Pago Pago - AMERIKA SAMOA

SIITIA TOTOGI TAUSIMA’I I LE FALEMA’I LBJ

O le a va’aia e tausima’i o le LBJ medical Center se siitaga i latou siaki o lo’o soso’o mai o lenei masina, e pei ona fa’alauiloa e le Pulesili o le LBJ ia Moefa’auo Bill Emmsley i se pepa o fa’amatalaga i le fa’aiuga o le vaiaso ua te’a. 

O lenei siitaga sa mua’i pasia mo tausima’i e le Komiti Faafoe a le Falema’i ia Tesema 06, 2022.

O le totogi amata mo le tausima’i Pasi ua fa’atulaga i le $9.88 i le itula ma ua maua ai le totogi fa’aletausaga atoa e $20,550. Ua siitia mai nei lea totogi amata mai le mea sa i ai e $7.88 i le itula ae aotelega i le tausaga atoa i le $16,390.

O le totogi mo le Tausima’i pasi ua maea umia le laisene ua i ai nei i le $13.22 i le itula poo le $27,498 i le tausaga atoa ua siitia mai le mea sa i ai e $10.22 i le itula poo le $21,258. i le tausaga.

Mo tamaitai tausima’i RN sa amata mai latou totogi i le $18.42 i le itula poo le $38,314 le totogi aofai i le tausaga lea ua i ai nei mai le $15.06 i le itula poo le $31,334 i le tausaga sa i ai.

Ua faailoa e fa’apea o se vaega o lenei si’itaga o lo’o fa’atupeina e le tupe fetarale, le ARPA. 

O le maulalo o le totogi ma le uumi o taimi e faigaluega ai ua avea lea mamafuaga tupito na fa’aleo mai ua mafua ai ona le toe fia galulue nisi o tausima’i i le falema’i, ma ua tu’ua ai galuega i lei falema’i.

Ua fa’ailoa mai e le taitaifono o le Komiti Fa’afoe o le falema’i Dr. Malouamaua Tuiolosega, o le isi siitaga o totogi o tausima’i sa faia lea i le 8 tausaga ua tuana’i.

Ua saunoa fa’afetai fo’i le tamaitai pule sili o Tausima’i ia Simamao Tuatoo ma ia fa’afetaia le siitaga ua toe fa’atulaga nei. “O le galuega lava lenei o se vala’au ina ia tautua, ae le ua na’o se tute e ao ina fa’ataunuu. Fa’afetai tele le manatu mai.”

FAAALIGA MEASINA HARVARD UNIVERSITY - ‘AUGA IA MATA’AFA & TUIMANU’A:

O le tamaitai Tausi Measina a le Falemata’aga o le Peabody i le Iunivesite o Harvard, sa ia fa’ailoa i lana folasaga  Samoa ma le Kolisi Tuufa’atasi fo’i i Amerika Samoa, “E tusa ma le 20,000 measina ua teumau nei i le falemata’aga o le Peabody i Harvard mai atumotu o le Pasefika, peita’i, e tele na’ua mea e fa’asino i le tala fa’asolopito o Samoa na lua. O lo’o i ai lo’u fa’anaunauga ou te fia feso’ota’i ma fetaui ma nisi o auaiga e tau ia Tuimanu’a Elisala poo nisi foi e tau o latou nafa i a Mata’afa Iosefa.”

O le tamaitai tausi measina o Dr Ingrid Ahlgren o lo’o nafa ma le faamauina lelei o nei measina. I le folasaga a lenei tamaitai sa ia faaalia ai ata o nei measina o lo’o fa’amauina e afua mai siapo, ie toga mamae ma le vaivai, o paopao sa fa’aaogaina, ali ma isi mea uma fa’apena sa fa’aaogaina e tagata Samoa a’o le’i mea o le talutalufou ua fa’aaogaina tele  lenei vaitau.

O le fa’anaunauta’iga ia maua le sootaga o nei mea ma o tatou tagata ae maise i latou e tau gafa i nei ta’ita’i o le atunuu. Ia silafia fo’i e i latou nei o lo’o mafai ona toe tepa i nei fa’amaumauga, aua e aoga ia i tatou uma, ona silafia o tatou tupuaga ma mea uma sa soifua a’e ma fa’aaogaina i o altou olaga i aso ta’itasi.

Ua i ai nei lea sootaga ma le Arts Coucil & Humanities, ae maise fo’i le Itu o A’oa’oga Tau le Tala fa’asolopito o Amerika Samoa ma Samoa poo Atumotu o le Atuvasa a le tatou Kolisi Tuufa’atasi. 

E le gata i lea ae ua i ai fo’i ni si o mea e mafai ona fa’aauau atu i ai suesuega auiliili mo aoaoga o le tala fa’asolopito o Amerika Samoa ma Samoa Tuto’atasi pe a moomia e ali’i ma tamaitai faia’oga i nei mataupu o le atumotu o le Pasefika.

FA’AAUAU FOA’I LEALAIFUANEVA FOUNDATION MO LE EKALESIA KATOLIKO

Ua fa’aauau pea ona faia foa’i fa’aletausaga a le Lealaifuaneva Peter E. Reid Foundation mo le Puleaga Samoa Pago Pago - le Ekalesio Katoliko i Amerika Samoa.

Fa’aalia le fa’afetaia e Epikopo Peter Brown foa’i a le Foundation. O le vaevaeina o le foa’i: $75,000 mo le Hope House & Gasegase Tausia Lelei ai; $14,689.25  mo le Aoga St Theresa; $7624.25 mo Fatuoaiga Montessori; ma le $11,000 mo Matagaluega Alao mo le latou Logo.

