TALA I VAIFANUA
Pago Pago - AMERIKA SAMOA
FEILOA’I UIFA’ATLI MA FANAU TAUTUA I SASA’E TUTOTONU
Ua fa’aaoga tatau e le afioga le Faipule o Amerika Samoa i le Konekeresi, Uifa’atali Amata lona aso Kerisimasi e malaga ai ma feiloa’i atu ma alo o Amerika Samoa o lo’o tiute i lala eseese o le Malo Tele o lo’o i Sasa’e Tutotonu. O i latou nei olo’o ua tautua mai nofoaga o le vaega au o lo’o i fafo atu mai le malutia i laueleele o le Malo o le Iunaite Setete, ma e fa’amoemoe tele fo’i i ai i tatou i lo tatou nofo saogalemu ai i totonu o tatou lava laufanua.
Ua fa’ailoa e Uifa’atasi sa amatalia le latou asiasiga i Bahrain, a’o le’i fa’asolo atu i isi nofoaga uma i Sasa’e Tutotonu o lo’o tiute ai fitafita Amerika o le vaega au.
Ona o le to’atele na’ua o faitauga o tatou fanau e ulufale i le Vaega Au i masina ta’itasi o le tausaga, o lea e tusa lava poo fea se mamao o nofoaga nei, e le o misia lava le i ai o se alo o le atunuu i nei nofoaga o vaega au.
“Ua ou fiafia tele e feiloa’i ma le tamaitai o Tracey Feagia’i o Manu’a, lea e tautua i le tatou atunuu i le vaega a le Fire & Medical Dispatch Supervisor i Sasa’e Tutotonu.
“E se foi le lagona fiafia e fa’afeiloa’ia alo o le tatou atunuu o lo’o fa’aauau pea lava ona tautua e oo mai i nei aso fiafia, e le o motusia pe malolo ai le auaunaga, i so’o se vaega lava o le tautuaina o le saogalemu o Amerika atoa. Fa’afetai tele mo lo outou sao i le puipuiga o le nofo filemu ma le saogalemu lava o tatou tagatanuu i so’o se vaega o le Iunaite Setete o Amerika ma ona teritori.”
“Ou te mautinoa o lo’o misia mai i latou i le mafutaga fa’aleaiga i totonu o latou aiga uma i Samoa, ae o se fiafiaga le avea ai o a’u, la outou auauna fa’atauva’a, e oo mai ia te’i latou i lenei aso Kerisimasi ma fa’amanuia ia i latou ma fa’amalo fo’i ia i latou ma le tautua o lo’o latou faia pea ma le aaga fa’afetai i le Atua o lo’o maua e i taotu uma le soifua tulu’i i lenei vaitau.”
“Matou te manana’o ina ia fa’ailoa ia i latou le agaga fa’afetai tele mai ia i tatou uma, aua o lo’o faia lava la outou tautua.”
O lo’o malaga fa’apitoa le tatou Faiule i le aumalaga o lo’o alu a le Konekeresi lea e ta’itaia lea e Con. David Cicciline mai le Rhode Island lea e avea ma Taitaifono o le Konekeresi i mataupu Tau Sasae Tutotonu, Aferika i Matu, o se vaega o le Maota i ona Mataupu Tau Le Va i Fafo.
TAPUNIA ALOA’IA FA’AFIAFIAGA MO LE KERISIMASI AIGA O SCANLAN
Mai le tele o tausaga e maimoaina ai lava e le atunuu fafiafiaga o pesega matagofie o le Kerisimasi e faatautaia lea e le afioga le Tapunu’u Telesia Scanlan ma Mulipola Herbert Scanlan ma le fanau ma latou fanau, ua fa’ailoa mai nei, o le latou toe fa’afiafiaga lenei ua fa’atino i lenei tausaga, ona taofia lea.
O lenei auaunaga lava a le Aiga pepese i le Ekalesia Katolko i Fagatogo, latou te pesepese ai ma fa’amanuia mai le Kerisimasi ma le Tausaga Fou i le mamalu lautele o le atunuu e ala i lenei polokalama i alaata o le KVZK-TV.
Peita’i i lenei tausaga, ua matua mautinoa le fa’aosofia o lagona lelei i le teritori o Amerika Samoa ina ua le va le tele o polokalama fa’atautaia i le atunuu ae maise fo’i o lea ua sofa’i mai le tele o afio’aga ma Ekalesia ua mu loto i le fia fa’afiafia fa’aleagaga i lenei vaitau o le fa’afetai si’itia i le Atua i lona alofa i le lalolagi ua foa’ia mai ai lona Alo.
O lea polokalama ua fa’aigoaina lava o le Scalan Family Christmas Program. O lea aiga ua fa’amanuia i ai le Atua i le Taleni o le Fatu pese ma le Usupese. O lea sa latou tutu le lamepa ma latou tuu i luga o le tu’ugalamepa e fa’asusulu atu le latou taleni e fa’afiafia ni agaga o moomia se toe fa’amanatu i le soifua mai o le Mesia.
