Ads by Google Ads by Google

TALA I VAIFANUA


[ata: foa'i]

Pago Pago - AMERIKA SAMOA

AUAI AMERIKA SAMOA I SE POLOKALAMA MO LE FAASAOINA O LAU’ELE’ELE MA FANUA

O le aso ananafi sa faataunuuina ai se polokalama ua fa’aigoaina o le Vala’au a le CNN ina ia faasaoina le siosiomaga ma o le lona tolu ai nei o tausaga o lenei polokalama taua.

E silia ma le 200,000 i latou, na aofia ai ma ni aoga e 235 sa mafai ona auai i lenei fuafuaga mo le faasaoina o le siosiomaga, e ala i gaioiga eseese, e mafai ona puipuia ai le paneta ma u’unaia ai se suiga lelei.

Sa mafai ona galulue faatasi, e le gata i le polokalama mo le faasaoina o le vaomatua a le aoga maualuga a Leone, ae na faapea le NOAA, ofisa a le DMWR, o le ofisa o Paka ma Malae Ta’alo, o le CRAG, o le Asosi o Faigafaiva a Pago Pago (PPGFA), ma se faalapotopotoga ua faaigoaina o le Fatoata, e tali i le vala’au i lenei tausaga, mo le faasaoina o le siomaga.

Na mafai ona faamamaina ia ogasami i Malaloa, e ala i tagata maulu a le DMWR, sa mafai ona aoina mai i luga le tele o lapisi mai totonu o le sami, e aofia ai ma pa’u ta’avale.  Sa iai ma nisi o fanau aoga, sa o latou la’uina nei lapisi.

O seisi gaioiga sa faataunuuina na aofia ai le tatu’uina o le la’au o le Lusina lea e lamatia ai nisi o la’au ma togavao o Amerika Samoa.  Ae na totoina e fanau aoga ia le la’au o le Futu.

Sa mafai foi ona agai atu le galuega i le aso Lua i Leone, i le faamamaina o le gataifale, o le tatu’uina o la’au le aoga ma le totoina o la’au e aoga mo le atunu’u.

TUMAU PEA AMERIKA SAMOA I LE 4 PINE MAI TA’ALOGA O LE PASEFIKA

I se faitauga o aofiaga o Pine a auta’a’alo o lo o tausinio i Taaloga o le Pasefika 2023, i le aso ananafi, o lo o fa’aalia le tumau pea o Amerika Samoa I Pine Siliva e 2 ma Pine Apamemea e 2.

Ae o lo o pine silia pea Niu Kaletonia ma a latou pine e 162.  Ua tulaga 2 nei Tahiti ma a latou pine e 131, tulaga 3 Ausetalia ma a latou pine 70, ae tulaga 4 ai Samoa ma a latou pine e 62.

Ua toe lava o Tokelau o lo o tau saili sa latou pine, e tusa ai ma ripoti mai i le aoauli ananafi, o nei ta’aloga.

O le faaiuga o le vaiaso nei ua fuafua e tapunia aloaia ai Taaloga o le Pasefika 2023.

FILIFILIA ULUAI FAIFEAU AMERIKA SAMOA E TAITAI FAAPOTOPOTOGA A EKALESIA

Ua filifilia nei le susuga i le Faifeau Toeaina ia Dr. Leatulagi Faalevao, mai i le Ekalesia Faapotopotoga a Kerisiano i Amerika Samoa (EFKAS), e taitaia le Koneferenisi o Ekalesia a le Pasefika (PCC) mo leisi fa tausaga o i luma, lea e amata atu i le tausaga fou, ae faamaeaina i le 2028.

E toaono totino o le EFKAS, na aofia ai ma le Taitaifono, o le Failautusi Aoao ma nisi, na mafai ona auai atu i le fonotaga a le PCC lea sa faataunuuina i Niu Kaletonia, ia Novema 16-23, 2023.

Na ta’ua e le susuga i le Faafeagaiga ia Nafatali Falealii, lea o lo o avea ma Failautusi Aoao a le EFKAS, le tu’ua e le susuga i le Faifeau Toeaina Faalevao ia le teritori i le po o le aso Gafua.

Na fa’aalia e Rev. Nafatali lona agaga fiafia, aemaise mo le ekalesia, ona o le filifiliga o se tasi mai Amerika Samoa e taitaia le Koneferenisi a Ekalesia o le Pasefika.

Na faamaonia e Rev. Nafatali le mauaina e le susuga i le Faifeau Toeaina ia Dr. Faalevao ia le tele o palota (62%) i le latou fonotele lona 12 lea sa faataunuuina, ma e ui i lenei tofiga fou, ae o le a faamautu pea le susuga i le Faifeau Toeaina i totonu o Amerika Samoa.

O le susuga i le Faifeau Toeaina ia Dr. Faalevao, na faauuina mai i le aoga faifeau i Malua, Samoa ae peitai na soifua mai i Faga’alu ma Toamua, Samoa.  Ma sa avea foi o ia ma faiaoga i le aoga fa’afaifeau a Kanana Fou mo le fa tausaga, ae ua pe a ma le 30 tausaga o la tausia ma si ona fletua ia Vagai Fa’alevao, ia le ekalesia i Amouli.

O le PCC e silia ma le 50 ekalesia o lo o aofia ai mai i motu o le Pasefika, e aofia ai Niu Sila, Ausetalia, le atu Kuki, Micronesia, Amerika Samoa, Samoa, Fiti, Tonga, Niu Kaletonia, Kiribati, Tuvalu, Niu, le Atu Malesala, French Polynesia, Nauru Papua Niu Kini, le atu Solomona, Vanuatu ma Papua i Sisifo.

O le susuga i le Faifeau Toeaina ia Dr. Faalevao, o le uluai Amerika Samoa ua filifilia mo lenei tofiga.