Pago Pago - AMERIKA SAMOA

TAUAU E FA’AMAVAE FOMA’I MANU - TASI LE TAUSAGA O LANA KONEKARATE:

O lo ua fa’ailoa mai ua toe manatu le tamaitai foma’i o meaola o lo’o ua mae’a le tausaga e tasi o lana Konekarate faigaluega ai i Amerika Samoa, o le a fa’amuta ai lana tautua ae toe taliu i Amerika. O lenei koekarate e lua tausaga na sainia e ia ina ua mae’a malie ai e amata galuega i le teritori ina ua tuuina le Falema’i o Meaola i lalo o le Matagaluega o le Soifua Maloloina, ae ave’esea mai le Matagaluega o Faato’aga ma Lafumanu sa i ai mai le tele o tausaga.

O lenei suiga sa mafua ona faia, talu ai ua fai si umi e le o maua se Foma’i Manu ua mae’a agava’a e faigaluega i so’o se Setete ma Teritori o Amerika.

O Dr. Barbara  Kahl o le ulua’i foma’i manu lea ua faafaigaluega tumau mai i le teritori, ae ua te’a le silia ma le 10 tausaga o tau sailia se foma’i Manu e tautuaina meaola fa’afagafao a le atunuu ma lafumanu, ae o lea ua toe fia fa’amuta e ia lana konekarate e lua tausaga na mae’a sainia ma le matagaluega o le Soifua Maloloina.

Ina ua feso’ota’i ma le Fa’atonu o le Soifua Maloloina i se mafuaga tonu ua ala ai ona manatu le tamaitai foma’i Manu e fa’amuta lana auaunaga i le atunuu, ae fa’ailoa mai e Motusa Tuileama Nua, “Ua mae’a fa’ailoa mai e Dr Dahl, ua faigaluega o ia i le teritori ae o lo’o ua tu’ua e ia lona to’alua i Amerika, lona lua o lo’o i ai ni mea e le o fiafia ai le tamaitai foma’i e tusa o le nofoaga o lo’o fa’atino ai le latou galuega, ae maise lava o le umi o se taimi e toe tatalia le toe fa’atumuga mai o ana tupe sa fa’aaoga e oka mai ai vaila’au ma fuala’au e fa’aaoga i togafitiga o meaola.

“I le taimi nei o lo’o malaga i fafo Dr Barbara Dahl i lona aiga mo sana malologa toe taliu mai ai, ma o le taimi fo’i lea o le a ia fa’ailoa mai ai pe toe nofo i le isi tausaga e tasi o lana konekarate pe o le a ia fa’amutaina lana konekarate i le tausaga e tasi ua mae’a nei.”

Poo le a lava le fa’ai’uga o le a faia e Dr. Dahl, ua nofo sauni fo’i le Matagaluega e toe sailia mai se isi foma’i manu i lenei tausaga, ma ua sailia mai lava i Amerika fo’i e lelei e fa’afaigofie ai ona mae’a tamau aiaiga mo se foma’i Manu e mafaia ona ia okaina mai vaila’au ma fuala’au e tausia lelei ai meaola i le teritori.

O lo’o ua i ai fo’i se tasi o ali’i foma’i Manu mai Fiti ua mae’a fa’afaigaluega mai e le Matagaluega o le Soifua Maloloina, ma o ia lea sa tausoa lua lava o la’ua tiute ma Dr Dahl, peita’i e na’o Dr Dahl lava e mafaia ona oka mai vaila’au ma fuala’au mo le tausiga lelei o Meaola Fa’afagafao a le atunuu fa’apea ma lafu manu uma i le teritori.

O lo ua fa’ailoa mai fo’i e Motusa Tuileama Nua, “O le mea lea e fa’afaigaluega mai ai lava le Foma’i o Manu mai Amerika, ina ia mafai ona oka mai vaila’au mo togafitiga, taotoga ma le tausia lelei o meaola fa’afagafao ma Lafumanu uma i le teritori.”

AMATALIA LE TAUTUA A LE VIRGIN AUSETALIA  - VA MA SAMOA IA MATI 2023:

Ua fa’ailoa mai au fa’atulaga nei le tautua a le Kamupani Va’alele a le Virgin Australia e ala i feoa’iga i le va o Samoa ma Ausetalia i le masina o Mati 2023.

O lo ua mafai ona tautuaina le mamalu lautele o i latou e fia malaga i Ausetalia i lenei Kamupani Vaalele i ana sootaga fa’atafa’ilagi o le Aeroroutes poo le Executive Traveller, ma ua fa’amauina ai lo o lo ua faatulaga malaga e lua i le vaiaso mo le latou tautua se’i mata’i ai e le Kamupani Va’alele pe a mai pasese femalaga’i. 