A’o atoatoa le mafutaga e aofia ai le afioga le Tapunuu Telesia Scanlan ma le tama o le aiga afioga Mulipola Herbert Scanlan fa’atasi ma le ulumatua Aliimau JR Scanlan ma le tuafafine Mary Anderson ma Annie Anderson, le tamaitai o Tina Scanlan ma Berbard Scanlan e lelei tele lana tata i meafa’aili, fa’apea ma la fanau sa latou amatalia ai lea auaunaga matagofie ma le manogi lelei i fiofoga ole Atua soifua.
Na i ai fo’i isi taimi sa fa’aopoopo ane uma i ai ma fanau sa auai i le latou Ekalesia Katoliko i Fagatogo, ma ua avea ma se fa’amalosi’au i fanau uma sa auai, e fiafia e vivi’i i le Atua e ala i vi’ivi’iga ma e vave ai fo’i ona latou sauniuni mo vaitau fiafia o le tausaga a’o latou fesaga’i ma aoaoga o latou fatuga fa’aKerisimasi e fa’asalalau i lenei polokalama a le tatou Faletelevise KVZK-TV i Utulei.
Ona ua mae’a tu’ua le malo e le afioga Tiumalu Telesia Scanlan fa’apena fo’i le afioga Mulipola Herbert Scanlan, o lea ua toe fa’afiafia tasi ai lava le fanau o totoe ma aiga, mo le tapuniga mautu o lea sao matagofie sa fa’atino mai mo le atunuu i tausaga e tele.
“O le toe fa’asalalauga lenei, ua faia e fa’ailoa atu ai le agaga fa’afetai tele mai ia i matou o totoe o le fanau ma aiga. Ua ia te’i matou le agaga fa’afetai i le avanoa na galulue fa’atasi ai ma le tatou Fofoga Fa’asalalau e ala i pesega fa’ama’ite lagona lelei i le atunuu i le tulata ai i le vaitau fiafia o tausaga ta’itasi. Tau ina ia vi’ia le Atua ma saga vi’ia pea lona suafa mamalu e i tatou uma i aso uma. Ia foa’ia fo’i i le atunuu lautele le malosi ma le siufofoga lelei e vivi’i ai i le Atua e ala i ona vi’iga,” o se tala lea ma le agaga fa’afetai o le susuga Bernard Scanlan lea sa ia taina vi’iga e faama’ea ai lana fa’amavaega aloaia mai lea polokalama taua.
Na pueina lea fa’asalalauga mai lona maota i Malaeimi ma sa vala’aulia fo’i le mamalu o sui fa’asalalau ina ia latou molimauina fa’atasi le muta’aga o lea sao matagofie ma le maualuga e agatonu lava i le Atua ma lona alofa mai
3 MALILIU VAITAU LAVA O LE KERISIMASI I SAMOA
I se lipoti mai Samoa, ua fa’ailoa ai e to’atolu sa maliliu i Samoa i le vaitau o le Kerisimasi.
O se tasi o tama ua molia i le fasioti tagata ona ua ia fasia lona afafine e 12 tausaga le matua ma maliu ai le teineititi. Ua taofia uma nisi fa’amaumauga e tusa o lea tama, ona o lo’o a’afia le teineititi e le’i uma le pule a matua i lona soifua.
O le tama fo’i e 49 tausaga le matua ua saisaitia i ona moliga o le fasioti tagata ina ua ia fa’ao’olima i se tasi o faiava a lona aiga ma maliu ai. O le faiava lea i le aiga e na’o le 29 tausaga le matua.
Peita’i o se faalavelave matuia lava na tupu tonu ona o fiafia o le Kerisimasi, e tusa o le 2:00 i le vaveao o le aso Sa, na fana ai e Edward Fanueli le tamaitai leoleo o Mele Segisolo Lapana i se pati na faia i le fale o Edward i Aleisa.
Ua fa’ailoa e le Komesina o Leoleo Auapa’au Logoitino Filipo, na maua atu lava e leoleo le tino o le tamaitai leoleo, 31 tausaga le matua i le nofoaga na faia ai lea fiafia ae ua maliu o ia mai le pulufana na lavea ai ma ua fa’amauina le 2:00am o le taimi na tupu ai le fa’alavelave ma maliu ai o ia.
O Edward Fanueli ua molimauina, sa fa’atupuina lea fa’alavelave ma ua mae’a saisaitia o ia i ona moliga o le fasioti tagata.
Ua fa’atulaga lona ulua’i iloiloga i le aso 30 Ianuari 2023 i le fa’amasinoga.
Ua iloga ona matua sofa’i e le to’atele lenei mea na tupu ma ua salalau fo’i le tala i luga o feso’ota’iga fa’ainiteneti a le Facebook.