Pago Pago - AMERIKA SAMOA

MU LE FALE’AIGA FOU A LE PARADISE PIZZA I NU’UULI

O le te’a laititi o le 12 i le vaveao o le Aso Faraile Iuni 2, 2023, na pisi ai tuaoi o le faleaiga o le Paradise Pizza i Nu’uuli, le vaega tinei mu ma sui malu o le ofisa o leoleo, ina ua vaaia le liu afi o asu mai i totonu o le fale’aiga, i le fale’aiga lea o lo o fesaga’i ma le ofisa a le McDonald, i le magatolu e aga’i atu i le Paka Liona.

Na fa’ailoa mai e le susuga Faamasino Upuese Galoia, lea o lo o faauluulu iai le Ofisa o Lavea’i e aofia ai le vaega ale EMS ma le Tineimu, na taunu’u atu se telefoni mo se lavea’i i le 12:45 i le vaveao o le Aso Faraile ma sa mafai ona taunu’u mai a latou taavale lavea’i ae e le’i sosolo atu le mu i fale o aiga tuaoi.

Na ta’ua e Galoia, e tupu le faalavelave, ua malaga ese atu le aufaigaluega o le faleaiga mo malologa i o latou aiga, ae toe ai na o le leoleo po, ma o ia lea na vala’auina atu lo latou ofisa mo se laveai.

Na ta’ua e Galoia, i le toa’i taunu’u atu o le latou aufaigaluega, sa va’aia ai e foliga mai na amata mai le afi i le mea e gasese ai taumafa a le faleaiga.  Ma o lo o fa’aauau pea a latou suesuega, ae leai se talitonuga e faapea, o se afi na amata e se tagata.

E foliga mai o le 1/3 o le fale na fa’aleaga uma i le afi.  O le faleaiga lenei, e le’i leva ona mae’a ona toe faaleleia, ma tatalaina mo le tautuaina o le mamalu lautele.

TOE AMATA ONA FUA UTA MA PASESE A LE HAWAIIAN EA

O le vaiaso fou lea o le a toe amatalia ai ona faatino le fuaina o le mamafa o le pasese faapea ma uta a le ofisa vaalele a le Hawaiian Ea, aua faigamalga i le va o Pago Pago ma Honolulu, e pei ona sa fa’ailoa mai e le so’oupu a le ofisa vaalele, le susuga Alex Da Silva.

E le o se taimi muamua lenei ua faia ai e lenei ofisa vaalele lea tulaga, ma sa fesiligia foi e le mamalu lautele, i tausaga ua tuanai, le mafuaaga o lenei gaioiga, ona ua manatu le toatele o tagata femalagai, ua mafua ona faia e le Hawaiian Ea lea tulaga, ona o le fia maua o nisi o a latou tupe faaopoopo.

Ae peitai, e pei ona toe faamatu’u mai e le Hawaiian Ea, o nei tulaga uma e faia ona oa tulafono faataatia a le Ofisa o Femalagaiga a le Malo Feterale.  Ma na fa’ailoa mai e Da Silva i sana imeli i le vaiaso ua mavae, o lo o faia foi lea tulaga i Iapani ma Korea i Saute.

Na ia ta’ua, o lenei fuafuaga, e pei ona ta’ua e Da Silva, o le a pe a ma le lua masina e faataunuu ai.  

Ua tolu nei malaga a le Hawaiian Ea i le va o Pago Pago ma Honolulu.

TUFATUFAINA FAAGASOLOGA #8 O LAFOGA

O le aso Faraile, Iuni 2, 2023, na toe tufatufaina ai nisi o lafoga mo le mamalu lautele, a’o sauni atu le atunu’u mo fa’au’uga a alo ma fanau.  E silia ma le $3 miliona le tupe fa’aaluina e totogi ai lafoga sa tufatufaina i le Aso Faraile.

E to’a 985 i latou sa faamanuiaina i a latou lafoga i le aso Faraile ua tuanai.  Ma o i latou ia na failaina a latou lafoga i le va o Fepuari 28 seia paia Mati 7, 2023.  O nisi o tagata sa mafai ona pikiina a latou siaki lafoga mai i le ofisa a le malo i Utulei, ae o nisi e maua i a latou pusa meli.

LEAI SE TULAFONO E FAATAPULA’A AI AOFAIGA O TA’IFAU

O le taimi nei, e leai se tulafono e mafai ai ona faaitiitia le fuainumera o taifau i totonu o Amerika Samoa.  E pei ona sa saunoa mai le tamaitai fomai manu o Debora Michielson mai Amerika, na aapa atu le fomai manu sa iai muamua i Amerika Samoa nei, mo se fesoasoani i sa latou taumafaiga e aoaoina tagata o le teritori ina ia faaitiitia le fuainumera o taifau a le teritori.  Ona o le tele o taifau e feoai solo i luga o le alatele, e leai ni tagata e vaaia.

 Na ta’ua e Michielson, ua maea ona faataunuuina e le Ofisa o le Soifua Maloloina e gafa ma meaola, se aoaoga i le tausiga o meaola.  Ma o se tasi lea o mataupu sa o latou aoaoina, o le leai o se tulafono i totonu o Amerika Samoa e faamalosia ai le mataituina o meaola, aemaise o taifau, i totonu o le teritori.

Ma ua a’e ai se manatu i le fomai manu, ina ia mafai ona faatulagaina ni tulafono e mafai ai ona foia lea faafitauli.  Na ta’ua e Michielson, o le tele o taifau ia o lo o tata’a solo i luga o le alatele, e mafua ona o le fia aai o nai meaola.  

Sa fa’ailoa mai e Michielson i le Samoa News, sa na o le 3 masina na tatau ai ona galue ai i totonu o le teritori, ae peitai, ona o le manaomia o lana tautua, o lea ua faaumiumi ai lana asiasi mai.