Fa’ailoa e Epikopo Peter Brown, “O le agaga fa’afetai tele mo le Aiga Pisinisi uma a Lealaifuaneva Peter E. Reid ona o nei foa’i mo vaega eseese a le Ekalesia e pei ona fa’ailoa mai, ae maise fo’i o agaga o le fanau ina ia fa’aauau ai nei foa’i mo le Ekalesia. E ese mai lea, ae o lo’o tua fo’i le Ekalesia i lenei fa’alapotopotoga o Pisinisi a Lealaifuaneva i le tele o galuega toe fa’aleleia o le Malumalu o lo’o fa’atautiaa nei, e le’i mae’a. Ia manuia ma lauolaola pea pisinisi ona o le lima foa’i.”

MANUMALO FSC 411TH  ENGINEER AMERIKA SAMOA - TAUVAGA FY23 I HAWAII

Ua mae’a le fa’atamasoali’i sa feagai ma le ‘au tau malolosi a le FSC 411th Engineering Battalion mai le US Army Reserve i Amerika Samoa i le tauvaga mo le FY23 na fa’atautaia i Honolulu.

Ua fa’ailoa na mati’e lava le taumafaiga a nei alo o le atunuu mo le FY23 Best Squad lea e fa’aigoaina ai i latou o Hammerheads! 

Peita’i e le pau ai lea o le tauvaga o le a toe ulufale atu i ai i latou ina ia fa’atauva ai i le amataga o le tausaga fou. Ua fa’atulaga mai le ofi atu o i latou i le tauvaga a le Best Squad i le FSC Engineering Battalion in Guam ia Ianuari 2023.

E to’afa isi battalion sa latou fetaui ina ia maua ai e i latou lenei manumalo a’ia’i ua i ai nei, ma ua agava’a fo’i mo le isi tauvaga lea i le Teritori o Guam.

O le latou ‘au’au i lenei tauvaga fa’atomai o aoaoga fa’amiliteri ua latou fa’ailo mai, “Sauni & Fa’amalosi!”

AOAOGA TA’ALOGA VOLLEYBALL FANAUITI - MASUI ALLEN CLINIC

O le aso Tofi o le vaiaso ua te’a sa auai le susuga Allen S. Allen ma sui e to’a tolu e avea ma nisi e fesosaoani malosi e fa’atino a’oa’oga amata ina ia matua ta’a’alo fanauiti a le atunuu ma le silafia lelei o tulafono ma ala e po ai le polo ma pasi lelei fo’i le polo i taimi o ta’aloga saili manumalo.

Ua toe fo’i ese atu Allen mai le atunu’u ae o lo’o i ai pea nisi e to’alua o le aumalaga mo lea fa’amoemoe mo le Masui Allen Foundation Clinics i Ta’aloga Volleyball.

“O le afuaga o lenei fa’amoemoe, e avea o se fa’amanatuga pea ia i matou o le matou uso Masui Allen sa agaga lava o ia e a’oa’oina fanau uma a le matou nuu o Amanave i le Volleyball ma e agaga lava fo’i i ai ina ua matou masi’i mai i Hawaii ma nonofo mau ai. E iloga lava o ia e fa’atasitasi i ai tamaiti Aiga Samoa uma ona o lona agaga fa’amaopoopo i ta’aloga Volleyball,” o se tala lea a Allen S. Allen, lea fo’i na te faatautaia lea ituaiga o aoaoga fa’amasani o fanauiti i le poina o le polo, pasiga o le polo ma seti le polo Volleyball ia lelei mo le isi sui e talia maia, ia maua se sipaika lelei mo le latou ‘au ta’a’alo.

O Allen S. Allen o se tasi lea o alo o Amerika Samoa sa mua’i avea ma tama ta’alo i le Au Volleyball na auina atu i le Olimipeka i Paselona.

O le susuga McCann Poasa Utu sa avea ma sui e fa’afesoota’ia le taumafaiga lenei a Masui Allen Clinic Foundation ma o ia fo’i lea sa fa’afeso’ota’ia uma lava ma fa’atulaga taimi e faia ai a’oa’oga fa’apitoa mo fanau a le atunuu ua mae’a leistalaina mai e amata mai le fanauiti 7-12 tama ma teine se’ia oo i nisi ua 21 ma sili atu tausaga.

O aoaoga faapitoa na fa’atautaia ia Tesema 09, 2022 i le faleta’alo i Tafuna sa amata mai lava a’oa’oga nei i le vasega o fanauiti 7-12 tausaga le matutua. Soso’o lea ma vasega a le fanau talavou ma isi vaega o i latou e matutua atu i luga. 

O sui na malaga mai i le atunuu mo lenei fa’amoemoe e aofia ai Allen S. Allen mai Spokane Washington, Mafutaga Taveuveu o se faia’oga o Taaloga Volleyball mai Kalefonia, i tupulaga ta’a’alo Volleyball a tama ma teine ta’a’alo i A’oga Maualuluga i le Kalapu a le South California Volleyball Club i Vista, Kalefonia.

O le isi sui na malaga mai o le afafine o Alofa Taveuveu, o lona tama Mafutaga Taveuveu. O le tamaitai Samoa lea o lo ua fa’amanuiaina lana taumafaiga ma o le a ulufale i le Kolisi i le amataga o le isi tausaga a’oga fou e fa’aaoga ai lona tomai ua a’otauina ai i le Volleyball e sapaia ai lona fa’amoemoe.

Na malaga fa’apitoa mai fo’i Keli Pula mai Long Beach Kalefonia, o se faia’oga fo’i ma sa avea ma se tasi o tamaitai na umia le pine Auro mai ta’aloga Volleyball a tamaitai lea na pine auro mai Papua Niu Kini i le Volleyball i le tausaga e 2015.