Pago Pago - AMERIKA SAMOA

TELE FAAMANUIAGA A LE ATUNUU UA MAUA MAI I POLOKALAMA O PEPA TAUMAFA A LE ASNAP

 Na fa’aalia e le faatonusili o le Matagaluega o Alagamanuia mo Tagata Lautele (DHSS), le susuga Muavaefaatasi John Suisala, i luma o afioga Faipule ma Senatoa o le Komiti o Tupe Faasoasoa i latou iloiloga aufaatasi i le Aso Faraile o le vaiaso ua tuanai, le siitia o aofaiga o pepa taumafa (food stamps) a tagata o le atunu’u o le a maua i lenei masina.

Na saunoa Muavaefaatasi, e lima vaega eseese o penefiti mo pepa taumafa mo i latou ua agava’a mo lenei faamanuiaga.

O le vaega muamua e $94; o le vaega lona lua, e $109; o le vaega lona tolu, e $127; o le vaega lona fa e $149 ma le vaega lona lima, e $177.  Ae na saunoa foi Muavaefaatasi, le aofia i totonu o le latou paketi mo le 2023 – lea e tapunia i le faaiuga o Setema – ia se tinoitupe e $10 miliona mai i le ARPA, ma ua o latou fa’aaogaina lea tupe e tu’u iai se faaopoopoga i tupe o pepa taumafa mo le atunu’u, ina ia tofu uma tagata ma pepa taumafa e $277 lo latou aofai.

Sa faapea foi ona ta’ua e Muavaefaatasi le amataina ia Setema 1 ona tufatufaina atu e le polokalama a le ASNAP ia ponesi e ta’ua o ‘penefiti mo faaiuga o tausaga’ mo i latou ua agavaa mo lenei polokalama.  Ma ua pasiaina mai e le malo feterale ia lo latou fa’aaogaina o tupe totoe mai i lea polokalama e toe faaopoopo ai seisi $496 i pepa taumafa mo le mamalu o le atunu’u.

SOLOGA LELEI LE POLOKALAMA O LE GAGANA SAMOA A LE IUNIVESITE A STANFORD

Ua fa’alauiloa mai e le tamaitai o Brandy Atuatasi ma le alii o Ari Patu, nisi o fanau aoga a le Iunivesite a Stanford i Kalefonia, le sologa lelei o le la polokalama mo le aoaoina atu o le gagana Samoa i fanau aoga i le Iunivesite a Palo Alto i Kalefonia.

Na la fa’alauiloa mai le faamanuiaina o a la taumafaiga ona o le fesoasoani malosi a le polokalama o Gagana a lea Iunivesite faapea ma le alii polofesa o Chris Young.  O le masina o Ianuari o le tausaga ne isa tatalaina aloaia ai vasega mo le aoaoina o le gagana Samoa i totonu o lea iunivesite.

I lalo o le taitaiga a le alii polofesa o Chris Young ma si ona tina o Tali’ilagi Young, na mafai ona mauaina ai se aofaiga e to’a 18 i le ulua’i vasega mo le aoaoina o le gagana Samoa, e aofia ai ni tagata Polenisia ma tagata ese.

I le tausaga muamua o lea polokalama, na mafai ona faamanuiaina ai nei vasega o le gagana Samoa i le auai o nisi lauiloa e pei o Troy Polamalu, Tennelle, Jane Schwalger-Wyatt ma le susuga Galumalemana Afeleti Hunkin faapea ma nisi, na fesoasoani i le aoaoina o tu ma aganu’u faa Samoa i le vasega.

O le vaiaso ua mavae na toa’i feiloai ai le afioga i le kovana sili ia Lemanu P. S. Mauga ma le tamaitai o Brandy ma sa ia faailoa atu i lenei alo o Samoa lona agaga mitamita ona o le galuega fita ma lona naunautaiga ina ia faasaoina le gagana ma le aganu’u faa Samoa.  Sa ia tauaooina atu foi ia Brenda ni meaalofa ma ia u’unaia le tamaitai ina ia maua sona avanoa e feiloai atu ai i le Komesina o le Gagana Samoa o Tia Seloti.

O Brenda na soifua mai i San Diego i Kalefonia.  O lona tua’a e mai i le afioaga o Fagasa ma Fagamalo i Amerika Samoa.  Ae o le alii o Ari Patu, o le alo o Saul ma Alana Patu ma na soifua mai o ia i Folsom, Kalefonia ma ua lauiloa foi o ia i le fa’agatama o le lakapi faa Amerika (football).