Pago Pago - AMERIKA SAMOA

FINAGALO MAUGA IA TOE FAI SA A NU’U MA ALALAFAGA

Ona o le faateleina o faafitauli ma faalavelave tau solitulafono ua tutulai mai i totonu o nu’u ma afioaga o Amerika Samoa, o lea ua manatu ai le afioga i le Maoputasi Mauga Tasi Asuega, le Failautusi o Mataupu tau Samoa, ua tatau ona toe faamalosia le faiga o sa i totonu o nu’u ma alalafaga o Amerika Samoa.

Na folasia le manatu o le Failautusi i luma o afioga a Pulenu’u uma o le teritori, i sa latou fonotaga na faia i le vaiaso ua tuanai.

Na ia saunoa e faapea, e tatau ona faataitai nu’u ma afioaga ia Fagaitua, lea o lo o fai a latou sa, o se tu ma aganu’u mai anamua a Samoa.  

Na fa’aalia foi le lagolagoina e le Pulenu’u o Fagaitua, le susuga Agaolea’i Manumalo Pauesi, lea manatu ua faatuina e le Failautusi o Mataupu tau Samoa.

I se faatalatalanoaga ma le Samoa News na saunoa ai Agaolea’i, i totonu o le latou nu’u, e faatolu ona ta le logo i le 6 i le afiafi m faigalotu, ona toe ta lea i le 9 i le po, e sa ai na toe feoai alo ma fanau i fafo, ae o le 10 i le po, ua matua sa ona toe fealua’i seisi i totonu o le nu’u.

E o’o lava i le faleoloa e tasi a le nu’u, e tapuni foi i le 10:00 i le po.

Na fesiligia e le Failautusi o Mataupu tau Samoa ia tofa ma manatu o Pulenu’u, ona o i latou ua iai le tiute o le tataiina ma le puipuiga o nu’u ma afioaga taitasi.  Na fa’aalia e Mauga, e moni, e faigata, ae e tatau ona faia se fuafuaga mo le puipuiga o tagata o nu’u.

E le gata i lea, sa fautuaina e Mauga le vave gaioi o Pulenu’u pe a o latou silafia se tulaga ua le talafeagai ma le saogalemu o le nu’u.  Ma sa ia faamanatu atu i Pulenu’u, i taimi o sa, e na o taavale mo faalavelave faafuasei, e mafai ona ulufale atu.  

O le a lea foi ni taelega ma auauga i Aso Sa ma ia taofia le toe iai o ni gaioiga i totonu o loiloi a aiga taitasi, i le ta o le 6 i taeao o Aso Gafua.

Na faamamafa foi e Mauga le puipuiga o fagotaga ma le gataifale.  Sa ta’ua e Agaolei’a, na iai ni tulaga na o latou masalomia ai le fa’aaogaina e ni Faiga faiva mai nu’u ese, ia le ava e fagogota ai i o latou gataifale, ma sa molimauina ai se tulaga faanoanoa, i le tele o i’a mamate na maua i luga o le matafaga ma le a’au.

E lata i le 50 pulenu’u sa auai i lenei fonotaga.  

Sa fa’aalia e Agaolei’a le usitaia e tagata o lona nu’u ia le taimi e ta ai le latou sa.  Ma sa ia fa’aalia foi lona atugalu i tulaga masau ua iai Fualaau faasaina i totonu o le teritori, lea na te taumate, e aumai e tagata mai atunuu i fafo, ae ua fa’aaoga ai fanau talavou a le atunu’u, e latou te faatauina atu.

Ae peitai, sa ia fautuaina le tu’u o mataupu faapea, i le ofisa o leoleo, e latou te mataituina, e pei o Faga’alu lea sa osofai e leoleo ia ni aiga se lua, i le aso 5 o Iuni, ma lokaina mai ai ni tagata se toalima, na umia ia Fualaau faasaina, e aofia ai le Aisa ma Mariuana.

FAATONU E LE KOVANA LANA KAPENETA INA IA FAAULU ATU A LATOU KALENA FA’ALEAOAOGA MO LE TAUSAGA

O le 3 i le aoauli ananafi, na faagataina ai ia le faauluina atu o kalena o aoaoga faaletausaga (YTC) a ofisa ma matagaluega eseese o le malo o Amerika Samoa, e pei ona sa faalauiloaina mai e le afioga i le Kovana Sili, i sana faaaliga tusitusia ia Iuni 20, 2023.  Ae le gata i lea, o tala o tupe mo ofisa eseese, aua le tausaga tupe 2024, lea e amataina ia Oketopa 1, 2023.

O se mataupu pito sili ona taua lenei o le a iloiloina e le Fono Faitulafono pe a tauaofia i le masina fou, mo le nofoaiga lona 38, o le paketi a le Malo mo le tausaga tupe 2024.  E le o mautinoa mai le aso tonu o le a faaulu ai lenei paketi i le fono faitulafono, ae o lo o iai se naunautaiga a nisi o sui faitulafono, ina ia vave maua le paketi a le malo ina ia lava se taimi e faataunuu ai a latou iloiloga.

I lana fa’aaliga sa talosagaina ai e le kovana ia totino o lana kapeneta, ina ia manatu alofa i tagata o le teritori, i taimi e faataunuu ai o latou tiute o le iloiloina lelei o vaega uma o a latou paketi, a’o loma le tausaga tupe o le 2024.