TALA I VAIFANUA
Pago Pago - AMERIKA SAMOA
MALIU FASIA LE TINA, PULE LE TAMA I LE OLA, UA TU’UA AI NA O FANAU ITI
O se fa’alavelave faamomoi loto ma le faafaigata ona talitonuina, ina ua salalau i luga o upega tafailagi le ata o se tina talavou na maliu fasia, a o pulapula atu mata ma fetagisi si ana fanau laiti. Sa lokaina mai le tama o le aiga, ina ua masalomia lona faaoolima i le tina na mafua ai ona maliu, ae peitai, o le taeao na soso’o ai, na maua atu ai lenei tama, ua maliu i totonu o le sela na loka ai i le to’ese i Tafuna.
I se faamatalaga a le susuga i le Taitai Leoleo ia Pouu’amea Tuaolo Supapo e faapea, o lo o faia suesuega a leoleo i le mafuaaga o le maliu o le na molia, ae o lo o iai se talitonuga, e foliga mai, na pule lava i lona ola.
O lenei tina ua maliu, o Dorothy Ropeti, e malaga mai i Samoa ae sa faamautu o ia ma lona toalua, o Andrew Ropeti, ma si a la fanau e toalima, i Mapusaga. E pei ona sa faamatala e se tasi o uo mafana a le tina ua maliu, o se tina sa alofa tele i si ana fanau ma lona toalua, ma o se tulaga talitonu gata lenei me aua tupu i si nei aiga.
FINAGALO LE KOVANA E SI’I AI TOTOGI A SUI FAITULAFONO ONA UA TAUGATA LE TAU O LE SOIFUAGA
Ua a’e nei se manatu i le afioga i le kovana sili, Lemanu P.S. Mauga, ina ia faatulafonoina se si’i, i totogi o sui faitulafono uma i totonu o le Maota Fono, ona o le siitia o le tau o le soifuaga talu mai le 1982 – le taimi mulimuli lea na si’i ai totogi a sui faitulafono.
E tusa ai ma tulafono a le malo o iai nei, o le totogi faaletausaga mo le Peresetene o le Senate faapea le Fofoga Fetalai, e $30,000; o totogi mo isi sui faitulafono e $25,000 i le tausaga, seia vagana ai le Faipule o le motu o Swains, e $20,000 i le tausaga.
Ae e tusa ai ma le pili tau faaulu a le kovana, afai e pasia, o le a faapea ona si’itia ai totogi o le Peresetene o le Senate ma le Fofoga Fetalai, i le $50,000 i le tausaga; ae $45,000 mo isi sui faitulafono, seia vagana ai le Faipule o Swains, e $40,000 i le tausaga.
O le amataga o le vaiaso ua tuanai sa faauluina ai e le kovana ia lenei pili taufaaofi ma e pei ona sa ia ta’ua i totonu o lenei pili, n agata mai lava ona faia se siitaga i totogi o sui faitulafono i le 1982. Ua talitonu le afioga Lemanu, talu ai le maualuga o le siitaga o le tau o le soifuaga faapea ai ma le tulata o le faamanatuina o le 75 tausaga talu ona faavaeina pe tatalaina ai tauaofiaga o le Fono Faitulafono a Amerika Samoa, ua alagatatau ai ona faia se siitaga fou mo afioga i sui faitulafono.
E le gata i a latou totogi; o lo o faapea foi ona maua e sui faitulafono o le Maota Fono ia ni alauni e $60,000 mo le Peresetene o le Senate ma le Fofoga Fetali ae $45,000 mo sui faitulafono. O le taimi mulimuli foin a si’itia ai nei alauni, o le masina o Oketopa 2021 lea sa aofia ai i totonu o se pili na faauluina e le Senate, lea na faia ai ma siitaga i totogi o le Kovana ma le Lutena Kovana.
O le taimi nei, e $120,000 le totogi a le Kovana ae $100,000 le totogi a le Kovana.
TAPA E LE MALO FINAGALO FA’AALIA E TUSA AI MA LE TAOFIA O PEMITA MO ATUNUU E 40 E AOFIA AI SAMOA
Ua iai nei se fuafuaga a le Ofisa o Femagalaiga, lea e aofia ai ma le Ofisa a le Loia Sili, ina ia faavaeina se polokalama e mafai ai e tagata mai Samoa ona malaga mai i Amerika Samoa mo le fitu (7) aso, e aunoa ma se pemita.
I se fa’aaliga sa faasalalauga i luga o le upega tafailagi a le Malo o Amerika Samoa (www.americansamoa.gov), i le vaiaso ua mavae, sa fa’alauiloa mai ai lenei fuafuaga fou a le Malo o Amerika Samoa i ana tulafono tau i femalagaiga (EPWP).
O lenei polokalama (EPWP) o se polokalama sa faatulagaina i le nofoaiga a Lolo i le 2017, faatasi ai ma nisi tulafono tau i femalagaiga, a o avea le afioga i le sui kovana, ia Talauega Eleasalo Ale, ma Loia Sili. Lea foi sa faatulaga ai ma se auala i luga lava o le upega tafailagi a le Malo, e mafai ai e tagatanu’u mai i atunu’u e 38 ona ulufale mai i totonu o Amerika Samoa e aunoa ma le tau faia o ni pemita.
Ae i lalo o tulafono fou o le EPWP, ua silia nei ma le 40 atunu’u o le a mafai ona mauaina lenei faamanuiaga, e aofia ai Ausetalia, Niu Sila, Micronesia, atu Malesala ma Palau. Seia vagana ai Fiti, e le o aofia i totonu o lenei lisi.
I lenei polokalama fou, o le a mafai ai e tagata o nei atunuu ona ulufale mai i totonu o Amerika Samoa e aunoa ma se pemita, e o’o lava i le 30 aso mo i latou o lo o na ona malaga e tafafao mai, ae afai o fuafuaga faapisinisi ma turisi, o le a i lalo ifo o le 30 aso faatagaina.
Ua ma’oti mai foi i tulafono o lenei polokalama fou, le le agavaa o i latou ua fuafua e faimalaga mai i Amerika Samoa e faatali ai va’a fagota po o isi ituaiga va’a faipisinisi.
O lo o mafai ona maua kopi o tulafono ma isi faamatalaga e uiga i lenei polokalama fou, i le ofisa o le Loia Sili, e mafai ona fesili mo Tuu Farani, po o luga o le website a le malo (ww.americansamoa.gov) ia po o le website a le Ofisa o Femalagaiga (www.legalaffairs.as.gov).
Mo i latou e fia fa’aali ni o latou manatu e tusa ai ma lenei polokalama fou, e mafai ona faaoo atu sau tusi i le Ofisa o le Loia Sili ae e le i aulia le aso 26 o Setema, 2023.