Pago Pago - AMERIKA SAMOA

ILOILOINA MATAUPU TAU I FA’AALOALOGA MO SUI O LE FONO FAITULAFONO I TAIMI O MALIU

Na fa’aleoina e le afioga Senatoa Malaepule Saite Moliga i totonu o le Maota o Senate i le aso Tofi o le vaiaso ua mavae, le avea o fa’aaloaloga faa Samoa, e pei o le ta’i ina o sua mo sui o le Fono Faitulafono, i taimi o maliu, ma avega faaopoopoga mo aiga.

Na ta’ua e Malaepule i le maliu o le afioga Senatoa Tauiliili Lauifi Paopao Tauiliili lea sa faia i le aso Lua i le Fale Laumei i Utulei, sa tofutofusia uma sui o le Fono Faitulafono na auai ma teutusi sa teu mai ai i latou, e le aiga.

Na o’o lava i le afioga I le Kovana Sili ma le Lutena Kovana, e le i auai i le sauniga maliu, ae na maua foi a la’ua teutusi.

I sana tuualalo, na saunoa ai Malaepule, a maliu se tasi o le Maota o le Senate, e mafai ona auai tau lava o le Fofoga Fetalai ma le Peresetene o le Senate, ma afioga i Senatoa.  E faapena foi pe afai ae maliu se Faipule, ua lava lava na o le Peresetene o le Senate, e malaga faatasi ma le Fofoga Fetalai ma afioga i Faipule, e avea ma sui o le Fono.

Na saunoa Malaepule, e na te le o iloa lelei po o iai i totonu o Tulafono ma Aiaiga a le Senate lea tulaga, o le auai uma o sui o le Fono Faitulafono i maliu o se Faipule po o se Senatoa.  Ae sa ia toe faamanatu mai i totino o le Senate, e tatau ona o latou faamama avega i aiga faanoanoa aemaise ai le tausia o le mamalu o le Fono Faitulafono.

Na saunoa le peresetene o le Senate, le afioga Tuaolo Manaia Fruean, e tatau ia Malaepule ma Olo, ona o la’ua o To’oto’o Alii, ona fautuaina le Maota o Sui e tusa ai ma ia mataupu.

Sa faamanino foi e Tuaolo e faapea, e latou te auai ina ia fa’aali lo latou faaaloalo i le tu’umalo o sui o le Fono Faitulafono, ae o se faamaisega i faletua, fanau ma aiga atoa ai ma le aloaia o tautua a i latou nei.  Na saunoa Tuaolo, e le o i tatou o ni paolo.

Sa ta’ua foi e Tuaolo, o lafo ia sa faia e le to’oto’o a le Fono, i matai o le aiga a le afiioga Tauiliili, e le o ni ana tupe ia sa fa’aaoga e fai ai ia lafo, ae o tupe fa’aagaaga a le malo mo le maliu.  Na saunoa Tuaolo, sa tatau lava i le tootoo ona folafola le si’i a le Fono e aofia ai ie o le malo ma le $20,000 ona pau lea.

FA’AALOALOGIA E LE MAOTA O SUI IA LE MALIU O JEANETTE TAUSISI’I SHIMASAKI TUAUA

I le amataga o le vaiaso na se’i mavae atu nei, na faaulu ai e le Maota o Sui, sa latou pili tuufaatasi, ona o le maliu o le tina ia Jeanette Tausisi’i Shimasaki Tuaua.

O le afiafi o le Aso Gafua, Aukuso 21, 2023, na faamanavaina ai e le Atua galuega a le tina ia Jeanette.  Ma o ia o le uluai tamaitai na faauu mai i aoaoga faaleleo ma i le tele o tausaga, sa na o ia foi le tamaitai, na ona ausia tofiga maualuluga i totonu o le ofisa a leoleo, seia o’o ina ua filifilia ia Pou Tuaolo Supapo ma Taitai Leoleo i le 2021.

E tusa ai ma lenei pili taufa’aofi, o lo o ta’ua ai le avea o Jeanette ma Satini i totonu o le ofisa o leoleo i le 1980 ma toe si’itia ai lona tulaga, o se Lutena.  Sa filifilia o ia e faavaeina se polokalama mo sauaga i totonu o aiga.  I le 1999 sa filifilia ai o ia e avea ma sui pule i le falepuipui ma ina ua o’o i le taimi e avea ai o ia ma kapeteni, sa le i filifilia o ia.  Ma o lea na tapa ai Jeanette i le faamasinoga ma i le 2002 na faae’e ai loa ona tulaga faa Kapeteni i totonu o le ofisa o leoleo.  Ae peitai ane, i le lua masina na soso’o ai, na litaea ai Jeanette ona o ma’i o le tino.

