Pago Pago - AMERIKA SAMOA

FA’ATULA’IA LE SOSAIETE E FANAU A’OGA ASCC MAUALULUGA TOGI I KOSI & MATAUPU IGILISI:

O le masina o Tesema 2022 na fa’atulaia ai le Sosaiete a le Sigma Kappa Delta i le Kolisi Tuufa’atasi o Amerika Samoa. O lea sosaiete ua fa’asinotonu lea i fanau a’oga ua ausia e i latou togi maualuluga i le kosi ma mataupu tau Fa’aperetania poo le Igilisi. O lo’o i ai lava le Phi Theta Kappa, le Sosiaete lea o fanau a’oga e ausia togi maualuluga i kosi uma lava o tauavea e i latou i le tatou Kolisi Tuufa’atasi.

O le Sigma Kappa Delta Chapter i le ASCC ua mae’a faia fo’i la le latou sauniga e fa’atula’ia ai mo le taimi muamua la latou fo’i Sosaiete ma sa fa’atino lea i le ulua’i vaiaso amata o le masina o Tesema 2022. O le tamaitai faia’oga i le Language & Literature Department a le ASCC, lea sa ia amata sauniunia lea vasega o le fanau agavaa i le SKD ina ia faatula’ia ma le manuia i le Kolisi.

O le ulua’i aotelega o fanau ua ausia agava’a mo le Sigma Kappa Delta e to’a 8 i latou mo le ulua’i lua tausaga o a’oa’oga i Kolisi mo le sailiga o fa’ailoga maualuluga i a’oa’oga.

Ua avea nei la le tamaitai faia’oga Ruth Tauiliili Mahuka ma ulua’i faufautua i lenei Sosaiete aoga, ma ua agaga tele i latou ina ia fa’aleleia atili tomai tusitusi i le gagana peretania o le fanau a’oga o tauavea kosi e moomia lava ona lelei atoatoa le tulaga o le tusitusi ma le malamalama lelei i le gagana peretania.

“Ina ua una’ia malosi le taumafaiga ia lelei tomai tusitusi ma le malamalama lelei o fanau o tauavea le igilisi ma latou kosi autu i le Kolisi, e tatau lava ona tusitusi le fanau mo le silafia ma pasia mo fa’asalalauga fa’alaua’itele maualuluga atu nai lo le na’o le faia’oga i latou kosi ma le kolisi lava latou ia pasia latou kosi tau’ave. O le iloa e le fanau, ua lautele atu le aotelega o e faitauina latou tusitusiga, e avea lea ma fa’anaunauta’iga ina ia si’isi’i fo’i le lelei o latou tusitusiga.” 

O le masina o Mati i le 2021 na taulimaina ai e Tauiliili Mahuka le fesota’iga ma le National Sigma Kappa ma ua fa’ailoa mai ia te ia, ina ia fa’aoo atu ni fa’amaumauga o tusitusiga a le latou SKD ina ia taga’i ma siakia e i latou tusitusiga a sui ua agava’a ai.

Ona sa tapena lelei Ruta Tauiliili Mahuka i lea tulaga mo lana SKD fia fa’atula’ia, o lea sa latou tuufa’atasia uma latou lomiga ma fa’amaumauga a le Pacific Voices lea sa auai a latou sui ma auina atu loa mo lena fa’amoemoe lelei.

Ua mae’a fo’i ona fa’aulu mai le vala’aulia mai le SKD ina ia auai i le latou tauvaga o tusitusiga ma Video mo le fa’aletausaga i le Pacific Voices. O le galuega e soso’o loa o le fa’atula’ia o le Sigma Kappa Delta i le tatou Kolisi e pei ona mae’a pasia mai e le fa’auluuluga o le Pulega, le peresetene o le ASCC Dr. Rosevanne Pato, lea sa ia mua’i pasia lea  ia Me 2022.

O nisi o mea e fa’amanuia mai ai sui agava’a o lea Sosaiete e maua ai latou fa’ailoga i taimi o fa’au’uga, avanoa fa’asikolasipi ma le tele o isi avanoa e mafai ona una’ia malosi ai e le SKD latou sui totino ina ia tumati’e a latou taumafaiga i a’oa’oga e agava’a atili ai i galuega ma ia lelei amio a le fanau totino e mata’ina ai o latou tagata i le va’aiga lautele a le atunuu ma nisi e fia fa’afaigaluegaina i latou.

O le tausaga nei ua fa’atulaga ai i latou uma o totino ma latou sao e lomia ma fa’aalia i le Polokalama fa’apitoa o le Dolly Parton’s Imaginary Library.

Peita’i o le taimi nei ua ave le fa’amuamua a le SKD a le tatou Kolisi i le latou sao lea e ao ina lomia ma fa’asalalauina i le Pacific Voices Lomiga 2 ma le 3, lea e aotelega i ai solo tusia, tala pupu’u ma ata tusia ma pu’eina e i latou uma.

Ua i ai fo’i le lisi o latou galuega fa’atino i totonu o le atunuu e ao ina fa’atinoina. Ua aofia i nei galuega tima’i o lapata’iga ma taumafaiga e fia fa’auia uma i a’oga maualuluga o le atunuu i a latou vaega o tau’avea mataupu tau fa’aperetania ma faitau tusi ina ia una’ia malosi le fanau e auai e fa’aulu latou tusitusiga i lomiga o latou nusipepa ma fa’auia latou galuega fa’atino tau tusiga tala i polokalama o fa’atautaia e le Mataglauega o A’oga e fa’aleleia atili ai le latou silafia i le gagana peretania ma tusitusiga fa’aperetania.

