Ads by Google Ads by Google

TALA I VAIFANUA


O se va’agia i le aotelega o le foa’i a le Kalapu a le Liona mo le fanau o lo’o i ai i le Juvenile Detention Center i Tafuna. Fa’afetai le alofa ma ia maua pea le malosi ma le agaga e galulue ai ma foa’i mo le mana’omia i e mo’omia le fesoasoani ma lagona alofa i le vaitau fiafia i le lalolagi. [ata: foa’i Lions Club]

Le Laau kerisimasi fa’atuina e le Kalapu a le Liona i Pago Pago i le afioaga o Aoloau ma ua tapena fo’i ma le tama o le Kerisimasi, Santa Claus. Fa’afetai le tauata’i ma ua aofia fa’atasi i ai le tamaitai peresetene Liona Ponita Tamarea Laussen ma sui iloga o le Kalapu a le Liona i lea fa’amoemoe. [ata: foa’i Lions Club]

Pago Pago - AMERIKA SAMOA

 

GALUEGA ALOFA, GALUEGA FOA’I KALAPU A LE LIONA - FA’AIUGA 2022

 

I so’o se galuega alofa e tele fa’atinoa, ia faia ma le agaça fiafia ma le loto e fia faimea lelei. O le agaga tonu lea e taumafai ai le Kalapu a le Liona ina ia fa’atautaia pea galuega lelei I tausaga ta’itasi. O le tamaitai peresetene o lo’o tula’i mai i le taimi nei, Lion Ponita Tamarea Laussen, ma nisi o sui Liona fo’i o le tatou Kalapu sa avec ma sui mamalu e asiasi ma pesepese i le Potu taofia o le falemai. Na fa’afiafiaina le fanauiti ina ua latou fa’alogoina pesega o lenei vaitau, pese e fa’amanatu ai pea ia i latou le soifua mai o le Mesia, le Fa’aola mo tagata uma. E le gata i lea le matagofie o le vaitau fiafia o le tausaga 2022 ua aulia ma le manuia, e ui ina fa’agasegasea i latou, ae maua fo’i latou meaalofa eseese.

 

O lenei foi tausaga ua toe faatuina fo’i le sao o le Lions Club i le Laina o La’au Kerisimasi i le afio’aga o Aoloau, ma sa latou avatua fo’i ma Santa Claus ina ia auai i le po na tatala ai le kiina o moli Kerisimasi a le afio’aga, ia fa’amatagofie atili ai le latou sao lea.

 

Ua fa’ailoa mai le mataina fo’i o le taumafaiga a le Liona i lenei tausaga i le latou vaega na fa’atino. O mea uma sa maua fo’i ma meaalofa suamalie mo le fanauiti e tali ai le naunau o le fanau e fia fa’atalofa ma feiloa’i ia Sana Claus Samoa.

 

E le’i fa’agaloina e le Kalapu a le Liona lo latou sao mo le fanau uma o lo’o ua taofia i le nofoaga o sala i Tafuna poo le Juvenile Detention Center i lenei tausaga ma le vaitau fiafia. Sa latou tuufa’atasia meaalofa eseese e mafai ona fa’aaogaina e le fanau i aso fai so’o,e aoga foi e tausia lelei ai o latou tino ma fa’ataunuu fo’i le latou foa’i a’o le’i oo mai i le vaiaso o le Kersimasi 2022.

 

I le aotelega o lenei foa’i sa iloga ai le agaga o sui totino uma o le Kalapu a le Liona, aua o se galuega na e agalelei ai ia i latou o nofosala fa’aletulafono, ua e faia lava lea i le Mesia, le Fa’aola o tagata ola uma.

 

Peita’i, i le masina o Novema sa mae’a tu’ufa’atasia ai fo’i le meaalofa tele sa taua’aoina e sui ta’itasi mo le Nofoaga e Tausia Tagata Matutua ma le Hope House i Fatuoaiga. Ua mae’a fo’i ona latou fa’ao’o lena foa’i taua ma ua talileleia fo’i e le afioga Epikopo Brown ma le Pulega atoa o le Hope House ma le Adult Care Center fa’apea ma le sui totino o le Komiti Fa’afoe o lo’o i ai fo’i i lea Kalapu, Liona Larry Sanitoa.