O le va tonu o Ausetalia e fa’ato’ai i ai faigamalaga a le Virgin  Australia o Brisbane to Faleolo ma ua fa’atulaga e amata i le aso 21 Mati, 2023, a o isi latou malaga e lua i le vaiaso e malaga mai Sydney to Faleolo e fa’ato’a amata lea i le aso 23 Mati, 2023. O le ituaiga o va’alele ua fa’atulaga mo nei faigamalaga a le Virgin i Samoa o le Boeing 737-800. Peita’i ua fa’ailoa mai fo’i e toe fa’amautu atili mai lea tulaga a’o le’i amatalia faigamalga ua fa’atulagaina nei.

I le taimi nei, ua fa’ailoa mai fo’i le pasese i Ausetalia mai Samoa me toe fo’i ua na’i le $549.AUSD

Peita’i, e leai se tamau poo se fa’amaoniga o le a tumau lea pasese a’o le’i o’o i le tiami e faia ai ia ulua’i malaga a le Kamupani Va’alele a le Virgin Australia i le atunuu ma toe taliu.

Ua faailoa mai fo’i e ala i fa’asalalauga i luga o le Executive Traveller , le upega tafailagi o fa’aulu ai pepa malaga mo lea Kamupani Va’alele, “O le talia ai o le talosaga a le Virgin Australia latou te tautuaina lea alava’a i Samoa ma toe taliu mai o le avanoa fo’i lea ua maua e tagata femalaga’i e filifili toto’a ai poo fea le tautua e fia malaga ai, ma o se mea lelei lea, ia lava ma totoe avanoa e filifili ai tagata malaga.”

Ua le gata la i le mauaina o le avanoa o le Virgin Australia e femalaga’i mai ai i Samoa ae ua latou mauaina fo’i le tautuaina o Vanuatu, ma ua fa’aleleia atili le tautuaina o tagata femalaga’i mai malo fa’aatumotu o le Pasefika, o se mea lelei tele lea mo Malo fa’aatumotu o le tatou Alamoana.

ASO O LE FU’A 2023:

Ua fa’ailoa mai e le Sui Failautusi o le Ofisa o Mataupu Tau Samoa, Tauese Va’aomala Sunia, “O le tatou Fu’a o lenei tausaga ua faatulaga e fa’amanatuina i ona aso e lua, Aperila 17 & 18, 2023. Ua fa’atulaga e faia ai fo’i tatou Fa’aaliga o Fua o Fa’ato’aga e fa’atautaia e le Matagaluega o Fa’atoaga a le tatou malo; Fa’aaliga o Oloa Gaosi mo fefaataua’iga o le a fa’atautaia lea e le Matagaluega mo Fefa’ataua’iga; Tauvaga mo le Aufaifaiva o le atunuu e fa’atautaia lea e le Matagaluega o Faigafaiva ma le Vaomatua; Liki Krikiti e fa’atautaia lea e le Ofisa o Mataupu Tau Samoa; ma le Tu’uga Fautasi e fa’atautaia fo’i e le Komiti tofia e le Ofisa o Mataupu Tau Samoa.

O lo ua i ai fo’i fa’afiafiaga masani lea e fa’atulaga mo lea vaitau tonu lava ma o le a fa’alauiloa nisi o fa’ai’uga fai i ai a le Komiti o le Sisigafu’a 2023 a le tatou Malo.

Ua fa’atulaga fo’i Ta’amilosaga Fa’apitoa fa’avaomalo e fa’atautaia e Asosi o Taaloga eseese i le Teritori ma o le fa’atautai lua lea e le Matagaluega o Paka ma Malaetaalo ma le DYWA poo le Matagaluega o Tamaitai ma Tupulaga Talavou.

Ua fa’atulaga mai fo’i le sauniga lotu e amatalia ai le Sisigafu’a i le aso 16 Aperila, a’o le’i amatalia le fa’amoemoe o le Malo i lenei tausaga mo le sisiga o lana Tagavai.

O lo ua toe fa’atulaga mai Ekalesia sa le oo a latou pesega i le tausaga ua tuana’i, ua toe tuuina i ai le avanoa i lenei tausaga e fa’afiafia ai. O le EFKAS, Le Metotisi ae maise le Ltu Katoliko, O lo ua taumafai fo’i le Komiti e sailia i le Ekalesia a Iesu Keriso o le Au Pa’ia o aso e Gata Ai pe mata o naunau i latou e fia pepese ma faia so latou sao i lea ituaso.