ia mafai ona tusitusi ai fo’i ma le malamalama. Ua taumafai nisi o matua e taofia a’ia’i le toe tautala o fanau i totonu o li’o o latou aiga i le gagana Samoa, ae fa’aaoga mai le gagana peretania, ona o le naunau ia lelei le a’oga ma togi o le fanau a’oga i nei mataupu, aua e le o fa’asamoaina le fa’aupuga o suega ua su’e ai le fanau i a’oga, ae ua fa’aperetania.”

“O le ala fo’i lea o le fa’atu’utu’u o le to’atele i le toe fa’aaogaina o le Gagana Samoa i totonu o aiga, ma ua lape mai ai lea taumafaiga ina ia vave malamalama fanau i le latou gagana ma tusitusi ai ma le toto’a.”

“Ua fesiligia nei poo le a tonu se sao o le Komisi i lea faiga? Poo le a fo’i se tonu e ao ina faia i nei aiga ma matua ma le latou fa’amuamua?”

Ua fa’afetaia fo’i e le susuga le Faife’au Rev Eleasalo mo lana saunoaga sa ia fa’afetaia ai le sao o le au fa’asalalau fa’asamoa ona o lo ua fai i latou ma sui e fa’amautinoa ai e le o mou atu le gagana, ae ua toe avea ma se i’umaea e toe fa’amautu mai ai le gagana i loto o tatou tagata lautele.

Manatua se tasi o folasaga a le tamaitai lauiloa i le gagana Samoa, Aiono Dr Fanaafi Ma’ia’i Le Tagaloa, “A mou le gagana a le atunuu, ua mou fo’i ona tagata.”

“Ia fa’asusulu pea le Lamepa, ia le gata ina fa’amumu atu, ae ia tu’u i luga o le tu’ugalamepa, ia matua sulugia uma ai le motu o tagata e to’atele.” O se mau mai le Tusi Sa e fa’atatau lava i le tatou taumafaiga ia matua toe a’oa’o tatou fanau iti i le gagana aua o le tatou lea measina ma o le tofi na toina mai e le Atua mo tagata Samoa moni lava.

TA’ITA’I O A’OAOGA TAUSIMA’I ASCC - TULAGA O TAUSIMA’I PASI:

O le tamaitai ulu o Kosi Tausma’i Pasi e tausailia i le tatou Kolisi Tuufa’tasi i Amerika Samoa, Lele Ah Mu sa ia fa’ailoa sona taofi e tusa o le mataupu tau le fa’aittia pea lava o le aofai o tausima’i pasi i totonu o le atunuu.

Ua matua faafiafiaina o ia ina ua talia ma le fa’afetaia e le vasega o tausimai mai Fiti le vala’au ina ia faigaluega mai i le tatou falema’i tele i Faga’alu. “O se fa’amalosi’au sili lea mo i matou o tausimai i Amerika Samoa le latou fesoasoani mai i tiute fai fa’atausima’i aua le fa’afaileleina o le soifua lautele o le atunuu i le Maota Gasegase i lenei vaitau,” o sana saunoaga amata lea.

“O le toe fa’aitiitia mai o itula faigaluega i le ta’i 8 itula o sifi ta’itasi, o se isi lea fesoasoani aoga tele mo le au tausima’i i le atunuu, aua ua mautinoa ua le lava le malolo i le to’atele o i matou e faigaluega aua, ua le lava le aotelega o tausima’i e mafai ai ona fa’aititia itula faigaluega.” 

“O le taimi nei e sili ona mo’omia ai le tupulaga tama malolosi tino e avea ma tausima’i, peita’i e to’agaogao lava le aofai o taulele’a Samoa e ofo mai ma mae’a lelei a’oa’oga fa’atausima’i, aua e ao lava ina o gatasi le fia avea ma tausima’i i tiute faatino ma silafia lelei o mea uma e ao ina fa’atino ai tiute i taimi uma.”

“Mo le uluai sitepu lava e aotauina ai se sui e avea ma tausima’i Aide ua ofoina mai e le ASCC le tupe maua e $1400. mo i latou uma e sainia suafa ma tauavea lea kosi amata mo le Nurse Aide. E sefulu vaiaso o lea kosi amata.”

“Soso’o mai ma le Practical Nursing Program e maua le tinoitupe e $2,000. i le afa tausaga e tasi ma o lea vaega o le kosi e 11 masina le umi ma e mafai ona umia ai fa’ailoga BScience i le muta’aga o lena taumafaiga.”

“Ua fa’atulaga fo’i e le Kosi mo Registered Nurses i le Iunaite Setete le pasia o le suega NCLEX lea e fa’atulaga mai e le Nationa Council of State Boards of Nursing, le suega la lea e tatau ona mae’a pasia fo’i e so’o se tausima’i pasi mai se tasi o atunuu uma lava i le pasefika lea e tatau ona pasia e Tausima’i Pasi mai Fiti ma Samoa, fa’ato’a faigaluega ai i so’o se setete ma teritori o Amerika.” 

I le taimi nei ua fa’ailoa mai e silia ma le to’a 20 o tamaiti aoga i le Kolisi ua amatalia le kosi o Tausima’i Aides. Ua fa’atulaga fo’i le latou sue’ga NCLEX e faia pe a mae’a lea taimi atofaina ma fa’amauina ai latou Konekarate faigaluega mo le 3 tausaga.

O tausima’i Pasi nei mai le malo o Fiti ua fa’ailoa mai e to’atele lava ua atoa le 6-10 tausaga o galulue i Fiti ma ua mae’a umia fo’i fa’ailoga BScience in Nursing, ma o le tamaitai Pule fo’i o a’oa’oga tausima’i a le Kolisi, Lele Ah Mu sa auai i le filifiliga maia o nei tausima’i uma ua mae’a faigaluega ma toe a’o’oga nei i le ASCC i le teritori.

I le taimi nei, ua fa’ailoa mai e le Pule Sili o le LBJ Medical Center Moefa’auo Emmsley, “Ua mae’a ona fa’atulaga e le Pulega o le Falema’i se fa’atulagaga fou mo tausima’i faigaluega uma i le LBJ Medical Center fa’apea ai ma le latou si’itaga fou o totogi mo vaega eseese uma ua ausia e so’o se tausima’i galue i le falemai.”

“O le a fa’alauiloa atili atu lea si’itaga ma le fa’atulagaga fou i le taimi e fa’amalosia ai loa.”