O i latou ua avea ma sui fa’aulu fou o le Sigma Kappa Delata i le Kolisi ua aofia ai nei:  Ayjah Leo, Cherinalei Tilau Simanu, Deliah Samarra Va’itaua Paopao, Evis Takubala, Janella Maribelle Musuni, Luciano Fuataga, Mareko Solofa, MJ Mauola Jr. Metuli, Neli Laulu ma Tavui Toatelegese II.  O isi sui iloga ua aofia ai: Talofa Fe’a [Peresetene], Osana Laulu (Teutupe), Mareko Solofa (Historian) ma Cailyn L. Ponausuia (Leoleo). O lo ua avea fo’i Avia Leo ma Sui Peresetene, ma Neli Laulu o le Failautusi.

FA’AMAU FA’AILOGA LE ATOAGA O LE 60 TAUSAGA O LE TAUTUA - TINA TAUSIMA’I:

O lo ua i ai se taumafaiga tuufa’atasia a le Matagaluega o Tina ma Tupulaga a le tatou malo, ua fa’atulaga ai se Tamo’ega Fa’apitoa e fa’ataua ai le auaunaga a nisi o le mamalu o le aufaigaluega a le Malo ua atoa le 20, se’ia oo i le 60 tausaga o le latou tautua i matagaluega eseese o le Malo.

Mo le tina Tausima’i o Tinousi Jennings, ua atoa lelei le 60 tausaga o lana tuatua o le Tausima’i Pasi i le Falema’i Tele i Faga’alu. Peita’i ona o lenei tausaga o loo tele lava gaoioiga a le Pulega o le Falema’i o lo’o fa’atutu i lea Matata ma le tulaga ova o taimi o lo’o faigaluega ai sui ta’itasi e fa’atino o latou tiute, o se tasi lea o mea ua mata’ina ai fo’i o ia ma lona agaga i lana tautua.

Ua fa’ailoa mai na amatalia le tamoega o lanu eseese fa’apitoa lea i le itula e 6:00 i le taeao, ma e tofu lava aso o le vaiaso ma mea ua fa’atulaga e fa’atino ai, mo lea taualoa o le tautua matavela a nei tagata faigaluega uma i le tatou malo.

Ua fa’ailoa fo’i o se isi mea ua fa’atulaga o le Sauniga Lotu mamalu lea e fa’atautaia i le malumalu EFKAS i Vaitogi,  o le asiasiga i le Uafu Tele o Amerika Samoa ma le asiasiga fo’i i le Maota o le Malo o lo’o alaala ai le afioga le Kovana Sili o le tatou faigamalo. O le afiafi lava lea e faia ai le asiasiga i le Maota o le Kovana o le a faia ai ma se ‘aiga fiafia fa’atasi ma le Fa’aao o le tatou Malo ma le faletua Kovana Lemanu PeletI Mauga ma le faletua Ella Mauga.

Ona o lo ua atoa lelei le 60 tausaga o le tautua  o se Tausima’i Pasi o lea ua manino lava o le a fa’aeaina atili o ia i lona fa’ailoga fa’apitoa o le a taua’aoina ma ua fa’aigoaina o le Tagata Faigaluega a le Malo o le Tausaga 2022.

Ua atoa le 83 tausaga o le tina o Tinousi Jennings, 60 tausaga talu ona faigaluega o ia i le tatou malo.

ULUA’I MALAGA A LE “MV LADY SAMOA IV” - UTA MA PASESE:

O le aso Tofi na te’a nei le aso na fa’ataunuuina ai ma le manuia le ulua’i malaga mai i Pago Pago a le “MV” Lady Samoa IV   ma lana pasese fa’apea ma le uta.

Ua fa’ailoa mai e le Polynesia Shipping Company, le Kamupani o feso’ota’i ma tautua a le Samoa Shipping lea e fa’afoea uma malaga a le “MV’ Lady Samoa IV i Amerika Samoa, “Ua mae’a fa’amaonia mai e le Samoa Shipping le malaga mai a le va’a fou lenei ma lana uta e aofia ai le pasese ma uta masani mo fefaataua’iga ma fa’amomoli mo aiga mai Samoa.”

O le ulua’i vaiaso lenei ua taofia ai le toe malaga mai o le “MV Lady Naomi, ae ua suia mai nei i le malaga a le va’a la’u pasese ma uta fou lenei a le Malo Tuto’atasi o Samoa.

O le va’a lenei e pei ona fa’alauiloa ia Novema 18, 2022 ina ua tatala mai mo le pasiga o lana malaga fa’ata’ita’i i le teritori, o lo’o fa’atupea mai e Iapani. O totonu o lo’o ea malulu ona potu uma ma e i ai potu fa’apitoa e mafai ona totogia e pasese e momoe lelei ai a’o faimalaga mai.

Ua leai fo’i se suiga o le pasese mo lea va’a mai le MV Lady Naomi, ae o lo’o tumau lava i le tagata matua i le pasese o le sau ma le toe fo’i e $US65. Malaga e tasi a le tagata matua e $US50,  mo fanauiti e i le va o le 2-12 tausaga le matutua e $US40. ma le $US20 mo le pasese na’o le tasi. O pepe na’o le 1-18masina le matutua e $US20 le malaga alu ma sau ma le malaga e tasi e na’o le $15.00.