Pago Pago - AMERIKA SAMOA

SIITAGA PENEFITI FALENOFO FITAFITA TIUTE 

Ua fa’ailoa mai le siitaga o penefit e totogi ai fale mo fitafita tiute ma isi uma sui tautua i le Vaega Au a le Malo tele, lea ua mae’a aiaia ma fa’atulaga e amatalia ia Ianuari 2023. O se mea o le a fa’afiafiaina ai fo’i a tatou fanau ma o latou aiga o lo’o alaala i nei alauni, ona o le a maua se fa’asiliga e 12.2% ua fa’aopoopo i lea penefiti i le tausaga fou.

Ua mae’a fa’alauiloa mai e le DOD le siitaga o le BAH mo i latou uma e galulue i le latou matagaluega ua mafai ona sapaia ona o le siitaga o le fa’atupega e tusa ma le $26.8 piliona mo le miliona o e tautua i le DOD.

Na fuafua le aofaiga o le pasene e si’itia ai le tupe maua mo tagata ttiute e tasi mai nofoaga e 300 atufalega o i ai e nonofo ai i latou o tiute ma ua faapea ona faia i so’o se nofoaga uma i setete uma o fa’atula’ia ai nofoaga autu o le Militeri, ona fa’ato’a toe fua tonu lea i le totogi o le tagata to’atasi o lo’o maua. O loo fua fa’atasi atufalega mo e o tautua ma a latou pili o le suavai taumafa, suavai lafoa’i, lapisi ma le sapalai o le eletise. O mea uma na e aofia i le BAH a le vaega au.

Ua fa’aloa fo’i le agaga fa’afetai tele o le tatou faipule i le Konekeresi a le Malo tele, Uifa’atali Amata, “O lenei si’itaga o penefiti e agava’a ai tatou fitafita tiute ma isi uma o e faigaluega i le DOD, fa’atasi ma siitaga o totogi mo fitafita i le taimi nei, ua avea fo’i ma se fa’amama avega i a latou pili totogi ma ni manuia fo’i e fa’asoa atu i matua a’o to’esea fanau i tiute i vaega au. E mautinoa lava, o nei sitaga i totogi ma le fa’aopoopoga i tupe maua mo nofoaga e totogia i fitafita tiute o ni agavaa ua alagatatau mo i latou e tusa o le latou sao ua fa’atino pea i aso uma, aua le saogalemu lautele o fa’amoemoe ia i latou uma ma e fa’afetaia fo’i le faliu o le Malo e taga’i toto’a i se taui lelei mo i latou uma o tautua.”

Ua fa’ailoa mai, ua mafua lea suiga lelei mo le tupe e totogia ai fale o i latou e tiute ma faigaluega uma mo le DOD, ona ua matauina le si’itaga ma le tau o le soifuaga o lo’o ua feagai ma i latou uma i lenei vaitau.

E’E SAILINI I AUA I LE ASO KERISIMASI - LE MAUTONU LE HOMELAND SECURITY

E le’i umi atu sa mana’omia ai ona e’e sailini mo faailo e logo tagata e aga’i i nofoaga maualuluga, ua lata mai se galulolo poo se galuafi, ae le e’e sailini nei. Peita’i o le aso Kerisimasi e leai ni fa’ailo sa moomia, ae e’e le sailini.

Masalomia fo’i ai ua manatu se tasi e fa’ailo lea aso, ae leai! Ua faailoa mai e le susuga le Fa’atonu Samana Ve’ave’a, e leai ua otomeki lava le e’e a le sailini leai se isi na oomia le fa’amau e ola ai le sailini mai le latou Ofisa autu poo le nuu fo’i. Peita’i o lo’o fa’auaau pea lava ona sailia le tonu o lea tulaga, ae o le fa’aiuga ua aumaia, ua e’e lava le sailini ia masalo o se sofa’i maualuga mai o le eletise i lea ki e ola ai le sailini.

“Ua moomia e i matou se fa’amatalaga mautu mai le ASPA e tusa o se mea fa’apena, ae o le Sailini lenei sa moomia ona e’e i le vaitau o galulolo sa fa’ailo e le’i mamao atu, ae le’i e’e. Lea fa’ato’a e’e,” e se tala lea a Samana.

E le’i faigofie ona fa’amatu’u ese lagona le mautonu o tagata o lea afio’aga ina ua fa’alogoina le e’e o le sailini. Ua tapena fa’afuase’i nisi, ae o nisi ua tau autilo i isi aiga tuaoi poo gaoioi e tusa o le fa’ailo. O nisi ua vala’au laina o sootaga ma le EOC poo le mea sa i ai se fa’ailo o se galulolo o fa’aolioli mai. 

Peita’i ua toe maua tala, “Leai, ua e’e lava le sailini ia, o se mea f’ate’ite’i e oo lava i le Matagaluega o le Saogalemu Fa’alotoifale o lo’o fa’ate’ia i lea sailini ua e’e o Aua.”

O le tina lava lea sa ia fa’ailoa mai, e fa’alua lelei ona e’e le sailini, o le afuaga lea o le tulaga le mautonu.

Ua faailoa mai e Samana, “O le mea fo’i e tasi na tupu i Aunuu e lei mamao atu, ae leaga la o Aunuu na oomi sa’o lava e le tamaititi le fa’amau e e’e ai le sailini, i le afio’aga o Aua, ua le oomia e le matou Ofisa le Sailini, poo se tasi i le afio’aga le fa’amau e e’e ai le sailini, e foliga mai ua e’e lava le sailini ia, ona ua e’e.”

