Pago Pago - AMERIKA SAMOA

12 AIGA i AUNUU AGAVA’A I NOGATUPE MAI USDA

Ua fa’ailoa le agaga fa’afetai tele o le Faipule o Amerika Samoa i le Konekeresi, Uifa’atali Amata, ina ua maua mai le fa’atupega faapitoa mai le Matagaluega o Fa’ato’aga a le Malo le Tele USDA ina ia fa’auia mai i le Faletupe o Atina’e i Amerika Samoa, ina ia fa’auia atu i le to’a 12 o Aiga ua agavaa ai, e toe fa’aleleia ma fa’amautu atili ai latou falenofo.

O le Vaega tupe lea mo Amerika Samoa ua na’o sina vagga ititi o i latou ua agava’a i nei ituaiga o talosaga, lea e to’a 273 i latou mai le 47 Setete ma na’o Amerika Samoa le teritori ua agava’a ai na’o le to’a 12 o aiga nei.

O le tinoitupe patino lenei ua toina mai, ua fuafua lea mo aiga e maulalo le tamaoaiga maua e to’a 4 ma le to’a 8 o isi aiga e sili atu ona maualalo le tamaoaiga tausi na talosaga mo lea fesoasoani mai le motu o Aunuu, lea sa matua a’afia ia Iulai 2022 i galu malolosi ma le maualuluga na sofa’ia latou apitagalu ma ua oo atu fo’i sologa o le palapala i le sami nofoaga o i ai fale nofo o nei aiga e to’a 12 i latou.

O le fa’atupega o le a aoga e toe fausia ia lelei ai latou falenofo ma ia mautinoa ua faaleleia atili ma le siomaga e soifua mautu ai i latou ma latou aiga.

Ua matauina fo’i o lo’o aofia ai nisi o tausia i totonu o latou aiga e moomia ona fa’aleleia mea e tausia ai tagata matutua, faauiti ma fanau fo’i o iai mana’oga fa’apitoa i le tino poo le mafaufau. “E tatau ona fausia nisi potu i totonu o fale nei e tausia ai ma tagata fa’apitoa poo tagata matutua, ina ia e so’ona tumutumu le aiga, ae ia lava potu o latou falenofo aua le tausiga lelei o i latou na.

O le a nafa le Faletupe o Atina’e ma le va’aia toto’a o nei mea uma ua fa’ailoa i luga, ina ia tinoitupe lea mo le aofai o aiga, ma e latou te fa’afaigaluegaina fo’i Kamuta lelei mo le fausaga lelei o fale nei ua fa’atupe e le polokalama. O le aufaigaluega fo’i a le faletupe o Atina’e e galulue fa’atasi ma le au Kamuta ua latou filifilia, ina ia mae’a lelei lava le galuega i le totogi o le a ofoina i le au faufale.

“Ua ou fiafia tele e fa’amalo atu i lenei to’a 12 o aiga sa talosaga ma ua fa’amanuiaina nei i lenei vaega tupe e aoga tele lona fa’aaogaina mo tatou i Aunuu.  Fa’afetai fo’i i le tamaitai Peresetene o le Faletupe o Atina’e Ruth Matagi Fa’atili  ma le aufaigaluega mamalu, ona o le latou sogasoga ma le galulue a’ia’i e taumafai ona fa’aulu talosaga mo lenei poloketi aoga tele mo tatou aiga i motu laiti,” o le saunoaga lea a Uifa’atali. 

“Fa’afetai fo’i i le tatou Kovana ma le taupulega le galulue ma taumafai i ala eseese e maua ai nisi o aiga le alamanuia aoga mo tatou aiga, ae maise fo’i o le aufaigauega a le Matagaluega o Fa’ato’aga a le Malo tele lea e aiaia mai toina mai ai lenei vaega tupe mo tatou aiga na a’afia i galu maualuluga ma le malolosi na sofa’i ai apitagalu o tatou atumotu laiti.

FA’AMANUIA ALO O FAGASA - ULUA’I FOA’I MEATA’ALO A LE FANAU KERISIMASI

O le ulua’i taumafaiga a le Fealofani Samoa Foundation e sailia ai mea ta’alo mo fanauiti i le vaitau lenei o le Kerisimasi, ua fa’ailoa mai o le a agava’a ai fanau uma lava o le afio’aga o Fagasa, lea e fo’i e autu i ai le Fa’alapotopotoga a le Fealofani Samoa.

Ua fa’ailoa mai i fa’asalalauga fa’alaua’itele a le Fealofani Samoa Foundation le latou sailiga meata’alo ua faatautaia nei, ma ua fa’atutu ai ni a latou  atigi pusa tetele i nofoaga fa’apitoa e pei o le Manu’a Store i Tafuna ma Pago Pago, ma le faleoloa o Tutuila i Tafuna  fa’afesaga’i ma Cost U Less ma le Leloaloa fo’i. 

O nofoaga na o le a e tuuina i ai ni meata’alo ua mae’a ona e totogia poo meata’alo fo’i o lo’o lelei lava e le’i leaga ina ia mafai ona avea ma ni meata’alo lelei mo nisi o fanau o le a gasolo mai mo lea fa’amoemoe fa’atasi ai ma fanau uma lava a le afioaga o Fagasa e fia auai i le aso mo le fa’amoemoe.

O lo ua fa’atulaga le tufatufaga lenei o meaalofa mo le fanauiti i le aso 26 Tesema, 2022 i le afio’aga o Fagasa. Ua fa’ailoa mai e le susuga Ekitoa Sopoaga, o le totino o le Fealofani Samoa Foundation, “O le tolu ai nei o matou galuega fa’atino ua fa’ataunuuina, ae o le aofai o i matou i lenei fa’alapotopotoga e nao le to’a 18  matou e to’atele lava i fanau talavou i le va o le 20 ma le 35 tausaga le matutua  mai uma lava i Fagasa.”

“Na mua’i  taumafai e fa’atautaia lava le Trick a Treat mo le fanau ia Oketopa 31, 2022, soso’o lea ma le latou taumafaiga e tufaina atu meaalofa mo tagata matutua uma lava i le afio’aga. I latou ua matutua ai lava i le vaitau o le Aso Fa’afetai. Lea la ua fa’asalalauina le matou “Fagasa Winter Wonderland” e fa’ato’a fa’atautaia lea ia Tesema 26, 2022,” o se talatala mai lea a Sopoaga.

“O lo ua fa’atulaga le faafiafiaina o fanau e ala i latou fa’ase’ega i le vai, Shave Ice, Mea’ai ma Sisiva i le Musika malie.”

Sa ia toe fa’amamafa mai le mana’oga lea o le Fealofani Samoa i lea aso o le fanau, “E le teena se tasi o le a malaga mamao mai e fia auai, o le ‘auga lena o lenei ituaiga o aso faapitoa mo fanau uma ia fiafia fa’atasi, o mai o le to’atele ma le fa’amasani solo o le fanau, o le agaga lea o lenei vaitau ia tele latou uo.”

Ua fa’apea foi ona fa’alautele mai soo se tasi e fia foa’i. “Pe afai ua fa’atau se meata’alo ae fia foa’i, va’ai atigi pusa ua fa’atulaga mo meaalofa ia tu’u i ai mo lenei fa’amoemoe,”  o se toe tala lea a Sopoaga.