Ads by Google Ads by Google

TALA I VAIFANUA


[ata: foa'i]

Pago Pago - AMERIKA SAMOA

PASIA PILI E SI’ITIA AI ALAUNI MO SUI FAITULAFONO

Na pasia i totonu o le Maota o le Senate,  i le Aso Tofi o le vaiaso ua mavae, e aunoa ma se faatu’i’ese, ia se pili teuteu, e si’i ai le aofaiga o le alauni a sui faitulafono, ina ua palota uma Senatoa e to’a 14 i le Ioe.   Ma afai ae pasiaina e maota e lua lenei pili, o le a suia ai loa Vaega 2.0104 o tulafono a Amerika Samoa.

E tusa ai ma le faaulutala o lenei pili teuteu, “o lo o aofia i totonu o le Maota Fono a Amerika Samoa ia le Senate ma le Maota o Sui, lea na uluai tauaofia ia Oketopa 9184, ma o le a faamanatuina i lenei tausaga lona 75 tausaga talu lona uluai tauaofiaga.

O lo o ta’ua ai foi le aofaiga o Senatoa ma Faipule o lo o tu’uto i le auaunaga o tagata o le atunu’u.  E to’a 18 Senatoa ma Faipule e to’a 20.  E le gata i lea, o lo o ta’ua ai le le’i toe iai o se suiga i le tulafono faavae a Amerika Samoa e 2.0202, faatulagaga o totogi faaletausaga mo sui faitulafono faapea le sui Faipule i Uasinitone, talu mai le 1982, e ui i le maualuga o le siitaga o le tau ole soifuaga.

Ua aofia foi i le pili ua pasia le tele o faafitauli o lo o feagai ma sui faitulafono, i le faatinoga o a latou tiute, ona o le fa’agasologa o galuega mo le toe faaleleia o le Maota Fono ma ua leai ai ni o latou ofisa e faataunu’uina ai a latou galuega.  O nisi ua fa’aaoga o latou maota ma laoa, o nisi o totonu o faleaiga, e faia ai a latou galuega.  Ma ua avea lea ma tulaga ua faaopoopo ai tupe alu i afioga Senatoa ma Faipule.

Ma o suiga ua pasia nei i le Vaega 2.0104 o le tulafono, ua si’itia ai alauni mo sui faitulafono, mai i le $45,000 i le tausaga, i le $65,000.  O nei tupe e mo le totogiina ma le faatauina o mea uma e manaomia e sui faitulafono, e faatino ai a latou galuega i totonu o a latou ofisa.

Ae mo le Peresetene o le Senate ma le Fofoga Fetalai, ua siitia mai a la alauni mai I le $60,000 i le tausaga, i le $80,000 i le tausaga.  O nei tupe maua, e i le faitalia a le sui faitulafono, pe aofia i totonu o a latou tupe maua, i taimi e faila a latou lafoga.

I totonu o le faaupuga o le uluai pili na faaulu mai e le Kovana Sili, na fautuaina ai le siitia o totogi a sui faitulafono.  Ae peitai, na suia e le Maota o le Senate lea pili, i le Aso Lulu o le vaiaso ua mavae, e si’itia ai na o tupe o alauni, ae le o totogi, a sui faitulafono.

O lenei pili e pei ona pasiaina, o le a faatupeina lea i tupe faaopoopo mai i le tausaga tupe o le 2023, e le i aofia i totonu o paketi.

Ua faaooina atu nei lenei pili teuteu, i le Maota o Sui mo sa latou iloiloga.

FILIFILIA SE FAIFEAU FOU A LE AOGA PAGO PAGO

O le Aso Faraile ua tuanai, i se palota sa feagai ai le Komiti a le Ekalesia a le ‘Assembly of God’ (AOG), na pasia ai le filifiliga o le susuga i le faafeagaiga ia Faraimo Pagaialii, e avea ma le Minisita fou a le AOG i Pago Pago. 

E to’a 6 faifeau laisene a lenei ekalesia sa o latou auai i se palota faalilolilo, lea na filifilia ai le susuga Pagaialii, e avea ma uluai faifeau a lenei ekalesia i totonu o Amerika Samoa.

O lo o ua sui tulaga ia Pagaialii i le susuga i le faafeagaiga ia Dave Mageo lea sa ritaea ona o gasegase o le tino.

Ua faamoemoe nei le faapaiaina o le taitai mamoe fou, i se taimi lata mai.

Sa faaleoina e le susuga i le faafeagaiga fou, ia Pastor Pagaialii lona agaga faafetai i le Atua mo le fa’aaogaina o ia, ae le gata i lea, sa ia faafetaia le mamalu o le ekalesia mo le filifiliga o ia e avea ma o latou taitai.  “Afai o le tali lea i a outou talosaga ma anapogi, o le Viiga e ave i le Alii.”