Ads by Google Ads by Google

TALA O VAIFANUA


[ata: SN]

Pago Pago - AMERIKA SAMOA

FA’AEAINA SE ALO O AMERIKA SAMOA I TOTONU O VAEGA’AU A LE MALO TELE

O se lupe faalele a Amerika Samoa, ua fa’aeaina nei i totonu o le Ami a Amerika, le susuga ia Agaalofa S. Tauane, mai i le afioaga o Alofau.  Na fa’au’uina mai Maj. Tauane, Agaalofa S. i le aoga maualuga a Fagaitua faapea le polokalame militeri i totonu o le Kolisi Tuufaatasi a Amerika Samoa (ASCC).

Na amataina mai le tautua a Maj. Tauane i totonu o vaega’au faaleoleo a Amerika, ae ina ua fa’au’uina mai i le polokalama a le ROTC i totonu o le Iunivesite a Hawaii, sa faapea loa ona avea o ia ma fitafita galue a le Ami.  

I le taimi nei, o lo o avea Maj. Tauane, ma faauluuluga o le ofisa tau saili (Recruit) a le Ami i Hawaii aua le saunia o fanau talavou o lo o fia ulufale atu i totonu o Ami a le Malo Tele.

O Maj. Tauane o se alo e faasino i le susuga Toeaso Tauane ma le faletua ia Ruta.  Ma o lo o faaipoipo atu o ia ia Toalua ma e toatolu le la fanau, o Vaolele, Agaalofa Jr. ma AneMae.

Sa soifua a’e Maj. Tauane i totonu o le ekalesia ‘Assembly of God’ lea sa mafai ona maua’a ai i lona loto le alofa ia Iesu Keriso ma ona tagata.

TOE TALIU MAI I FANUA LE SUSUGA I LE FAAFEAGAIGA O LE AMI A AMERIKA 

I le i’u manuia o lana auaunaga i totonu o le vaega’au a le Ami a le Malo Tele, ua toe taliu mai nei i laufanua ma aiga, le susuga i le faafeagaiga ia Chpalain Major Tupuola, Folauga Jr., e 61 tausaga le soifua mai i le afioaga o Iliili.

E 15 tausaga na tautua ai le susuga i le faafeagaiga i totonu o vaega’au a le Ami a le Malo Tele.  Ae ua lima masina talu ona ia litaea mai i ona tofiga fa’avaega’au.  

Ua toe taliu mai nei o ia ma si ona faletua o Leilani Tupuola, o nai o la alo e toatolu ma fanau a fanau e to’afa, faatasi ai ma alo a si ona uso lea ua fa’ilagi lana folauga.

I sana faatalanoaga ma le Samoa News, na fa’ailoa mai ai e Chaplain Maj. Tupuola sa faauuina mai o ia mai i le Seminare a Kanana Fou ae e le i faimalaga atu i Kalefonia mo le fa’aauauina o ana aoaoga fa’afaifeau.  Sa mafai ona ia ausia lona Masters ma ia toe taliu mai ai i Amerika Samoa ma faiaoga ai i Kanana Fou mo tausaga e lua ma le afa.

I le 2008 na ia ausia ai lana faailoga faafomai i mataupu faaleaagaga i Kalefonia ma avea ai o ia ma fa’afeagaiga i totonu o vaega’au a le Ami, lea sa avea i la’ua ma matua fa’aleagaga mo le toatele o fitafita.

Ua saunia nei le susuga i le faafeagaiga e tautuaina ona tagata ma lona atunu’u. 

MITAMITA MICAH MASEI I LE TAUAVEINA O LE TAGAVAI A AMERIKA SAMOA

Na fa’aalia e le alii o Micah Masei lona mitamita tele ina ua filifilia o ia e na te tauaveina le tagavai a Amerika Samoa i le solo tele a malo eseese, lea na tatala aloaia ai Taaloga o le Pasefika lona 17 i le afiafi o le aso Sa na se’i mavae atu nei, i Honiara, i le atu Solomona.

I se faatalanoaga a le alii o Masei ma le sui o le Samoa News, na ia fa’aalia ai le mitamita o lona agaga ona o lenei avanoa matagofie ua ia maua e avea ma sui o au ta’a’alo e ta’imua i le aumalaga mai Amerika Samoa.

O le alii o Masei sa faamanuiaina o ia i se pine auro i ta’aloga o le Olimipeka i le 2021, i Iapani.

O ia o se alo e fa’asino ia Bill ma Tobi Masei ma sa fanau mai o ia i Coos Bay, Oregon.  O ia e ogatotonu i sona uso matua, o Alika ma lona tuafafine laititi o Malia.

O lona tua’a na soifua mai i le afioaga o Faga’alu ae o lona tina o se sitiseni Amerika mai i Saina.