“O se sailiga lava i le afuaga o lea fa’aletonu, ua fa’aauau ai ona fa’afesiligia le ASPA pe i ai lava se mafuaga o le a tupu ai lea mea, pe afai e sofa’i fa’afuase’i le maualuga o le eletise e uia uaea o le laina eletise e ola ai le sailini? O le fausaga fo’i o lea ituaiga o Sailini, masalo sa leva ona oomi e se tasi le saliini i le taimi na moomia ai ona e’e, aua e le’i leva atu le taimi na moomia ai ona e’e fa’ailo nei, ma o totoe ai lava se fa’atonuga fa’aeletoronisi e ao ina e’e le sailini, e le’i toe kilia aloa’ia mai se fa’atonuga sa fa’apolokalama i le sailini e e’e ai. O isi na mea e ao ina taga’i toto’a i ai i tatou o fa’apipi’ia ma fa’aaogaina nei ituaiga o Sailini i le atunuu.”

Na toe siakia lelei sailini ona tape ai lea o Sailini e le Homeland Security, peita’i ua toe ki nei, talu ai nei tutupu moni ni fa’aletonu e moomia ai ona fa’ae’e fa’ailo nei.

Na fa’ato’a toe fa’aleleia atoata Sailini nei i afio’aga i le amataga o le tausaga nei, ae o le lua tausaga ua tuana’i sa le fa’aaogaina ai lava.

LESLIE TUISOSOPO GABRIEL - FAIAOGA ULU ‘AU VOLLEYBALL IUNIVESITE O WASHINGTON:

O le alo tamaitai o le ali’i Samoa ta’alo football lauiloa o Manu Tuiasosopo, Leslie Tuiasosopo Gabriel ua avea nei ma Faia’oga Ulu o le “au Volleyball a Tama’ita’i a le Iunivesite o Washington, le Huskies e afua i lenei tausaga a’oga.

“O le ausia ai e lenei tamaitai Samoa o lea fo’i tulaga i lona olaga tautua i lea Iunivesite, o se mitamitaga lea i le mamalu o tagata Samoa uma o lo’o alaala i so’o se setete o le Malo tele o Amerika.” O se tala fiafia lea a le susuga Seiuli Jesse Sapolu mai le setete o Kalefonia, ma le ‘au sa ta’a’alo fa’atasi ai ma Manu Tuiasosopo, le 49ers.

Ua fa’asalalauina fa’alaua’itele mai e le Seattle Times lea taumafaiga a lenei tamaitai Samoa, ae ua leva fo’i ona lauiloa lona tomai i lea fa’agatama e afua mai lava a’o a’oga i le A’oga Maualuga aWoosinville, East Seattle, ma aga’i atu ai e a’oga i le Iunivesite o Washington, lea sa iloga atili ai lana taumafaiga ua fa’amauina i so’o se ala i le Inaite Setete atoa.

Na mua’i avea o ia ma Faia’oga fesoasoani i le Koleniga o le au Volleyball a Tamaitai a le Iunivesite o Washington i le tausaga e 2001, lea sa la’ua galulue fa’atasi ai le Faia’oga Ulu o McLaughlin ona soso’o ai lea ma Cook, Peita’i i le taimi nei ua faalauiloa e e Iunivesite o Washington ua taua’aoina atu nei le tofiga Faia’oga Ulu o le au Volleyball a Tamaitai ia Leslie Tuiasosopo Gabriel e afua ia Tesema 2022.

“O Tuiasosopo - Gabriel, talu mai lona taimi sa a’oga ai e oo mai ina ua toe faigaluega i le Iuniveste, ua iloga lona avea ma Husky, e le fa’avaivai e umi le malosi, o le poloka ua fa’amauina le malosi ma le mata’alia i le Iunaite Setete, faitau i ai. ”

I le fa’asologa o sui e lelei na’ua le tu’i i lea ta’aloga ua tulaga 9 ai o ia i le aotelega o ana tui e 2,382 i le NCAA. I le poloka fo’i e matua ta’ua o ia o le Pa Piliki malosi, na matua le sao lava se tu’i na fa’afetauia lea poloka ua fa’amauina e 613 poloka na’o ia ma le poloka fesoasoani e 520 ua mautu i lona igoa.

O ana ta’aloga fa’avaomalo ua ia ave fu’a ai mo le malo o Amerika sa ta’alo ai i le “Universiade” poo le Ta’amilosaga Volleyball ‘au Volleball uma mai Univesite o le Lalolagi i le tausaga 1999, lea sa faia i Mucia, Spain. Ina ua mae’a ane lona olaga a’oa’oina ma ta’alo sa mautu ia te ia lona fa’ailoga Bachelors in Psychology ma lana isi ona fa’ailoga i le Communications.

Na toe taliu o ia e faigaoga fesoasoani i le koleniga o le ‘au Volleyball a tamaitai i lana Iunivesite sa a’oga mai ai, Iunivesite o Washington i le 2001, ma e talu mai le 20 o ta’amilosaga volleyball sa avea ai o ia ma faufautua i le Huskies a Tamaitai, ua iloga le i ai fo’i o tamaitai ta’a’alo lelei lava mai lana ‘au e fa’atauva mo au fa’avaomalo a le Iunaite Setete i lea fa’agatama. O igoa o isi o nei tamaitai e aofia ai Courtney Thompson  ma Tamari Miyashiro. Ua mae’a fa’alauiloa fo’i tusitusiga, ata ma fa’amatalaga fa’amauina i le lelei o ta’a’alo na tamaitai i le volleyball, ae afua mai ona o le fautua ma le fa’asoa a le Tuiasosopo Gabriel i lo la’ua soifua ta’a’alo.