 

I tulaga o fa’aaloaloga masi’i i o latou totino ua tu’ua le malo, sa mua’i fa’atino ai e i latou le sauniga mamalu e fa’amavae ai ma se tasi o latou totino ua tu’ua fa’afuase’i le mafutaga, ma sa latou fa’atinoa ai se sauniga fa’apitoa e tutu ai moliga’o, e fa’ailoa lo latou agaga fa’anoanoa ma toe tepa ai i taimi a’o fa’atasi ma Liona Chris King, o se tasi ua fa’atolu ona avea ma Peresetene o le Kalapu a le Liona i Pago Pago Amerika Samoa. O se tasi fo’i e mata’ina lona sao i galuega faatino fa’atulaga a le Kalapu, ma ua misia lava e i latou uma le latou mafutaga mafana. Ua fa’apea fo’i ona latou fa’amafanafana i le tina Liona Danielle King ma le fanau, aua sa ia sapaia a’ia’i lana manamea a’o fa’atino ona tiute tautua ai i le mamalu lautele o le atunuu i poloketi uma sa fa’atino e le Kalapu a le Liona i le atunuu. O le masina o Tesema sa fa’atino ai e le Malo le latou toe sauniga mamalu mo le susuga le Fa’atonu o le Matagaluega o le Pulega o Uafu ma Malaeva’alele i le atunuu, ma sa auai fo’i sui e to’atele o le Kalapu a le Liona i lea toe sauniga o le latou uo mamae.

 

O taimi fo’i o toe sauniga o le tina o Fa’afeu Mauga - Amisone sa oo atu fo’i sui mamalu, le susuga le Peresetene Liona Ponita Tamarea Laussen, Liona McCann Poasa Aumoeualogo ina ia fa’ao’o le fesoasoani i le fanau ma le pa’ia o aiga. O le tina lea o se tasi fo’i o sui iloga i le Liona ma e le fa’agaloina e le Kalapu a le Liona lana fo’i tautua. 

 

Peita’i ua faliu le itu o tautua ma fa’ailoa mai e le Kalapu a le Liona nisi fo’i sa fesoasoani atu mo i latou i le fa’aiuga o lenei tausaga, ma latou taua’aoina le Seleni aua le fa’atupega o ni a latou galuega fa’atino mo le mamamlu lautele o le atunuu.

 

O le tamaitai o Arianna Princess Auva’a sa malaga mai i le atunuu ona o le to’esea lana pele, lona tina matua, ua ia taua’aoina ai se foa’i mai le la’ua taumafaiga a le Koko Comedy, poo se polokalama faitala malie ma faalauiloa ai nisi o mea e tatau ona silafia i luga o so’otaga fa’ainiteneti a le Facebook.

 

O le polokalama lea ua fa’atautai lua e i la’ua ma Jordan Fanene mai Utulei, ma sa la’ua fa’atautaia se polokalama saili tupe mo lea fa’amoemoe e taua’aoina i se fa’alapotopotoga e fa’atinoa galuega alofa, galuega fesoasoani fo’i mo le mamalu lautele o le atunuu. O le fa’atupega muamua lea ua mafai ona la’ua tuufa’atasia mai le amataga o le sailiga ua maua ai le $500. lea ua taua’aoina nei i le Kalapu a le Liona e fa’aaoga mo latou galuega fa’atino i le atunuu.

 

Na faia lea foa’i i se la’ua ‘aiga fiafia ma le Peresetene o le Liona, Ponita Tamarea Laussen i le DDW, ma ua saunia fa’apitoa ai e le Kalapu a le Liona a latou meaalofa mo le pesepesega fa’apitoa i le Potu Taofia o le fanauiti i LBJ Medical Center Pediatirc Ward mo le vaitau o le Kerisimasi ia Tesema 22, 2022, lea ua mae’a ta’ua i luga.

 

AVANOA FA’AFOEA SOLO TA’AVALE & TUFA MEAALOFA MO FANAU

 

Ua fa’ailoa mai e Aaron Hall, “O tietiega ta’avale lea e fa’asolo i taimi ua le poloka ai feoa’iga i le alatele, ua le fuafua na’o le fa’amalomaloa ai o le alatele i le fa’ae’e o pu o ta’avale ae ua fa’aaogaina e taua’ao atu ai fo’i meaalofa o so’o se ituaiga, mo fanauiti e mafai ona maua atu e tatau ona maua se meata’alo.”

