Pago Pago - AMERIKA SAMOA

FAAFOFOGA FAIPULE I LE FAAFITAULI FEAGAI MA TAUSI MA’I MAI I FIJI

Na fa’afofoga afioga i Faipule o le Maota o Sui i le molimau a le Faatonusili a le LBJ, le susuga Dr. Akapusi Ledua, i se iloiloga na faataunuuina e le Komiti o le Soifua Maloloina i le aso Lua, Iulai 25, 2023 e faapea, mai i le 21 o tausima’i ia sa aumai mai Fiti, e na o le toalua ua pasia a la’ua suega fa’a tausima’I (NCLEX-National Council Licensing Examination).  E toatolu isi na su’e i le vaiaso ua mavae, ae e le i pasia ma o le toe taumafai foi ia Setema.  Ae o leisi 16, o lo o sauniuni atu nei mo lea suega i le faaiuga o Setema po o le amataga o Oketopa.

Na molimau foi Ledua, o nei tausimai na malaga mai ia Novema o le tausaga ua mavae, ma sa faamautu i latou i le Sadie Thompson Inn i Fagatogo, ae o nei lea ua mae’a ona faatonuina ai i latou, e tu’ua ai le faletalimalo mo ni o latou fale tumau, lea o le a maua ai ni a latou alauni e ta’I $500 i le masina.

O se tasi o molimau na aofia i lea iloiloga, o le tina ia Lele Ah Mu Mageo lea o lo o faauluulu i le polokalama tausima’i i le Kolisi Tu’ufaatasi a Amerika Samoa (ASCC).  Na saunoa Mageo, e le i sa’o le faataunuuina o le faafaigaluegaina o tausima’i nei mai Fiti, mai lava i le amataga ma i sona talitonuga, o le mafuaaga lea e le o i’u ai i se lelei.

Sa saunoa foi Mageo, e leai ni tusi pasi po o ni faamaumauga e faamaonia ai le atamai o i nei tausimai e faataunuu ai o latou tiute, ae o mea ia e tapa muamua pe a fuafua e aumai ni tausimai mai atunuu i fafo, ina ia mafai ona faamaonia ai i le malo o Amerika Samoa, le agava’a o i latou nei, i le tausiga o le soifua maloloina o tagata o le atunuu.

Na tete’e Mageo i le toe fa’aaluina o tupe po o nisi alagamanuia i le sauniaina o tausimai e le i pasia a latou suega tausima’i ae ia liliu loa le malo i alo ma fanau o lo o aooga i le i le polokalama tausima’i i totonu lava o le teritori.

E to’a 17 fanau aoga ua faamoemoe e su’e i le NCLEX ma ua fuafua e faauu ia Tesema, ae to’a 18 lea ua foufou atu mo le amataina o a latou aoaoga faatausimai, pe a toe a’e a’oga i le masina fou. 

MALAGA SUI O SAMOA E LUA I AUSETALIA 

O le Aso Faraile ua tuanai na tu’ua ai e le Faatonusili o le Ofisa o Turisi a Amerika Samoa (ASVB), le susuga ia Taimalelagi Minnie Tuia faapea ma Sandra Fuimaono Lutu, ia Amerika Samoa, e tali se valaaulia faapitoa mai i le Ofisa o Turisi a Samoa, mo se asiasiga i aai tetele o Ausetalia, e aofia ai Brisbane, Melbourne ma Sydney, lea e faamoemoe e faataunuuina i le vaiaso nei.

O le faamoemoega o lenei faigamalaga, e mafai ai ona fa’alauiloa atu i lea malo ma ona tagata ni maimoaga ma nisi o tamaoaiga maoa’e i totonu o Samoa e lua ina ia mafai ona faatosina mai ai turisi ma tagata asiasi, faapea pisinisi, i totonu o Samoa e lua.

O sui o le ofisa mai Samoa o le a faimalaga faatasi ma Taimalelagi ma Lutu, e aofia ai le Minisita o le Ofisa o Turisi a Samoa (STA) ia Toesulusulu Cedric Shuster faapea le Pulesili ole Ofisa ale STA, o Pativaine Petaia Tevita.

Ua iai se faamoemoega ia Taimalelagi ma le ASVB o le a mafai ona avea le faatasi atu o le ASVB i lenei faimalaga a le STA ma auala o le a mafai ai ona tata’iina mai ai nisi o turisi fuafua mo Samoa, i Amerika Samoa.

Na saunoa Taimalelagi, e le mafai ona faatusatusa Amerika Samoa ma Samoa ona e eseese malo ma atunuu e lua. O Samoa, e pei ona saunoa le faatonusili o le ASVB, e agai atu iai vaalele tetele, e pei o le Qantas, Fiji Air, Air New Zealand, Samoa Airways ma o lea foi o le a faaopoopo mai iai ma le China Air.  Na ta’ua foi e Taimalelagi, e le o taumafai Amerika Samoa e faatautava atu ia Samoa, ona o le maketi ma’oti lava a le teritori, o Amerika.

Ae peitai, na fa’auau ona saunoa Taimalelagi, e ao ia Samoa ona faaopoopo atu ma Amerika Samoa i a latou taumafaiga e faatosina mai Turisi i lo latou atunuu, aua ua tasi ona tagata, tasi le aganu’u, e ui i le eseese o tofo i motu taitasi, e aofia ai tulaga faapolokiki.

Na fa’aalia e Taimalelagi lona agaga faafetai i le Minisita o le TSA faapea ma lana pule sili mo lenei valaaulia ma le avanoa e mafai ona o la’ua auai atu i lenei faigamalaga mo Ausetalia, e fa’alauiloa atu ai nisi foi  maimoaga ma tulaga e mafai ona fai e Turisi ma maimoa iai, i totonu o Amerika Samoa.

FILIFILIA E LE KOVANA SILI LE SU’ETUSI FOU A LE TERITORI

O le vaiaso ua tuanai, na faaooina atu ai e le afioga i le Kovana Sili ia Lemanu P. S, le suafa o Michael A. Edmonds, e avea ma Su’etusi Autu a le malo o Amerika Samoa.  

O le tausaga e 2012 na faamavae ai le Suetusi a le teritori, o Robert Dantini i le faaiuga o le nofoaiga a Kovana Togiola, lea ua fa’ato’a toe tofia lea o se tagata e avea ma Suetusi.

O le susuga ia Edmonds na avea ma CPA (Certified Performance Accoutant) i totonu o le teritori amata mai ia Me 2012 seia o’o mai ia Iuni 2013 ma na galue foi o ia o se Suetusi i Kalefonia.

 E tusa ai ma se ripoti mai i se tasi o taitai sinia a le malo o Amerika Samoa i le vaiaso ua tuanai, na amata faatalanoaina le susuga Edmonds mo le tofi o le Suetusi Autu a Amerika Samoa, i le amataga o le tausaga.