O Jeanette na soifua mai i le afioaga o Faga’alu, o se alo e faasino I le Afioga Fano Frank Shimasaki ma Lydia Godinet.  Sa faaipoipo atu Jeanette ia Lene Tuaua ma e to’aiva se la fanau.  Ona o lana tautua matavela i totonu o le ofisa o leoleo, na mafua ai ona faauluina ma pasia lenei iugafono i totonu o le Maota o Sui, e aloaia ai lona soifua.

ISI MATAUPU A LE MAOTA O SUI

O nisi o mataupu sa faapea ona iloiloina i totonu o le Maota o Sui i le vaiaso ua tuanai, na aofia ai se talosaga mai i le afioga i le Faipule ia Fiu Johnny Saelua, mo ripoti mai i le Ofisa o Aoga e tusa ai ma tapenapenaga o fale aoga aua le toe amataina o aoga i lenei tausaga.

Na saunoa le Fiu, sa o latou talosagaina le Faatonusili o Aoga mo se ripoti i tulaga faaleleia faapea galuega o lo o faia i aoga, ae peitai, e le i maua mai se ripoti ina ua auai mai le Faatonusili o Aoga i se iloiloga a le Komiti o Aoaoga lea sa faia.

Sa le gata i le ripoti mai i le Ofisa o Aoga, ae sa tapaina foi e Fiu, lea o lo o avea ma Taitaifono o le Komiti o Aoga, ia se ripoti mai i le Ofisa o le Soifua Maloloina e tusa ai ma ni asiasiga ua faia i faleaoga.  Na saunoa Fiu, ua mafua ona tapaina nei ripoti ina ia mafai onao latou nofo malamalama i tulaga o iai faleaoga i itumalo taitasi, ae le gata i lea, o mea o lo o manaomia ona faaleleia, ae e le i toe amataina aoga.

Na faaopoopo mai i le saunoga a Fiu ia le afioga i le Fofoga Fetalai, lea na saunoa e faapea, e manaomia ona aumai sui o le Ofisa o le Soifua Maloloina e fesiligia pe aisea ua tu’u ai a latou asiasiga e faia latalata i taimi e a’e ai aoga o lenei tausaga aoga fou.

O seisi mataupu na faatulai e le afioga i le Faipule ia Manumaua Wayne Wilson, o le tulaga lea i pagota sosola mai i le toese i Tafuna.  Ma na faasoa atu e Manumaua i afioga Faipule le toatele o tagata o lona itumalo o lo o valaau atu ia te ia, ona o lo latou popole tele i lea tulaga.

Na saunoa Manumaua, afai ae fa’aauau ai pea ona mafai ona sosola so’o pagota mai i le falepuipui, o le a o’o ina tula’i mai se faafitauli matuia.  Sa pa’ia i le saunoga a Manumaua le o’o mai o faauluuluga o le falepuipui ae o a latou molimau, ua na ona faato’ato’a ai Faipule, ae o lea lava e sosola pagota.

O lea na u’unaia ai e Manumaua ia le Komiti o le puipuiga o le Saogalemu Lautele ina ia toe aumaia le pule o le falepuipui, ma sa lagolagoina e le sui Fofoga Fetalai, le afioga Fetu Fetui ia lea manatu.

Sa ta’ua foi e sui Faitulafono e faapea, e latou te le i faalogo pe faitau i se fa’aaliga mai i le sui Kovana, le afioga Talauega E. V. Ale e tusa ai ma se gaioiga a le Faigamalo e fofoina lea faafitauli, lea e aofia ai ma se fuafuaga mo le tofia o ni leoleo fou se to’a 40 e leoleoina le falepuipui.

I le mataupu e faatatau i le fa’asoasoaina o tupe fa’aalu a le ARPA (Amerixan Recovery Plan Act), na saunoa ai le afioga i le Faipule ia Larry Sanitoa e faapea, e tatau ona talosagaina le auai mai o le faauluulu o le ofisa a le ARPA, le susuga Keith Gebaur aua se faamalamalamaga o le fa’aaogaina o ia tupe, ae le i amataina iloiloga o le paketi mo le tausaga 2024, ma sa ia toe faamanatu atu foi i afioga Faipule, o le masina o Tesema o le tausaga fou, e faagata ai ona toe fa’aaogaina tupe faasoasoa a le ARPA.

E $479 miliona tupe maua a le malo o Amerika Samoa mai i tupe faasoasoa a le ARPA.