Ads by Google Ads by Google

TALA I VAIFANUA


[ata: SN]

Pago Pago - AMERIKA SAMOA

 

MANATUA PEA E LE STAR KIST LATOU TAGATA FAIGALUEGA - MALILIU FA’AFUASE’I 2021

 

O le aso Faraile talu ai le toe aso e faigaluega uma ai le Packing Room a le Kamupani I’a a le Star Kist, ona tapunia aloaia lea o le Kamupani mo le lua vaiaso ae tapena fo’i ma toe fa’aleleia nisi o mea uma e fa’aaoga i galuega i aso fai so’o aua le tu’uapaina o le I’a, o se oloa fa’atau ati i fafo a le Malo o Amerika Samoa, ma ua iloga fo’i le tumati’e ai o lea oloa i le lalolagi, i lona tele.

 

O le lua vaiaso fo’i lenei, ua mafai ona fa’aavanoaina mo nai tagata faigaluega a le Kamupani a le Star Kist e o atu ai ma fai tausaga fou ma le Kerisimasi i o latou pelega i Samoa. O le to’atele lava o le aufaigaluega a le Star Kist e o mai Samoa.

 

A’o le’i malaga i latou sa latou auai uma lava i le sauniga fa’apitoa na fa’atautaia e fa’amanatu ai sui e to’afa o le Kamupani na maumau lo latou soifua ona o se fa’alavelave tau ta’avale sa tupu i luma a’e o le falefaigaluega a le Star Kist ma maliliu ai i latou.

 

O nei sui uma e to’afa e aofia ai:Taumaoe Filipo. Ierome Vili, Faasaulala Ahoni ma Alatina Fatuesi, e tofu ma ta’ito’alua ma fanau ma ua siitia fa’apitoa le tatalo i le Atua ina ia alofagia i lona Agaga Sa, ia mafutaina pelega a i latou ua motusia fa’afuase’i a latou mafutaga i le malaga a le oti i le tausaga ua te’a.

 

Na tutuina moliga’o fa’apitoa o se fa’ailo o le tuutoina atu o le aotelega o le aufaigaluega a le Star Kist ina ia alofagia e le Atua agaga o i latou o e ua tu’ua le mafutaga, ae maise o latou pelega ua tu’ua na’o i latou ina ua maliliu fa’afase’i i latou i lea fa’alavelave tau ta’avale.

 

ASIA AMERIKA SAMOA - SUI KONESULA O KOREA MR INSUK JUNG

 

O le ali’i sui Konesula o le Ofisa Autu o le Konesula o Korea Mr Insuk Jung sa malaga mai i le vaiaso ua te’a, ma sa ia asia ai le Ofisa o le Kovana sili Lemanu P.S Mauga, mo se la’ua feutaga’iga fa’ata’ita’i o Malo.

 

A’o le’i lutia le atunuu ma le lalolagi atoa i le Covid-19, e masani lava ona asiasi mai sui mamalu nei o le Malo o Korea ma fa’apea fo’i ona tatala mai se avanoa e fia asiasi atu ai tatou ta’ita’i i o latou fo’i laufanua ma faigamalo.

 

Peita’i e le’i mamao atu sa asia ai fo’i e sui mamalu o le tatou Malo, le Kovana ma nisi o sui mamalu o lana Kapeneta, sa latou asia ai se vaega  o le Malo o Korea i Saute. 

 

Na mua’i fa’amalo Insuk Jung i le Kovana ona o lona tutua’ai ma le to’a fo’i i ana fa’ai’uga faia i le vaitau atoa o le Covid-19, o le taua e le’i to’atele nisi o le tatou malo sa maumau ai le soifua i lea pagatia tele ile lalolagi. Ua iloga fo’i le lelei tapena o mea uma aua o fua o le lelei o le fa’atulagaga e fa’atino ai lea fa’asa, o lo’o tali mai i le to’agaogao o e na maumau le soifua ma e le to’atele fo’i se vaega atoa o le atunuu na a’afia, ae to’atele i latou ua mae’a faia tui puipuia.

