Pago Pago - AMERIKA SAMOA

Na fa’alauiloa mai e le susuga Dr. Akapusi Ledua, le Faatonusili le tumau a le LBJ, i le Aso Lulu, Aperila 19, 2023, le filifilia o le susuga Sefanaia Kaumaitotoya e avea ma le pule fou a le Ofisa o Tupe (Chief Financial Officer) a le LBJ.

I se fa’aaliga sa tufatufaina i ulu o ofisa ma Faatonusili o le Faigamalo, i le aso Lulu, na ta’ua ai e Dr. Ledua lona faatuatuaga i le faaiuga ua faia e le Komiti Faafoe a le falema’i aua lenei tofiga taua.

Sa ia ta’ua foi le agavaa o Kaumaitotoya mo lenei tofiga, ma o ia o se tagata ua loa ona tautua o ia i totonu o ofisa ma matagaluega tau tupe faapea ai ma lona agavaa i tautua tau i le soifua maloloina, e le gata i totonu o Amerika Samoa ae faapea foi i atunuu i fafo.

Sa ta’ua i le pepa o fa’aaliga mai ia Dr. Ledua e faapea, o le susuga Kaumaitotoya, ua silia ma le lima tausaga sa galue ai o ia i Ofisa Tupe eseese i totonu o Honolulu, Hawaii.

Na faamaonia i suesuega a le Samoa News, ae e le i filifilia o ia e avea ma faauluuluga o le Ofisa o Tupe a le LBJ, sa galue muamua Kaumaitotoya o se Faufautua i tulaga tau tupe mo le LBJ.

Sa talosagaina e Dr. Ledua i lana fa’aaliga ia le aufaigaluega uma a le LBJ, ina ia o latou tu’u o latou a’ao faatalofa ia Kaumaitotoya e tusa ai ma lana tofiga fou i totonu o le falemai, ae le gata i lea, o le tu’uina atu o le lagolago ma le onosa’i, i le feagai ai o ia ma ona tofiga fou.

Tapunia aoga ona ua maua le teritori i le Misela

I se fa’aaliga i luga o le ‘Facebook’ a le Ofisa o le Soifua Maloloina, o lo o lapataiina mai ai le mamalu o le atunu’uu ina ia nonofo i totonu o maota ma laoa, ma valaau le numera 219, pe afai o aafia se tasi i auga o le gasegase o le Misela, e aofia ai le maualuga o le fiva, tale, isupe tafe, mumu ma tagi mata, ma le pata mumu e sosolo i foliga ma le tino.  

E le gata i lea, ua fautua mai foi le Ofisa o le Soifua Maloloina, afai o maua oe i le ma’i o le Misela, e tatau ona nofo i se potu, po o se vaega o le fale, e tau mamao mai isi o le aiga.

I se fonotaga a le ofisa o le Soifua Maloloina ma vaega faasalalau i le aoauli o le Aso Lulu na se’i mavae atu nei, mo le faalauiloaina o le tapunia o nofoaga e tausia ai fanau iti (Daycares) na saunoa ai le Faatonusili o le Ofisa o le Soifua Maloloina ma Tautua Lautele (DHSS), le susuga Muavaefaatasi John Suisala, ua maea ona faamaonia e le Faatonusili o le Ofisa o le Soifua Maloloina (DOH), le susuga Motusa Tuileama Nua, le iai o se alo o Amerika Samoa, ua faamaonia e ala i suesuega, ua a’afia i le Misela.

Sa ia ta’ua foi e faapea, o lo o ua galulue malosi nei le Ofisa o le DOH ina ia faamautuina le le pipisi o lenei faama’i, e ala lea i le tapunia o Daycares uma i totonu o le teritori.

O lo o ua toe faamanatu mai foi i matua, ina ia taga’i lelei i pepa tui a alo ma fanau, ia mautinoa ua uma ona fai uma tui puipuia a le fanau.