Pago Pago - AMERIKA SAMOA

FA’AALIA LE AGAGA FAAFETAI O LE AFIOAGA O FAGATOGO

Ua fa’aalia le agaga fa’afetai o le afioaga o Fagatogo i le tele o pisinisi, e pei o le ABC Fax, JN Mart, Summer Store, Fagatogo Mart, KT Mart ma le fale pamu kesi a le Morris Scanlan Service Station, ona o mea sa foaiina e fesoasoani i le latou galuega o lo o faia nei, mo le fa’amatagofieina o le nu’u.

E le gata i lea, na fa’aalia foi le agaga faafetai o le afioaga i e sa ofoina atu o latou taimi ma taleni aua le faatinoina o le galuega mo le fa’amatagofieina ma le fa’aaulelei atili o le afioaga.

I se tu’ualalo mai i le afioaga, ua talosagaina ai le mamalu lautele ina ia tu’u le faalapisi ae le gata i lea, o le amanaiaina o le sa a le nu’u.  

MANUMALO FA’AUIFONO VAITAUTOLU I LE NOFOA FAIPULE MO LE ITUMALO MANU’A #1

Ua mae’a nei ona pasia e le Faauluuluga o le Ofisa Palota, le susuga Uiagalelei Lealofi, ia le faaiuga o le palota faapitoa lea sa faia ia Setema 12, mo le itumalo palota a Manu’a #1.  Lea ua tulai mai ai le tamaitai o Fa’auifono Vaitautolu, ua manumalo i le tofi Faipule mo lenei itumalo, ina ua na maua numera faasilia o palota.

O le 4:30 i le aoauli o le aso 19 o Setema, po o le fitu o aso talu ona mae’a le palota, sa faagataina ai ona toe faauluina ni faatu’iese po o ni faasea e faatatau i le palota faapitoa, mo le Faipule o le itumalo #1 a Manu’a, lea e aofia ai Ta’u, Faleasao ma Fitiuta.

E tusa ai ma aiaiga o tulafono tau palota faalotoifale, e pei ona sa faalauiloa e Uiagalelei, ina ua pasi le aso faatulagaina e faagata ai ona toe faauluina ni faatuiese, ua ia pasia ma aloaia ai loa le faaiuga o le palota.  Ma ua tula’i mai ai, ua manumalo Vaitautolu ma palota e 203 (po o le 48.1% o palota), mai i palota e 422 lea sa faitauina.

Na soso’o ai ma Paepaetele Mapu Jamias ma ana palota e 128, o Mailo Oge T. Nua ma ana palota e 48 faapea ma Leifitele Aliitama Sotoa ma ana palota e 43.

O Vaitautolu, ua loa na avea ma sui faatonusili i le Ofisa o Aoga, seia o’o mai ia Ianuari 2021 – ma o le a ia sui tulaga nei i le afioga Alumamalu Ale Filoialii, lea na tuumalo ia Iuni, i totonu o le Maota o Sui.

E lua nofoa Faipule a le itumalo palota a Manu’a #1, lea o lo o nofoia e le afioga i le sui Fofoga Fetalai ia Fetui Fetu Jr.  Ae ua avea Vaitautolu ma tamaitai Faipule e toatasi i totonu o le Maota o Sui, i le nofoaiga a le Fono Faitulafono lona 38.  Afai ae finagalo o ia e fa’aauau lana nofoaiga i le nofoaiga a le Fono Faitulafono lona 39, o le a faapea foi ona toe tu’uina atu lona suafa e palotaina e le mamalu o lona itumalo.

E toatasi foi le tina o lo o aofia i totonu o le Maota o le Senate, o le afioga lea i le Senatoa Fonoti Tafa’ifa Aufata.

MU LE FALEAIGA A LE SUNRISE I TOGAFU’AFU’A, APIA

O le po o le aso Lulu na sei mavae atu nei, na galulue tino u ai alii tinei mu i le taulaga i Apia, Samoa, ina ia tineia se mu tele na faatama’ia ai le faleaiga a le Sunrise lea e tu i tafaala i Togafu’afu’a i Apia.

E tusa ai ma se ripoti a le Samoa Observer, na ta’ua ai e faapea, o lo o iai se talitonuga na amata mu le faleaiga i le 8 i le afiafi.  Ma o le lona lua ai lea o fale ua faatamaia i le afi, i le taulaga o Apia i le lua vaiaso.

I le vaiaso ua mavae, na faatamaia ai le fale a le Maria’s Pharmacy i se mu tele, ma i le faaiuga o suesuega, ua fa’ailoa mai ai le amataina o le afi ona o se uaea eletise.

Na ulua’i galulue vaega tinei mu i Apia ina ia mafai ona puipuia fale ma pisinisi sa tu lata i le faleaiga lea na mu, ina ne’i sosolo atu iai le afi.  I lalo o le taitaiga a le susuga i le Komesina Tinei Mu, le susuga Tanuvasa Petone Mauga, na galulue vaega tinei mu seia maea lelei ona tapeina le afi.

Sa faafaigata le galuega a le vaega tinei mu ona o le malosi o matagi i lea afiafi.  Sa galulue uma tagata fai pisinisi ma nisi o le mamalu o le atunuu e nonofo latalata i le mea na tupu ai le faalavelave, ina ia le faatamaia nisi fale e le afi.

E o’o mai ananafi, e le i faamautuina le mafuaaga o lenei faalavelave.  Ma e foliga main a tapunia le faleaiga i le taimi na amata ai le mu.

O lo o fa’aauau pea suesuega a le malo, e pei ona ripotia mai e le Observer.