 

Ua fa’ailoa mai, “Sa galulue fa’atasi lava nisi o fa’alapotopotoga tumaoti i le atunuu “Wired to Your Future WTYF” ma Asosi Tietie Pasika a le Sauia, Kalapu Ta’avale a le Tautai MC, Island Pride, Manulele Tausala Car Club, Heavy Duty ma le Just Uce, ina ia fa’atupe se latou foa’i mo le fanau i lenei vaitau fiafia o le tausaga ma e solo atu i latou e faia nei foa’i uma.”

E tusa ma le $2,000. le tinoitupe sa tuufa’atasia ma latou fa’atauina ai meata’alo eseese mo le fanauiti, ae maise fo’i o nisi o totino o le Kalapu sa latou tuufa’atasia maia foa’i o meata’alo ua mae’a fa’aaogaina ae o lo’o lelei atoatoa fa’atasi ai fo’i ma meata’alo fou fa’ato’a fa’atauina mai, e fa’alava ma totoe ai le saoga mo le latou foa’i lea.

 

“O le manatu autu o le matou Asosi aufa’atasi lenei, ina ia mafai ona foa’i mo le fanau o lo’o ua iloga o i ai le mana’omia.”

 

O meata’alo sa mafai ona fa’atauina, sa foa’ia lea i le Matagaluega o Alamanuia mo Tagata Lautele i lona vaega o Tautua mo Fanauiti & Puipuigamalu o Fanauiti a lea matagaluega. Ua fa’apea fo’i ona matou foa’ia nisi i le Ofisa Autu o le LBJ Medical Center, ina ia fa’auia atu i alo ma fanau uma i le Pediatirc Ward poo le Potu Taofia o le Fanauiti i fanau e le o fiafia atoatoa i lenei vaitau ona o gasegase o le tino.”

 

“Na asia lava e i matou potu taofia nei o fanau i lena aso, taua’aoina i ai meata’alo i e na taofia, peita’i o meata’alo na totoe ai sa fa’ao’o lea i le ofisa autu ina ia taua’aoina mo nisi o latou fanauiti tausimai ma foma’i uma, ia avea o se fa’afetai fo’i mo le latou tautua matavela i le atunuu i lo latou fa’afailele o le soifua ma’ale’ale i taimi o moomia ai le latou auaunaga.” O se toe saunoaga lea a Hall e tusa o le fa’amoemoe ua mae’a fa’ao’o i le fanau.”

 

“O matou sui totino uma lava sa loto gatasi uma lava i le poloketi lea o le fa’atauina o mea ta’alo ma tufatufa atu i fanauiti o moomia le fa’afiafiaina i lenei vaitau. O le aaga tonu lava lea i lenei vaitau, o le foa’i ma le loto.”

 

Ina ua mae’a ona taua’aoina latou foa’i i le ofisa ulu o le Pule Sili o le Falema’i, sa taua’aoina mai e Moefa’auo Bill Emmsley le tusi pasi e fa’ailo ai lenei foa’i tele ma ua ia fa’ailoa mai fo’i, “O le fa’alua ai lea ona foa’i a outou Kalapu Ta’avale i le tatou falema’i.”

 

I le foa’i na fa’auia i le Matagaluega o Tautua Lautele a le tatou Malo, sa talia mai le agaga fa’afetai e le susuga le Sui Fa’atonu Sandra Fruean mo le foa’i, “Fa’afetaia tele le agaga o le fa’asoa mo le fanau o lo’o nonofo puipuiamalu i nofoaga a le Matagaluega ona ua le malutia i latou i le li’o o latou aiga. Ua avea nei meata’alo fa’ameaalofa o se toe fa’amanatu ia i latou lo latou taua tele, ma o lo’o manatua pea i latou e le tatou atunuu ma aiga ta’itasi i talosaga. O se fa’atinoga sili lea ua latou maua ma va’ai tino i ai, o nisi e faimeaalofa ua avatua lava ma lagona o le alofa ia i latou uma. Fa’afetai tele!”

 

“O le taumaaiga lenei e le’i umi se taimi na afuafua ma fa’atino ai, ae o le agaga o tagata uma na foa’i mai nei fa’alapotopotoga ua mafai ai ona fa’atino ma fa’ataunuu ma le manuia le fa’amoemoe ua mae’a foa’ia nei. Fa’afetai lo outou sapaia fo’i o tatou galuega fa’atino, e iloga ai fo’i so tatou sao i le atunuu ma le mamalu lautele.” O se toe tala mai lea a Hall.