Ads by Google Ads by Google

TALA I VAIFANUA


[ata: foa'i]

Pago Pago - AMERIKA SAMOA

MAUALUGA I LE FAAMANATUINA O LE 75 TAUSAGA A LE FONO FAITULAFONO LE MANUIA O AMERIKA SAMOA I LE TAITAIGA A ONA LAVA TAGATA

Sa aofia potopoto taitai o Faigamalo ua tuanai ma taitai o le Faigamalo o iai nei a Amerika Samoa, i le faatasiga tele sa faataunuuina i le aso Tofi o le vaiaso ua mavae, Novema 30, 2023, i le Fale Laumei i Utulei, e faamanatuina le 75 o tumau pea Amerika Samoa i lalo o le taitaiga a ona lava tagata .

E silia ma le 500 malo fa’aaloalogia sa auai faatasi i lenei fiafia tele, lea na mafai foi ona auai mai ai ma le sui Palemia o Samoa, le afioga Tuala Iosefo Ponifasio.

I le saunoaga a le afioga i le Kovana, Lemanu P. S. Mauga, sa ia faapea mai ai, o taitai ua tuanai atu, o nisi na filifilia e le Atua mo lenei galuega lelei.  Sa ia fa’afetaia foi sui faitulafono o lo o galulue nei i totonu o le Maota Fono, aemaise le Peresetene o le Senate ma le Fofoga FEtalai mo la latou galuega fita, o la latou tautua matavela ma lo latou loto alofa.

Sa mafai ona maua e le Tootoo ia Fofo Sunia, o se tasi na avea ma Senatoa i totonu o le Maota o Sui faapea foi ma sui Faipule a Amerika Samoa i totonu o le Malo Tele, mo sana faamanuiaga aua le aso taua mo le Fono Faitulafono.

I le saunoaga a le Peresetene o le Senate, le afioga Tuaolo Manaia Fruean, sa ia lu’itauina ai Tina ma Tamaitai o Amerika Samoa ina ia tulai mai ma avea ma Taitai i totonu o le Malo.  Na saunoa Tuaolo, o lo o manaomia ni tina po o tamaitai i tofi taitai i totonu o le malo.  I le taimi nei, e toalua ni tina o lo o galulue i totonu o le Maota Fono, faapea ma le afioga Uifaatali Amata o lo o avea ma Sui Faipule i Uasigitone.

I tulaga o fa’aaloaloga faaSamoa sa faapea ona faameaalofa atu ai e le Malo o Samoa se ie tele aua le faamanatuga o le 75 tausaga a le Fono Faitulafono a Amerika Samoa.

Sa saunoa le afioga i le sui Palemia o Samoa, o lenei ie o le a ‘ie a Tumua ma Pule, sa i le Maota o Faipule i Tiafau.  Ae ua faameaalofaina mai e le Palemia o Samoa, ia Fiame Naomi Mataafa, o le Fofoga Fetalai o le Palemene, ia Papalii Li’o Taeu Masipa’u ma Faipule o le Palemene, i le faamanatuina o le 75 tausaga a le Fono Faitulafono a Amerika Samoa.  

Sa saunoa Tuala, o Samoa o se aiga.

FAATAUINA E LE ALASKA EA IA LE HAWAIIAN EA

Ua ripotia mai i le aso Sa na sei mavae atu nei, le faatauina e le kamupani vaalele a le Alaska Ea ia le kamupani vaalele a le Hawaiian Ea, i se maliliega e $1.9 piliona lona aofa’i.

Ae ua malilie kamupani e lua, o le a tumau pea le fa’aaogaina o igoa eseese mo femalagaiga.

O lo o aofia ai i lenei maliliega le totogia e le Hawaiian Ea o le aitalafu $900 miliona a le Hawaiian Ea.  

Ma o le a faamautu le ofisa autu mo ofisa vaalele e lua, i Seattle, ae pulea e le pule sili a le Alaska Ea, o Ben Minicucci.

TOE AOINA LOKA O FAITOTO’A A LE FORD ONA O TULAGA FAALETONU

Ua fa’alauiloa mai e le kamupani taavale a le Samoa Motors, Inc., lea o lo o okaina le ituaiga taavale o le Ford, le le o iai o ni a latou loka faitotoa o a’afia i se fa’aaliga lata mai a le kamupani ‘Ford’ i atunu’u i fafo, lea ua toe aoina uma a latou loka faitotoa ta’avale, ona o se tulafono faaletonu, lea e matala ai faitoto’a a’o alu le ta’avale.

E silia ma le 45,000 taavale o le ituaiga o le 2015 Ford Fiesta, 2016 Ford Fusion ma le 2016 Lincoln MKZ, lea o lo o faatauina I Amerika Samoa ma Hawaii, faapea ma le tele o isi setete o Amerika ma ona teritori, ua faapea ona toe aoina e le kamupani taavale a le Ford, talu ai lenei faafitauli.

Na ta’ua i le fa’aaliga mai i le Ford e faapea, o se vaega i totonu o le loka o faitotoa o nei taavale, e mafai ona malepe ma matala ai faitoto’a o ta’avale a’o alu le taavale.

Ia Oketopa 18, 2023 na nofo malamalama ai le pulega a le Ford, e 14 ni tagi ua fa’aulu e faasaga i faafitauli i a latou taavale, ae i le va o Oketopa 8, 2015 ma Aukuso 21, 2023, e 39 ni fa’asea na faaulu atu i le latou kamupani ona o lenei lava faafitauli e tasi.

Ae e leai se ripoti o se fa’alavelave ua faamanu’alia ai se tasi, ua o’o atu i le Ford.