 

Ua matauina fo’i e i latou le lelei fa’afoea o mea uma a le faigamalo, ae maise fo’i e le’i fa’aesea se tautua mai o latou tagatanuu ma a latou pisinisi o lo’o fa’atautaia i totonu o Amerika Samoa.

 

Ua fa’afetaia fo’i e Kovana le ulua’i asiasiga a lenei ta’ita’i ua ia fa’ato’a talimalo ai, e ui ona o le Ofisa Autu o le Konesula o Korea o lo’o i ai lea i Hawaii.

 

Ua ia toe fa’amanatu mai le tatou va lelei ma Korea ua fai si umi ona fa’atumauina lea e afua mai lava i le vaitau o le taua i Korea i le tausaga e 1950.

 

Ua sili ona fa’afetaia e Lemanu le tulaga o lo’o aoga tele ai Korea ma latou pisinisi i le atunuu, ae maise lava ona o le Star Kist Samoa i le taimi nei o lo’o fa’afoea lea e sui faipisinisi mai Korea, le taitaifono o le Dongwon Mr Kim. Ona o lenei Kamupani I’a o se tasi lea o Fale Faigaluega o lo’o fa’amoemoe tele i ai le malo i le tupe maua mo le tausiga o le to’atele o aiga i totonu o le teritori fa’apea fo’i ma isi aufaigaluega fou ua fa’afaigaluega mai Samoa i totonu o le tatou nei teritori.

 

I le mae’a ai o le la’ua feiloa’iga ma talanoaga fa’ata’ita’i o malo na lua,  sa feasoa’i la’ua meaalofa aua le fa’aauau fo’i o le leleiga fa’apa’aga ma lea malo e ala i fesota’iga o tautua fa’apisinisi ma fefaataua’iga.

 

TALA I LALO LE FALESAMOA I LE MALAEVA’ALELE

 

Ua mae’a matauina e le to’atele, ua le toe i ai le Fale Samoa i totonu o le Malae Va’alele i Tafuna.

 

Ua fa’ailoa e le tamaitai sui fa’atonu sili o Uafu ma Malaeva’alele, Falenaoti Loi-On Fruean, “Ua tuu i lalo lea faletele ona o tulaga ua le toe saogalemu ai le to’atele o tagata fegasoloa’i, aua e matele lava ina nofonofo ma fa’ataliva’a ai le to’atele o le atunuu i lalo o lea fale.”

 

Ua fa’ailoa e Loi-On Fruean, “Mai le tele o tausaga e taumafai lava le matou matagaluega e fa’ailoa atu i tagata lautele e le o toe malosi pe saogalemu le fale lenei mai le nofonofo ma fa’ataliva’a ai aiga, peita’i e le mafai lava tagata lautele ona tu’ua le nofonofo ma talanoa ai, O le faigata ua masani lava tagata i o tatou fale Samoa, e fiafia lava i latou uma e fa’amautu i ai fa’amavaega ma fa’ae’ega va’a  i taimi uma o malaga a va’alele tetele i le atunuu.”

 

Ua fa’ailoa mai e tala atu le fale lea, “Sa i ai le manatu e sefe mai nisi o mea o le fale aua e mananaia tele teuteuga o taina ai, e pei o pou ma ona iviivi ma la’au fa’alava, ae emo ane le ata, e matua le mafai ona sefe o nei mea uma, aua ua atia ma ua pala.”

 

Ina ua fesiligia Loi-On pe toe fausia se isi fale Samoa e sui tulaga i lea fale i le tatou Malaeva’alele, sa ia fa’ailoa mai, “Ioe o le fuafuaga lena ua mae’a fa’ataoto a le matagaluega, ae mo le taimi nei, e le o fa’amuamua i le fa’asologa o galuega fai i le Malae va’alele.”