Ads by Google Ads by Google

TALA I VAIFANUA


[ata: foa'i]

Pago Pago - AMERIKA SAMOA

TAUNUU I FANUA LE AU FA’AFIAFIA A LE ‘COMMON KINGS’

O le aso a taeao lea ua fuafua e faia ai se koneseti a le au fa’afiafia o le ‘Common Kings’, e pei ona lagolagona e le Bluesky ma le Budlight lea o lo o tauaveina e le kamupani a le SOPAC.  O lenei koneseti o se vaega o le polokalama faaletausaga a le Bluesky mo le Kerisimasi, lea e aofia ai fa’aaliga ‘fireworks’.

Ua le gata i lenei aufa’afiafia o le ‘Common Kings’ ae o le a faapea foi ona fa’afiafia ai le alii DJ o Big Body Cisco ma o ia lea o le a avea ma fofoga o le po.

Na talu ona taunu’u le Common Kings I laufanua o Amerika Samoa, sa mafai ona asiasi atu I aoga maualuluga a le teritori, e pei o le aoga maualuga a Tafuna lea na faia ai sina koneseti pu’upu’u i le fale a le DYWA i Tafuna.  Na mafai ai ona aloaia ai le au siamupini a le ‘football’ a le aoga maualuga.

O lenei koneseti ua faamoemoe e faia i le Veterans Stadium i Iliili.

FAAMANATUINA LE 75 TAUSAGA A LE FONO FAITULAFONO A AMERIKA SAMOA

O le aso ananafi na faatumulia ai le Fale Laumei i Utulei i afioga I Sui Faitulafono o le Maota Fono ma o latou aiga, o taitai o le malo, o malo fa’aaloalogia na aofia ai ma le sui Palemia mai i le malo o Samoa, aua le faamanatuina o le 75 tausaga talu ona faavaeina le Fono Faitulafono i totonu o Amerika Samoa.

O le afioga i le Fofoga Fetalai, ia Savali Talavou Ale sa avea ma fofoga o le aso.  O tagavai o le malo o Amerika Samoa ma le Malo Tele, na taumolimoli mai e le vaega a le Ofisa a Leoleo.

O le susuga i le Faifeau Toeaina ia Faaeteete Saifoloi o le EFKAS i Amalua, faapea le susuga i le Faafeagaiga ia FAalili Otineru mai i le EFKAS i Fagali’i, atoa ai ma le aufaipese a le EFKAS Fagali isa gafa ma le sauniga lotu, e tatalaina aloaia ai lenei polokalama taua.

Na maua foi le avanoa e malo fa’aaloalogia ma afioga I Sui Faitulafono, e faafofoga ai i se tuleiga mai i le afioga i le Kovana, Lemanu P. S. Mauga, ae o le lauga faapitoa o le aso, o le susuga ia Iiga Fofo I. F. Sunia.

Sa maua foi le avanoa mo se saunoaga mai i le Peresetene o le Senate Tuaolo Manaia E. Fruean, aemaise le afioga i le sui Palemia mai i le malo o Samoa, ia Tuala Iosefo Ponifasio, faapea ai le sui Faipule i le Konekeresi ia Uifa’atali Amata Coleman Radewagen.

O fa’afiafiaga o le aso sa faia lea e nisi o fanau aoga mai i le aoga maualuga a Leone faapea le Autalavou EFKAS Talalelei o le Faaolaga.

TATU’U I LALO LA’AU I LUGA O LE MAUGAOALII MO LE PUIPUIGA O TAGATA

Na toatele nisi o le mamalu o le atunu’u ua tu’ufesiligia le mafuaaga o le faamamaeseina o la’au i luga o le mauga lea e agai atu i luga o le Maugaoalii, ma o le aso Lua na sei mavae atu nei, na maua mai ai se faamalamalamaga mai i le ofisa o le Kovana, e tusa ai ma lea mataupu.

E tusa ai ma se fa’aaliga fa’alauaitele mai i le Ofisa o le Kovana, ua fa’alauiloa mai ai le tele o le afaina o soifua o le mamalu o le atunu’u o lo o femalagai i luga o le alatele, ona o la’au ua tu lata i le alatele, aemaise lava i taimi o le malolosi o timuga ma matagi.  E le gata i lala o la’au e pau’u i luga o le auala, ae faapea foi o le solo mai i lalo ma punitia ai le alatele pe lavevea ai taavale.

Sa ta’ua foi i lea fa’aaliga, le iai o ni faalavelave na tutupu mai i taimi ua tuanai, lea na afaina ai nisi o ta’avale feoai i luga o le auala i la’au ma ma’a. Ma e fa’afetaia ona e le o maliu ai se tasi i nei faalavelave.  Ae o le mafuaaga lena ua a’e ai se manatu i le Faigamalo, ina ia faamama ese nei la’au ae le i tulai mai se faalavelave e ono maliu ai se tasi.

Sa galulue faatasi ia le aufaigaluega a le DPW ma isi ofisa o le malo e mataituina lenei mataupu i le Maugaoalii ma e ui ina o latou talitonuina le taua o le iai o la’au ina ia maua’a ma taofia ai le palapala mai i le solo ma i lalo, ae peitai, ua o latou talitonu foi, e sili ai le faamama ese o la’au ina ia taofia ai le toe solo mai i lalo o le palapala ma ma’a.

Na ta’ua foi i totonu o lenei fa’aaliga le iloloina auiliili o lenei mataupu, aua le sailiga o se fofo sili ona lelei.  Ma i le fa’amama ese ina foi o la’au mai i lea nofoaga, o le a mafai ona fa’afaigofie ai galuega i luga o le auala.