Pago Pago - AMERIKA SAMOA

PALOTA “LOCAL ABSENTEE”

O le aso Faraile na te’a nei na fa’ailoa mai ai e le Ofisa o Faiga Palota e fa’apea, o le a amata i le Aso Lulu, 9 o Aukuso 2023 le palota “local absentee” mo le Palota Faapitoa mo i latou ua ma’ea lesitala e palota, ae o le a malaga i fafo, ma e le i ai i totonu o Amerika Samoa ile aso o le palota fa’apitoa. 

Ma o le palota “local absentee” e faia i le Ofisa o Palota i Tafuna i le Aso Lulu, Aokuso 9, 2023 mai le aso 7:30am - 4:30pm.

I le tatalaina o le palota “local absentee”, o le a tatala le Ofisa Palota mai le Aso Gafua i le Aso Faraile, 7:30 i le taeao i le 4:30 i le afiafi ma le Aso Toonai, mai le 7:30 i le taeao - 12:00 i le aoauli.

E pei o faiga palota talu ai, e mana'omia e le tagata palota e faia le palota “local absentee” ona fa'aalia se fa'amaoniga - o le pepa malaga a le va'alele ma isi pepa - o le a alu ese le tagata i le motu i le taimi o le Faiga Palota Fa'apitoa.

So’o se fesili, telefoni i le Ofisa Palota i le 699-3570.

FA'AMAUTU I LATOU AGAVA'A SUI TAUVA, PALOTA FA'APITOA MAOTA O SUI ITUMALO #1 - MANU'A

Ua fa’amautu e le Pulesili Sili o Faigapalota ia Uiagalelei Lealofi, e to’afa tagata ua “agavaa e avea ma sui tauva” mo le Faiga Palota Fa’apitoa mo le Itumalo Numera 1- Manu’a i le aso 12 Setema, 2023.

Ma ua fa’atulaga mai e le Ofisa o Palota, le “local absentee” e palota ai i latou o le a toesea mai Amerik Samoa i le aso e faia ai le palota fa’apitoa mo le Itumalo Manu’a #1 - a le Maota o Sui. 

O le aso sa tu’uina atu ai talosaga palota mo Faiga Palota Fa’apitoa, mo le itumalo o le maota o sui e aofia ai Faleasao, Ta’u ma Fitiuta e le’i silia i le itula e 4:30 i le afiafi. i le aso 03 o Aukuso, 2023. E pei ona lipotia muamua e le Samoa News, e toalima tagata na latou  aoina le pepa talosaga mo le palota faapitoa.

I se fa’aalia fa’alauaitele i le aso Faraile ua te’a sa fa’alauiloa ai e Uiagalelei e faapea, e tusa ai o talosaga sa tuuina atu, ma isi pepa o faamaumauga i le Ofisa o Palota, ua ia faamautuina ai ni tagata se toafa e agavaa e avea ma sui tauva mo le Faiga Palota Faapitoa. 

Ma o sui faatutu: Faauifono Vaitautolu; Leifitele Aliitama Sotoa; Mailo Oge T. Nua ma Paepaetele Mapu Jamias, e pei ona saunoa le Ofisa Sili o Palota.

Na fa’ailoa e sui o le ofisa faiga-palota i le Samoa News i le vaiaso na te’a nei, e tolu aso o lu’itau mo i latou e fia lu’iina so’o se tasi o sui tauva. Ma afai e leai ni lu’itau, ona fa’amaonia lea e le Ofisa Sili o Faiga Palota ia sui tauva.

SAINIA MALILIEGA FA'AMALOSIA FAIGA FA'APA'AGA AMERIKA SAMOA MA LE HAWAII JOB CORPS

Ua fa’ailoa e le Ofisa o le Kovava, le sainia e le Kovana Sili is Lemanu P.S Mauga se maliliega (MOU) ma le Hawaii Job Corps o lo’o tu’uina atu ai a’oa’oga tau galuega ma polokalame fa’aa’oa’oga mo tupulaga talavou e maualalo tupe maua mai le 16 i le 24 tausaga.

I se pepa o fa’amatalaga sa fa’ailoa ai e le Ofisa o le Kovana e fa’apea, mo le tele o tausaga, sa faia e Hawaii Job Corps se sao taua i le tuʻuina atu o aʻoaʻoga lelei ma avanoa mo aʻoaʻoga mo tupulaga talavou o Amerika Samoa.

“Matou te fiafia e fa’amalosia la matou faiga-pa’aga o lo’o iai nei ma le Malo o Amerika Samoa,” o le fa’aaliga lea a Julie Dugan, o se sui sinia o le  Hawaii Job Corps. “O lenei Feagaiga o le a saunia ai le auala mo le tautuaina o le toatele o tupulaga i Amerika Samoa, e mafai ai ona latou maua faamanuiaga o le suiga o a tatou polokalame tau aoaoga ma aoaoga e maua fua,” o lana faaopoopo mai lea.

Saunoa Kovana Lemanu e fa’apea, o le MOU o lo’o fa’atusalia ai se matati’a taua i la tatou taumafaiga galulue fa’atasi e fa’amalosia tupulaga o Amerika Samoa e silasila ai i luma. Na taua e le kovana fuafuaga e fa’atula’i se ofisa i Amerika Samoa i se taimi lata mai. O le faʻamoemoe o le faʻafaigofieina o le faʻagasologa o le lesitalaina, faʻamautinoa e mafai e tagata ona maua faʻamanuiaga a le polokalame i le faigofie.

Hawaii Job Corps o loʻo faʻatautaia ni lotoa se lua i Waimanalo ma Maui, e ofoina atu le tele o avanoa eseese o aʻoaʻoga matata.

Mo i latou o lo'o sailia se galuega fou, fa'amae'aina o latou tipiloma i le a'oga maualuga, po'o le su'esu'eina o avanoa eseese, ua ofoina atu e le Hawaii Job Corps a'oa'oga fua e oso-amata ai lo latou lumana'i. 

Saunoa le kovana, “Matou te faafetai mo le lagolago taua ma avanoa ua ofoina mai e le Hawaii Job Corps i a tatou tupulaga matutua, ua mafai ai ona latou faʻataʻitaʻia se ala manuia o galuega."