Pago Pago - AMERIKA SAMOA

TU TOLU SE ALII AOGA A TAFUNA I LE TAUVAGA TUSIGA TALA A LE JROTC A LE AMI

Fa’aalia le fiafia tele o le aoga maualuga a Tafuna ma le latou vasega JROTC faapea ma le Iunite o Aoga a Amerika Samoa (American Samoa Multiple School Unit – ASMSU), ina ua ausia e se tasi o tama fanau a le atunuu, le alii o Tristan Tufele, ia se tasi o tulaga maualuga i tauvaga tusiga tala a fanau aoga o lo o auai i totonu o vasega faalemiliteri a le Ami, i aoga eseese a Amerika.

Ma i le ausiaina e Tufele o le tulaga tolu i totonu o lenei tauvaga tusi tala, ua faapea ona siitia ai le tulaga o le ASMSU i totonu o vaega’au, ae le gata i lea, ua lauiloa ai le alii JROTC Tufele, o le aoga maualuga a Tafuna ma le latou polokalama JROTC.

O le manulauti a Cadet Tufele sa fausia ona mafaufauga i lana tala, o le “Fa’aauauina ona Faaleleia Atili:  Afai o oe o le taitai o vaega’au, o a ni auala e mafai ona faaleleia atili ai le JROTC?”

Na ta’ua e Tufele i totonu o lana tusitusiga le manaomia o ni toniga lapopoa mo fanau aoga e pei o ia, ina ia mafai ona opogi mai ai fanau aoga uma i totonu o lenei polokalama.  Sa ia faamamafaina foi le taua o le faatulagaina o lenei polokalama, ina ia mafai ona opogi mai ai fanau aoga o so’o se itutino ina ia mafai ona uunaia i latou e auai i le JROTC ma ausia tulaga sili atu i o latou olaga.

E 101 fanau aoga mai i aoga eseese i Alaska, Uasigitone, Oregon, Kalefonia, Montana, Nevada, Hawaii, Atu Mariana, Guam, Iapani ma Korea i Saute na auai i lenei tauvaga. 

AVEINA ATU FAAIUGA O SUESUEGA A LEOLEO I SAMOA E UIGA I LE VA’A O LE ‘KITE RUNNER’ I LE PALEMENE

Ua maea nei galuega a le Ofisa o Leoleo i Samoa, e faasaga i le va’a mai Pago Pago, o le ‘Kite Runner’, lea na sopoia ogasami o Samoa e aunoa ma se faatanaga mai i le malo o Samoa, i sana faigamalaga i Savaii.

O le vaiaso ua tuanai na faaooina atu ai le ripoti o suesuega a leoleo, i le kapeneta mo sa latou iloiloga, e tusa ai ma se faamatalaga mai i le Komesina o Leoleo, le susuga Auapa’au Logoitino Filipo, i le Aso Tofi o le vaiaso ua tuanai, i sui o le Samoa Observer.

Sa te’ena e Au’apaau se faamatalaga e faapea, na aofia nisi o le sui o le Kapeneta i le tuufaatasia o pepa e mafai ai ona sopoia e le ‘Kite Runner’ ia ogasami o Samoa.  Sa ia ta’ua e faapea, e leai se tulaga faapena na maua i la latou suesuega.

Na ta’ua i se lomiga a le Observer i le tolu vaiaso ua tuanai, le masalomia o se sui o le kapeneta ma lana aufaigaluega i lenei mataupu.

O le va’a lenei o le ‘Kite Runner’, o le vaa a le susuga Papali’i Lauli’i Alofa, le pule o le Paramount Builders Inc., lea e faamautu iinei i Amerika Samoa.  Na faamaonia e taitai o le Malo o Samoa, o le susuga Papali’i, e mai i le aiga o Semanu i Salelologa, Savaii, lea na fai sa latou faalavelave i Salelologa.